Deuteronomi

23 KARE tei tatāia e tei kokotiia e o ki roto i te uipaanga o Iehova ra.

2 Kare te puti e o i te uipaanga o Iehova; e tae ua atu ki te ngauru o te uki ra, kare ra aia e o i te uipaanga o Iehova ra.

3 Kare te ngati Amona e te ngati Moabi e o i te uipaanga o Iehova; tae ua atu ïa ki te ngauru o te uki, kare rai ratou e o i te uipaanga o Iehova e tuatau ua atu:

4 No te mea kare ratou i aravei mai ia kotou ma te kai e te vai i te ara tiroa, ia kotou i aere mai mei Aiphiti maira; e no te mea kua tutaki ratou ia Balaama te tamaiti a Beora i Petora i Mesopotamia ei taumaa ia koe ra.

5 Kare ra to Atua ra ko Iehova i akarongo ia Balaama; kua akariro ra to Atua ra ko Iehova i taua taumaa ra ei meitaki noou, no te mea i aroa to Atua ra ko Iehova ia koe.

6 Auraka rava koe e kimi i te au no ratou e te meitaki no ratou, i toou katoa ra au rā e tuatau ua atu.

7 Auraka koe e akaviivii i te ngati Edoma; ko toou ïa taeake: auraka koe e akaviivii i to Aiphiti; no te mea e tuitarere oki koe i tona enua ra.

8 Ko ta ratou tamariki e anau ra, ka o ïa i te uipaanga o Iehova, kia tae ki te toru o te uki ra.

9 Kia aere te nuku ra e tamaki i to au enemi ra, e akaatea atu koe i te au mea kino katoa ra i reira.

10 Ko te tangata i viivii i roto ia kotou i te peu i tupu i roto iaia i te po ra, e aere aia ki vao mai i te puakapa i reira, auraka aia e oki mai ki roto i te puakapa ra:

11 Kia paî ra aia ki te vai i te aiai; e kia topa te rā, ei reira aia e tae mai ei ki roto i te puakapa ra.

12 E ngai tika oki toou ki vao mai i te puakapa ei aere anga noou ki vao:

13 E ei oe iti oki taau i roto i nga taoonga naau ra; e kia aere ua atu koe ki vao i toou ra tere, ka ko koe i te rua i taua oe ra, ka ariu ei ka tapoki atu ei i tei mei roto ia koe na:

14 Te aaere ua ra oki to Atua ra ko Iehova na rotopu i toou na puakapa ei akaora ia koe, ei tuku mai oki i to au enemi ki mua i to aroaro ra; kia tapu oki toou puakapa e tikaʼi: ko te akara aea aia i tetai mea viivii i roto ia koe ra, ko te ariu ke aea aia ia koe.

15 Auraka koe e akaoki i te tavini ki tona pu, tei oro mai i te rima o tona pu kia koe ra:

16 Ka noo aia ia koe ra, i tana ngai i anoano i te noo, ei roto katoa i tetai i toou ra au oire i tana uaorai i meitaki ra: auraka koe e takinga-kino iaia.

17 Auraka rava ei akaturi i roto i te au tamaine a Iseraela; auraka katoa oki ei sodoma i roto i te au tamaroa a Iseraela.

18 Auraka koe e apai mai i te tutaki a te akaturi, e te oko i te puakaoa, ki roto i te are o to Atua ra o Iehova ei tia; e mea viivii ravarai te reira na to Atua na Iehova.

19 Auraka koe e apai i te apinga ou ki to taeake ra; i te ou moni, i te ou kai, e te au mea katoa i apaiia ei ou:

20 Ki te tangata ke ra e tika ia koe kia apai i te apinga ou; kareka i to taeake ra, auraka koe e apai i te apinga ou kiaia: kia akameitaki mai to Atua ra ko Iehova ia ko ei te au mea katoa ta to rima e rave ra, i te enua taau e aere e rave ei nooanga.

21 Kia tia koe i te tia ki to Atua ra kia Iehova, auraka koe kia kore e rave i te reira; ka umuumu tika mai oki to Atua ra ko Iehova i te reira ia koe; e riro oki ei ara naau ra.

22 Kia kore ra koe e tia ra, kare te reira e riro ei ara naau.

23 Ta to vaa i tuatua ra, ko taau ïa e akono e e rave; i te tau tikai ki taau i tia ki to Atua ra kia Iehova, taua apinga apai ua ra ta to vaa i tuatua ra.

24 Kia tae koe ki roto i te kainga vine a to taeake ra, e kai ua atu koe i te vine e kia merengo koe ra; auraka rava ra koe e tuku ki roto i te kete naau ra.

25 Kia tae koe ki roto i te sitona tupu a to taeake ra, e uuti ua atu koe i te ua sitona i to rima; auraka ra koe e rae i te matipi i te sitona tupu a to taeake ra.