Au Uianga a te Aronga Tatau

Kia tau ki te au nuti tei ripotiia, i muri ake i te anau anga o tetai pepe, e akono ana etai au are maki i te enua e te tumu pito kia rauka mai tetai au mea mei roto i to ratou toto. Ka tau ainei kia manata atu tetai Kerititiano i teia?

I te maata anga o te au ngai, kare te reira e tupu ana, no reira kare te au Kerititiano e anoanoia kia manata. Me e tumu tau tetai no te irinaki e te raveia ra teia angaanga i roto i te are maki te ngai ka anau tetai Kerititiano, e mea tau kia akakite ngoie ua ki te taote e kia titiriia te enua e te tumu pito, kia kore e taangaangaia i tetai ua tu.

E manganui te au apinga rapakau tukeke tei rauka mei te au tumu apinga ora, me e manu ra me kore e tangata. Ei akaraanga, kua rauka mai tetai au omone no roto i te mimi o te au oroenua tei nui. I riro ana te toto oroenua ei tumu no te serum piritanga, e te gamma globulin no te tamaki maki kua roa i teianei te rauka anga mai mei te toto i roto i te au enua (muri ake i te anau anga) tangata. Kua akonoia e kua akatokaia te au enua e etai au are maki e kua koiia a muri akera e tetai pharmaceutical laboratory i reira e raveiaʼi te toto e rito tona au anipote kia rauka mai te gamma globulin.

I ou ua ake nei, kua manuia te aronga kimikimi i te taangaanga i te toto mei te enua anau anga no te rapakau i tetai tu rukimia, e kua karangaia ka tano teia tu toto no etai au tamanata anga immune-system me kore ei tupau i te au kiriti anga uo ivi. No reira, kua kiteaia e kua rave tetai au metua kia rauka mai te toto mei te enua anau anga, kua akatokaia, e kua vaooia penei ka puapinga te reira i roto i tetai rapakau anga i ta ratou tamariki a te au mataiti ka aereia mai.

Kare teia tu akapuapinga anga o te toto enua e akara anga e e mea marekaia e te au Kerititiano mou, tei aratakiia to ratou manakoanga na te ture apa kore a te Atua. Ki Tei Anga ra e mea tapu to tatou toto, te akatutuanga i te ora orongaia mai e te Atua. Te ngai ua i taangaangaiaʼi te toto tana i akamana koia oki i runga i te atarau, ei au atinga. (Levitiku 17:10-12; akaaite ia Roma 3:25; 5:8; Ephesia 1:7.) Me kare ra, te toto tei raveia mai mei tetai mea ora kia riringiia ki runga i te one, kia titiriia.​—Levitiku 17:13; Deuteronomi 12:15, 16.

Me opu te au Kerititiano i tetai manu me kore ra ka ta i tetai moa kainga me kore puaka, ka akatae ratou i te toto e ka titiri i te reira. Kare ratou e anoano tikaiia kia riringi i te reira ki runga i te one, te manako tikai koia kia titiri ratou i te toto i te mea e ka taangaanga i te reira i tetai ua atu tu.

Kua marama te au Kerititiano i te are maki e ka titiriia te au apinga ora tei raveia mei roto ia ratou, noatu e e au repo kopapa ia, e tissue maki, me kore e toto. Me ka inangaro ra tetai taote kia raveia tetai au akarakara anga na mua, mei te akara anga mimi, tetai akara anga maki o te tissue tuma, me kore te au akarakara anga toto. Inara i muri mai, ka titiriia te au apinga kia tau ki te ture enua. Kare te tangata maki o te are maki e anoano roaia kia rave i te au pati anga takake no teia no te mea e mea tau e te pakari i te pae o te rapakau anga kia titiriia teia au apinga ora. Me e tumu meitaki ta tetai tangata maki kia ekoko e ka aruia teia rave anga noa ua, ka tau aia kia taiku atu i te reira ki te taote tei kite, te akakiteanga i tana au tumu akonoanga e ka inangaro aia i teia au tu apinga katoatoa kia titiriia.

Inara, mei tei taikuia atu, taki tai ua ake taime e manata teia no tetai tangata maki ua nei no te mea i te au ngai e manganui teia tu rave anga e te taangaanga akaou anga i te enua anau anga me kore tetai atu au apinga ora kare ia e manakoia ana, e kare katoa e rave putuputuia ana.

Te atikara “E Rikarika Tatou i te Kino,” i roto i “Te Punanga Tiaki” o Tianuare 1, 1997, kua tuatua te reira no runga i te “pedophilia.” Eaa te aiteanga o teia angaanga?

Te akakite ra ta Webster’s Ninth New Collegiate Dictionary i te aiteanga o te “pedophilia” e ko “te ainga viivii tei inangaro tikaiia te tamariki ei apinga no te rave ainga.” Teia au tu angaanga kua akaapaia i roto ia Deuteronomi 23:17, 18. Kua akakite ki reira e kua patoi te Atua kia riro mai tetai ei vaine akaturi i te iero (“me kore, ‘ei catamite,’ e tamaiti tei akonoia no te au akakoro anga o te ainga viivii,” NW, tataanga i raro ake). Te patoi katoa ra teia au irava i tetai ua atu tangata kia apai ki roto i ‘te are o Iehova’ te oko “i te puakaaoa” (“e pederast; tei rave i te ainga toe, ma tetai tamaiti tikai,” NW, tataanga i raro ake). Te riro ra te au akapapaanga Tuatua Tapu e tei tataia ei akatumu i ta Te Punanga Tiaki e uriuri ra e e tama tei akariroia ei apinga no te ravenga ainga, kapiti mai te mirimirianga, a tetai aronga mamaata.