Deuteronomi

11 E TEIANEI, e inangaro koe i to Atua ia Iehova, e e akono i tana ikuikuanga, e tana au akonoanga, e tana au tuatua-tau, e tana au akauenga, i te au rā katoa ra.

2 Kua kite oki kotou i teianei rā, (kare oki ki ta kotou au tamariki taku e karanga atu nei, ko tei kore i kite ra, ko tei kore i akara ra,) i te ako a to kotou Atua ra a Iehova; i tona mana, tona rima marōrō, e tona rima i akatikaia ra,

3 E tana au akairo, e tana au angaanga, i raveia e ia i rotopu i Aiphiti i te ariki oki o Aiphiti ra ia Pharao, e tona enua katoa ra;

4 E tana i rave i te nuku o Aiphiti ra; ta ratou au oro-enua, e ta ratou au kariota; i te akanina anga aia i te reira i te Tai Muramura ra, ka aruaru mai ei ratou ia kotou; e te pou takiri anga ratou ia Iehova ra, e tae rava akenei ki teianei rā;

5 E tana oki i rave ia kotou i te medebara ra, e tae rava mai nei kotou i ko nei;

6 E tana oki i rave ia Datana raua ko Abirama, nga tamariki a Eliaba te tamaiti a Reubena ra; i te enua nei i te amama anga i tona vaa, e te apuku anga ia ratou, e to ratou au kopu-tangata, e to ratou au puakapa, e te au apinga ravarai no ratou ra, i rotopu ia Iseraela katoa ra:

7 E tenana, kua kite pu to kotou na au mata i taua angaanga maata katoa a Iehova tana i rave ra.

8 E akono oki kotou i te au akauenga ravarai taku e akaue atu kia kotou na i teianei rā, kia maroiroi kotou, e kia tae kotou, e kia rauka te enua, ta kotou e aere e rave nei ei nooanga;

9 E kia roa to kotou au rā ki runga i te enua, ta Iehova i taputou atu ki to kotou na ai metua e e oronga aia no ratou, e no to ratou ra uanga, e enua taʼe a vai ua te u e te meli.

10 Ko te enua nei ta kotou e aere e rave no kotou nei, kare mei te enua ra mei Aiphiti, mei reira mai kotou ra, i ta kotou i ruru i te ua naau, e na to kotou vaevae i tavai, mei te kainga tanu anga rakau rikiriki ra:

11 Ko te enua ra ta kotou e aere e rave no kotou nei, e enua maunga ïa, e te o, e inu ua i te vai ua no te rangi mai;

12 E enua i akonoia mai e to Atua ra e Iehova; tei reira uaorai te mata o to Atua ra o Iehova tei rungao i taua enua ra, mei te momua anga o te mataiti, e tae ua atu ki te openga o te mataiti ra.

13 Kia akarongo tikai kotou i te au akauenga taku e akaue atu ia kotou i teianei rā, kia inangaro kotou i to kotou Atua ia Iehova, e kia akamori kotou iaia, ma to kotou ngakau katoa, e ma to kotou vaerua katoa ra,

14 Ei reira au e oronga atu ei i te ua i to kotou na enua i tona tuatau tikai, i te ua muatangana, e te ua openga; kia akaputuputu mai koe i taau sitona ki roto, e taau vine, e taau inu.

15 E oronga atu oki au i te ngangaere ki rungao i toou enua na taau au puaka, kia kaikai koe e kia merengo.

16 Kia matakite ia kotou uaorai, kia kore to kotou ngakau e vare, kia kore kotou e tatipake i te araara anga i te au atua ke ra, e te akamori anga atu ia ratou ra;

17 E kua tupu te riri o Iehova ia kotou, e momani iora aia i te rangi e kare rava atura e ua, e kare akera oki e tupu te kai o te enua ra, mate vave iora kotou i rungao i taua enua meitaki ta Iehova e oronga mai no kotou ra.

18 E teianei e vaio kotou i taua au tuatua naku nei ki roto i to kotou ngakau, e ki roto i to kotou vaerua, e tākai oki i te reira ki rungao i to kotou rima ei akairo, e kia riro oki mei te tarae ki mua tikai i to kotou na mata.

19 E apii oki kotou i te reira ki ta kotou au tamariki, i te karangaranga anga i te reira kia noo ua koe i roto i to are, e kia aere ua koe na te arataa, e kia akāvai koe, e kia tu oki koe ki runga.

20 E tata oki koe i te reira ki rungao i te au kopa ngutupa are noou ra, e ki rungao i to au ngutupa oire:

21 Kia akamaataia to kotou au rā, e te au rā katoa o ta kotou au tamariki, ki runga i te enua ta Iehova i taputou atu ki to kotou ai metua ra e oronga no ratou ra; mei te au rā o te rangi ki runga i te enua nei.

22 Kia akono tikai oki kotou i teia katoa nei au akauenga taku e akaue atu ia kotou nei, ma te rave i te reira; kia inangaro kotou i to kotou Atua ra ia Iehova, ma te aere i tona katoa ra au arataa, e te topiri tika anga kiaia ra;

23 Ka eke teianei au iti-tangata katoa ia iehova ki mua atu ia kotou na i reira; e e au enua tangata maata roa, e te ririnui to ratou i to kotou ra, te ka eke ïa ia kotou.

24 Ko te au ngai katoa i takaiia e to kotou au vaevae ra, no kotou ïa; mei te medebara mai, e tae ua atu ki Lebanona, mei te vai maira ko te vai Eupharati, e tae ua atu ki te tai i te opunga o te rā ra, ko ta kotou ïa kotinga.

25 Kare rava e tangata e mou ki mua ia kotou na: na to kotou Atua oki na Iehova e tuku i te mataku ia kotou, e te ngarangara ia kotou, ki runga i te enua katoa ta kotou e takai ra, tana i tuatua mai kia kotou na.

26 I na, te tuku nei au i te meitaki e te kino ki mua ia kotou i teianei rā:

27 Kia akarongo kotou i te au akauenga a to kotou Atua ra a Iehova taku e akaue atu kia kotou i teianei rā, ko te meitaki ïa;

28 E kia kore kotou e akarongo i te au akauenga a to kotou Atua ra a Iehova, kia tatipake ra kotou i te arataa taku i akaue atu ia kotou i teianei rā, kia aru atu i te au atua ke, kare i kitea e kotou ra, ko te kino ïa.

29 E kia kavea koe e to Atua ra e Iehova ki runga i te enua taau e aere nei e rave noou ra, ka tuku moe i te meitaki ki runga i te maunga ra ko Gerizima, e te kino ra, ei runga ïa i te maunga ra ko Ebala.

30 Kare aina tei tera pae Ioridana i te pae i te opunga o te rā ra, i te enua o te ngati Kanaana, e noo i te Araba i aite ki Gilagala ra, i vaitata i te au rakau i More ra?

31 Ka aere oki kotou ki tetai pae Ioridana, kia rauka te enua ta to kotou Atua ra ta Iehova e oronga mai no kotou; e ka riro ia kotou taua enua ra, e noo oki kotou i reira.

32 E mako tikai ra kotou i te au akonoanga, e e rave i te au tuatua-tau katoa taku e tuku atu ki mua i to kotou aroaro i teianei rā.