Iobu

20 KUA karanga aturā Zophara i Naama, na ko atura,

2 No toku manako ka karanga atu ei au, e no toku rapurapu i roto iaku nei.

3 Kua rongo au i te ako akakino iaku, e no te ngakau kite noku ra ka tuatuaʼi au.

4 Kare ainei koe i kite i teia mei taito mai, ka akanooiaʼi te tangata ki runga i te enua nei.

5 E e poto rai te autu anga o te aronga kino, e to te pikikaa ra rekareka mei te kamo anga mata nei ïa?

6 Tae ua atu tona nengonengo ki runga i te rangi, e te tumurangi kia taea ravaia e tona mimiti;

7 E mate rava aia mei te apinga viivii ra e tuatau ua atu: na te aronga i kite iaia e tuatua e, Teiea aia nei?

8 E peke ke atu aia mei te moe, e kare e kitea kia kimi: e ngaro rava atura aia mei te orama i te po ra.

9 Te mata i akara iaia, kare e akara akaou atu; kare oki tona ngai e kite akou atu iaia.

10 E taparu aere tana au tamariki i te ao, e na tona uaorai rima e akaoki i ta ratou au apinga.

11 Kua ki tona au ivi i te ara o tona ou anga, ka takoto rai ma ia katoa ki raro i te one-pueu.

12 Vene ua rai te tuatua kino i tona vaa, e kua uuna aia i te reira i raro ake i tona arero;

13 Akaperepere oti aia i te reira, e kare i akaruke; kua vaoo marie ra i roto i tona vaa:

14 Kua akatu keia te kai i roto i tona kopu, e kua riro ei au asepi i roto iaia.

15 Ko te apinga i apukuia e ia, ka ope ïa i te ruaki ki vao: na te Atua ïa e akaruaki i te reira mei roto i tona kopu.

16 Ko te kavangu asepi tana e ngote: e mate aia i te arero o te vipera.

17 Kare aia e kite i te au matavai, te au kauvai, e te taʼe a vai ua anga o te meli, e te bata.

18 Ka akaoki aia i tana i rauka i te angaanga, e kare aia e kai: e aite tana e akaoki ra ki tana apinga i te maata, e kare ona e rekareka anga.

19 No te mea kua takinga-kino aia, kua akaruke i te ao; kua rave ua aia i te are kare i akatuia e ia;

20 Kare rava oki aia e kite i te ki anga o tona kopu, e tana kai inangaro kare e akatoeia.

21 No tana kai kare e toe; i kore ei tana apinga e kimiiaʼi.

22 I te vai maata anga o tana apinga nui, e pini tona i reira: e rokoia aia e te au rima akapekapeka ravarai.

23 Te akaki ra aia i tona kopu, te uri maira te Atua i te otooto anga o tona riri ki runga iaia, e te kai ra aia, te akatopa ua maira i taua riri ra ki runga iaia.

24 Ka oro aia i te mouranga auri, e ka puta mama aia i te ana veo.

25 Kua kiritiia te reira, e kua riro mai mei roto i te kopapa; e te koke kanapanapa no roto i tona au; kua rokoia aia e te rikarika.

26 Kua uunaia nga mea poiri ravarai ei apinga nana: e pou aia i te ai pupui koreia; e tei vaooia i roto i tona ra puakapa, ka kino ïa.

27 Na te rangi e akakite i tona kino; e ka tu mai te enua e patoi iaia.

28 E riro ke ïa te apinga o tona are, e e kore ua ïa i te rā e riri ei te Atua ra.

29 Ko te tuanga ïa o te tangata kino i te Atua ra, e te kelero i akonoia e te Atua nana.