Levitiku

20 KUA tuatua mairā Iehova kia Mose, na ko maira,

2 E tuatua rai koe ki te tamariki a Iseraela, Ko te tangata e apai i tana i anau ra no Moloka, to te tamariki a Iseraela, e to te aronga tangata ke ke i tuitarere i roto ia Iseraela ra; ka mate roa ïa aia: na te tangata o te enua na e peî ki te toka. 3 Ka anaana tikai toku mata ki te reira tangata, e tipu ke atu au iaia i tona iti-tangata ra; no te mea kua akaviivii aia i toku ngai-tapu, e kua akanoa i toku ingoa tapu nei, koia i apai i tana i anau ra no Moloka.

4 E kia kore te tangata o te enua e akara i taua tangata ra, kia apai aia i tana i anau ra no Moloka, e kare e ta iaia:

5 Ka anaana tikai toku mata ki taua tangata ra i reira, e tona katoa ra kopu-tangata, e ka tipu ke atu au iaia, e te aronga katoa e aru akaturi aere iaia ra, e to ratou katoa e aru akaturi aere ia Moloka ra, i to ratou ra iti-tangata.

6 E te tangata e ariu tika ki te au vaerua kino ra, e te au purepure, i te aru akaturi aere anga atu ia ratou, ka anaana tikai toku mata ki te reira tangata, e ka tipu ke atu au iaia i tona iti-tangata ra.

7 E tenana, e akatapu ia kotou, kia tapu: ko au oki to kotou Atua ra ko Iehova.

8 E akono oki kotou i taku ra au akonoanga, e rave ïa kotou i te reira: ko au ko Iehova, ko tei akatapu ia kotou na.

9 Ko te akakino i tona metua tane, e tona metua vaine, ka mate roa ïa aia; kua akakino aia i tona metua tane, e tona metua vaine; ei runga iaia uaorai tona toto. 10 Ko te moe i ta tetai ke ra vaine, koia oki te moe ki te vaine a tona tangata tupu, ko tei moe e ko tei moeia ka mamate katoa ïa.

11 E te tangata e moe i te vaine a tona metua, i ta tona metua e moe ra, e mamate katoa ïa raua ravarai; ei runga ia raua uaorai to raua toto.

12 E kia moe te tangata i tana uaorai unonga, ka mamate katoa ïa raua ravarai: kua rave raua i te mea viivii: ei runga ia raua uaorai to raua toto.

13 E kia moe te tangata i te tane, mei te moe i te vaine, kua rave katoa raua i te mea viivii: ka mamate ïa raua ravarai; ei runga ia raua uaorai to raua toto.

14 E kia rave te tangata i te vaine e tona metua vaine katoa, e ara maata ïa: ka taʼuia ïa ratou ki te ai, taua tane ra e raua katoa; kia kore taua kino i roto ia kotou na.

15 E kia moe te tangata i te puaka ra, ka mate roa ïa aia; ka ta oki kotou i taua puaka ra.

16 E kia oronga te vaine iaia uaorai ki te puaka ra, e ta koe i taua vaine ra, e te puaka katoa ra; ka mamate takiri ïa raua; ei runga ia raua uaorai to raua toto.

17 E kia rave te tangata i tona uaorai tuaine, i te tamaine a tona uaorai metua tane, e te tamaine a tona uaorai metua vaine, kia moe tikai aia iaia; e mea kino maata ïa: ka tipu keia ïa raua ki mua i te mata o to raua uaorai tangata ra: kua rave aia i tona uaorai tuaine; ei runga iaia uaorai tana ara.

18 E kia moe te tangata i te vaine i tona akataka angaia ra, e kua akatika katoa taua vaine ra; e tipu keia ïa raua ravarai i to raua ititangata ra.

19 Auraka koe e moe i te teina o to metua vaine, e te tuaine o to metua tane; kua moe oki i te vaine taeake roa: ei runga ïa ia raua uaorai ta raua ara. 20 E kia moe te tangata i te vaine a te taeake o tona metua tane ra, ta te taeake o tona metua tane e moe ra, ei runga ia raua ta raua ara: ka mate raua ma te tamariki kore.

21 E kia moe oki te tangata i te vaine a tona taeake, ta tona taeake e moe ra, e mea viivii ïa: e kare ta raua e tamarikiia.

22 E akono kotou i taku au akonoanga ravarai ra, e taku katoa ra au tuatua-tau, e rave ïa kotou: kia kore te enua, taku e arataki ia kotou kia noo nei, e akaruaki ia kotou ki vao.

23 Auraka kotou e akono i te au akonoanga a te au tangata, taku e vaitata i te tuaru ke ki mua ia kotou na; kua rave oki ratou i taua au mea katoa nei, i akaviivii ei au ia ratou. 24 Teia ra taku tuatua kia kotou, Ka noo ïa kotou i to ratou enua, e e oronga ïa au i te reira no kotou ei nooanga, e enua taʼe a vai ua te u, e te meli: ko au to kotou Atua ra ko Iehova, ko tei akataka ia kotou i te au iti-tangata ra. 25 E teianei, e akataka ia kotou i te puaka viivii kore e te viivii, e te manu viivii e te viivii kore: e auraka kotou e akaviivii ia kotou uaorai i te puaka, e te manu, e te au mea katoa e totoro aere na runga i te one nei, taku i akataka ke atu ia kotou, no te mea kua viivii.

26 Ei aronga tapu kotou noku: no te mea te tapu nei au ko Iehova, e kua akataka au ia kotou i te au iti-tangata ei tangata noku.

27 E teianei, ko te tane vaerua kino, e te vaine vaerua kino, e te purepure, ka mate takiri ïa: ka peîia te reira ki te toka: ei runga ia ratou uaorai to ratou toto