2 Paraleipomeno
21 MOE iorā Iehosaphata ki o tona ai metua, e tanumia iora ki o tona ai metua i roto i te oire o Davida, tupauia akera aia i te au e te tamaiti nana ra e Iehorama.
2 E aronga teina oki tona, i te au tamariki a Iehosaphata, ko Azaria, e ko Iehiela, e ko Zekaria, e ko Azaria, e ko Mikaela, e ko Sephatia: e aronga tamariki anake ïa na te ariki o Iseraela na Iehosaphata.
3 E apinga maata ta to ratou metua i oronga mai no ratou, i te ario, e te auro, e te apinga memeitaki, e te au oire i akaketaketaia i Iuda ra: kua oronga ra aia i te basileia kia Iehorama; no te mea te tama mua iaia.
4 E kia rauka ia Iehorama te basileia o tona metua, kua akamaroiroi aia iaia uaorai, e kua ta atura i tona au teina katoa ki te koke, e tetai aronga mataiapo katoa i Iseraela ra.
5 Tei te toru ngauru ma rua o to Iehorama mataiti i ariki ei aia; e varu akera ona mataiti i te ariki anga i Ierusalema.
6 Aere atura aia na te arataa o te ui ariki o Iseraela, mei to te ngutuare o Ahaba: te tamaine oki a Ahaba tana vaine: i rave ua ra aia i te kino i mua i te aroaro o Iehova.
7 Kare rai a Iehova i akapou i te ngutuare o Davida, no te koreromotu i papauia e ia kia Davida, e no te mea kua tuatua mai aia e oronga mai aia i tetai mori nana, e na tana au tamariki katoa e tuatau ua atu.
8 Tei tona au rā to Edoma kaitamaki anga i te rima o Iuda, e kua akaariki i tetai ariki no ratou uaorai.
9 Kua aere iorā Iehorama e te ui mataiapo nana, e te au kariota katoa ki ona ra; e kua tu iora aia i te po e kua ta atura i to Edoma i akapini mai iaia, e te au rangatira o te au kariota.
10 Kaitamaki rai Edoma i te rima o Iuda e tae rava akenei ki teianei rā, Kua kaitamaki katoa maira oki Libena i te rima nona i te reira tuatau; no te mea kua akaruke aia i te Atua o tona rai ai metua ia Iehova.
11 Kua akatu iora oki aia i te ngai teitei i te au maunga ra i Iuda ra, e nana i akariro i to Ierusalema ei akaturi, e kua akaapo katoa oki ia Iuda.
12 Kua tae maira tetai leta kiaia na Elia peroveta, na ko maira, Te na ko maira te Atua o to tupuna ra o Davida ko Iehova, No te mea kare akenei koe i aere na te arataa o to metua o Iehosaphata, e te arataa o te ariki o Iuda o Asa,
13 Kua aere ra koe na te arataa o te au ariki o Iseraela, e kua akariro oki ia Iuda e to Ierusalema katoa kia akaturi, mei te au akaturianga o te ngutuare o Ahaba, e kua ta oki i to ai teina o te ngutuare o to metua ra, tei meitaki ake ia koe ra:
14 I na, e mate maata ta Iehova e tuku ki runga i to au tangata nei, e to au tamariki, e to au vaine, e to au apinga ravarai:
15 E ka rokoia koe e te maki maata rava, ka makiia to kopu; e manganui akera te rā ka topaʼi to ngakau ki vao i te maata o taua maki ra.
16 Kua akaaraara akerā Iehova i te ngakau o te Philiseti e tamaki ia Iehorama, e to Arabia katoa oki i vaitata i to Kusa;
17 E kua aere maira ratou ki Iuda, e kua akangaangaa aere, e kua apai ke akera i te au mea ravarai o te are o te ariki ra, e te au tamariki nana, e te au vaine katoa; kare akerai e tamaiti toe nana, mari ra te tamaiti openga ra ko Iehoahaza.
18 E i muri ake i te reira au mea katoa, taia maira aia e Iehova i te maki ora kore ki roto i tona kopu.
19 E roa akera, e ope akera nga mataiti e rua, kua topa iora tona ngakau ki vao, i taua maki nona ra; mate iora aia i te maata o te maki ra. Kare tona au tangata i tutungi i te ai iaia, mei te tutungi anga i te au metua nona ra.
20 Kua tae aia ki te toru ngauru ma rua o ona mataiti i ariki ei aia, e varu akera oki ona mataiti i te ariki anga i Ierusalema. I aere oki aia ma te anoano koreia, kua tanu ra ratou iaia i roto i te oire o Davida, kare ra i tukuia ki roto i te menema o te ui ariki ra.