Angaanga

9 KAREKĀ Saula, te maata ua ra ïa tana tuatua akamataku e te ta i te au pipi a te Atu ra, e aere atura aia ki te taunga maata ra,

2 Kua pati atura iaia i te leta e kave ki te au sunago i Damaseko, e kia kitea atu e ia te aronga i mou i taua tuatua ra, kia arataki mai aia ia ratou ma te tapeka auri katoa ki Ierusalema, te tane e te vaine katoa oki.

3 E aere atura aia i tona tere, e vaitata atura aia ki Damaseko ra; kua pini rava akera aia i reira i te mārama no te rangi i te kakā anga mai;

4 Topa iora aia ki raro i te one, e akarongo atura aia i tetai reo i te tuatua anga mai kiaia, E Saula, e Saula, eaa koe i takinga-kino mai ei iaku?

5 Kua karanga atura aia, E te Atu, koai koe? Kua tuatua maira te Atu, Ko au ko Iesu taau i takinga-kino mai nei; e mea ravengata naau kia takatakai i te ko.

6 Kua karanga atura aia ma te rutetetete e te tumatetenga, E te Atu, akapeea au, eaa toou anoano? Kua tuatua maira te Atu kiaia, Ka tu ki runga, e aere koe ki roto i te oire, ei reira koe e akakiteia mai ei i taau ravenga.

7 E te au tangata i aere ma ia katoa, tu ua iora ïa ma te muteki, kua kite katoa oki i te reo ra, kare ra e tangata i kitea.

8 Kua tu akerā Saula ki runga mei raro mai i te one; te puera ua ra tona mata, kare rava ra aia i kite i te tangata: i aratakiia atura aia e ratou ki te rima, e tae atura aia ki Damaseko.

9 E po toru akera aia ma te kite kore; e kare rai oki i kaikai e te inu oki.

10 Tei Damaseko tetai pipi ko Anania te ingoa, kua tuatua maira te Atu i te orama kiaia, E Anania. Kua karanga atura aia, E te Atu, teia au.

11 Kua tuatua maira te Atu kiaia, Ka tu, ka aere ki te arataa i tuatuaia ra, ko Tika ua, e te ngutuare rava o Iuda ra ka ui atu ei i tetai tangata no Tareso, ko Saula te ingoa: i na oki, te pure ra aia,

12 E kua kite akenei oki aia i te orama i tetai tangata, ko Anania te ingoa, i te tomo anga atu ki roto, e te tuku anga i te rima ki rungao iaia, kia kite akaou aia.

13 Kua karanga aturā Anania, E te Atu, e manganui akenei toku kite i te reira tangata, i tona takinga-kino maata i to aronga tapu i Ierusalema ra:

14 E mana oki tona i ko nei no te kau taunga nunui ra, kia tapeka aia i te au tangata katoa e akaiki i to ingoa na.

15 Kua tuatua maira te Atu kiaia, E aere koe; e āriki ikiia oki aia naku, ei apai i toku ingoa ki mua i te aroaro o te au etene, e te ui ariki ra, e te tamariki na Iseraela ra:

16 E akakite oki au kiaia i te maata o te mate e tikaʼi iaia kia akakoromaki no toku nei ingoa.

17 Aere aturā Anania, e tomo atura ki roto i te are; kua tuku atura i tona rima ki rungao iaia, na ko atura, E taku taeake e Saula, na te Atu na Iesu taau i kite i te arataa, ia koe i aere mai nei i tono mai iaku kia puera toou mata, e kia akakiia koe ki te Vaerua Tapu.

18 Kua topa iora i reira tetai mea no runga i tona mata, mei te poa ika te tu; e kite akaou atura aia i reira, tu akera ki runga, e bapetizoia iora oki.

19 E kia kai aia i te manga, maroiroi akera aia. Noo iorā Saula i etai puke rā ki o te au pipi i Damaseko ra.

20 Kua akakite atura aia i reira i te Mesia i roto i te au sunago ra e, ko te Tamaiti aia na te Atua.

21 Va anake iora te au tangata katoa i akarongo ra, na ko akera, Kare ainei teia te tangata i ta i te aronga i akaiki i teianei ingoa i Ierusalema ra? e ko tei aere mai oki i ko nei, e arataki tapeka ia ratou ki te kau taunga nunui?

22 Maroiroi rava aturā Saula, e muteki atura iaia te ngati Iuda e noo i Damaseko ra, tupu marie atura e ko te Mesia teia.

23 E manganui akera te rā i topa, kua akaaiteite iora te ngati Iuda i te tuatua e ta iaia.

24 I akakiteia mairā Saula i to ratou moetapapa anga. Kua tiaki atura ratou i te au ngutupa ra i te po e te ao e ta iaia.

25 Kua rave iora te au pipi iaia, tuku atura ki raro na te pae koro i te po i roto i tetai tapora.

26 E tae aturā Saula ki Ierusalema, kua timata atura aia i te kapiti atu ki te au pipi ra: mataku anake iora ratou iaia, kare i akarongo e, e pipi aia.

27 Kua rave akerā Banaba iaia, arataki atura ki te au aposetolo ra, kua akakite atura kia ratou i tona kite anga i te Atu i te arataa ra, e tana tuatua anga mai kiaia ra, e tana ako anga i Damaseko ma te ingoa o Iesu, kare rava i mataku ra.

28 Kapiti atura aia kia ratou i te aere anga atu ki vao, e te oki anga mai ki roto, i Ierusalema ra:

29 E ako atura aia i te ingoa o te Atu ra o Iesu ma te mataku kore: e taumāro atura aia i te au Eleni ra: te umuumu maira oki ratou iaia e ta.

30 E kite akera te au taeake ra, arataki atura iaia ki Kaisarea, e kua tono atura oki iaia ki Tareso.

31 E au atura te au ekalesia ra i reira, e pini rava ake Iudea katoa e Galilea, e Samaria oki e kua maroiroi atura; mataku atura oki i te Atu i to ratou aerenga, e ma te akapumaana oki a te Vaerua Tapu, maata atura ratou.

32 Te tapini aere ra oki a Petero na taua au ngai katoa ra, e aere atura aia ki te aronga i noo i Luda ra.

33 E kitea atura e ia tetai tangata i reira, ko Ainea te ingoa, kua mate i te akangoru, ka varu akera mataiti i te akāvai ua anga ki runga i te roi.

34 Kua karanga aturā Petero kiaia, E Ainea, te akaoraia mai na koe e Iesu e te Mesia; ka tu, ka toatoa i to roi.

35 Tu akera aia i reira. Kua akara maira to Luda e to Sarona iaia, e kua ariu atura ki te Atu.

36 E te noo ra tetai pipi vaine i Iopa, ko Tabita te ingoa, (koia oki a Doreka kia akatauia:) kua ki oki taua vaine ra i te angaanga meitaki tana i rave ra, e te oronga oki i te apinga.

37 E makiia iora aia i taua puke rā ra, e mate rava atura: e oti akera aia i te oreiia, vaio atura ratou iaia ki roto i te pia i runga ra.

38 No te mea ra te vaitata ua ra Luda ki Iopa, e kite akera te au pipi e tei reirā Petero, kua tono maira ratou i e toko rua puke tangata e tuatua kiaia, e aere ki reira, eiaa e tavare.

39 Kua tu akerā Petero, aere atura ratou katoa. E tae atura aia, kua arataki ratou iaia ki roto i taua pia i runga ra: kua tu ua maira te au vaine takaua i tona pae ma te aue, e te akakite anga mai i te au pona, e te kakau pu, i roiia e Doreka, iaia i noo katoa ki o ratou ra.

40 Kua tuku aturā Petero ia ratou ki vao, kua tuturi iora, pure atura: kua ariu atura ki taua kopapa ra, na ko atura, E Tabita, ka tu. Puera akera tona mata, e kite akera ia Petero, kua nootu ua maira aia ki runga.

41 Kua rave atura aia i tona rima, akatu rava akera ki runga: kua kapiki atura i te aronga tapu ra, e te au vaine takaua ra, kua tuku atura iaia kia ratou ra, kua ora rava akera.

42 Kitea puia akera i Iopa katoa ra; e manganui tei akarongo i te Atu.

43 Noo ua iora aia i Iopa e manganui te rā ki o tetai tangata ko Simona te ingoa, e tangata rapakau kiri.