Deuteronomi

3 KUA ariu akera tatou i reira, kua aere iora na te arataa ki Basana ra: kua aere maira te ariki o Basana ko Oga, koia ma te tangata katoatoa nona, e tamaki ia tatou i Ederei.

2 Kua tuatua mairā Iehova kiaku, Auraka e mataku iaia; ka tuku atu au iaia e te tangata ravarai nona ra, e tona ra enua, ki to rima na; e mei taau i rave i te ariki o te ngati Amori ra ia Sihona i noo i Hesebona ra, e akapera katoa koe iaia.

3 Kua tuku maira to tatou Atua ra ko Iehova i te ariki o Basana ia Oga, e tona katoa ra au tangata, ki to tatou rima; pou iora aia ia tatou e kare rava akera ona i toe.

4 Rave akera tatou i tona au oire ravarai i reira, kare rava o ratou oire i toe i te riro mai ia tatou, e ono ngauru oire ra, ko te enua katoa ra ko Aragoba, i te basileia o Oga i Basana ra.

5 E oire patuia taua au oire ravarai ra, e patu teitei, e te pa, e te tea auri; e manganui oki te oire patu koreia ra.

6 Tairiiripoti takiri akera ratou ia tatou: mei ta tatou oki i rave i te ariki o Hesebona ra ia Sihona, i te akapou rava anga atu i te tane, e te vaine, e te tamariki, i te au oire katoa ra.

7 Kareka te au puaka katoa, e te apinga o te au oire ra, kua rave tatou i te reira no tatou uaorai ei apinga.

8 Riro maira oki ia tatou i reira, mei roto i te rima o nga ariki toko rua o te ngati Amori ra, te enua i teia pae Ioridana ra, mei te kauvai maira ko Aranona, e tae ua atu ki te maunga ra ko Heremona;

9 (E taua Heremona ra ko Siriona te ingoa i to Sidona ra; e te ingoa i te ngati Amori ra ko Senira ia:)

10 Te au oire ravarai o te ngai atea ra, e Gileada katoa, e Basana katoa ra, e tae rava atura ki Salaka e Ederei, nga oire o te basileia o Oga i Basana.

11 Ko Oga ariki o Basana anake ra tei toe i te au tangata-roangarere ra: i na, tona roi, e roi auri ia: kare ainei i Raba i o te tamariki a Amona ra? e iva kubiti te roa, e a kubiti i te pararauare, i te kubiti a te tangata nei.

12 E taua enua nei, i tei rauka ia tatou i reira ra, mei Aroera mai i te pae o te kauvai ra ko Aranona, e tetai pae i te maunga ra ko Gileada, e to reira oki au oire, ko tei orongaia e au no te ngati Reubena, e no te ngati Gada ra.

13 E tetai pae i Gileada, e Basana katoatoa, i te basileia o Oga ra, i orongaia e au no tetai veenga o te kopu o Manase ra, i te enua katoa ra ko Aragoba, ma Basana katoa oki, tei tapaia e, ko te enua o te tangata-roangarere ra.

14 Pou iora ra te enua katoa ra ko Aragoba, e tae ua atura ki te pae o te Gesuri, e te ngati Maaka, ia Iaira te tamaiti a Manase ra, tapa iora aia i te reira i tona uaorai ingoa ia Basana-kavota-iaira e tae rava akenei ki teianei rā.

15 Kua oronga atura oki au ia Gileada kia Makira ra.

16 E mei Gileada mai e tae ua atu ki te kauvai ra ko Aranona, i te ngai i roto i taua kauvai ra e tei te pae uaorai, e tae ua atu ki te kauvai ra ko Iaboka, i te kotinga o te tamariki a Amona ra, oronga atura au no te ngati Reubena, e no te ngati Gada ra:

17 E te Araba katoa ra, e ko Ioridana, e te ngai i reirao, mei Kinereta mai e tae ua atu ki te roto o te Araba ra i te Tai Taitai ra, i raro ake i te au pupui anga vai o Pisega ki te pae i te itinga o te rā ra.

18 Kua akaue atura au ia kotou i reira, na ko atura, Kua oronga mai to kotou Atua ra ko Iehova i teianei enua no kotou ei nooanga; ko to kotou katoa ra e tika kia aere ki te tamaki ra, e na mua ïa i to kotou ai taeake i te tamariki na Iseraela i te aere, ma te taoonga tamaki katoa, ki tera pae ra.

19 Ko ta kotou au vaine ra, e ta kotou au tamariki, e ta kotou puaka, (kua kite oki au e e puaka maata ta kotou,) ka vaooia i roto i to kotou au oire i orongaia e au no kotou na:

20 E kia akanoo marie a Iehova i to kotou ai taeake, mei ia kotou katoa na, kia noo katoa ratou i te enua ta to kotou Atua ko Iehova e oronga atu no ratou i tetai pae Ioridana ra; ei reira kotou ka oki katoa mai ei ki to kotou katoa ra au kainga, i taku i oronga atu no kotou na.

21 Kua akaue atura oki au ia Iosua i reira, na ko atura, Kua kite pu akenei to mata i ta to kotou Atua i ta Iehova i rave i nga ariki toko rua nei; e akapera katoa oki a Iehova ki te au basileia ravarai taau e aere nei.

22 Auraka kotou e mataku ia ratou; na to kotou Atua oki na Iehova e tamaki i ta kotou tamaki.

23 E kua pure oki au ia Iehova i reira, na ko atura,

24 E te Atu e, e Iehova, kua timata io nei oki koe i te akakite mai ki to tavini nei i toou mana, e to rima ririnui; teiea oki ïa atua i runga i te rangi e te ao katoa nei oki e tikaʼi kia rave i te angaanga mei taau te tu, e mei to mana oki?

25 E tuku akena koe iaku ki tera pae, taku ïa tuatua ia koe, kia kite au i tenana enua meitaki i tera pae Ioridana, tenana maunga meitaki, e Lebanona oki.

26 Kua riri rā Iehova iaku ia kotou, e kare akerai i akarongo mai kiaku; e kua tuatua mai a Iehova kiaku, Oti ra ua; auraka koe e tuatua akaou mai kiaku i tena.

27 E aere koe ki rungao i te take maunga ra ko Pisega, ka akara tika atu ei to mata ki te pae i te opunga o te rā ra, e te pae i apatokerau, e te pae i apatonga, e te pae i te itinga o te rā, kia kite oki toou mata na; kare oki koe e tae ki tetai pae i teianei Ioridana.

28 E ikuiku ra koe ia Iosua, e akapumaana atu, e akamaroiroi atu iaia; koia oki te aere na mua i taua aronga tangata nei, e nana ratou e akanoo i te enua taau e akara na.

29 Noo ua iora ra tatou i te o i vaitata i Bete-peora.