Luka

15 KUA uipa katoa maira te au telona, e te aronga rave ara, e akarongo iaia.

2 Kua koumuumu iora te au Pharisea, e te au tata tuatua, na ko akera, Te kite mei teianei tangata i te aronga rave ara, e te kaikai katoa ra ma ratou.

3 Kua karanga atura aia kia ratou i teianei parabole, na ko atura,

4 Koai ïa tangata i o kotou nei, okotai anere ana mamoe, kia ngaro ra tetai, kare ainei aia e vaio i te iva ngauru ma iva i te medebara ra, e aere, ka kimi ei i tei ngaro ra, e kia kitea atu?

5 E kitea atura e ia, tuku iora ki runga i tona pakuivi ma te rekareka.

6 E tae maira aia ki te ngutuare, kua akaputuputu maira aia i te au taunga nona, e te aronga tangata tupu ra, kua na ko atura kia ratou, E rekareka katoa tatou; kua kitea oki iaku taku mamoe i ngaro ra.

7 E akakite atu oki au kia kotou, E rekareka maata to runga i te rangi i te tangata ara okotai kia tataraara, i te aronga tuatua-tika, e kia iva ua atu te ngauru anga ma iva, te kore e tau ia ratou te tataraara.

8 Koai oki ïa vaine, okotai ngauru ana diderama, kia ngaro ra tetai, kare ïa e tutungi i te lamepa, ka purumu ei i te are, ka kimi marie ei, e kia kitea atu e ia?

9 E kitea atura e ia, kua akaputuputu maira aia i te au taunga nona e te au vaine rikiriki tupu ra, ka na ko atu ei, E rekareka katoa tatou; kua kitea oki iaku te diderama i ngaro iaku ra.

10 E karanga atu au kia kotou, Mei te reira katoa te tu o to te au angela a te Atua ra rekareka, kia tataraara te tangata rave ara okotai ra.

11 Kua karanga atura aia, Toko rua a tetai tangata tamariki tamaroa:

12 Kua karanga atura te tama muri ki te metua, E taku metua, o mai ana i taku tuanga i to tatou nei apinga. Kua tua atura aia i te apinga ravarai na raua.

13 E topa akera etai rā kare e rainga, kua akaputuputu iora te tama openga i tona apinga katoa, e aere atura i tona tere ki te enua mamao, kua kaituauau atura i tona apinga i te kanga.

14 E ope rava akera tona apinga, rokoia iora taua enua ra e te onge maata; kite akera aia i te ngere.

15 Kua topiri atura aia ki tetai tangata tupu o taua enua ra, ko tei unga atu iaia ki te au kainga nona e angai i te puaka-maori.

16 E kua kaki atura aia i te kai e keingaia e te puaka-maori, kia ki tona kopu: kare ra e tangata i oronga mai iaia.

17 E rako tangata maira aia, kua na ko akera aia, E manganui to taku metua tavini i ouia ra, e kai maata ta ratou e te toe ra tetai pae, e te mate nei au i te pongi!

18 E tu au e aere ki taku metua ra, e karanga atu au kiaia, E taku metua, kua ara au i Tei te rangi ra, e ia koe katoa oki,

19 E kare atura e tau kia tuatuaia au e, e tamaiti naau: e akariro koe iaku mei tetai i te au tavini ou noou nei.

20 Kua tu akera aia, aere atura ki tona metua. E tei te ngai mamao rai aia, kua akara maira tona metua iaia, aroa maira, oro maira, takave maira i runga i tona kaki, kua ongi maira iaia.

21 Kua karanga atura taua tamaiti ra kiaia, E taku metua, kua ara au i Tei te rangi ra, e ia koe katoa oki, e kare atura e tau kia tuatuaia au e, e tamaiti naau.

22 Kua karanga atura ra te metua ki tona au tavini ra, Apai mai ana i te kakau pu meitaki ra, e akakakau mai iaia nei, e momono i tetai tapeka ki tona rima, e aao oki te tamaka ki tona vaevae.

23 E tiki oki i te punua puakatoro akaangai ra e ko; kia kaikai tatou, e kia rekareka oki:

24 Ko taku tamaiti nei oki, i mate ana, e kua ora mai nei; i ngaro ana, e kua kitea mai nei.

25 Rekareka atura ratou. Tei te kainga tana tama mua: e te aere maira ki te ngutuare, e vaitata maira, akarongo maira aia i te tangi koe e te ura.

26 Kua kapiki maira aia i tetai tavini, kua ui maira i taua au mea ra.

27 Kua karanga atura aia kiaia, Teia mai nei toou teina; e kua ko io nei to metua i te punua puakatoro akaangai nei, no te mea i aere ora mai nei aia, kare i maki.

28 Riri akera aia, kare akera i tae ki roto; i aere atu ei te metua tane ki vao, taparu atura iaia.

29 Kua na ko maira aia, i te tuatua anga mai, ki te metua tane, I na, e manganui akenei oku mataiti i te tavini anga ia koe nei, e kare rava akenei au i akarongo ngata i taau tuatua: e kare koe i oronga ua mai i tetai punua puaka-nio naku, kia akarekareka au i toku au taunga:

30 Tei te oki anga mai ra o taau tamaiti na, ko tei kaimoumou i toou apinga na te au vaine akaturi ra, ko io nei koe i te punua puakatoro akaangai nei nana.

31 Kua karanga atura aia kiaia, E tama, e tika koe i ko nei iaku nei, e toku apinga ravarai, noou ïa.

32 E mea tika oki ia tatou kia rekareka e kia pereperekavana: ko to teina nei oki i mate ana, e kua ora mai nei; i ngaro ana, e kua kitea mai nei.