Angaanga

5 KO tetai tangata ra ko Anania te ingoa, e tana vaine ko Saphira, ooko atura i te kainga,

2 E uuna iora i tetai pae i taua oko ra, kua kite katoa tana vaine, e taoi maira oki i tetai pae, e tuku iora ki te pae vaevae o te au aposetolo ra.

3 Kua karanga aturā Petero, E Anania, eaa toou ngakau i akakiia mai ei e Satani, i pikikaaʼi koe i te Vaerua Tapu, i uunaʼi i tetai pae oko i te kainga na?

4 I te vai ua anga ra, kare aina toou uaorai na? kia oko na ra oki, kare aina tei ia koe rai? eaa oki koe i akatupu ei ki roto i to ngakau i tenana tuatua? ko te Atua taau i pikikaa ana, kare te tangata.

5 E tei te akaronga anga mai a Anania i taua tuatua ra, topa iora ki raro, unui rava akera: mataku rava atura te aronga katoa i kite i taua mea ra.

6 Kua tu akera te au tangata ou ra, opa iora iaia, e apai atura ki vao, tanu atura.

7 E e toru paa ora i topa, kua aere maira tana vaine ki roto, kare i kite i taua mea ra.

8 Kua karanga aturā Petero kiaia, Ka akakite mai koe kiaku, ko te oko tikai aina teia i ta korua i oko i te kainga na? Kua tuatua maira aia, A, koia tika tena.

9 Kua karanga aturā Petero kiaia, Eaa korua i akaarite ei i ta korua tuatua e tapikipiki atu i te Vaerua o te Atu? i na, tei te ngutupa mai nei te vaevae o te aronga i tanu o to tane na, e na ratou katoa koe e apai ki vao.

10 Kua topa iora aia i reira ki raro i tona pae vaevae ra, mate rava akera: e kia tomo mai te au tangata ou ra ki roto, rokoia maira, kua mate rava aia, apai atura ki vao, tanu atura ki te pae o tana tane ra.

11 Rokoia taua ekalesia katoa ra e te mataku, e te aronga katoa i kite i taua au mea ra.

12 E manganui te akairo e te mea umere i raveia e te rima o te au aposetolo ki rotopu i te tangata katoa ra; (kua putuputu oki ratou katoa ma te anoano okotai ki roto i te tomoanga o Solomona ra.

13 Kareka tetai pae ra, kare rava ïa tetai i kapiti tika mai kia ratou i te mataku; kua akapaapaaia ra ratou e te tangata:)

14 Te aronga ra i akarongo i te Atu, e manganui rava atura ïa tei kapiti mai kia ratou ra, te tane ma te vaine katoa oki.

15 I apai maira oki ratou i te aronga maki ki vao i te arataa ra, tuku atura ki runga i te roi, e te roi rikiriki apaapai ra, peneiake ko te tapokiia ratou e te ata no Petero kia aere na reirao ra.

16 E manganui oki to te au oire ra i aere mai, e pini ua ake, i te apai anga mai i te aronga maki, e te aronga e tamanataia e te vaerua viivii ra, ki Ierusalema; kare rava ïa ratou i toe i te akaoraia.

17 Kua tu akera te taunga maata ra e te aronga katoa i vaitata iaia ra, (koia oki te pupu Sadukea ra,) kua ki rava i te riri.

18 Kua opu maira to ratou rima i te au aposetolo, tuku atura ia ratou ki roto i te are tapekaanga tangata kikino ra.

19 Na tetai angela ra a te Atu i eeu i te au pa i taua are tapekaanga ra i te po, e kua arataki maira ia ratou ki vao, na ko atura,

20 Ka aere ki roto i te iero ra tu ei, ka akakite atu ei ki te tangata i te au tuatua ravarai o teianei ora.

21 E kite akera ratou i te reira, aere atura ki roto i te iero ra i te popongi akirata, apii atura. Kia tae maira te taunga maata ra e te aronga i kapiti kiaia, kua akaputuputu maira i to te Sunederi ravarai, e te aronga pakari katoa i te tamariki na Iseraela ra, e kua tono atura i te karere ki te are tapekaanga ra, e arataki mai ia ratou.

22 E tae atura taua aronga taoonga ra, rokoia atura, kare ua ratou i roto i te are tapekaanga ra; kua oki maira ratou e akakite,

23 Na ko maira, Rokoia atura e matou, te mou meitaki ra te pa o te are tapekaanga ra, e te aronga tiaki oki i te tu ua anga ki vao i te ngutupa ra: kia eeu ra matou i te pa kare rava e tangata o roto.

24 E kite akera te taunga maata, e te rangatira o te iero ra, e te kau taunga nunui katoa ra, i te reira tuatua, eumiumi iora ratou i taua tuatua ra e, eaa ra a muri ake.

25 Kua aere maira tetai tangata, kua tuatua maira kia ratou, na ko maira, I na, te au tangata ta kotou i tuku ki roto i te are tapekaanga ra, tera ake, e tu ua ake ki roto i te iero nei, te apii akera i te tangata.

26 Kua tiki atura taua rangatira ra, ma te au tavini katoa, e arataki mai ia ratou, kare ra i rave viviki atu; kua mataku ratou i te tangata, ko te peîia mai aea ratou ki te toka.

27 E kia aratakiia maira ratou ra, tuku atura ratou ki mua i te aroaro o te Sunederi ra: kua ui maira te taunga maata ra kia ratou, na ko maira,

28 Kare aina matou i akaue tika atu kia kotou, auraka kotou e apii ma teianei ingoa? e i na, kua ki rava Ierusalema ia kotou i ta kotou tuatua, e te inangaro na kotou kia io mai te toto o teianei tangata ki runga ia matou nei.

29 Kua karanga aturā Petero e te au aposetolo katoa ra, na ko atura, Ko te Atua ta matou e akarongo e tikaʼi auraka te tangata.

30 Kua akatu io nei te Atua o to tatou ai tupuna ra ia Iesu, ta kotou i ta nei i te patiti anga ki runga i te rakau:

31 Koia ta te Atua i akateitei akenei i tona rima katau ei Ariki e ei Ora, ei oronga mai oki i te tataraara no Iseraela, e te akakore anga i te ara.

32 Ko matou oki tona au kite i taua tuatua nei, e te Vaerua Tapu katoa, ta te Atua i oronga mai ki te aronga e akarongo iaia ra.

33 E kite akera ratou i te reira, motu atura to ratou ngakau i te riri, e akaeatu ua iora i te ravenga e mate ei ia ratou.

34 Kua tu akera tetai Pharisea ki runga i taua Sunederi ra, ko Gamaliela te ingoa, e apii ture, e tangata akameitakiia e te tangata ravarai, kua akaue atura e arataki atu i te au aposetolo ra ki vao, e kia roa poto ake.

35 E kua karanga atura aia kia ratou, E te au tangata no Iseraela nei, e matakite ia kotou i ta kotou rave anga atu i tenana aronga tangata.

36 Tupu akenei a Teuda i muatangana akenei i te akatietie anga iaia uaorai e tangata maata aia; kapiti katoa atura te tangata iaia e a katoa paa anere; e taia atura aia; e te aronga katoa i akarongo iaia, pueurikiriki ke atura ïa, pou atura.

37 Kua tupu akenei oki i muri ake iaia, ko Iuda no Galilea, i te tuatau i tataiaʼi te ingoa ra, e kapiti atura aia i te tangata e manganui i te aru anga atu iaia: e mate katoa atura aia; e te aronga katoa i aru iaia ra, akangaoro rava atura ïa.

38 E teianei, teia taku tuatua kia kotou, E akataka ke atu kotou i tenana au tangata, e vaio ua atu: na te tangata teianei angaanga e teianei tuatua, ka ngaro ua ïa:

39 Na te Atua ra, kare rava e kore ia kotou; ko te riro aea oki kotou ei aronga tamaki atu ki te Atua.

40 Kua akatika maira ratou iaia: e akaokiia maira e ratou te au aposetolo ra ki roto, pāpā atura, e oti akera, kua akaue atura ia ratou, auraka rava e tuatua ma te ingoa o Iesu, e kua tuku atura ia ratou.

41 Aere atura ratou mei te aroaro atu o te Sunederi, ma te rekareka, i te mea, no tona ingoa i manakoiaʼi ratou e tau ia ratou taua takinga-kino ra.

42 E kare e rā i tukua ia ratou, i te apii anga atu e te tuatua anga atu ia Iesu Mesia, ki roto i te iero ra, e i tera are i tera are.