Mareko

6 AKARUKE iora aia i te reira ngai, aere atura i tona uaorai enua; kua aru katoa atura tana au pipi iaia.

2 E tae akera ki te rā sabati, timata atura i te apii i roto i te sunago ra: kua na ko akera te aronga i akarongo iaia e manganui, ma te va ua, Noea te au ravenga a teianei tangata? e eaa teia pakari i orongaia mai ei iaia nei, i tikaʼi teianei au akairo i raveia e ia nei?

3 E kare ainei teia te kamuta, te tamaiti a Maria, te taeake no Iakobo, e no Iose, e no Iuda, e no Simona? e tona ai tuaine oki, kare aina te noo ki o tatou nei? Kua maitu iora ratou iaia.

4 Kua na ko aturā Iesu kia ratou, Kare te peroveta i akavaavaaia, mari ra i tona uaorai enua, e i tona uaorai kopu-tangata, e i tona uaorai ngutuare.

5 Kare atura i tika iaia kia rave i te akairo i reira, mari ra ko e tokotai puke tangata maki i akaoraia e ia, i te tuku anga i tona rima ki rungao ia ratou ra.

6 Kua va ua atura aia i to ratou akarongo kore. Aere atura aia na roto i te au vila i reirao i te apii aere anga.

7 Kua karanga atura aia ki te tino ngauru ma rua e aere mai kiaia ra, tataki toko rua atura i te tono anga ia ratou, tuku atura i te mana ia ratou, kia vi te au vaerua viivii ra.

8 Kua karanga atura oki kia ratou, auraka ei apinga e apaiia atu i to ratou tere; auraka ei pute, auraka ei manga, auraka ei moni i te tatua ra, ko te tokotoko anake ra:

9 Ei tamaka tākaiia: e eiaa kia taki rua pereue kia kakau.

10 Kua karanga katoa atura aia kia ratou, Te ngai e tomo atu ei kotou ki roto i te are ra, ei reira e noo ei, e ka aere atu ei kotou.

11 E te kore e kite mai ia kotou ra, e kare oki e akarongo mai ia kotou, kia aere atu kotou ra, ka ruru atu i te one o to kotou vaevae, ei akairo anga atu ia ratou. Koia tika taku e karanga atu kia kotou, Kia tae ki te rā akavaanga ra, e ngari ake to Sodoma e to Gomora i te reira oire.

12 Aere atura ratou e ako aere atura i te tangata kia tataraara;

13 E tuaru atura oki i te demoni e manganui ki vao, e kua akaora atura i te maki e manganui, ma te tainu ia ratou i te manongi.

14 Kite akera te ariki ra ko Heroda iaia (kua varia oki tona ingoa); kua na ko akera, Kua tu akaou a Ioane bapetizo, mei te mate mai; i tikaʼi teianei au akairo tana i rave nei.

15 Na ko akera tetai pae, Ko Elia ïa. Na ko akera etai, E peroveta ïa, mei tetai o te au peroveta ra.

16 Kite akera rā Heroda, kua na ko akera aia, Ko Ioane teia taku i tipu i te mimiti ra; kua ora akaou mai nei mei te mate mai.

17 Na Heroda i akaue atu kia opukiā Ioane, e tapekaia iora i roto i te are tapekaanga ra, no Herodia oki, no te vaine a tona taeake a Philipa, tei akaipoipoia e ia.

18 I tuatua anā Ioane kia Heroda, Kare ïa e tau i te ture kia akaipoipo koe i te vaine a to taeake.

19 Riri iorā Herodia iaia, i inangaro oki i te ta takiri iaia; kare akera i tika.

20 Te mataku rā Heroda ia Ioane, kua kite oki aia e, e tangata tuatua-tika aia e te tapu, kua akara oki aia iaia, e kua akono i te au mea tana i tuatua maira e manganui, kua akarongo oki iaia ma te rekareka.

21 E tae akera ki te rā e raukaʼi tana ravenga, i te rā i anau ei a Heroda, e kaingakai maata tana i akatupu, na te au mataiapo nunui ki ona ra, e te ui rangatira vaeau ra, e te aronga taoiau katoa i Galilea ra.

22 Kua aere maira te tamaine a Herodia ra ki roto, kua ura maira ki muao ia ratou, mareka rava akerā Heroda e te au manuiri katoa nana ra; kua karanga atura te ariki ki taua tamaine ra, Ka pati ua mai i taau mea i inangaro ra, e orongaia atu ïa e au.

23 E kua taputou atura aia kiaia, Ko taau e inangaro iaku nei, ka orongaia atu e au, e tae ua atu ki te afa i toku nei basileia.

24 Aere atura aia e ui atura ki tona metua vaine, Eaa taku e pati atu? Kua tuatua maira aia, Te mimiti o Ioane bapetizo ra.

25 Kua oki vave ua maira aia ki te ariki ra, kua pati maira, na ko maira, Teia toku anoano, ka o mai i te mimiti o Ioane bapetizo ki roto i tetai kumete i teianei.

26 Maata rava atura te aue o te ariki, no te taputou ra nana ra, e te au manuiri oki nana, kare atura i akakore atu.

27 Kua akaue atura aia i tetai vaeau i reira, e tiki i tona mimiti e apai mai: aere atura aia, tipu atura i tona mimiti i roto i te are tapekaanga ra;

28 E kua apai maira oki i tona mimiti i roto i tetai kumete, tuku maira ki taua tamaine ra; apai atura taua tamaine ra ki te metua vaine.

29 E kite akera tana au pipi, kua tiki maira ratou i te kopapa, apai atura ki roto i tetai tanumanga.

30 E uipa maira te au aposetolo kia Iesu ra, kua akakite anake maira iaia i ta ratou i rave e ta ratou i apii ra.

31 Kua karanga atura aia kia ratou, Ka taki aere tatou ko tatou anake uaorai i tetai ngai motutaa, e noonoo iti ua na; kare oki o ratou e manga tuatau kia kai i te kai, i te maata o te tangata, ana atura, ana maira.

32 Aere poiri atura ratou na runga i te pai ki tetai ngai motutaa.

33 Kua kite ra te tangata ia ratou i te aere anga, e manganui oki tei kite iaia, kua oro atura na uta mei roto atu i te au oire katoa ra, ko ratou ana oki tei tae, e kua akaputuputu mai kiaia ra.

34 E tei te tapae anga atu a Iesu, akara atura aia i te pouou tangata maata, tangi atura ia ratou, no te mea, mei te mamoe tiaki kore ratou, e kua apii atura aia ia ratou i te au tuatua e manganui.

35 E parepare akera te rā, kua aere maira te au pipi kiaia ra, na ko maira, E ngai motutaa teia, e kua parepare oki te rā.

36 Ka tuku atu ia ratou nei, kia aere ana ratou i te au ngai are ra, e te au vila vaitata nei, e oko i te kai na ratou; kare rava a ratou kai kia kai.

37 Kua karanga atura aia kia ratou, na ko atura, Na kotou e apai atu i te kai na ratou. Kua na ko maira ratou kiaia, E apai aina matou i e rua anere denari, ka oko atu ei i te manga e angai atu ia ratou?

38 Kua na ko atura aia kia ratou, Eia ake a kotou manga? ka aere ka atoro. E kite akera ratou, kua na ko maira, E rima, e nga ika oki e rua.

39 Kua karanga atura aia kia ratou, E akatakoto pupu aere ia ratou ravarai ki runga i te mātā.

40 Kua takoto atura ratou, taki tai anere i tetai pupu, taki rima ngauru oki i tetai.

41 Kua rave iora aia i nga manga e rima, e nga ika e rua, nānā akera ki runga i te rangi, akameitaki atura, vavaʼi iora i nga manga, apai atura na te au pipi e tuku atu ki mua i te aroaro o taua aronga maata ra, e nga ika oki e rua kua tua katoa atura aia na ratou ravarai.

42 Kai anake iora ratou, e pangia rava akera.

43 Kua akaputuputu iora ratou i te totoenga kai ra ma te ika, e ki akera nga tapora raungauru ma rua.

44 E te aronga i kai i taua kai ra, e rima paa tausani te tane.

45 Kua akaue atura aia ki tana au pipi e aere ki runga i te pai i reira ra, e akatere na mua ki tetai pae i Betesaida, ka tuku atu ei aia i te tangata tini.

46 E kia tukuia ratou e ia, aere atura aia ki runga i tetai maunga e pure.

47 E po akera, tei rotopu atura te pai i taua roto ra, koia anake ua tei uta.

48 Akara atura aia ia ratou, kua roiroi rava i te oe ua anga; te na mua maira oki te matangi: e tae akera ki te a o te araanga i te po ra, aere atura aia kia ratou, na runga i te kare i te aaere anga, kua akaaere ke atura na te pae io ia ratou ra.

49 Kia akara mai ratou iaia i te aere ua anga na runga i te kare, manako akera e turuma, kua aue iora ratou.

50 (Kua kite oki ratou katoa iaia, ngarangara rava akera.) Kua tuatua maira aia kia ratou i reira, Ka akamaroiroi; ko au; auraka e mataku.

51 Kake maira aia ki runga i te pai ia ratou ra, aki takiri akera te matangi: va ua iora ratou, e maata ua atura te umere.

52 Kare oki ratou i manako i te akairo i te manga ra, i te mārokiakia o to ratou ngakau.

53 E tae atura ratou ki tetai pae, tapae atura i te enua ra ki Genesereta, aere atura ratou ki uta.

54 E kia akaruke ratou i te pai, kua kite maira ratou iaia,

55 Oro aere ua atura, e pini rava akera taua enua ra, e kua apai mai i te aronga maki, ma te roi katoa, i te au ngai katoa ta ratou i kite e, tei reira aia.

56 E te au oire ravarai, e te au vila, e te ngai are, tana i tomo ra, kua tuku maira ratou i te aronga maki ra ki te au arataa, kua akanauru maira iaia kia akatukia ua ake ratou i tona tapa kakau; e ko tei akatukia mai iaia ra, kua ora anake atura ratou.