Salamo

143 E IEHOVA, e akarongo mai i taku nei pure; e ariu mai i to taringa ki taku e pati nei: e akarongo mai iaku i taau ra tuatua-mou, e taau ra tuatua-tika. 2 Auraka e akava mai i to tavini nei; kare rava oki tetai o te aronga e ora nei e akatikaia i mua i to aroaro. 3 Kua takinga-kino mai te enemi i toku nei vaerua; kua tukiparu roaia au ki raro i te one; kua akanoo aia iaku i roto i te poriri, mei te aronga i mate takere ra. 4 I tumatetenga roaʼi toku vaerua i roto iaku nei; kua tuputupuā toku ngakau i roto iaku nei. 5 Te manako nei au i te tuatau taito ra; te akamaaraara nei au i taau ra au angaanga katoa; te akaeatu ua nei au i te au angaanga a to rima ra. 6 Te akatika nei au i toku rima kia koe ra; te anoano nei toku vaerua ia koe mei te enua papa-marō ra. Sela. 7 E akarongo vave mai koe iaku e Iehova; kua taravai toku vaerua: auraka koe e uuna i to mata iaku; kua tau oki au ki te aronga e riro ki raro i te rua ra. 8 E akakite mai koe iaku i to aroa i te popongi; te irinaki nei oki au ia koe: e akakite mai koe kiaku i toku arataa kia aere ra; te apai atu nei oki au i toku vaerua kia koe. 9 E akaora koe iaku i toku au enemi, e Iehova: e pipini atu au i roto ia koe ra. 10 E apii mai koe iaku kia rave au i to inangaro; ko koe oki taku Atua: kia aratakiia au e toou Vaerua meitaki i te enua o te aronga tiratiratu. 11 E akamaroiroi mai koe iaku, e Iehova, i toou ra ingoa; no taau ra tuatua-tika e tuku koe i toku vaerua i te tumatetenga nei. 12 E tipu ke atu oki i toku au enemi i te aroa noou ra, e akapou oki i te aronga katoa i takinga-kino mai i toku vaerua: ko au oki toou tavini.