Maseli

29 KO tei ako putuputuia, e kua akaketaketa iora i te kaki, e viviki mai tona mate, e kare e ravenga e oraʼi.

2 Kia akamaataia te aronga tuatua-tika ra, kua rekareka te tangata: kia tutara ra te tangata kino ra, kua aue anake te tangata.

3 Ko tei inangaro i te tuatua pakari, kua akarekareka aia i tona metua tane: ko te tauoaoa ra i te vaine akaturi, kua kaimoumou aia i tona apinga.

4 E akatinamouia te enua i te tuatua-tau a te ariki: ko tei rave ra i te ou ra, kua tairipotiia e ia.

5 Ko tei tuatua akarekareka ua atu i tona ra tangata tupu, kua totoa aia i te kupenga ei taii i tona vaevae.

6 E ii te tangata kino i tana uaorai ara: e imene ra te tangata tuatua-tika, e e rekareka iora.

7 E akono te tangata tuatua-tika ra i ta te ao ra tuatua: kare ra te tangata kino ra e kite ua atu i te reira.

8 Te aronga akavaavaa ra, e akatupu i te taumāro ki roto i te oire: na te aronga pakari ra e akaariu ke i taua riri ra.

9 Kia taumāro te tangata pakari i te neneva ra, riri ua atu kia riri, kata ua atu oki kia kata, kare e akaeaanga.

10 E riri te ta tangata ki te aronga apa kore: e kimi ra te aronga tiratiratu kia ora te vaerua.

11 E akaope te neneva i tona manako ki vao: kareka te tangata pakari, e tāpu ïa e kia roa iti ake.

12 Ko te tutara kia akarongo i te tuatua pikikaa ra, e riro tona katoa ra au tavini i te kino.

13 E aravei te ao e te tangata takinga-kino; na Iehova i akamārama i to raua katoa ra mata.

14 Te ariki ko tei akava i te ao ma te tuatua-mou, e akatinamouia tona terono e tuatau ua atu.

15 Na te pāpā e na te ako e akapakari atu: ko te tamaiti ra kia akaruke takiriia ra, e riro te metua vaine i te akama.

16 Te maata ra te aronga kino i te tupu anga, te maata katoa ra te ara: e kite ra te aronga tuatua-tika ra i to ratou inga.

17 E ako atu koe i to tamaiti, e mareka koe iaia i reira: koia rai ïa, e rekareka to ngakau iaia.

18 Kare e oramaia mai, e akono kore ïa tangata i reira; e ao ra tona, to tei akono i te ture ra.

19 Kare ïa tavini e akarongo i te reo, tei kite i i taua reo ra e kare e ki mai.

20 Te kite ra koe i taua tangata rapurapu ua kia tuatua ra? manakonako roa ake tei te neneva ra i tei iaia.

21 Ko tei rave akaperepere i tona tavini mei te mea-ngiti anga mairai, e riro aia i te akono atu iaia ei tamaiti i te openga ake.

22 E akatupu te tangata rotoriri i te karo, e te tangata riri maata ra, e maata ïa tana ara.

23 E inga te tangata i tona uaorai parau: e akangateiteiia ra te tangata ngakau akaaka.

24 Ko tei kapiti i ta te keia ra, kua riri aia ki tona uaorai vaerua; te kite ra aia i te taputou anga ra, kare ra e aaki.

25 E rokoia e te ii tei mataku i te tangata ra: ko tei irinaki ia Iehova ra, e ora ïa.

26 E manganui tei aruaru kia kiteia mai e te tutara ra: no ko maira ia Iehova ra ta te tangata nei tuatua-tau.

27 Te tangata tuatua-tika kore ra, e mea viivii ïa i te aronga tuatua-tika: e tei tiratiratu i tona aerenga, e mea viivii ïa i te tangata tuatua-kino ra.