Akaaere i Toou Vaerua!

“KUA kiteia mai e te taote i te pae o te manako e te aronga riririri e te akateitei e rima taime te akaraanga ka mate i raro ake i te 50 o te au tangata maru e te irinakiia.” Kua ripotiia e The New York Times o Tianuare 17, 1989. Te Taote ko Redford B. Williams, e tangata kite i te Duke University Medical Center i Durham, North Carolina, kua “akatumu i tana au kiteanga ki runga i te au apii e manganui.” “I nanaʼi, e roa atu te openga o te au ngakau irinaki, no te mea te paruruia ra ratou mei te au takino anga o te tu ru ua o te au uaua,” i ripoti ei te Times.

Ka rauka i te riri i te akakake i te vaito o te toto ki runga, te akatupu i te au manamanata o te akaea anga, e tetai pae atu au kino. Ka rauka i te roto riri i te takino i te au turanga o te manako, e te maata anga o te taime ka tupu mai tetai taitaia anga pakari i te pae o te manako a muri ake. Tetai mea kino katoa, ko te tu o te riri ki runga i te ora anga i te pae vaerua o tetai peretana. No reira rai te Puka Tapu i tuatua ei: “Tetai ngakau maru ra ko te oraanga ia o te mea kopapa ra.” (Maseli 14:30, NW) Ae, e mea meitaki i te ora anga kia akaaere i toou vaerua. Inara ka akara ana i etai au tumu no te rave i te reira.

E Aruaru i te Kaveinga o te Pakari

Ka inangaro tetai ua atu i tona manako i te rave ma te pakari. Tetai mataara no te rave i teia na te akaari anga i te tu akaaere ia koe uaorai. Na teia tu, te akakite ra a Maseli 29:11, (NW): “Kua tuku pouroa mai te neneva ra i tona vaerua ki vao, inara koia tei pakari ra, kua tamou i te reira kia maru e tae ua atu ki te ope.”

I roto i te Puka Tapu te tuatua “vaerua” te akamaramaia ra e ko te tu tutara akaaere te ka akakeu ra i tetai peretana kia aruaru i tetai kaveinga. Ka tuku tetai “neneva ra” i tona vaerua katoa, no te mea kare ana arataki anga i te reira. Te tuku ua ra aia i tona riri kia aruru ma te kore e manako anga no te au mea ka tupu a muri ake. Ko te vaerua i roto i tetai neneva ra penei ka akatupu iaia na mua kia rave i tetai tuatua anga tauetono ma te riri. I reira ka akatika atu tona vaerua iaia uaorai ki tetai tuatua anga e te ta ua e te au ravenga auouo.

Inara, ka tamou te peretana pakari ra i tona vaerua ma te “maru e tae ua atu ki te ope.” Te akaaere ra aia i te reira ma te akara marie e eaa te ka tupu me ka riri ake aia. Noatu e e tumu meitaki tana i riri ei aia, te kite ra aia e na te rave viviki anga i te reira iaia e manako riririri ra ka tupu tetai mea kino kiaia. No reira, ka akaaere aia iaia uaorai e te tapu iaia mei te rave anga i tetai akaari anga marikonga kore, me kore tapupu kore o tona tu riri. Ka akara pakari aia kia Iehova no te tauturu, penei te tuatua i tetai pure viviki e te muteki. I te katoa anga, no te inangaro tikai o te katoatoa ka rauka i te peretana pakari i te tamaru i tona riri e te uriuri ma te tau i te au Tuatua Tapu e to te Atua anoano, e te au mea meitaki rava no te katoatoa tei o mai. Te maata atu, ka kite tei pakari ra e auraka aia e akamoupuku i tona riri no te mea penei ka akamarokiakia te reira iaia ki roto i tetai angaanga pakari kore e te raveanga i te ara.

Ka taangaanga katoa tetai peretana pakari i te ako a te apotetoro ko Paulo: “Kia riri kotou ra, auraka kia araia: auraka e topa te rā i to kotou riri anga: Auraka e tuku i ta te diabolo ngai kia o mai.” (Ephesia 4:26, 27) Me ka riri ake ma te tika kore auraka e tamou i tetai turanga kia roa te riri, te tuku anga i te ra kia opu no te reira turanga. No teaa ra? No te mea ka tuku ua koe i te Tiaporo ko Satani no te rave ia koe, penei te akavare anga ia koe kia rave i tetai mea kino e kite atura i te mareka kore anga a te Atua. (Salamo 37:8, 9) E akaaere i toou vaerua e e rave ma te viviki no te rapakau i te au manamanata te ka akakeu ia koe kia riri.​—Mataio 18:15-17.

Kia Maru te Vaerua

Kua tuatua akaou tetai maseli e: “Te tangata pakari, kare e rapurapu i te tuatua ra, e te tangata kite ra, e ngakau maru tona.” (Maseli 17:27) Tetai tangata tei iaia te kite o te Tuatua na te Atua ‘kare e rapurapu i tana e tuatua ra’ e kare e tuku ua i tana au tuatua kia rere ke ua, mei tetai aerenga tapupu kore, i te mea tikai me kua tamanataia aia. Te matakite anga i tona pirianga kia Iehova e tona ngai tau i roto i te akaaerenga a te Atua, kare aia e tuku i te vera o tona riri kia arapaki iaia. Mari ra, “te tangata pakari ra” ka tauta aia kia vai maru ua e te tau meitaki i te manako. Ma teia vaerua, ka rauka katoa ia koe i te arataki i te au turanga te ka taki atu i tetai peretana neneva ki roto i te ara.

Kapiti atu ki teia au tuatua, ka tatau tatou: “Ko tei kore e riri vave ra, e kite maata tona: ko tei rapurapu ra te ngakau ra, kua akateitei ïa i te tuatua neneva.” (Maseli 14:29) Na te kore anga e akakoromaki ma te akaririia i te pae manako ngakau ka arataki te reira ki te au angaanga neneva. Mei teaa i reira te meitaki maata atu i te tamanako e eaa te ka tupu mei tetai tuatua me kore angaanga tei rave pu uaia ma te tapupu kore! Me kare ana, penei ka rave tetai peretana ma te akakoromaki kore i tei tau kore, te “akateitei ïa te tuatua neneva.” No reira, auraka “e riri vave” mei te Atua rai, e ka kopae koe i te au ravenga akakoromaki kore e te tau kore.​—Exodo 34:6.

Kopae i te Akaparau

No te tu akaparau, ka riro tetai peretana i te manako kore i tetai pae me kore ka tupu te riri veravera. No reira ka tatau tatou: “E akatupu te tangata rotoriri i te karo, e te tangata riri maata ra, e maata ïa tana ara.” (Maseli 29:22) Me kare tetai tangata e akaaere i tona vaerua inara oronga atu “i te rotoriri,” penei ka ‘akatupu aia i te karo,’ i rotopu i te au taeake. E te peretana “riri maata ra, e maata ïa tana ara.” Ae, te papu ra ka rave aia i te ara​—tetai mea teia ka inangaro tetai peretana tu atua i te kopae.

Auraka e akangaropoina e kare a Iehova e mareka ana i te tu akaparau e te au tu riri akateitei. (Maseli 16:18) E meitaki maata rava atu i te kimi i to te Atua tauturu no te akakoromaki i te timata anga e te rave ma te akaaka i te ariu atu ki te ngakau akaparau me kore te rotoriri.​—Maseli 29:23.

Rave ma te Maru

Ka anoanoia te akaaka me ka karoia mai koe e tetai tangata taoonga. I teia taime, eaa toou tu ki te reira? Penei ka ariu atu koe ma te tuatua rapurapu e te manako kore. Inara te ako ra te Puka Tapu: “Kia tupu te riri o te tangata tutara ia koe ra, auraka e akaruke i to ngai; tei te tuku maru ua oki e anga ai te riri maata rava.” (Koheleta 10:4) Mei teaa tikai te pakari kia pau atu ma te maru! E tikai, “ko te tuatua maru ra tei akaanga ke i te riri.” (Maseli 15:1) E tau kia akaaere ia koe uaorai no te pau atu ma te maru, ka akaatea teia kaveinga pakari i te au manamanata e ka akamaata i te au pirianga au.

Me ko koe tetai tei kare i tau kia karoia, e mea tau e ka akatika mai te peretana taoonga ra ia koe kia akamarama i te au mea. E tika, kia raveia te au akamarama anga na roto i te vaerua maru te manako anga e ka akatikatikaia tetai manako tarevake. Ka anoanoia te tangata taoonga ra kia akaaere i tona vaerua no te akatika i tetai akamarama anga, e ka akaari teia e e tu pakari tona e te ririnui.

Noatu e tei roto tetai Kerititiano i te turanga taoonga me kare, kia akamaara aia e “mei te oire koro kore e te ngaangaa ra, koia katoa te tangata kare i akavi i tona uaorai vaerua.” (Maseli 25:28) Tetai peretana kare i maru tona tu e kare e akaaere i tona vaerua, te ngoie ua ra kia oia e te au manako tau kore te ka akakeu iaia kia rave i te au mataara tarevake. Ko Iesu Mesia, tei tuku i te akaraanga apa kore, “te maru nei, . . . e ngakau akaaka.” (Mataio 11:29) Te maata atu, e ua te tu maru no te vaerua tapu o te Atua, ta te au Kerititiano kia pure.​—Luka 11:13; Galatia 5:22, 23.

No Teaa ka Akaaere ei i Toou Vaerua?

Te ariki ra tatou i te au tuatua maru, inara te maata anga o te taime kare tatou i kite e eaa tei akakeu i tetai riri anga viviki. Penei ka rauka i tetai tangata tei kore i apiiia i te au kaveinga i te uuna i tona riri e tona tauta pakari kia akaaiteite atu ki tetai peretana no tetai apa tikai me kare tetai mea maani ua! Ma te tu pikikaa, penei te tiaki ua ra aia i tetai tuatau no te tuatua i tetai mea kino no te peretana tana i riri atu. Papu e, auraka tetai Kerititiano e tuku i te reira vaerua kia tupu i roto iaia, no te mea te tata ra te apotetoro ko Ioane e: “Ko tei makitakita ra i tona taeake, tei roto ïa i te poiri, e te aere ua ra na roto i te poiri, e kare aia i kite i tana ngai tana e aere ra, no te mea kua akapoia tona mata i te poiri.” Kua tuatua katoa a Ioane e: “Ko tei makitakita i tona taeake, e ta tangata ïa: kua kite oki kotou e, kare o te ta tangata ra e ora mutu kore e vai i roto iaia.”​—1 Ioane 2:11; 3:15.

Me te uunaia ra te tu akaparau, te pikikaa, me kore tetai ua atu tu atua kore, kare te reira tapokianga e riro mai ei akaneneva i te Atua. Kare katoa te akakite anga apa ki te atea me kore tetai akaari anga tuatua tika iaia uaorai e ngaro mei te Atua i to roto i te ngakau. Kua tuatua a Maseli 16:2 e: “Te mā anake ra to te tangata nei au aerenga i tona uaorai mata: te kimi matatio rā Iehova i te vaerua.” Kare rava te Atua e akavareia.

Ei meitaki uaorai noou e no te au tumu Tuatua Tapu tei uriuriia, e riro i reira mei ia Iesu e etai aronga tu pakari tei kopae i te tu parau e kua rave ma te tu maru. Ma te maata tikai, e akaaere i toou vaerua!

Mei ia Iesu, e akaaere i toou vaerua e kopae kia riro mai “mei te oire koro kore e te ngaangaa ra”