Isaia

49 E AKARONGO mai iaku, e te pa enua taatai e; e akono mai, e te au tangata i te atea ke ra; kua tuatua mairā Iehova iaku mei te kopu mairai; kua taiku aia i toku ingoa mei toku anau anga mairai.

2 Kua akariro aia i toku vaa ei koke kokoi; kua uuna aia iaku ki roto i te maru o tona rima; e kua akariro aia iaku ei kakao akainuinuia: kua uuna aia iaku ki roto i tona pia kakao.

3 E kua tuatua maira aia kiaku, Ko toku tavini koe: e Iseraela, noou e akameitakiiaʼi au nei.

4 Kua karanga atura au, Roiroi puapinga kore toku, kua akaope puapinga kore ua au i toku matutu, e ei mea tarevakaua: tei ia Iehova ra taku tuatua, e taku tutaki, tei taku Atua ïa.

5 E teianei, te tuatua mairā Iehova, ko tei akatupu mai iaku mei te kopu mai ei tavini nona, ei akaoki mai ia Iakoba kiaia ra, kia kore Iseraela e akakatoatoaia maira, e manea rai au i te mata o Iehova; e ka riro mai toku Atua ra ei paapaa anga naku.

6 Kua tuatua mairai aia kiaku, E mea ngiti tena ia koe, ko koe i riro mai ei tavini noku, ei akatupu i te au kopu o Iakoba, e ei akaoki mai i tei akatoeia i o Iseraela: e oronga katoa au ia koe ei turama no te etene, ei ora naku e tae ua atu ki te openga mai o te enua nei.

7 Te na ko mairā Iehova, te Akaora o Iseraela, Tei Tapu iaia ra, i tei akavaavaaia e te tangaʼa ra, i tei akaviiviiia e te enua ra, i tei tavini i te au tutara ra: E tu mai te au ariki kia akara mai iaia ra; e te ui ariki katoa e akamori mai iaia; no Iehova nana te tuatua-mou ra, no Tei Tapu i Iseraela nei, koia oki tei iki ia koe ra.

8 Te na ko mairā Iehova, Kua akarongo au ia koe i te tuatau tau ra; kua tauturu au ia koe i te rā e oraʼi ra: e naku e akaora ia koe, e oronga au ia koe ei koreromotu na te au tangata nei; ei akāu aere i te enua, kia akanooia te au kainga i akaruke uaia ra;

9 Kia tuatua koe ki te aronga i tapekaia ra, Ka aere ki vao; to roto i te poiri, Ka akakite mai ia kotou. E kai aere ratou na te pae arataa; e ki rungao i te au tuaivi katoa, ko ta ratou ïa one kai.

10 Kare ratou e pongi, kare oki e kaki vai; kare oki ratou e taia i te veravera, e te rā: na tei aroa ia ratou ratou e arataki, e nana e taki aere ia ratou ki te au punavai pupui ua ra.

11 E anga oki au i te arataa na runga i te au maunga ravarai noku ra, e ka akāūia taku ra au ara metua.

12 I na, e aere mai teia mei te enua mamao mai: e i na, no apatokerau teia, e no te opunga o te rā ra: e teia no te enua ra o te ngati Sini.

13 Ka imene, e te au rangi e; ka rekareka, e te enua e; e te au maunga, kia puroro ua mai te imene: kua akapumaana mai a Iehova i tona ra iti-tangata, e tona aronga i tumatetenga ra, kua aroa mai aia ia ratou.

14 Kua tuatua ra Ziona, Kua akaruke mai a Iehova iaku; e kua akangaropoina mai toku Atu iaku.

15 E tika ainei i te vaine kia akangaropoina i tana tamaiti kai u, e kare atura e tangi ki te tamaiti a tona uaorai kopu? a, e tika ia ratou kia akangaropoina, kare ra au e akangaropoina ia koe.

16 I na, kua tata au ia koe ki runga i oku kapu-rima; e te vai ua maira to au patu ki mua iaku nei.

17 E rapurapu ua mai taau au tamariki; te aronga i pou ei, e i taneaʼi koe ra, e aere ua ratou ki vao mei roto ia koe.

18 Ka nānā ana to mata, ka akarau aere e pini ua ake; kua akaputuputu anake mai teianei aronga, e aere mai kia koe ra. Te tuatua mairā Iehova, Te ora nei au, e akakakau ia koe ia ratou ravarai ra, mei te mea akamanea ra; e ka akamou aere ia ratou ki runga ia koe, mei te vaine akaipoipo ou ra.

19 Toou oki au ngai tanea, e tei akarukeia ra, e to enua i pou ra, ei teianei ïa e piripiri ei no te rai o te tangata; e te aronga i pou ei koe ra, ka akamamao keia ïa.

20 Te au tamariki tamaroa, i ngere ei koe, e tuatua maira ratou ki roto i oou ra pukai taringa; Kua riro teianei ngai ei ngai piripiri iaku; e akaatea ana iaku kia noo au.

21 E riro oki koe i te tuatua ki roto i to ngakau ra, Naai i akaanau mai i teianei aronga naku? kua ngere oki au i te tamariki, e noongata roa akera; e tuikaa oki, e te tuaruia; naai teia i rāpu? I na, toe iora ko au anake; koea ua akera teia aronga nei?

22 Te na ko maira te Atu ra ko Iehova, I na, e apai au i toku rima ki runga i te pa enua ra, e akateitei au i taku reva ki runga i te au tangata ra: e e apai mai ratou i to au tamariki ki roto i to ratou umauma, e to au tamaine na runga i to ratou pakuivi i te apai anga.

23 E te au ariki e riro ei akaangai noou, e ta ratou au vaine ei metua vaine akaangai naau: e tupou ratou ki raro to ratou mata i te enua ia koe ra, e mitimiti ratou i te one-pueu o toou vaevae ra; e kite oki koe e ko Iehova au: kare oki ratou e akama tei tatari iaku nei.

24 E rauka mai ainei te apinga noni kia riro i te tangata ririnui? e ka akaoraia ainei tei riro tikai ei tuikaa?

25 Te na ko maira rā Iehova, Te au tuikaa i riro i te tangata ririnui, e riro akaou mai ïa; e te apinga noni i rauka akaou mai ïa: ko te aronga oki e māro mai ia koe ra, naku e māro atu; e naku e akaora i to au tamariki.

26 E naku e akaangai i tei takinga-kino ia koe ra i to ratou uaorai kiko; e kona ratou i to ratou uaorai toto mei te kona wina ou ra: e kite oki te tangata katoa e, ko au toou ra Akaora ko Iehova, e ko Tei Mana i Iakoba nei, ko te Akaora ïa ia koe.