1 Samuela

16 KUA tuatua mairā Iehova kia Samuela, Mei te aa te roa o toou ra aue anga ia Saula, tei akarukeia e au auraka aia ei ariki no Iseraela? Ka akaki ana i to āriki ki te manongi, e aere, e tono atu au ia koe kia Iese i Betelehema ra; kua rauka oki tetai ariki naku i roto i te au tamariki nana ra.

2 Kua karanga aturā Samuela, Akapeea au e tikaʼi kia aere? Kia kite a Saula ra, ka mate au iaia. Kua tuatua mairā Iehova, E taki katoa tetai punua puakatoro ua i to rima, ka karanga atu ei e, I aere mai nei au e apai i te atinga na Iehova.

3 E tuatua kia Iese, e aere katoa mai ki taua atinga ra, e naku e akakite kia koe i taau e rave; e ko taku e akakite atu kia koe ra, taau ïa e akatainu naku.

4 E kua pera oki a Samuela ta Iehova i tuatua maira, e kua aere aia ki Betelehema. E kua rutetetete iora te aronga pakari o taua oire ra i taua aerenga mai nona ra, e kua tuatua maira, E tere au toou?

5 E kua karanga atura aia, E tere au: i aere mai au e apai i te atinga kia Iehova ra: ka akatapu ana ia kotou e aere katoa mai ki te atinga nei. Kua akatapu iora aia ia Iese e tana au tamariki, e kua tuatua kia ratou e aere mai ki taua atinga ra.

6 E tae maira ratou, kua akara atura aia ia Eliaba, e kua tuatua akera, Ko ta Iehova tikai teia i akatainu ra, tei mua i tona aroaro.

7 Kua tuatua mairā Iehova kia Samuela, Auraka e akara i tona mata, e tona tu i te teitei; no te mea kua kopaeia aia e au: e kare oki ta Iehova akara anga e tau ki ta te tangata; e akara oki te tangata ki te tu i vao ake, karekā Iehova e akara ïa i te ngakau.

8 Kua karanga aturā Iese kia Abinadaba, e kuat uku maira iaia ki mua i te aroaro o Samuela. Kua tuatua akera aia, Kare katoā Iehova i iki i teia.

9 Kua tuku mairā Iese ia Sama. Kua tuatua akera aia, kare katoā Iehova i iki i teia.

10 E kua pera rai a Iese i te tuku mai i tana au tamariki toko itu ki mua ia Samuela. Kua karanga aturā Samuela kia Iese, Kare a Iehova i iki i taua aronga nei.

11 E kua karanga aturā Samuela kia Iese, Kua ope rava mai nei taau au tamariki? Kua tuatua maira aia, Te toe nei te openga, e i na, te tiaki ra i te au mamoe. Kua karanga aturā Samuela kia Iese, Ka unga i tetai tiki iaia; auraka oki tatou e noo ki raro kia tae mai aia i ko nei.

12 Kua unga atura aia i te tangata, e kua arataki mai iaia ki roto. E tangata muramura, e te mata meitaki, e te tu meitaki kia akara atu. E kua tuatua mairā Iehova, Ka tu, ka akatainu iaia; koia oki tena.

13 Kua rave iorā Samuela i taua āriki manongi ra, e kua akatainu atura iaia i rotopu i tona ai tuakana ra: e mei taua rā maira te Vaerua o Iehova i te tae anga mai ki runga ia Davida. Kua tu akerā Samuela ki runga, e kua oki maira ki Rama.

14 Kua akaruke ra te Vaerua o Iehova ia Saula; e te akakoiriria maira tetai vaerua kino i tukuia mai e Iehova ra kiaia.

15 Kua tuatua maira te au tavini o Saula kiaia, I na oki, te akakoiririaia maira koe e tetai vaerua kino no ko i te Atua ra:

16 E tuatua ua mai ana koe, e to matou atu, i to au tavini i mua ia koe nei, e kimi i tetai tangata i kite meitaki i te akatangi i te kinura: e kia rokoia mai koe e taua vaerua kino no ko mai i te Atua ra, ka akatangi ei ki tona rima, kua ora iora koe i reira.

17 Kua karanga aturā Saula ki taua au tavini nona ra, E kimi kotou i tetai tangata i kite meitaki i te akatangi kinura, arataki mai ei i ku nei kiaku nei.

18 Kua tuatua maira tetai o taua au tavini ra, na ko maira, I na, kua kite au i tetai tangata, e tamaiti na Iese i Betelehema, kua kite meitaki ïa i te akatangi kinura, e tangata maroiroi, e tangata tamaki oki, e e ravenga karape oki tana, e te tangata meitaki i te tu o te kopapa ra: e tei iaia oki a Iehova.

19 Kua tono akerā Saula i te karere kia Iese ra i reira, kua karanga atura, E tono mai koe i taau tamaiti ra ia Davida kiaku nei, ko tei tiaki i te au mamoe ra.

20 Kua rave iorā Iese i tetai asini ma te areto, e tetai āriki wina, e tetai punua puakanio, e kua akau ua atura kia Saula i te rima o tana tamaiti ra o Davida.

21 Aere aturā Davida kia Saula ra, tu atura ki mua iaia: e kua akaperepere rava maira aia iaia; riro atura aia ei apai taoonga tamaki nana ra.

22 Kua tono akerā Saula i te karere kia Iese ra, karanga atura, E tuku mai koe ia Davida kia noo mai aia ki oku nei, taku ïa tuatua kia koe, e mea akaperepereia oki aia i mua i toku aroaro.

23 E kia tae maira te vaerua kino no ko mai i te Atua ra ki runga ia Saula, kua rave iorā Davida i te kinura, kua akatangi iora ki tona rima: papa rava akera te manava o Saula, kua meitaki atura, kua akaruke maira oki taua vaerua kino ra iaia.