Isaia

25 E IEHOVA e, ko toku Atua oki koe; e akateitei au ia koe, e akameitaki au i toou ingoa; e au mea taka ke oki taau i rave; te au tuatua takere naau ra, e tuatua pikikaa kore anake ïa, e te tuatua-mou.

2 Kua akariro oki koe i te oire ei ututua; te oire i akaketaketaia ra ei mea ngaangaa ua: te are ariki o te au tangata ke, kia kore rava ei oire; kare rava e patu akaouia ra.

3 E teianei e akakakā te aronga ririnui ia koe; te oire o te pa enua rikarika ra, e mataku ïa ia koe.

4 Kua riro oki koe ei punanga no te tangata rikiriki; ei punanga no tei ngere i tona pini anga ra; ei akapuanga i te uriia ra; ei marumaru i te veravera rā; i te riri o tei matakuia ra, mei te uriia ki runga i te patu.

5 Mei te pukakā i te enua vera ra, e akakore rai koe i te mutamuta o te au tangata ke; mei te pukakā i te marumaru tumurangi patapatatue ra, te peʼe rekareka o tei matakuia ra i te akakore angaia.

6 Ei reirā Iehova Sabaota ra e rave ei na te tangata katoa, i teianei maunga, i tetai pokai, e kai memeitaki ra, te kaingakai wina i runga i te ota; e kai matu roa ra, te wina i runga i te ota i akaareare meitakiia ra.

7 E ei teianei maunga aia e akakore ei i te tapoki i tapokiiaʼi te mata o te tangata katoa ra, e te vai i rarangaia i rungao i te au enua katoa ra.

8 Nana e akakore rava i te mate e tuatau ua atu; e na te Atu ra na Iehova e orei i te roi-mata i te au mata ravarai; e akakore aia i te akakino i tona iti-tangata i te enua katoa nei: na Iehova oki teia i tuatua nei.

9 Kia tae i taua rā ra, e peraʼi ratou e, I na, ko to tatou Atua teia; kua tapapa tatou kiaia, e ka akaora aia ia tatou: ko Iehova teia; ta tatou i tapapa na; e rekareka tatou, e kia pereperekavana oki i te ora nana.

10 E i teianei maunga e vai marie ei te rima o Iehova; e takatakaiia ra Moabi i tona ra ngai, mei te ngangaere i takatakaiia ei turu.

11 E akatika aia i tona rima i rotopu ia ratou, mei tei akatika i tona rima kia kau: e nana oki e tuku i to ratou ngakau parau ki raro, e te ravenga pikikaa katoa a to ratou rima.

12 E te punanga i taau patu teitei ra, nana e tuku ki raro, kia taakaaka roaia; e aite ki te one, ki te one-pueu.