Salamo

31 TE irinaki nei au kia koe, e Iehova; auraka au kia akama e tuatau ua atu; e akaora iaku i taau ra tuatua-tika.

2 Ka tuku mai ana i to taringa kiaku nei; kia ngakoikoi mai koe i te akaora iaku: ei mato etaeta koe noku, ei are akapuanga kia ora au.

3 E mato oki koe noku, e akapuanga oki koe noku: e no toou ra ingoa, e arataki mai koe, e e akakite mai kiaku.

4 E totō koe iaku ki vao i te kupenga i uunaia e ratou noku nei: ko koe oki toku maroiroi.

5 Te tuku atu nei au i toku vaerua ki to rima: kua akaora koe iaku, e te Atua tuatua-mou, e Iehova.

6 E aronga riri naku tei akamori i te au mea pikikaa puapinga kore ra: kareka au nei, tei ia Iehova toku irinaki anga.

7 Ka pereperekavana au e ka rekareka au i toou ra aroa: i akara ana oki koe i toku tumatetenga anga; kua kite mai koe i toku vaerua i te au mate noku nei;

8 Kare oki koe i momani iaku ki roto i te rima o te enemi: kua tuku ra koe i toku vaevae ki te ngai atea.

9 E aroa mai koe iaku, e Iehova, kua tumatetenga oki au: kua naonao toku mata i te aue, toku vaerua e toku kopu.

10 Kua potopoto toku aʼo i te aue, e toku au mataiti i te mii: kua kore roa toku maroiroi i te ara naku nei, e kua popo toku nei au ivi.

11 Kua riro au ei akakino anga na toku au enemi katoa, e maata atu rai ïa ki toku au tangata tupu, e ei rikarika anga na toku au taunga: te aronga i kite mai iaku i te atea ke ra, kua oro ke ïa iaku.

12 Kua ngaropoinaia au mei te tangata mate, kare i maaraia; kua riro au mei te kapu i ngaangaa ra.

13 Kua rongo oki au i te akakino a te tangata tini nei: kua akapiniia au e te akamataku e kako roa ake, ia ratou i akaaiteitei i te tuatua e rave iaku nei: kua kimi i ta ratou ravenga kia mate au.

14 Kareka au nei, i irinaki ana au ia koe, e Iehova: i tuatua ana au e, Ko koe taku Atua.

15 Tei to rima oki toku au tuatau: kia ora au ia koe i toku au enemi, e tei takinga-kino mai iaku nei.

16 Kia kakā mai to mata i to tavini: kia ora oki au i toou ra aroa.

17 E Iehova e, auraka au kia akama, te kapiki nei oki au ia koe: kia akama ra te aronga kino, kia muteki ratou ki roto i te vaarua.

18 Kia akamutekiia te vaa pikikaa, tei tuatua kino mai i te aronga tuatua-tika ra, no te nengonengo e no te akavaavaa.

19 Te maata oki o te au mea memeitaki naau, i tei vaooia e koe no te aronga i mataku ia koe ra! i tei akonoia no te aronga i irinaki ia koe, ki mua i te aroaro o te tamariki a te tangata nei!

20 E uuna koe ia ratou i te ngai ngaro o to aroaro na, i te nengonengo anga o te tangata ra: e akapipini koe ia ratou i roto i to maru ra, i te tauetono anga o te vaa tangata ra.

21 Kia akameitakiiā Iehova, ko tei akakite mai i tona takinga-meitaki maata kiaku, i roto i te oire akaketaketaia ra.

22 I tuatua ana oki au i taua rapurapu anga noku ra e, kua akataka keia au i mua i to mata na; kua akarongo maira koe i toku nei reo i te pati anga atu, iaku i kapiki atu kia koe ra.

23 Ko Iehova ta kotou e inangaro, e te aronga tapu katoa nona e: te akaora nei a Iehova i te aronga pikikaa kore, e akautunga nui aia i tei akanengonengo ra.

24 Kia matutu, e nana e akamaroiroi mai i to kotou ngakau, ko kotou ravarai, e te aronga e manakonako atu ia Iehova ra.