Salamo

49 E AKARONGO i teia, e te au tangata katoa ra, e ariu mai to kotou taringa, e to te ao katoa ra;

2 Ko tei akaaka, e tei teitei, ko te aronga apinga nui, e te aronga ao katoa ra.

3 Ka tuatua oki toku vaa i te tuatua karape, e te manako anga o toku ngakau ra, ei te kite ïa.

4 E tuku au i toku taringa ki te parabole; ka tatara au i taku tuatua ngaro i runga i te kinura.

5 Eaa au kia mataku i te au rā kikino nei, kia pini au i te kino o te aronga moetapapa ra?

6 Te aronga i irinaki i ta ratou ra apinga, ko tei akatietie i te maata anga o ta ratou apinga;

7 Kare rava e tika i te tangata kia akaora i tona taeake, e kare ana tutaki kia apai ki te Atua e rauka mai ei aia ra;

8 Ko te oko oki o te vaerua, e maata ua atu ïa, e ko te kore rai ïa e tuatau ua atu;

9 Kia ora ua mairai aia e tuatau ua atu, e auraka roa kia tae ki te pe.

10 Kua kitea oki e te mate nei te tangata pakari; ko te neneva ra, e te tangata kite kore, te mate katoa nei ïa, e te vaooia nei ta ratou apinga ra na etai ke.

11 Ko to ratou manako e ka vai rai to ratou au are e tuatau ua atu; to ratou au nooanga e tae ua atu ki te au uki katoa ra; te akatapa ra ratou i to ratou ingoa i to ratou au kainga ra.

12 Kare oki te tangata ma te meitaki katoa ra e vaoo tamouia; e tau ïa ki te au puaka, e mate ua ïa.

13 Ko to ratou ïa aerenga teia, ko to ratou ïa neneva; e te akatika nei rai ta ratou tamariki i ta ratou tuatua. Sela.

14 Kua tukuia ratou ki ade mei te mamoe ra; na te mate ratou e tiaki; e na te aronga tiratiratu, kia tae ki te popongi ra, e tutara ki runga ia ratou; to ratou manea ra, ka pou ïa i te vaarua, i to ratou nooanga.

15 Na te Atua ra e akaora i toku vaerua i te ririnui o ade, e ka rave mairai aia iaku. Sela.

16 Auraka rava koe e mataku kia apinga maataia ta tetai, kia akamaataia te manea o tona ra are:

17 Kia mate oki aia ra, kare ana e apinga e apai; kare oki tona manea e aru iaia ki raro ra.

18 Tona ora anga ra, kua akameitaki aia iaia uaorai, e ka akapaapaaia koe, kia rave koe i te meitaki noou uaorai;

19 Ka riro ra aia ki te uki o tona ra ai metua, ko te kore rava e kite akaou mai i te mārama.

20 Ko te tangata, ma te meitaki katoa ra, e kare aia i kite ra, e tau ïa ki te au puaka ra, e mate ua ïa.