Salamo

84 E MEA mataora toou ra au puakapa, e Iehova Sabaota!

2 Te anoano nei toku ngakau, e te noinoi nei i te au paepae o Iehova: te aue nei toku ngakau e toku kopapa i te Atua ora ra.

3 Kua rauka i te manu rere te are nona, e i te kopekapeka te koanga nona uaorai, ei anau anga i tana ra punua; ko taau ra au atarau, e Iehova Sabaota, e taku ariki, e taku Atua.

4 E ao to te aronga i noo i toou ra are: kare ratou e akapaki i te akapaapaa ia koe. Sela.

5 E ao to te au tangata ko koe to ratou maroiroi ra; tei to ratou ngakau te au arataa.

6 Aere ua ratou na te o ra ko Aue-anga, kua ko ratou i te punavai i reira; e na te ua oki e akaki i te au rua.

7 Ka aere rai oki ratou mei te maroiroi ki te maroiroi, e kitea atura ratou ki mua i te aroaro o te Atua i Ziona.

8 E te Atua Sabaota, e Iehova, e akarongo mai i taku pure: e anga mai i to taringa kiaku nei, e te Atua o Iakoba e. Sela.

9 E te Atua, to matou paruru ra, e akara mai ana, e akono mai i tei akatainuia e koe ra.

10 E meitaki maata to te rā okotai i roto i te au paepae noou ra, i to te au rā e tausani ua atu. E anoano maata toku i te tiaki i te ngutupa i te are o taku Atua, i te noo i te au puakapa o te aronga kino ra.

11 E rā oki e te paruru te Atua ra ko Iehova: ka oronga mai a Iehova i te meitaki e te kakā: kare rava ona meitaki e tāpu i te aronga aerenga tiratiratu ra.

12 E Iehova Sabaota e, e ao to te tangata e irinaki ia koe ra.