Deuteronomi

7 KIA kavea koe e to Atua ra e Iehova ki te enua taau e aere e rave nei ei nooanga, e kia eke iaia te au iti-tangata e manganui ki mua ia koe ra; i te ngati Heta ra, e te ngati Giragasi, e te ngati Amori, e te ngati Kanaana, e te Perizi, e te ngati Hevi, e te ngati Iebusi, e itu katoa vaka tangata mamaata, e te ririnui to ratou i toou na;

2 Kia tuku mai to Atua ra ko Iehova ia ratou ki mua i to aroaro na; e ta koe ia ratou, kia pou takiri rava; auraka koe e papau i te koreromotu kia ratou, auraka koe e akaperepere atu ia ratou:

3 Auraka oki koe e akaipoipo ia ratou: auraka koe e oronga i taau tamaine na tana tamaiti; auraka oki koe e rave i tana tamaine na taau ra tamaiti.

4 Ka riro oki ratou i te akaanga ke i taau tamaiti, kia kore e aru mai iaku, kia araara i te au atua ke ra; tupu iora te riri o Iehova ia koe, mate vave iora koe i reira.

5 Ka akapera ra kotou ia ratou, ka uritumu kotou i ta ratou au atarau, e akangaangaa i to ratou au tiki, ka tipu i te au Asetoreta, ka taʼu oki i to ratou au idolo akatikitikiia ra ki te ai.

6 E aronga tapu oki koe no to Atua no Iehova; kua ikiia koe e to Atua ra e Iehova ei iti-tangata tikai nona uaorai, auraka atu te au tangata katoa ki runga i te enua nei.

7 Kare to te mea e, e maata kotou i te au iti-tangata katoa ra, i inangaro ei a Iehova ia kotou, e i iki ei ia kotou; e iti oki kotou i te au iti-tangata ravarai ra:

8 No te mea i inangaro akerā Iehova ia kotou, e kia akono oki aia i te taputou i tana i taputou atu ki to kotou ai metua ra, i arataki mai ei a Iehova ia kotou ma te rima marōrō, e kua akaora ia kotou i taua ngutuare i tavini ei ra, i te rima o te ariki o Aiphiti ra o Pharao.

9 E tenana, ko to Atua ra ko Iehova, ko te Atua ïa, kia kite oki koe, ko te Atua pikikaa kore, ko tei akono tikai i te koreromotu, e te aroa, ki te aronga i inangaro iaia, e tei akono i tana au akauenga, e tausani ua atu te uki ra;

10 Kareka te aronga kare i inangaro iaia ra, e tutaki akakite pu aia ia ratou ki te mate takiri rava: kare aia e tavare i tei makitakita mai iaia ra; ka tutaki akakite pu aia iaia.

11 E teianei, e akono koe, e e rave i te au akauenga, e te au akonoanga, e te au tuatua-tau taku e akaue atu kia koe i teianei rā.

12 Kia akarongo oki koe i teianei au tuatua-tau, e kia akono tikai kia rave i te reira, e akono to Atua ra ko Iehova i te koreromotu, e te aroa, tana i taputou atu ki to ai metua ra, ei ia koe ia:

13 E akaperepere mai oki aia ïa koe, e akameitaki mai ia koe, e akamaata mai oki ia koe: ka akameitaki katoa mai oki aia i taau i anau ra, e te kai a to enua na; to sitona, e to wina, e to inu, e ta to au puakatoro i anau, e te anana a to au mamoe ra, i runga i te enua tana i taputou atu i to ai metua ra e, e oronga mai aia noou ra.

14 E maata toou meitaki i to te tangata katoa ra: kare rava tetai tangata i o ou e riro ei pa, e to au puaka rai oki.

15 E na Iehova e akakore i te au maki katoa ia koe; kare rava e tuku i te au maki kikino o Aiphiti, i taau i kite ra, ki runga ia koe; e tuku ra aia i te reira ki runga i te aronga i makitakita mai ia koe ra.

16 Ka tamate takiri rave oki koe i te tangata ravarai ta to Atua ra ta Iehova e tuku mai kia koe ra; auraka rava to mata e akaperepere ia ratou: auraka oki koe e araara i to ratou au atua; ka riro oki te reira ei ereere ia koe.

17 Kia tuatua koe i roto i to ngakau e, E enua tangata mamaata teia, e iti au; e akapeea ratou e eke ei iaku?

18 Auraka koe e mataku ia ratou; e akamaara tika ana i ta to Atua ra ta Iehova i rave ia Pharao, e ia Aiphiti katoa oki;

19 Taua au timata-anga maata ra ta toou uaorai mata i kite ra; e te au akairo, e te au mea umere, e te rima marōrō, e te rima i akatikaia ra, i te arataki anga mai to Atua ra ko Iehova ia koe ra: ka pera katoa to Atua ra ko Iehova i taua aronga katoa taau e mataku ra.

20 E na to Atua ra na Iehova e tono i te rango taae i rotopu ia ratou, e kia ope rava te aronga i toe, i tei pipini ia koe ra, i te mate.

21 Auraka koe e ngarangara ia ratou; tei ia koe oki to Atua ra ko Iehova, e Atua mana e te matakuia.

22 Na to Atua na Iehova e tuaru rikiriki i taua au iti-tangata ra ki mua ia koe ra; auraka koe e tairipoti takiri ia ratou, i te akapou anga okotai, ko te maata rava aea te au puaka taae o te enua ia koe ra.

23 Ka tuku maira to Atua ra ko Iehova ia ratou kia koe ra, e akapou oki aia ia ratou ki te mate maata, e pou rava akera ratou.

24 E ka tuku mai aia i to ratou au ariki ki to rima na; e ka akapou koe i to ratou ingoa i raro ake i te rangi nei: kare rava tetai tangata e mou ki mua ia koe ra, e pou ua atu ratou ia koe.

25 Ka taʼu koe i to ratou au atua akatikitikiia ra ki te ai: auraka koe e noinoi i te ario e te auro i rungao ia ratou; auraka koe e rave i te reira, ko te iia aea koe; e mea viivii oki te reira i to Atua ra ia Iehova.

26 Auraka koe e apai i te mea viivii ki roto i to are, ko te riro aea koe mei te reira te tu, ko te taumaaia aea ra; kia viivii tikai oki koe, e kia rikarika tikai i te reira; e mea taumaaia ïa oki te reira.