Ezekiela

36 E KO koe oki, e te tamaiti a te tangata na, e totou katoa koe ki te au maunga o Iseraela, karanga atu, E te au maunga o Iseraela, e akarongo mai i te tuatua a Iehova:

2 Te na ko maira te Atu ra ko Iehova; no te mea kua tuatua te enemi ia kotou e, Eitoa, tei ia tatou oki te au ngai teitei taito ra ei nooanga:

3 E teianei, ka totou koe, ka karanga atu, Te na ko maira te Atu ra ko Iehova, Koia ïa, no te mea kua tanea, e kua apukuia kotou e pini ua ake, kia riro kotou ei apinga no te toenga o te au etene nei, e kua taoi aereia kotou e te vaa o te aronga vaa karea ra, e kua akakinoia e te tangata nei:

4 E teianei, e te au maunga o Iseraela nei, akarongo mai i te tuatua a te Atu ra ko Iehova; Te na ko maira te Atu ra ko Iehova ki te au maunga, e ki te au tuaivi, ki te au kauvai, e ki te au o, ki te au ngai tanea roa ra, e ki te au oire akarukeia ra, tei riro ei aōnga, e ei maevakata-anga, na te toenga o te au etene e pini ua ake;

5 E teianei, te na ko maira te Atu ra ko Iehova; Koia tika rai, i te ai o taku riri i tuatuaʼi au i te toenga o te au etene nei, e ia Edoma katoatoa, ko tei akairo i toku enua no ratou uaorai ei nooanga, ma te ngakau katoa i te rekareka anga, ma te manako akaviivii, kia akaruke ravaia mai ei aōnga.

6 E teianei, e totou i te enua ra ia Iseraela, e karanga atu ki te au maunga, e ki te au tuaivi, ki te au kauvai, e ki te au o, Te na ko maira te Atu ra ko Iehova; I na, kua tuatua au ma toku vareae e ma toku riri otooto, no te mea, kua akakoromaki kotou i te akakino o te au etene.

7 E teianei, te na ko maira te Atu ra ko Iehova, Kua taputou au, Koia tika rai, e riro te au etene e pini ua ake ia kotou i te akakoromaki i to ratou uaorai akakino.

8 Kareka kotou, e te au maunga o Iseraela, e riro to kotou au rara i te toro, e ua mai oki kotou i to kotou ua na toku au tangata na Iseraela, kua vaitata rava oki ratou i te oki mai.

9 I na oki, no kotou au nei, e ariu atu oki au ia kotou, e ka kenumia oki kotou, e ka ruruia.

10 E naku e akamaata i te tangata ia kotou, i te ngutuare katoatoa o Iseraela e ope rava ake: e tangata ia te au oire, e te au ngai pou, e patuia ïa:

11 E akamaata oki au i te tangata e te puaka ia kotou; e ka maata ratou, e ka anau aere: e akanoo au ia kotou mei to kotou tu taito ra, e maata toku takinga-meitaki i teianei i tei to kotou akamata anga ra: ka kite oki kotou e ko Iehova au.

12 Ei tangata ra taku e tuku kia na runga ua ana ia kotou te aere, i toku ra au tangata ia Iseraela; e riro koe ia ratou, e ei tuanga koe no ratou, e kare koe e akangere akaou ia ratou.

13 Te na ko maira te Atu ra ko Iehova; No te mea te tuatua nei ratou ia kotou, Ko te enua kai tangata ra koe, e kua akangereia e koe toou au vaka tangata:

14 E teianei, kare e pou akaou te tangata ia koe, e toou au vaka tangata, kare ïa e inga akaou ia koe, te tuatua maira te Atu ra ko Iehova.

15 Ko te akakino a te au etene ra, kare e akarongo akaouia i roto ia koe ra iaku, kare oki koe e akakoromaki akaou i ta te au tangata nei akaviivii anga, kare oki toou au vaka tangata e inga akaou ia koe, te tuatua maira te Atu ra ko Iehova.

16 Kua tae maira oki te tuatua a Iehova kiaku nei, na ko maira,

17 E te tamaiti a te tangata na, i te noo anga i te ngutuare o Iseraela ki to ratou uaorai enua, kua viivii te reira ia ratou i to ratou uaorai aerenga e i ta ratou au ravenga; kua aite to ratou aerenga ki mua iaku ra mei te viivii o te vaine i akataka keia ra.

18 I riringi atu ei au i toku riri otooto ki runga ia ratou, i te toto i maringi ia ratou ki runga i te enua nei, e no te mea kua viivii te reira ia ratou i to ratou au idolo:

19 E kua akapueurikiriki atu au ia ratou i rotopu i te au etene, e kua ruru aere ia ratou na roto i te au enua ra: mei tei tau i to ratou aerenga e ta ratou ravenga i akautunga atu ei au ia ratou.

20 E tae atura ratou ki rotopu i te au etene, i aereia e ratou ra, kua viivii toku ingoa tapu ia ratou i reira, i te tuatuaia mai ratou e, Ko te au tangata teia no Iehova, e kua aere ke mai ratou i tona enua.

21 Kua tangi ra au ia ratou no toku ra ingoa tapu, ta te ngutuare o Iseraela i akaviivii i rotopu i te au etene, i te ngai i aereia e ratou ra.

22 E teianei, e karanga atu ki te ngutuare o Iseraela, Te na ko maira te Atu ra ko Iehova; kare no kotou i akaperaʼi au, e te ngutuare o Iseraela, no toku nei ra ingoa tapu, i tei akaviiviiia e kotou i rotopu i te au etene, i te ngai i aereia e kotou na.

23 E akatapu oki au i toku ingoa maata, i tei akaviiviiia i rotopu i te au etene, i tei viivii ia kotou i rotopu ia ratou; e kite oki te au etene e ko Iehova au, te tuatua maira te Atu ra ko Iehova, kia akatapuia au i roto ia kotou ki mua i to ratou mata.

24 E rave mai oki au ia kotou mei roto mai i te au etene ra, e e akaputuputu au ia kotou mei roto mai i te au enua katoa ra, e e arataki au ia kotou ki to kotou uaorai enua.

25 Ei reira au e pîpî ei i te vai areare ki runga ia kotou, e mā akera kotou: ka tamā oki au ia kotou i to kotou au viivii katoa, e i to kotou au idolo ravarai.

26 Ei ngakau ou taku e o atu ia kotou na, e ei vaerua ou taku e tuku ki roto ia kotou: e naku e kiriti i te ngakau toka i roto i to kotou kopapa, e naku e oronga i te ngakau maru ia kotou.

27 E naku e tuku i toku vaerua ki roto ia kotou, e e aratakiia kotou e au na taku ra au akonoanga, e ka akono kotou i taku ra au tuatua-tau, e na kotou e rave.

28 Ka noo oki kotou ki runga i te enua taku i o atu no to kotou ai metua ra: e ei tangata kotou noku, e ei Atua oki au no kotou.

29 E naku kotou e akaora i to kotou au mea viivii ravarai: e naku e kapiki ki te sitona, e naku e akamaata i te reira, e kare au e tuku atu i te onge ki runga ia kotou.

30 E naku e akamaata i te ua o te rakau, e tei tupu i te kainga ra, kia kore kotou e akakino akaouia e te au etene i te onge.

31 Ei reira kotou e akamaaraʼi i to kotou uaorai au aerenga kino, e ta kotou au ravenga tei kore i meitaki, ka akaviivii oki kotou ia kotou uaorai no to kotou au kino, e no ta kotou au mea viivii.

32 Kare ra no kotou i akaperaʼi au nei, te tuatua maira te Atu ra ko Iehova, kia kite mai oki kotou: kia akama oki kotou, e kia aringaringa i to kotou uaorai au aerenga, e te ngutuare o Iseraela e.

33 Te na ko maira te Atu ra ko Iehova, I te rā e mā ai kotou iaku i to kotou au kino ravarai, ka akanoo au ia kotou ki roto i te au oire, e ka patuia te au ngai pou.

34 E te enua tanea ra, e tanuia ïa, ko tei vai tanea uaia oki ki mua i te aro o te aronga ravarai i na reira i te aere.

35 E ka tuatua ratou e, Ko taua enua nei tei vai tanea ua ra, kua riro ïa mei te kainga ra mei ia Edene; e te au oire i pou, e i tanea, e i uritumuia na, kua koroia ïa, e kua tangataia.

36 Ei reira te au etene i toe ia kotou e pini ua ake e kite ei e, naku na Iehova i patu i te au ngai i uritumuia ra, e i tanu i tei tanea ra: ko au ko Iehova i tuatua ra, e naku e rave.

37 Te na ko maira te Atu ra ko Iehova; E kimiia ra au e te ngutuare o Iseraela, kia akapera au ia ratou ra: e akamaata oki au i te tangata ia ratou mei te anana ra.

38 Mei te anana tapu ra, mei te anana i Ierusalema i te au oroa tapu nona ra; mei te reira te au oire i pou e ki i te anana tangata nei: e kite oki ratou e ko Iehova au.