Ioane

8 AERE aturā Iesu ki runga i te maunga i Oliveta.

2 E i te popongi roa ra, kua oki akaou maira aia ki roto i te iero ra, e kua aere katoatoa maira te tangata kiaia ra; noo iora aia ki raro, apii atura ia ratou.

3 Kua arataki maira te au tata tuatua e te au Pharisea kiaia i tetai vaine, i rokoia atu te raveia ra: kua tuku maira ratou iaia i rotopu;

4 Kua tuatua maira ratou kiaia, E te Orometua, rokoia atu teianei vaine te rave mouia ra.

5 I tuatua maira oki a Mose ki roto i te ture e, ka peî i te reira i te toka; eaa taau tuatua?

6 I pera mai ratou i te tapikipiki anga mai iaia, kia rauka ta ratou tapepe anga mai iaia. Kua piko iorā Iesu ki raro, kua tata iora tona rima ki runga i te one.

7 Kua tamou nui maira ratou i te ui anga mai kiaia; tu akera aia ki runga, kua karanga atura kia ratou, Na te tangata ara kore i roto ia kotou na, e peî atu i te toka mua kiaia.

8 Kua piko akaou iora aia ki raro, tata iora aia ki runga i te one.

9 E kite akera ratou i taua tuatua ra, akaapa iora ia e to ratou uaorai akava-ngakau, kua unui taki tai ua atura ratou, ko te tangata pakari tei na mua na, e tae ua atura ki te tangata openga; toe iora ko Iesu anake ma taua vaine ra, i te tu ua anga i rotopu.

10 Kua tu akerā Iesu ki runga, e kite atura, kare ua e tangata, mari ra ko taua vaine anake ra, kua tuatua aia kiaia, E maine, teiea te aronga i tapepe mai ia koe na? kare ua e tangata i akautunga mai ia koe nei?

11 Kua tuatua maira aia, Kare ua, e te Atu. Kua karanga aturā Iesu kiaia, Kare katoa au e akautunga ia koe: ka aere, auraka ra e ara akaou.

12 Kua karanga akaou aturā Iesu ki te tangata, na ko atura, Ko au te mārama o teianei ao: ko te aru mai kiaku nei, kare aia e aere ua i te poiri, e mārama ora tona.

13 Kua patoi maira te au Pharisea kiaia, Te tuatua nei koe ia koe uaorai; kare taau tuatua e akatikaia.

14 Kua karanga aturā Iesu, na ko atura kia ratou, Tuatua ua rai au iaku uaorai, ka tika rai taku tuatua: kua kite oki au i te ngai no reira au nei, e te ngai taku e aere nei; kare kotou i kite i te ngai no reira mai au nei, e te ngai taku e aere nei.

15 No te kopapa ta kotou akaapa anga, kare au e akaapa ua atu i tetai.

16 E kia akaapa oki au ra, ka tika taku akaapa anga: kare oki e ko au anake teia, ko au ra ma te Metua katoa, ko tei tono mai iaku nei.

17 Kua tata katoaia ki roto i ta kotou ture ra e, kia akatika mai nga tangata toko rua ra, e tuatua-mou ïa.

18 Ko au oki tetai i akatika iaku uaorai, e te Metua oki, ko tei tono mai iaku mei, tetai i akatika katoa mai iaku nei.

19 Kua ui maira ratou kiaia, Teiea ua toou Metua? Kua karanga aturā Iesu, Kare kotou i kite iaku, e toku Metua katoa; naringa kotou i kite iaku ra, kua kite katoa ïa kotou i toku Metua.

20 I te vairanga apinga te tuatua anga a Iesu i teianei au tuatua, i tana apii anga i roto i te iero ra: e kare rava e tangata i rave atu iaia, kare akerai i tae ki tona ora mou.

21 Kua karanga akaou aturā Iesu kia ratou, Te aere ke nei au, e kimi kotou iaku, e ka mate kotou ma ta kotou ara katoa: kare kotou e tae ki te ngai taku e aere nei.

22 Kua na ko akera te ngati Iuda, Ka ta ainei aia iaia uaorai, i karanga mai ei e, Kare kotou e tae ki te ngai taku e aere nei?

23 Kua karanga atura aia kia ratou, No raro nei kotou; no runga au: no teianei ao kotou; kare au no teianei ao.

24 I karanga atu ei au kia kotou e, Ka mate kotou ma ta kotou ara katoa: kia kore kotou e akarongo e, ko au ra, ka mate rai kotou ma ta kotou ara katoa.

25 Kua ui maira ratou kiaia, Koai oki koe na? Kua karanga aturā Iesu, Ko taku oki i karanga atu kia kotou i muatangana.

26 Te vai nei taku tuatua e taku akatau anga ia kotou e manganui: ko tei tono mai iaku nei ra, e tuatua-mou tana; e te tuatua nei au ki to te ao nei i te au tuatua taku i akarongo iaia ra.

27 Kare ratou i kite e, ko te Metua tana i tuatua ra.

28 Kua karanga aturā Iesu kia ratou, Kia akateiteiia e kotou te Tamaiti a te tangata nei, ei reira kotou e kite ei e, ko au ïa, e kare aku peu rave ua; ko ta taku Metua ra i apii mai iaku ra, ko taku ïa e tuatua nei.

29 Ko tei tono mai iaku nei, tei vaitata uaorai ïa iaku nei; kare te Metua i akaruke ua iaku nei ko au anake ra; kare oki au i tukumoe i te rave i te mea e mareka mai ei aia.

30 Kia akapera atura aia i te tuatua anga i teianei au tuatua, maata ua maira te tangata i akarongo iaia.

31 Kua karanga aturā Iesu ki te ngati Iuda i akarongo mai iaia ra, I tāpu tika kotou i taku tuatua, e pipi tikai kotou naku i reira:

32 Ka kite ïa kotou i te tuatua-mou, e na te tuatua-mou kotou e akarangatira.

33 Kua tuatua maira ratou kiaia, E tamariki matou na Aberahama, kare ua matou i riro ei tuikaa na etai ke: eaa koe i tuatua mai ei e, Ka akarangatiraia kotou?

34 Kua karanga aturā Iesu kia ratou, Tika, tika tikai taku e karanga atu kia kotou, Ko te rave i te kino ra, e tuikaa ïa no te kino.

35 Kare oki te tuikaa e noo tamou i te ngutuare; kareka ra te Tamaiti, ka noo tamou ïa i reira.

36 Na te Tamaiti kotou e akarangatira ra, kua rangatira tika ïa kotou.

37 Kua kite au e, e tamariki kotou na Aberahama: te umuumu mai nei ra kotou iaku e ta, no te mea kare o taku tuatua e vairanga i roto ia kotou na.

38 Te tuatua nei au i te tuatua taku i kite i toku Metua; e te akono na oki kotou i ta kotou i kite i to kotou metua.

39 Kua tuatua maira ratou kiaia, na ko maira, Ko Aberahama to matou metua. Kua karanga aturā Iesu kia ratou, Naringa kotou ei tamariki na Aberahama ra, e akono ïa kotou i ta Aberahama ra tuatua.

40 I tenana ra, te umuumu mai nei kotou iaku e ta, i te tangata i akakite atu kia kotou i te tuatua-mou, i taku i kite i te Atua ra: kare uā Aberahama i akapera.

41 Te akono na kotou i te tuatua a to kotou metua. Kua tuatua maira ratou kiaia, Kare matou i ta te akaturi i anau: okotai rai o matou metua, ko te Atua.

42 Kua karanga aturā Iesu kia ratou, Naringa ko te Atua to kotou metua ra, kua anoano mai kotou iaku: no reira oki au nei, mei reira mai au i te Atua ra; kare oki au i aere ua mai, nana oki au i tono mai.

43 Eaa kotou i kore ei i kite i taku tuatua? no te mea, kare e tika ia kotou i te akarongo i taku tuatua.

44 Ko te diabolo to kotou metua, i akatikaʼi kotou i te anoano o to kotou metua ra. E ta tangata aia mei ito mairai, kare aia i mou i te tuatua-mou, no te mea kare e tuatua-mou o roto iaia. Kia tuatua aia i te pikikaa ra, kua tuatua aia i tei tau iaia uaorai: e pikikaa aia, e e metua oki no te pikikaa.

45 No te mea e tuatua-mou taku i karanga atu nei, i kore ei kotou i akarongo mai iaku.

46 Koai to kotou e akakite i taku pikikaa? E e tuatua-mou taku ra, eaa kotou i kore ei i akarongo mai iaku nei?

47 No te Atua aia ra, ka akono ïa i ta te Atua tuatua: kare kotou i akono, no te mea kare kotou i to te Atua.

48 Kua tuatua maira te ngati Iuda kiaia, na ko maira, Kare ainei te tuatua-tika ta matou i karanga nei e, no Samaria koe, e e demoni toou?

49 Kua karanga aturā Iesu, Kare oku e demoni; te akangateitei nei ra au i taku Metua, e te akakino nei oki kotou iaku.

50 Kare oki au i kimi i toku uaorai kakā. te taka atura tei kimi i te reira, nana rai e akono.

51 Tika, tika tikai taku e karanga atu kia kotou, Ko te akono i taku ra tuatua, kare rava aia e kite i te mate.

52 Kua tuatua maira te ngati Iuda kiaia, Kua kite atura matou e, e demoni tikai toou. Kua mate oki a Aberahama, e te au peroveta katoa; e te tuatua mai na ko e, Ko te akono i taku ra tuatua, kare rava aia e kite i te mate.

53 E maata ua aina koe ia Aberahama i to matou metua i mate ra? e te au peroveta katoa oki kua mate: koai koe na i toou maara anga?

54 Kua karanga aturā Iesu, Kia akameitaki au iaku uaorai, e akameitaki anga marikonga kore taku: ko toku Metua tei akameitaki mai iaku; ko ta kotou i tuatua na e, e Atua no kotou:

55 Kare kotou i kite iaia; kua kite ra au iaia: naringa au i na ko ana e, Kare au i kite iaia, kua riro au ei pikikaa mei ia kotou katoa na: kua kite ra au iaia, e te akono nei au i tana tuatua.

56 I rekareka ana oki to kotou metua ko Aberahama i toku nei tuatau kia kite aia: e kite atura, e mareka atura oki.

57 Kua tuatua maira te ngati Iuda, Kare akera i tae i te rima o te ngauru anga i toou mataiti, e kua kite oki koe ia Aberahama?

58 Kua karanga aturā Iesu kia ratou, Tika, tika tikai taku e karanga atu kia kotou, Kare a Aberahama i anau ra, TE NOO NEI AU.

59 Kua rave iora ratou i te toka e peî iaia: akangaro ua iorā Iesu, na rotopu atura ia ratou te aere, aere atura ki vao mai i te iero ra, aere atura.