Salamo

86 E ARIU mai i to taringa, e Iehova, e akarongo mai iaku: kua tumatetenga oki au e te putaua.

2 E tiaki koe i toku vaerua, kua tapu oki au; kia ora, e taku Atua, to tavini i irinaki ia koe nei.

3 E aroa mai koe iaku, e te Atu; te kapiki atu nei au ia koe, kare e rā e tukua.

4 E akarekareka mai i te vaerua o to tavini; te apai atu nei au i toku vaerua kia koe, e taku Atu e.

5 Te meitaki ra oki koe, e te Atu, e kua tika ia koe i te akakore mai i te ara nei, e te aroa maata i te aronga katoa e kapiki atu ia koe.

6 E akarongo mai, e Iehova, i taku pure, e akono mai i te reo o taku patianga.

7 I te rā e tumatetengaʼi au ra e kapiki rai au ia koe ra; ka akarongo mai oki koe iaku nei.

8 Kare oou e aite, e te Atu, i roto i te au atua ra, kare oki e angaanga e arite ki taau ra angaanga.

9 Te pa enua ravarai i angaia e koe ra, ka tae mai ïa e akamori ia koe, e te Atu, ka akakakāʼi i toou ra ingoa.

10 E maata oki koe, e te angaanga taka ke taau e rave ra: ko koe te Atua, ko koe anake ra.

11 E apii mai koe, e Iehova, i toou ra arataa, kia aere au i taau ra tuatua-mou; kia tavaitai toku ngakau i te mataku anga i to ingoa.

12 Ka akameitaki rai au ia koe, e te Atu ra, e taku Atua, ma toku ngakau katoa ra; e akakakā rai au i to ingoa e tuatau ua atu.

13 Kua maata oki toou aroa iaku; kua akaora oki koe iaku i ade i raro roa ra.

14 E te Atua e, kua tu mai te aronga nengonengo ki runga iaku; e te uipa anga o te aronga takinga-kino tei kimi mai iaku kia mate; kare oki ratou i tuku ia koe ki mua ia ratou ra.

15 Ko koe ra, e te Atu, e Atua takinga-meitaki koe e te aroa, te akakoromaki roa, e maata oki i te tangi e te tuatua-mou.

16 E akono mairai koei iaku, e e aroa mai; o mai ana i toou ra maroiroi ki to tavini nei, kia ora oki te tamaiti a to tavini vaine nei.

17 E akakite mai koe i tetai akairo ei meitaki noku, kia kite mai te aronga i makitakita mai iaku nei, ka akama atu ei; ko koe oki, e Iehova, tei tauturu mai iaku, e tei akapumaana mai iaku.