Mataio

17 E PO ono akera, kua arataki aturā Iesu ia Petero, ia Iakobo, e tona taeake ia Ioane, ki runga i tetai maunga teitei, ko ratou anake ra.

2 E akatu keia aia ki mua ia ratou; kakā atura tona mata mei te rā ra, teatea atura tona kakau mei te mārama ra.

3 E i na, kua mama mairā Mose raua ko Elia ia ratou ra, i te tuatua anga mai kiaia.

4 Kua karanga aturā Petero kia Iesu, na ko atura, E te Atu, e mea meitaki kia noo tatou i ko nei: kia tika ia koe, e akatu matou i e toru are puakapa i ko nei; noou tetai, no Mose tetai, no Elia oki tetai.

5 E te tuatua ra aia, i na, tapokiia maira ratou e tetai tiao kakā: e i na, tetai reo maira no roto i taua tiao ra, na ko maira, “Ko taku Tamaiti akaperepere teia, kua mareka rava au iaia; e akarongo kotou iaia.”

6 E kite akera te au pipi i te reira, kua tipapa iora ki raro te mata, mataku roa akera.

7 Kua akavaitata mairā Iesu, kua akatukia maira ia ratou, tuatua maira, Ka tu, auraka e mataku.

8 E kia akara akera to ratou mata ki runga, kare ua e tangata i kitea, ko Iesu anake ra.

9 E tei to ratou eke anga mai mei runga mai i te maunga, kua ako aturā Iesu ia ratou, na ko atura, Auraka e akakite atu ki tetai tangata ta kotou i kite nei, e kia tu akaou te Tamaiti a te tangata nei mei te mate maira.

10 Kua ui maira tana au pipi kiaia, na ko maira, Eaa i tuatua mai ei te au tata tuatua e, ko Elia na te ka aere mai?

11 Kua karanga aturā Iesu kia ratou, na ko atura, E na mua tikai oki a Elia i te aere anga mai, e akatika i te au mea katoa.

12 E karanga atura au kia kotou, Kua riro mai anā Elia, kare ra ratou i kite iaia, e ta ratou i inangaro ra, kua pera atura ratou kiaia. E na reira oki ratou i te rave i te Tamaiti a te tangata.

13 Kite atura te au pipi ra e, ko Ioane bapetizo tana i tuatua maira.

14 E tae maira ratou ki taua urupu maata ra, kua aere maira tetai tangata, kua tuturi maira ki mua iaia, kua na ko maira,

15 E te Atu, e aroa mai koe i taku tamaiti; e neneva oki aia, e maki maata tona; e manganui tona inga anga ki roto i te ai, e ki raro oki i te vai.

16 I apai naia e au ki te au pipi naau nei, e kare aia i ora ia ratou.

17 Kua karanga aturā Iesu, na ko atura, Aue ïa uki māro, e te akarongo kore e! mei te aa te roa o toku noo anga ki o kotou nei? mei te aa te roa o toku akakoromaki anga atu ia kotou? e arataki mai iaia kiaku nei.

18 Kua kauvae aturā Iesu i taua demoni ra; aere atura aia ki vao; ora takiri akera taua tamaiti ra i reira ra.

19 Kua aere poiri maira te au pipi ia Iesu i reira ra, na ko maira, Eaa i kore ei i tika ia matou nei kia tuaru atu iaia ki vao?

20 Kua karanga aturā Iesu kia ratou, No to kotou akarongo kore; tikai taku e karanga atu kia kotou nei, Angairi e akarongo to kotou mei tetai ua sinapi nei, ka tika ia kotou kia karanga atu ki teianei maunga, Ka aere i ko atu; e nana e aere ua; e kare rava e mea e kore e tika ia kotou.

21 Kare ra teianei tu demoni e tae ua ki vao, mari ra i te pure ma te akakore anga i te kai.

22 E tei Galilea ratou, i karanga atu ei a Iesu kia ratou, E riro te Tamaiti a te tangata nei i te tukuia atu ki te rima tangata;

23 E e ta takiri ratou iaia, e akatu akaouia ra aia kia tae ki te po toru ra. Taitaia rava atura ratou.

24 E tae atura ratou i Kaperenauma, kua aere maira te aronga e akaputuputu i te diderama kia Petero, na ko maira, Te oronga nei aina to kotou orometua i te diderama?

25 Kua karanga atura aia, A. E tae atura aia ki roto i te are, ko Iesu ana te tuatua mai, na ko maira, Eaa toou manako, e Simona? ei iaai ra te ui ariki no teianei ao e umuumu atu ei i te apinga uipa e te telo? Ei ta ratou uaorai tamariki aina, e ei te tangata ke aina?

26 Kua karanga aturā Petero kiaia, Ei te tangata ke. Kua tuatua mairā Iesu kiaia, Kua ora mari te tamariki.

27 E aere atura koe ki te pae roto, e titiri atu ei i tetai matau, ka uuti mai ei i te ika muatangana i kai ra; e kia aae koe i te vaa ra, e kitea ia koe tetai setatera, ko taau ïa e apai atu ia ratou na taua katoa, ko te kinokino mai aea ratou ia tatou nei.