Salamo

5 E AKARONGO mai, e Iehova, i taku tuatua, e akono mai i toku nei ngunguru anga:

2 E akarongo mai i toku kapiki anga, e taku ariki, e taku Atua; te pure atu nei oki au ia koe.

3 Te kite maira koe, e Iehova, i toku reo i te popongi; ei te popongi au e akataka atu ei i taku pure kia koe ma te tapapa marie.

4 Kare oki koe i te Atua e mareka mai i te kino; kare oki o te kino ra e noo anga ia koe.

5 Kare oki te neneva e mou i mua ia koe; te riri ra koe i te aronga katoa i rave i te mea tika kore ra.

6 Ka pou te aronga pikikaa ia koe: ko te ta tangata ra, e te tangata pikikaa ra, ko ta Iehova ïa e rikarika.

7 Kareka au nei, no te aroa maata noou ra, e tae atu rai au ki toou are, ka akamori ei ma te mataku ia koe i to nao tapu ra.

8 Ka arataki koe iaku, e Iehova, i taau ra tuatua-tika; no toku au enemi nei, e akatikaoru ua i to arataa i mua iaku.

9 Kare roa e tuatua-mou o roto i to ratou vaa; ko te kino anake ra to roto ia ratou: mei te vaarua turuma i tuera ua ra to ratou karaponga: e na to ratou arero e pikikaa mai.

10 Ei tangata ara ratou ia koe, e te Atua; e kia inga ratou i ta ratou uaorai tuatua; e no ta ratou ara e manganui e akaruke ke atu koe ia ratou, kua kaitamaki oki ratou ia koe.

11 Ko te aronga katoa ra e irinaki ia koe ra, kia rekareka ïa, kia akateitei i te reo i te rekareka auraka kia mutu, no te mea, ko koe te tiaki ia ratou; e te aronga katoa i inangaro i to ingoa ra, kia rekareka anake ïa ia koe:

12 No te mea naau oki, e Iehova, i akameitaki i te tangata tuatua-tika ra, e kua akapiniia aia e to aroa mei te paruru ra.