Ieremia

10 E AKARONGO mai i te tuatua ta Iehova e tuatua nei kia kotou, e te ngutuare o Iseraela e:

2 Te na ko mairā Iehova, Auraka kotou e apii i to te au etene ra aerenga, e auraka e mataku i te au akairo o te rangi ra; kua mataku oki te au etene i te reira.

3 E akonoanga puapinga kore anake ta te au tangata ra: e rakau tipuia no roto i te vaorakau ra, te angaanga ïa a nga rima o te taunga ki te tapae.

4 Kua akamanea oki ratou i te reira ki te ario e te auro; kua akamou oki ratou i te reira ki te nairo e te amara, kia kore e ngaueue.

5 Kua tu a nu tamara i angaia ra kare ra e tuatua mai: e apapai aereia ratou e tikaʼi, kare oki e tika ia ratou kia aere ua. Auraka e mataku atu ia ratou, kare oki e tika ia ratou kia takinga-kino mai; kare rai oki o roto ia ratou kia takinga-meitaki mai.

6 Kare oki oou e aite, e Iehova e; te maata ra koe, e te maata ra toou ingoa i te mana.

7 Koai tei kore e mataku ia koe, e te ariki o te pa enua e? e mea tau ïa oki ia koe; kare oki tetai, i to ratou aronga pakari katoa i te pa enua ra, e to ratou au basileia katoa, e aite kia koe.

8 Kua auouo ua ratou ravarai, e te neneva: e apii anga puapinga kore to te rakau.

9 E ario tupakiia tei apaiia mai mei Taresisa mai, e te auro mei Uphaza mai, te angaanga a te taunga, e a nga rima oki o te taunga akato ra: e kakau uriuri e te kerekere to ratou: te angaanga anake ïa a te aronga karape.

10 Ko Iehova ra te Atua mou, koia te Atua ora, e te ariki au mutu kore: i tona riri e ruketekete ei te enua, kare e tika kia akaruru mai te pa enua i tona riri maata.

11 E akapera ta kotou tuatua anga atu kia ratou, Ko te au atua kare i anga i te au rangi ma te enua nei, e pou anake ïa i runga i te enua nei, e i raro ake i teianei au rangi.

12 Nana i anga te enua i tona mana, e nana i akamou te ao katoa nei i tona ra pakari, e i tona kite i totoaʼi aia i te au rangi ra.

13 Kua tuatua anake tona reo, kua maata ua atu te vai ki runga i te au rangi, e akapeke mai aia i te manu mei te openga mai o te enua nei; e nana e akatupu i te uira ma te ua, e kua apai mai aia i te matangi no roto i tona au vairanga.

14 Kua auouo anake te au tangata i te kite kore, kua akama te au taunga akato ravarai i te tiki: e pikikaa oki tona idolo akatoia ra, kare oki e aʼo o roto ia ratou.

15 E puapinga kore ua ratou, e angaanga na te tareva ke: i te tuatau e tutakiiaʼi ratou ra, ka pou ïa ratou.

16 Kare te Tuanga a Iakoba i aite ki te reira: ko te Taunga oki aia no te au mea katoa; e ko Iseraela te aite o tana tuanga: ko Iehova Sabaota tona ingoa.

17 E akaputu na i taau au apinga i te enua nei, e tei noo ki roto i te punanga e.

18 Te na ko maira oki a Iehova; I na! i teianei e maka atu ei au i te tangata no teianei enua e e tairo oki au ia ratou, e ka kite oki ratou.

19 E ae oki au, i toku tumatetenga e! kua mamae toku puta: kua tuatua akera au e, E tumatetenga tikai oki teia, e kia akakoromaki au e tikaʼi.

20 Toku are puakapa, kua pou ïa, e kua motumotu taku au taura ravarai; kua aere ke atu na aku tamariki iaku nei, e kare nei ratou: kare ua tetai kia patia akaou i toku are puakapa, e kia akatu i toku paruru.

21 Kua auouo te au tiaki, e kare akera i kimi ia Iehova: i kore ei ratou i manuiaʼi, e ta ratou anana katoatoa kua pueurikiriki keia.

22 I na, te aruru o te rongo kua tae maira, e mutamuta maata ua atu mei te enua maira mei apatokerau, ei akatanea i te au oire o Iuda, ei vaaru no te au taae.

23 Kua kite oki au, e Iehova e, e kare tei te tangata uaorai tona aerenga: kare tei te tangata e aere nei, i te akono i tona uaorai takainga tapuae.

24 E pāpā mai iaku, e Iehova e, ma te tuatua-tau ra, auraka ma to riri, ko te kore roa aea au ia koe.

25 Ka riringi atu koe i to riri otooto ki runga i te pa enua, tei kore i kite ia koe, e ki runga i te au kopu-tangata kare i kapiki ki toou ingoa: kua pou oki a Iakoba i te kaingaia e ratou, kua pou takiri, e kua akatanea ratou i tona nooanga.