Salamo
147 ALELU Ia. E mea meitaki oki te imene akameitaki i to tatou Atua; e mea mataora oki ïa; e mea tau te akameitaki. 2 Ko Iehova tei patu ia Ierusalema; nana e akaputuputu i te Iseraela i pueurikiriki ke ra. 3 Kua rapakau aia i te aronga ngakau paruparu ra, e kua tākai i to ratou au puta. 4 Kua ope te au etu i te tatauia e ia; nana i tapa i to ratou katoa ra au ingoa. 5 E maata to tatou Atu, e te mana maata; tona kite, e mea kitea koreia kia kimi. 6 Te akateitei nei a Iehova i tei akaaka ra, te titiri nei ra i te aronga kino ki raro i te one. 7 E imene ma te akameitaki ia Iehova; e imene ma te kinura i to tatou Atua; 8 Ko tei tapoki i te rangi ki te au tumurangi ra: ko tei akono i te ua no te enua. Ko tei akatupu i te ngangaere ki runga i te au maunga: 9 Te angai nei aia i te au puaka ki te kai, e ta te orebi ou e kapiki atu iaia ra. 10 Kare aia e rekareka i te maroiroi o te oroenua ra; kare aia e mareka i te vaevae tangata ra. 11 E tau rā Iehova ki te aronga e mataku iaia ra, ki te aronga e irinaki ki tona aroa. 12 E akameitaki ia Iehova, e Ierusalema; e akapaapaa i to Atua, e Ziona. 13 Koia tei akaketaketa i te au tea o toou ra au ngutupa; e kua akameitaki i taau au tamariki i roto ia koe. 14 Nana i akatupu i te au i toou ra au kotinga; e kua akamerengo ia koe ki te sitona meitaki maata. 15 Kua akau aia i tana tuatua i te enua nei: te oro viviki nei tana tuatua. 16 Kua oronga mai aia i te kiona mei te uru-mamoe ra; te akapueurikiriki ke nei i te kephura mei te reu ai ra. 17 Kua uri ua aia i tona vai toka ngaangaa ra ki raro: koai tei mou ki mua i te anu nana? 18 Kua tuku mai aia i tana tuatua, e kua taravai iora ratou; kua akaarara maira aia i te matangi, kua taʼe iora te vai. 19 Kua akakite aia i tana tuatua kia Iakoba; i tana au akonoanga e tana au tuatua-tau kia Iseraela. 20 Kare aia i pera ki te pa enua ravarai: e tana ra au tuatua-tau, kare ïa ratou i kite. Alelu Ia.