Genese

14 TEI taua tuatau ra to te ariki o Sinara to Ameraphela, e te ariki o Elasara ko Arioka, e te ariki o Elama ko Kedalaoma, e te ariki o Goima ko Tidala,

2 Tamaki anga mai i te ariki o Sodoma ia Bera, e te ariki oki o Gomora ko Beresa, e te ariki o Adama ko Sinaba, e te ariki o Zeboima ko Semebera, e te ariki oki o Bela, koia ko Zoara nei.

3 Kua kuku anake iora ratou i te ngai maniania ra i Sidima, koia te Tai Taitai nei.

4 Raungauru akera o ratou mataiti, e rua ara, i raro ake ia Kedalaoma, e tae akera ki te ngauru ma toru o te mataiti, kua kaitamaki iora ratou.

5 E tae akera ki te ngauru ma o te mataiti, kua aere mairā Kedalaoma, e te au ariki i tau mai kiaia, kua ta iora i te aronga roangarere i Aseterota-Karenaima, e te Zuzi i Hama ra, e te Emi i Save-kiritaima,

6 E te ngati Hori i to ratou maunga i Seira, e tae roa atura ki Eleparana, i te pae medebara ra.

7 E oki atura ratou, e tae atura ki Ena-misipata, koia Kadesa nei, e tairipoti roa akera te enua o te ngati Amaleka, e to te ngati Amori katoa, i noo i Hazezona-tamara.

8 E te ariki o Sodoma, e te ariki o Gomora, e te ariki o Adama, e te ariki o Zeboima, e te ariki o Bela, koia ko Zoara nei, aere katoa atura ki taua ngai maniania ra ki Sidima, e kua akamou i te tamaki kia ratou,

9 Ki te ariki o Elama kia Kedalaoma, e te ariki o Goima kia Tidala, e te ariki o Sinara kia Ameraphela, e te ariki o Elasara kia Arioka; toko a ariki ki e toko rima ra.

10 E kua ki rava akera taua ngai maniania ra i Sidima ra, i te vaarua hemera; e ati iora nga ariki no Sodoma, e no Gomora, e manganui tei mate i reira; e oro atura tei toe ki runga i te maunga.

11 E rave iora tei autu i te apinga tini ravarai o to Sodoma, e to Gomora, e ta ratou kai katoa e ope roa akera, e aere atura.

12 E te tamaiti a te tuakana o Aberama ra ko Lota, (i Sodoma oki tona nooanga,) e tana katoa ra au apinga i te aō katoa anga atu, ka aere ei ratou.

13 E kua aere maira tetai tangata i ora maira, kua akakite maira kia Aberama ngati Ebera, i noo i te au ale i o Mamera ngati Amori ra, e taeake oki no Esekola raua ko Anera; ko tei kapiti katoa kia Aberama ra.

14 E kite akerā Aberama e, kua riro tona taeake, kua akaputuputu iora aia i tona au tangata i apiiia ra, i tei anau i tona uaorai ngutuare, e toru anere okotai ngauru e varu ara, e aru atura i te enemi e tae roa atura ki Dana.

15 E kua akataka atura aia i tona au tavini, e tamaki ia ratou i te po, kua ta roa atura ia ratou, e aruaru roa atura, e tae atura ki Hoba, ki te pae kaui i Damaseko ra.

16 E kua akaoki maira aia i te apinga ravarai, e tona taeake ia Lota, e tana ra apinga, e te au vaine, e te au tangata ra, ko tana ïa i akaoki maira

17 E i tona oki anga mai mei te tainga mai ia Kedalaoma, e te ui ariki i kapiti katoa kiaia ra; aere atura te ariki o Sodoma e aravei atu iaia i te o ra i Save, koia te o o te ariki ra.

18 E kua apai atura oki te ariki o Salema, ko Melekizedeka, i te areto e te wina: e taunga oki aia na te Atua teitei.

19 Kua akameitaki atura aia iaia, na ko atura, Kia akameitakiiā Aberama e te Atua teitei, te Pu o te rangi e te enua nei:

20 E kia akameitakiia oki te Atua teitei, ko tei tuku mai i toou au enemi ki toou rima na. Kua tuku mairā Aberama i te ngauru i taua au apinga katoa ra nona.

21 E kua karanga atura taua ariki o Sodoma ra kia Aberama, E tuku mai te au tangata kiaku nei, e tāpu atu i te apinga ra noou uaorai.

22 E kua tuatua maira Aberama ki taua ariki o Sodoma ra, Kua taputou au ki te Atua teitei ra, kia Iehova, ki te Pu o te rangi e te enua nei,

23 Kare au e rave ua atu i tetai manga taura iti i te apinga ravarai naau na, e tae ua atu ki tetai taura iti i tamaka ra, ko te tuatua aea oki koe, E apinga maata ta Aberama iaku:

24 Mari ra i tei keangaia e te au tangata ou nei, e te tuanga a te au tangata i aere katoa ra, ta Anera, ta Esekola, e ta Mamera; ka rave ratou i ta ratou tuanga.