2 Paraleipomeno

11 E TAE akerā Rehoboama ki Ierusalema, kua akaputuputu iora i to te ngutuare o Iuda e to Beniamina, okotai anere e varu ngauru i te tausani, ko te aronga toa i ikiia ïa, e tamaki ia Iseraela, e akaoki mai i te au kia Rehoboama.

2 Kua tae maira te tuatua a Iehova ki te tangata no te Atua kia Semaia, na ko maira,

3 E karanga atu ki te ariki o Iuda kia Rehoboama, te tamaiti a Solomona, e kia Iseraela katoa i o Iuda e i o Beniamina, e na ko atu,

4 Te na ko mairā Iehova, Auraka kotou e tae, auraka oki e tamaki ki to kotou ai taeake; ka oki te tangata ravarai ki tona uaorai ngutuare, naku oki taua mea nei. Kua akarongo akera ratou i te au tuatua a Iehova, e kua oki, kare i tamaki ia Ieroboama.

5 Noo iorā Rehoboama i Ierusalema, e kua patu i te au oire ei punanga i Iuda ra.

6 Kua patu aia ia Betelehema, e ia Etama, e ia Tekoa,

7 E ia Bete-zura, e ia Soko, e ia Adulama,

8 E ia Gata, e ia Maresa, e ia Zipha,

9 E ia Adoraima, e ia Lakisa, e ia Azeka,

10 E ia Zora, e ia Aialona, e ia Heberona, e aronga oire akaketaketaia i o Iuda ra, e i o Beniamina.

11 E kua akaketaketa atura aia i te au punanga ra, kua tuku oki i te aronga rangatira i roto i te reira, e te kai maata, e te inu, e te wina.

12 E kua tuku oki aia i te au paruru e te au korare i roto i taua au oire ra, e ketaketa rava atura iaia: tei iaia oki Iuda e Beniamina.

13 Ku aere ua maira te kau taunga e te ngati Levi i o Iseraela katoa ra kiaia, mei to ratou au tapere katoa ra.

14 Kua akaruke iora oki te au ngati Levi i to ratou au pae, e to ratou au kainga, e kua aere tika mai ki Iuda e Ierusalema: no te mea kua akarukeia ratou e Ieroboama e te au tamariki nana, auraka ratou e rave i te taoonga taunga ia Iehova:

15 E kua akatakaia e ia uaorai te aronga taunga no te au ngai teitei, e no te au demoni, e no te au punua puakatoro i te angaia e ia ra.

16 E te taka atura oki te aronga i akamou i to ratou ngakau i te kimi i te Atua o Iseraela ia Iehova, no roto i te au kopu katoa o Iseraela, ko tei aere katoa ki Ierusalema, e apai i te atinga ki te Atua o to ratou ai metua ra kia Iehova.

17 Ketaketa atura te basileia o Iuda ia ratou, maroiroi atura oki a Rehoboama te tamaiti a Solomona, e toru akera mataiti: ka toru akera oki o ratou mataiti i te aere anga na te arataa o Davida e ia Solomona.

18 Kua rave iorā Rehoboama ia Mahalata, te tamaine na Ierimota, te tamaiti na Davida, ei vaine nana, e ia Abihaila, te tamaine na Eliaba, te tamaiti na Iese;

19 E kua anau te tamariki nana; ko Iehusa, e ko Semaria, e ko Zahama,

20 E muri ake iaia, kua rave iora ia Maaka, te tamaine na Abasaloma; e kua anau maira tana ko Abia, e ko Atai, e ko Ziza, e ko Selonita.

21 E maata to Rehoboama inangaro ia Maaka, i te tamaine a Abasaloma, i te au vaine ravarai nana, e te au vaine tavini nana ra; (okotai ngauru ma varu oki ana vaine, e ono ngauru i te vaine tavini; okotai takau ma varu oki ana tamariki tamaroa, e ono ngauru tamaine i anau:)

22 Kua akariro aturā Rehoboama ia Abia te tamaiti a Maaka ei tutara maata i te au taeake nona ra: i manako oki aia e akaariki iaia.

23 E ravenga pakari tana, kua tuku atura i te au tamariki katoa nana ra i te au tapere katoa e pini rava akera Iudea e Beniamina, i te au oire katoa i akaketaketaia ra; e kua akataka aia i te kai e maata ua atura na ratou: e kua kimi iora aia i te au vaine e manganui na ratou.