1 Korinetia

5 I karangaia oki e kanga tei o kotou na, e kanga oki kare rava i kitea ki o te etene katoa ra, tei tetai tangata te vaine a tona uaorai metua tane. 2 E te akanengonengo ua na kotou? kare aina e tau te aue; e kia tuku keia taua tangata i rotopu ia kotou i rave i taua mea ra? 3 Ko au nei ra, taka ke ua mai taku kopapa nei, tei vaitata ua rai toku vaerua, kua akaapa takere ana au i taua tangata i rave i taua mea ra, mei te mea e tei reira tikai au; 4 Kia putuputu kotou ma taku vaerua katoa, ma te mana o to tatou Atu ra o Iesu Mesia, 5 Ka tuku atu kia Satani taua tangata ra, i te ingoa o to tatou Atu ra o Iesu Mesia, kia mate te kopapa, kia ora te vaerua i te rā o te Atu ra o Iesu. 6 Kare to kotou akaktietie i te mea meitaki. Kare kotou i kite e, e opue te putunga katoa i te akaopue mea ngiti ra? 7 E teianei, ka tamā ana i te akaopue taito, kia riro kotou ei putunga ou, kia kore te akaopue ia kotou na: ko te Mesia oki ta tatou pasa i taia ïa na tatou. 8 E teianei, e akono tatou i taua oroa ra, eiaa ma te akaopue taito, eiaa katoa ma te akaopue akamoupuku e te kino, ma te kai akaopue koreia ra, ko te pikikaa kore e te tuatua-mou. 9 Te tata atu nei au i teianei episetole ia kotou na e, auraka kotou e kapiti atu ki te kanga: 10 Auraka ra te au kanga ravarai, e te noinoi apinga, e te āru, e te akamori idolo, o teianei ao ra; naringa oki te reira, e akaruke mai kotou i teianei ao e tika’i. 11 Te tata nei ra au ia kotou e, auraka kotou e kapiti atu i te tangata e karangaia e taeake kia riro ei tangata kanga, e te noinoi apinga, e te akamori idolo, e te akakino, e te kona kava, e te aru; auraka katoa e kai atu i te manga i reira. 12 Eaa taku puapinga kia akaapa atu ki to vao ra? Kare ainei kotou e akaapa atu i to roto na? 13 Kareka to vao ra, na te Atua ïa e akaapa. E tenana e akataka ke atu kotou i taua tangata tuatua kino i roto ia kotou na.