1 Korinetia

8 TE tuatua oki no te au mea akaatingaia na te idolo ra, kua kite tatou, tei ia tatou ravarai te kite. E akaparau anga tei te kite, kareka te aroa, e tamaata ïa i te meitaki.

2 Te manako ra tetai tangata e, kua kite aia ra; kare rava aia i kite, i te kite tau iaia ra.

3 Te inangaro ra tetai tangata i te Atua, koia tei kiteia mai e ia.

4 E teianei, te tuatua i te kai i te au mea i akaatingaia na te idolo ra, kua kite tatou e, e mea puapinga kore te idolo i te ao nei, okotai rava oki Atua kare atu.

5 Vai ua rai oki te au mea e karangaia e e atua, tei te rangi ra, tei reira ïa; tei te enua nei, tei reira ïa; (e manganui oki te atua, e manganui oki te atu, mei te reira te tu,)

6 Kareka ia tatou nei, okotai rava ïa Atua, ko te Metua, no reira mai te au mea katoa nei, e nona oki tatou; okotai oki Atu ko Iesu Mesia, nana te au mea katoa nei, e nana katoa oki tatou.

7 Kare ra teia kite i roto i te tangata ravarai: te kai nei tetai papaki i te au mea i akaatingaia na te idolo, ma te manako i te idolo e e mea tika rai i teianei; e kua viivii to ratou akava-ngakau no te matutu kore.

8 Kare oki tatou e kiteia mai e te Atua i te kai: kare oki e maata to tatou meitaki kia kai; kare katoa to tatou kino e maata kia kore e kai.

9 E matakite ra i teianei mea tika ua ia kotou, ko te riro aea ei turorianga no tei apikepike ra.

10 Kia akara mai oki tetai tangata ia koe i tei kite na, i te kaingakai ki roto i te are o te idolo, kare ainei e riro te akava-ngakau o tei apikepike i te kai mataku kore ua i te atinga a te idolo ra?

11 Kia mate aina taua taeake apikepike i mate ei te Mesia ra, i toou kite?

12 Kia ara ra kotou i te au taeake mei te reira, e mamae iora to ratou akava-ngakau paruparu, kua ara ïa kotou i te Mesia.

13 E teianei kia maitu taku taeake i te kai ra, kare rava au e kai i te puaka e tuatau ua atu, ko te maitu aea taku taeake iaku.