Oraanga Manako Ngakau

TE RIRI

KAVEINGA PIPIRIA: “Te kore e rapurapu i te riri ra, e meitaki maata tona i to te aronga ririnui.”​—Maseli 16:32.

EAA TE AITEANGA: Ka puapingaia tatou me akaaere meitaki tatou i to tatou manako ngakau. Tau rai tetai au riri, inara me kare tatou e matakite ka kino atu te reira. Te akakite maira te aronga kimikimi e i te taime e tupu ra te riri, ka tuatua te aronga riririri i te au tuatua tau kore e a muri mai kua tataraapa.

TAAU KA RAVE: E akatere meitaki i toou riri i mua ake ka akatere ei te reira ia koe. Te manako ra tetai au tangata e e aronga maroiroi te aronga riririri, inara kua kite tatou e e tu paruparu te reira. “Mei te oire koro kore e te ngaangaa ra, koia katoa te tangata kare i akavi i tona uaorai vaerua,” i karanga ai te Pipiria. (Maseli 25:28) Ko tetai mataara meitaki i te akatere i toou riri, koia oki e akara i te tumu i tupu ei te reira. “Na te akono o te tangata i kore ei i riri vave.” (Maseli 19:11) E mea meitaki kia akarongo tatou ki nga tua, te ka oronga mai i te kite pakari ei akatinamou i to tatou manako ngakau.

KIA MAREKA

KAVEINGA PIPIRIA: “E kia mareka oki kotou.”​—Kolosa 3:15.

EAA TE AITEANGA: Kua karangaia e e tangata mataora te tangata mareka ua. E te aronga kua tupu te tumatetenga maata kia ratou te āriki katoa ra i teia. Te karanga ra ratou e ko te mea tei tauturu ia ratou, ko te akamanako anga​—kare ki runga i te tumatetenga tei tupu—​mari ra ki runga i ta ratou e mareka ra.

TAAU KA RAVE: I te au rā ravarai, e akamanako e te tata i te au mea taau e mareka ra. Kare no runga i te au mea mamaata. Mari ra, te au mea rikiriki katoa, mei te itinga rā manea, te pukapuka mataora anga ki toou au akaperepere, me kore te ora mai anga i tetai rā ou. Ka akaketaketa teia au manako papu i toou oraanga manako ngakau​—me akamanako e me āriki rekareka koe i te reira.

E puapinga katoa me akamanako koe i te tumu i āriki rekareka ai koe i toou ngutuare tangata e te au oa. Me kite koe i te tumu i āriki rekareka ai koe i te au tangata, e akakite i te reira kia ratou, na roto i te reta, imere e te tuku karere. Na teia e akaketaketa i toou pirianga e kia kite i te mataora mei te oronga anga ki tetai ke.​—Angaanga 20:35.

TETAI AU KAVEINGA PIPIRIA

AKARUKE I TE KARO.

“E tau te akamataanga karo ki te ngaa anga vai ra: e akaruke ra i te karo ra, ka tupu aea te riri.”​—MASELI 17:14.

AURAKA E APIAPI I TO APOPO.

“E teianei, auraka e apiapi i to apopo ra; na apopo e apiapi i tana uaorai. Ko te rā ko tona uaorai kino, oti ra ua ïa.”​—MATAIO 6:34.

AKAMANAKO MEITAKI I MUA AKE KA RAVE EI KOE I TETAI MEA.

“Na te akono meitaki e tapapa ia koe i reira; e na te kite e tiaki ia koe.”​—MASELI 2:11.