Pene 8
Atea ke Anga Mei Tetai Tangata Takinga Kino
KUA akaara atura a Iosepha ia Maria e kua akakite atura i te tuatua rapurapu kiaia. Koi mama ua maira tetai angera a Iehova kiaia, na ko maira: “Ka tu, ka rave i te tamaiti iti, e tona metua vaine, e oro ki Aiphiti; e noo i reira, e kia karangaia atu koe e au; e kimi oki a Heroda i te tamaiti iti e ta.”
Viviki ua ratou toko toru i te aere ke atu mei reira. Tau tikai te aere anga no te mea kua kite a Heroda e kua rave tapikipiki te aronga akara etu ra iaia e kua akaruke i taua enua ra. Kia maara e, kua akaueia ratou kia oki atu e akakite kiaia me kitea a Iesu e ratou. E riri maata to Heroda. No reira i te tauta anga e ta ia Iesu, kua ikuiku atura aia kia tamateia te au tamariki tamaroa katoatoa e rua mataiti e raro mai, i Betelehema e tona au tapere katoa ra. Kua akanoo aia i te reira tareanga mataiti ki rungao i te tuatua akakite kiaia i mua akera no ko mai i taua aronga akara etu no te Itinga ra maira.
E mea rikarika tikai kia akara i te tamate anga i te au pepe tamaroa katoatoa ra! Kua vaʼi atura te au vaeau a Heroda e kua tomo atu ki roto i tetai ngutuare e tetai ngutuare. E kia kitea e ratou tetai pepe tamaroa, kua opukinaia mai mei roto i nga rima o tona metua vaine ra. Kare tatou i kite eia ta ratou au pepe i tamate ana, inara ko te tangianga e te aueanga maata o te au metua vaine ra te akatupu ra i te totou Puka Tapu na te peroveta a te Atua ko Ieremia.
I te reira tuatau, kua tae ora meitaki atu a Iosepha e tona ngutuare tangata ki Aiphiti, e kua noo ratou ki reira. Inara i tetai po kua mama akaou atura te angera a Iehova kia Iosepha na roto i te moemoea. “Ka tu, ka rave i te tamaiti iti, e te metua vaine,” ta te angera ia i karanga atu, “e ka oki ki te enua o Iseraela: kua mate oki te aronga i umuumu e ta i te tamaiti iti nei.” Ei akatupu anga i tetai atu totou no te Puka Tapu te karanga ra e ka tikinaia te Tamaiti a te Atua i Aiphiti, kua oki atura taua ngutuare tangata ra ki to ratou enua kainga.
I te akaraanga kua manako a Iosepha kia noo ki Iudea, te ngai i noo ei ratou i te oire i Betelehema i mua ake i to ratou oro anga ki Aiphiti. Inara kua kite aia e ko te tamaiti a Heroda tangata kino ra ko Arekelau te ariki o Iudea i reira, e na tetai atu moemoea kua akamatakite atu a Iehova i taua tu kino ra. E no reira kua aere atura a Iosepha e tona ngutuare ki te pae apatokerau e kua noo ki te oire o Nazareta i Galilea ra. I reira i te reira ngai, mamao atu i te ngai o te oraanga akonoanga ngati Iuda ra, kua tupu ake a Iesu ki reira. Mataio 2:13-23; Ieremia 31:15; Hosea 11:1.
▪ I te kore anga te aronga akara etu ra i oki atu, eaa te ravenga kino ta te Ariki ko Heroda i rave, inara i akapeea i orai a Iesu?
▪ I te oki atu anga mei Aiphiti, eaa ra a Iosepha i kore ei i noo akaou ki Betelehema?
▪ Eaa nga totou Puka Tapu tei akatupuia i te reira tuatau?