Au Uianga A Te Aronga Tatau

I muri ake i to Iesu anau anga, eaa a Iosepha e Maria i noo ei ki Betelehema e kare i oki ana ki Nazareta?

Kare te Pipiria i akakite mai ana. Inara kua akakite mai te Pipiria i te au mea tei tupu ei akamārama i te reira.

Kua akakite tetai angera kia Maria e ka nui aia e ka anau. Te akakite anga te angera i teia, te noo ra a Maria e Iosepha ki Nazareta, to Iosepha oire kainga i Galilea. (Luka 1:26-31; 2:4) I muri mai, te oki anga mai raua mei Aiphiti, kua oki raua ki Nazareta. Kua maata mai a Iesu ki reira e kua riro mai ei tangata Nazareta. (Mata. 2:19-23) Ae, teia tokotoru—ko Iesu, Iosepha, e Maria—no Nazareta mai ratou.

E kopu tangata to Maria ko Elizabeta no Iuda mai. E vaine a Elizabeta na te kau taunga ko Zekaria e kua riro mai ei metua vaine no Ioane Bapetizo. (Luka 1:5, 9, 13, 36) Kua atoro a Maria ia Elizabeta i Iuda e kua noo ki reira e toru marama. E oti kua oki a Maria ki Nazareta. (Luka 1:39, 40, 56) Te tumu te reira i matau ei a Maria i te reira ngai i Iuda.

I muri mai, kua aru a Iosepha i te akaueanga ‘kia retitaia’ ratou. No reira kua aere a Iosepha mei Nazareta ki Betelehema, “te oire no Davida” e ko te ngai anau anga totouia te reira o te Mesia. (Luka 2:3, 4; 1 Samu. 17:15; 20:6; Mika 5:2) Te anau anga a Maria ia Iesu ki reira, kare a Iosepha i tapapa atu ana kia oki a Maria e te pepe ou ki Nazareta. Kua noo ratou ki Betelehema, e iva kiromita te mamao mei ia Ierusalema. E mea tau i reira kia apai raua i ta raua pepe ki te iero ma te oronga i tetai atinga tau.—Levi. 12:2, 6-8; Luka 2:22-24.

Kua akakite takere te angera a te Atua kia Maria e ka rauka i tana tamaiti ‘te terono o Davida’ e ‘ei iaia te Au.’ Penei kua umere a Iosepha e Maria e kua anauia a Iesu i te oire o Davida? (Luka 1:32, 33; 2:11, 17) Penei kua manako raua e meitaki i te noo ki reira ma te tiaki atu i te au akakite anga no to te Atua anoano.

Kare tatou i kite eaa te roa to ratou noo anga ki Betelehema te tae anga mai te aronga akara etu. I te reira taime, te noo ra raua ki roto i tetai are, ma te “tamaiti iti,” kare i te pepe. (Mata. 2:11) I te akara anga kare ratou i oki ana ki Nazareta, e kua roa to ratou noo anga ki Betelehema.

Kua akaue a Heroda kia tamateia “te aronga tamariki tamaroa katoa i Betelehema . . . te rua o te mataiti ra e tei kore.” (Mata. 2:16) Te rauka anga ta te Atua akamatakite anga no runga i teia akaueanga, kua oro a Iosepha e Maria ki Aiphiti ma Iesu e kua noo ki reira e mate ua atu a Heroda. I muri mai, kua apai a Iosepha i tona pamiri ki Nazareta. Eaa raua i kore ei i oki ki Betelehema? Kia kore ratou e kitea e te tamaiti kino a Heroda, ko Arekelau, i Iudea, e kia aru i te akamatakiteanga a te Atua. I Nazareta, ka rauka i reira ia Iosepha te utuutu ia Iesu kia akamori i te Atua.—Mata. 2:19-22; 13:55; Luka 2:39, 52.

Kua mate a Iosepha i mua ake ka akatuera ei a Iesu i te oraanga ki te rangi. E ka tuakaou mai a Iosepha ki te enua nei. E manganui te ka aravei iaia e ka kite maata atu no runga iaia e no teaa raua ko Maria i noo ei ki Betelehema i muri ake i to Iesu anau anga.