Ka Inangaro Ainei Koe kia Kite Maata Atu i te Pipiria?
Eaa ra ka Tatau ei i te Pipiria?
KARE te Pipiria mei tetai ua atu puka ke ra—te vaira i roto i reira te ikuiku anga aroa no ko mai i te Atua. (1 Tesalonia 2:13) Me akono koe i ta te Pipiria e apii maira, ka puapinga maataia koe. Ka akamaata ia mai toou uaorai aroa no te Atua e ka akapiri vaitata atu kiaia, Tei Oronga mai i “te au mea memeitaki i o maiia ra.” (Iakobo 1:17) Ka rauka ia koe i te kite e akapeea i te akavaitata atu kiaia na roto i te pure. I te au tuatau manamanata, ka kite koe i te tauturu anga a te Atua. Me akarotai koe i toou uaorai oraanga ma te au turanga tei akanooia i roto i te Pipiria, ka oronga mai te Atua kia koe i te ora mutu kore.—Roma 6:23.
Te vaira i roto i te Pipiria te au tuatua mou te oronga maira i te akamarama anga. Ko te aronga tei rauka te kite Pipiria kua akarangatira ia mei te au manako anga tarevake te akatere ra i te au oraanga e mirioni ua atu. Ei akatauanga, te kiteanga i te tuatua mou e eaa te ka tupu i muri ake i te mate anga tatou ka akarangatira ia tatou mei te mataku anga e ka takino tei mate ra ia tatou me kare ra te mamae ra to tatou au kopu tangata e te au oa tei mate. (Ezekiela 18:4) Te oronga maira te apiianga Pipiria o te tuakaou anga i te pumaana ki te aronga tei takake ta ratou i akaperepere i roto i te mate. (Ioane 11:25) Te kiteanga i te tuatua mou no te au angera kino ra te akamatakite maira ia tatou i te au kino o te purepure e te tauturu anga ia tatou kia marama e eaa i maatai te manamanata i runga i te enua nei.
Te au kaveinga tu-Atua i roto i te Pipiria te akaari maira kia tatou e akapeea te noo anga i roto i tetai ravenga te oronga maira i te au akameitaki anga i te pae kopapa. Ei akatauanga, te “akono meitaki” te oronga maira i te oraanga meitaki. (1 Timoteo 3:2) Na te ‘tamā ia tatou uaorai i te au viivii katoa o te kopapa e te vaerua,’ te kopae ra tatou i te akakinoanga i to tatou oraanga. (2 Korinetia 7:1) Na te akonoanga i te ako anga a te Atua tei kitea ia i roto i te Pipiria te akamaata katoa ra i te tu mataora i roto i te akaipoipo e te akangateitei uaorai.—1 Korinetia 6:18.
Me akono koe i te Tuatua a te Atua, ka riro koe ei tangata mataora. Te tauturu ra te kite Pipiria ia tatou kia rauka te au i roto roa e te merengo anga e te oronga maira kia tatou i te manakonako anga. Te tauturu ra te reira ia tatou kia tatanu i taua au tu manea mei te aroa ua, te inangaro, te rekareka, te au, te takinga meitaki, e te akarongo. (Galatia 5:22, 23; Ephesia 4:24, 32) Ko taua au tu te tauturu ra ia tatou kia riro ei tane me kare ei vaine, ei metua tane me kare ei metua vaine, ei tamaiti me kare ra ei tamaine meitaki.
I manako ana ainei koe no te tuatau ki mua? Te akaari maira te au totou Pipiria kia tatou e teiea tatou i roto i te aerenga o te tuatau. Kare teia au totou e akataka ua ra i te turanga o te ao o teia tuatau nei mari ra te akaari katoa ra ratou e kare e roa atu ana ka taui te Atua i te enua ki roto i tetai parataito.—Apokalupo 21:3, 4.
Tauturu Anga kia Marama i te Pipiria
Penei kua tauta ana koe i te tatau i te Pipiria inara kua kitea ia ei mea ngata i te marama. Penei kare koe i kite i te ngai ka akara i roto i te Pipiria i te kimi i te au pau anga ki taau au ui anga. Me koia ia, kare ko koe anake ua. Ko tatou pouroa te anoano ra i te tauturu kia marama i te Tuatua a te Atua. Te oronga ua ra te Au Kite o Iehova, i roto i etai 235 enua, i te apii anga Pipiria ki te au tangata e mirioni ua atu. Ka mataora katoa ratou i te tauturu ia koe.
Te mea meitaki roa atu kia apii tamou marie i te Pipiria, te akamataanga ki te au apiianga mama. (Ebera 6:1) Ia koe e rave ra, ka rauka ia koe i te rave meitaki i te “kai pakari ra”—koia oki, te oonu o te au tuatua mou ra. (Ebera 5:14) Ko te Pipiria te mana. Na te au puka tei akatumuia ki runga i te Pipiria, mei te poroutia rai Eaa ta te Atua e Umuumu Maira ia Tatou?, e tauturu ia koe kia marama i te au papa anga Tuatua Tapu no runga i te au tumu tuatua tuke ke ra.
Te Inangaro ra Ainei Koe i te Akapou i te Tuatau i te Epetoma Tataki Tai ra kia Marama i te Pipiria?
Ka rauka ua tetai apii Pipiria i te akanoonooia i tetai tuatau e te ngai te tau ra kia koe. E manganui tei apii pirivati i to ratou uaorai kainga. Ko etai te apii ra i runga i te terepaoni. Te porokaramu no te apii, kare ia i te pupu ma te au tangata e manganui, mari ra e akanoonoo anga pirivati te akatano ia ra ki toou uaorai au turanga, kapiti mai te turanga o toou kite e te apii anga. Kare e tarere anga, e kare koe e taakama ia. Ka pau ia taau au ui anga Pipiria, e ka kite koe e akapeea i te akapiri vaitata atu ki te Atua.
Kare koe e tutaki i tetai o taua apii Pipiria ra. (Mataio 10:8) Te oronga ua ia ra ki te au tangata o te au akonoanga katoatoa e ki te aronga kare e akonoanga inara tei inangaro tikai ra i te akamaata i to ratou kite i te Tuatua a te Atua.
Koai ma te ka o ki roto i te uriuri anga? Toou ngutuare katoa. Ko tetai atu au oa taau i iki i te pati kia o katoa mai. Me kare me te inangaro ra koe, ka raveia te uriuri anga ko koe anake ua.
E manganui tei tuku i tetai ora i te epetoma tataki tai ra kia apii i te Pipiria. Me ka rauka ia koe i te akapou e maata te tuatau me kare kua rimitiia te manga tuatau i te epetoma tataki tai ra, ka oronga atu te Au Kite ia ratou uaorai i te tauturu ia koe.
Tetai Pati Anga kia Kite
Te pati atu nei matou ia koe kia aravei atu i te Au Kite o Iehova. Ko tetai mataara te ka rauka ia koe i te rave i teia koia oki kia tata atu ki te ngai i raro ake. Ka rave ia i reira tetai au akanoonoo anga no tetai tangata i te apii i tetai apii Pipiria oronga ua i te kainga kia koe.
□ E tuku mai kiaku i tetai kopi o te poroutia Eaa ta te Atua e Umuumu Maira ia Tatou?
□ E aravei mai iaku no tetai apii Pipiria oronga ua i te kainga ine.