Kia Rekareka i taau Angaanga

1-3. (a) Eaa te manako o te manganui no runga i ta ratou ngai angaanga? (e) Eaa te au uianga ta tatou ka akamanako i roto i teia pene?

TAKAPINI i teia ao, te angaanga pakari nei te tangata i te akono ia ratou uaorai e to ratou ngutuare tangata. Kare te manganui o te tangata e reka ana i ta ratou ngai angaanga, e tetai papaki e apiapi ana ratou me akamanako e ka aere ki te angaanga. Me te manako akapera ra koe, eaa ra taau ka rave kia mataora koe i te rave anga i taau angaanga? Eaa ra taau ka rave kia reka koe i taau ngai angaanga?

² Te akakite maira a Iehova e: “Kia kaikai anake ra te tangata e kia inu, e kia rave aia i te meitaki no tana katoa ra au angaanga; e mea o maiia mai ïa e te Atua.” (Koheleta 3:13) Anga a Iehova ia tatou e kua oronga mai i te tareni kia rauka ia tatou te angaanga. Inangaro aia kia rekareka tatou i te rave i ta tatou angaanga.—E tatau ia Koheleta 2:24; 5:18.

³ Eaa i reira te ka tauturu ia tatou kia rekareka i te rave anga i ta tatou angaanga? Eaa te au tu angaanga ka tau te au Kerititiano kia kopae? Akapeea tatou te akanoonoo anga i ta tatou angaanga kia tau ki ta tatou akamorianga ia Iehova? E eaa te angaanga puapinga rava atu ta tatou ka rave?

TE NGA TAUNGA ANGAANGA PAKARI RAVA ATU

4, 5. Mei teaa ra to Iehova aerenga manako no runga i te angaanga?

⁴ E mea inangaro na Iehova te angaanga. Akakite a Genese 1:1 e: “I muatangana ra, kua anga iora te Atua i te rangi e te enua.” Muri ake i te oti anga te enua e te au mea ravarai i te anga, akakite te Atua e “te meitaki roa ra” ïa. (Genese 1:31) Kua mareka rava Tei Anga mai i tana i rave.—1 Timoteo 1:11.

⁵ Kare rava a Iehova i akamutu ana i te angaanga. Akakite a Iesu e: “Te angaanga ua nei rai toku Metua.” (Ioane 5:17) Noatu kare tatou i kite no runga i te au mea umere pouroa ta Iehova i rave mai ana, kua kite ra tatou i tetai papaki o taua au mea ra. Kua iki aia i te aronga ka tutara kapiti e Iesu Mesia tana Tamaiti, i roto i te Patireia. (2 Korinetia 5:17) Te akono e te arataki katoa nei a Iehova i te tangata na te apii anga ia ratou. Na roto i te angaanga tutu aere e raveia nei i te ao katoa, mirioni ua atu tei apiiia kia kite no runga ia Iehova e tei rauka te manakonakoanga kia noo e tuatau ua atu i roto i te parataito i te enua nei.—Ioane 6:44; Roma 6:23.

6, 7. Mei teaa ra to Iesu tu i te rave anga i tana angaanga?

⁶ Mei tona Metua rai a Iesu, mea inangaro nana te angaanga. I mua ake ka aere mai ei aia ki te enua nei, ko Iesu to te Atua rima rave e te pu angaanga, i te anga kapiti i te au mea tini ravarai to te rangi, e to te enua nei. (Maseli 8:22-31; Kolosa 1:15-17) Iaia i te enua nei, kare a Iesu i akamutu ana i te angaanga pakari. Tona meangiti anga, kua apii e kua riro mai aia ei kamuta karape, i te pātu are e te maani apinga no roto i te are. Kua riro a Iesu ei tangata kite karape i te rave i tana angaanga e kua kite matau uaia aia e ko “te kamuta.”—Mareko 6:3.

⁷ Inara, ko ta Iesu angaanga puapinga rava atu i te enua nei koia oki, ko te tutu aere i te tuatua meitaki e te apii i te tangata no runga ia Iehova. E toru e te apa mataiti tei anoanoia nona kia oti tana angaanga orometua, e kua angaanga pakari tikai aia mei te popongi ki te roaanga po. (Luka 21:37, 38; Ioane 3:2) Anere ua atu maire tei pou iaia i te aere anga na te ara i roto i te one pueu, kia akakite aere i te tuatua meitaki ki te manganui o te tangata tei rauka iaia i te tuatua atu.—Luka 8:1.

8, 9. Eaa te tumu i mataora ei a Iesu i te rave i tana angaanga?

⁸ Kia Iesu, ko te rave i te angaanga a te Atua, mei te kai rai. Riro teia angaanga ei akamatutu e ei akamaroiroi iaia. Tetai au rā, no te maata o te angaanga, kare a Iesu i manako atu ana kia akamutu aia e kia kaikai. (Ioane 4:31-38) Kua akapou aia i te au atianga ravarai tei rauka iaia, kia tauturu i etai ke kia kite no runga i tona Metua. No reira i rauka ai iaia kia karanga kia Iehova e: “Kua akakakā au ia koe i te ao nei: kua oti iaku te angaanga taau i o mai naku e rave ra.”—Ioane 17:4.

⁹ E mea mataora e e mea mareka roa na Iehova e Iesu te angaanga pakari. Ka inangaro tatou kia ‘aru i te Atua,’ e kia ‘aru i to Iesu takainga vaevae.’ (Ephesia 5:1; 1 Petero 2:21) No reira tatou i inangaro ei i te angaanga pakari e te rave i tetai ua atu mea ta tatou ka rauka ma te ngakau tae.

MEI TEAA RA TO TATOU AERENGA MANAKO I TA TATOU ANGAANGA?

10, 11. Eaa te ka tauturu ia tatou kia akatupu i te aerenga manako tau no runga i ta tatou ngai angaanga?

¹⁰ E iti tangata tatou no Iehova, te angaanga pakari nei tatou i te akono ia tatou e to tatou ngutuare tangata. Inangaro tatou kia mataora i te rave i ta tatou angaanga, inara kare teia i te mea māmā. Eaa ra i reira ta tatou ka rave me kare tatou e mataora ana i ta tatou angaanga?

¹¹ Akatupu i te aerenga manako tau. Penei kare e rauka ia tatou i te taui i te ngai e angaanga nei tatou e ta tatou e rave nei, ka rauka ra ia tatou i te taui i to tatou aerenga manako e te tu. Me mārama tatou eaa ta Iehova e tapapa maira, ka riro tera ei tauturu ia tatou. Ei akaraanga: Te tapapa maira Iehova i te upoko o te ngutuare kia tauta pakari i te akono i te au anoano o tona ngutuare tangata. No te mea te karanga ra te Pipiria e, ko tei kore e akono i tona ngutuare e “maata atu ïa tona kino i to te tangata akarongo kore ra.” (1 Timoteo 5:8) Me e upoko koe no te ngutuare, ka angaanga pakari koe i te akono i te au anoano o toou ngutuare tangata. Noatu te reka ra koe e me kare i te angaanga taau e rave ra, inara kua kite koe e te akamareka ra koe ia Iehova me akono koe i toou ngutuare tangata.

12. Eaa te puapinga ka rauka ia tatou no te angaanga pakari e te rave i te mea tika?

¹² E angaanga pakari e kia rave i te mea tika. Na teia e tauturu ia koe kia mataora i te rave i taau angaanga. (Maseli 12:24; 22:29) E tetai, ka irinaki toou pu ia koe. E mea puapinga ki te au pu te aronga angaanga e rave ra i te mea tika no te mea kare ratou e keia moni, kare e keia apinga e kare e pikikaa i to ratou ora. (Ephesia 4:28) E ko tei puapinga roa atu, te kite maira a Iehova i taau angaanga pakari e te rave ra koe i te mea tika. Ka rauka ia koe te ‘akava-ngakau meitaki,’ no te mea kua kite koe e te akamareka ra koe i te Atua no toou inangaro iaia.—Ebera 13:18; Kolosa 3:22-24.

13. Eaa atu tetai ka tupu no ta tatou akaraanga meitaki i te rave i te mea tika i te ngai angaanga?

¹³ Kia kite e ko toou tu i te ngai angaanga ka akakakā te reira ia Iehova. Teia katoa tetai tumu tau no tatou kia mataora i te rave i ta tatou angaanga. (Tito 2:9, 10) E penei ka inangaro tetai o toou au oa angaanga i te apii i te Pipiria no te akaraanga meitaki taau i akaari.—E tatau ia Maseli 27:11; 1 Petero 2:12.

EAA TE NGAI ANGAANGA KA TAU KIA IKI AU?

14-16. Eaa te ka anoanoia kia akamanako tatou me iki i tetai ngai angaanga?

¹⁴ Kare a te Pipiria papaanga no te au ngai angaanga ka tau e kare e tau kia iki tetai Kerititiano. Kareka ra e au kaveinga ta te Pipiria, ei tauturu ia tatou kia rave i te au ikianga tau no runga i te ngai angaanga. (Maseli 2:6) Me taangaanga i te au kaveinga Pipiria, e ui kia tatou uaorai i teia au uianga ka aru mai.

¹⁵ I roto i teia ngai angaanga, ka anoanoia ainei au kia rave i tetai au mea e akakite maira a Iehova e e tarevake? Kua apii tatou no runga i te au angaanga ta Iehova e rikarika ra, mei te keikeia e te pikipikikaa te tu. (Exodo 20:4; Angaanga 15:29; Ephesia 4:28; Apokalupo 21:8) No reira kia matakite tatou e kia kopae i tetai ua atu rai angaanga te ka patoi i to Iehova au turanga.—E tatau ia 1 Ioane 5:3.

¹⁶ Te turuturu ra ainei teia ngai angaanga i tetai au peu ta Iehova i kopae? Ei akaraanga, peea me kua orongaia mai tetai ngai angaanga tiaki opati naau, i ko i te ngai okooko tiketi peti moni? Kare e tarevake i te angaanga tiaki opati. Inara kua kite koe i to Iehova manako no runga i te noinoi. No reira noatu kare naau e okooko i te tiketi, kare ainei koe e manako ana e i roto i te mata o Iehova, te turu ra koe i tetai angaanga kare Aia e inangaro?—Ephesia 5:3-5.

17. Eaa te ka tauturu ia tatou kia rave i te ikianga tau te ka akamareka i te Atua?

¹⁷ Me taangaanga tatou i te au kaveinga Pipiria, ka riro tatou mei te au tangata rai tei akatakaia mai i roto ia Ebera 5:14, e ko “te aronga no te mātau i kite ei to ratou ngakau i te meitaki e te kino.” E ui kia koe uaorai: ‘Me ka āriki au i teia ngai angaanga, ka akaturori ainei te reira i etai ke? Ka riro ainei teia nga angaanga ei apai iaku ki tetai enua ke e kia akaruke i toku tokorua e ta maua tamariki? Eaa ra ta teia ka akatupu kia ratou?’

TIMATA KIA PAPU EAA TE AU MEA MAATA ATU TE MEITAKI

18. No teaa ka riro ei ei mea ngatā kia akamou ki runga i ta tatou akamorianga?

¹⁸ I teia tuatau openga, e maata ua atura te kino, ka ngatā rai i te tuku na mua i te akamorianga a Iehova. (2 Timoteo 3:1) Te kimi i tetai ngai angaanga e te akamou ki te reira, ka riro ei mea ngatā. E tika, ka anoanoia tatou kia akono i to tatou ngutuare tangata, kareka ra kua kite tatou e ko ta tatou akamorianga te mea mua. Kare tatou e inangaro kia akariro i te au apinga o te kopapa ei mea puapinga roa atu i roto i to tatou oraanga. (1 Timoteo 6:9, 10) No reira, ka akapeea e rauka ai ia tatou i te akapapu eaa “te au mea e maata ua atu te meitaki,” ia tatou e akono ra i te au anoano o to tatou ngutuare tangata?—Philipi 1:10.

19. Me irinaki tatou kia Iehova, akapeea te reira te tauturu anga ia tatou kia kore e apiapi i ta tatou ngai angaanga?

¹⁹ E irinaki kia Iehova ma te ngakau katoa. (E tatau ia Maseli 3:5, 6.) Kua kite tatou e kua kite ua a Iehova, eaa tikai tei anoanoia no tatou e te manako maira aia ia tatou. (Salamo 37:25; 1 Petero 5:7) Te akakite maira tana tuatua kia tatou: “Ei noo anga noinoi kore i te apinga to kotou; kia mareka i ta kotou i rauka ra: ko te Atua oki tei tuatua mai e, ‘Kare rava au e akaruke atu ia koe, kare oki au e taka ke ia koe, kare, kare rava atu.’” (Ebera 13:5) Kare a Iehova e inangaro ia tatou kia apiapi ua rai no runga i te akono anga i to tatou ngutuare tangata. Mei tera taime ki tera taime kua akaari mai Aia e ka rauka iaia i te akono i te au anoano o tona iti tangata. (Mataio 6:25-32) Noatu eaa to tatou turanga no ta tatou ngai angaanga, kia apii putuputu tatou i te Tuatua a te Atua, kia tutu aere i te nuti meitaki, e kia aere ki ta tatou au uipaanga Kerititiano.—Mataio 24:14; Ebera 10:24, 25.

20. Akapeea e rauka ai ia tatou kia akamāmā ua i to tatou oraanga?

²⁰ Akamou i to mata ki runga i te anoano o te Atua. (E tatau ia Mataio 6:22, 23.) Tera te aiteanga, kia akamāmā ua i toou oraanga kia rauka ia koe i te tavini ia Iehova. Kua kite tatou e kare i te mea meitaki kia akariro i te moni, te oraanga akatietie, me kore i te au apinga ou rava atu ei mea puapinga roa atu i to tatou uaorai pirianga ki te Atua. Eaa ra te ka tauturu ia tatou kia tuku na mua i te au mea puapinga roa atu? Kia tauta pakari tatou auraka kia ō ki roto i te kaiou. Me e kaiou taau, akataka i tetai ravenga i te tutaki i te reira kia peke takiri. Me kare tatou e matakite, ka pou ua to tatou taime e te maroiroi ki runga i teia au apinga, e penei kare o tatou taime i te pure, te apii e te tutu aere. Kare tatou e inangaro kia riro te apinga o te kopapa ei akateiaa i to tatou oraanga mari ra, ka inangaro tatou kia mareka ua i te au mea tikai tei anoanoia mei te ‘kai e te kakau.’ (1 Timoteo 6:8) Noatu eaa te tu, e mea meitaki kia akamanako marie i to tatou turanga mei tera taime ki tera taime kia kite e ka akapeea tatou te tavini anga ia Iehova ma te ngakau katoa.

21. Eaa te tumu ka anoanoia ai tatou kia iki e eaa te mea mua i roto i to tatou oraanga?

²¹ Na mua te au mea puapinga roa atu. Ka anoanoia tatou kia rauka te tu pakari i te taangaanga i to tatou maroiroi, e ta tatou apinga ma te tau. Me kare tatou e matakite, ka pou ua to tatou taime ki te au mea kare e puapinga roa ana, mei te apii teitei me kore te moni. Akakite a Iesu: “E na mua ra kotou i te kimi i te basileia.” (Mataio 6:33) Ka riro te au ikianga ta tatou i rave, to tatou tu, ta tatou angaanga e rave ra i te au rā, e to tatou au akakoroanga ei akaari mai e eaa te mea puapinga i roto i to tatou oraanga.

TE ANGAANGA PUAPINGA ROA ATU KIA RAVE TATOU

22, 23. (a) Eaa te angaanga puapinga rava atu na tatou te au Kerititiano? (e) Eaa te ka tauturu ia tatou kia mataora i te rave i ta tatou angaanga?

²² Ta tatou angaanga puapinga rava atu koia oki, ko te tavini ia Iehova e te tutu aere i te nuti meitaki ki etai ke. (Mataio 24:14; 28:19, 20) Ka inangaro tatou i te rave i teia angaanga ma te ngakau tae mei ia Iesu rai. Tetai aronga kua neke ratou ki te ngai tei anoano maataia te aronga tutu evangelia. Tetai papaki te apii nei ratou i tetai reo ou kia rauka ia ratou i te tutu aere atu ki te au tangata no ratou tera au reo. E tuatua atu ki teia aronga tei rauka ia ratou i te rave i teia, e e ui kia ratou no runga i ta ratou i rave. Kare e kore ka akakite atu ratou e e meitaki roa atu to ratou oraanga i teianei e te mataora.—E tatau ia Maseli 10:22.

²³ Teia tuatau, e maata ua atu te ora e pou nei i te manganui i te angaanga kia rauka i te akono i te au anoano o to ratou ngutuare tangata. Kua kite a Iehova i teia, e te mareka maira aia i ta tatou e rave nei i te akono i to tatou ngutuare tangata. No reira kia aru tatou i te akaraanga a Iehova e Iesu i te angaanga pakari, noatu eaa te tu o te angaanga ka rave tatou. Kia akamaara tatou e ko ta tatou angaanga puapinga rava atu, ko te tavini ia Iehova e te tutu aere i te nuti meitaki o te Patireia o te Atua. Na teia e akatupu i te mataora mou tikai no tatou.