APII 51

Akapeea Koe me Akamareka ia Iehova na Roto i Taau Tuatua?

Printed Edition

I te angaia anga tatou e Iehova, kua oronga mai aia i tetai apinga aroa manea—te tuatua. Te manako ra ainei aia akapeea tatou me taangaanga i teia apinga aroa? Ae, papu roa! (E tatau ia Iakobo 1:26.) Akapeea i reira tatou me akamareka ia Iehova na roto i ta tatou tuatua?

1. Akapeea tatou me taangaanga meitaki i teia apinga aroa?

Te akakite maira te Pipiria “e akapumaana kotou tetai ki tetai, e akatupu i te meitaki tetai ki tetai.” (1 Tesalonia 5:11) Kua kite ainei koe i tetai tei anoano i te akapumaana anga? Eaa taau ka tuatua ei akamaroiroi ia ratou? E akapapu kia ratou e te akaperepere ra koe ia ratou. Penei ka akakite koe i taau i reka no ratou. Kua kite ainei koe i tetai irava te ka akamaroiroi i tetai ke? E maata taau ka rauka i te iki. E akamaara i taau ka tuatua e akapeea koe me tuatua, ka akakeu te reira i tetai. No reira e aruaru i te tuatua meitaki e te maru.—Maseli 15:1.

2. Eaa te au tuatua ka kopae tatou?

Karanga te Pipiria: “Auraka ei tuatua viivii e mama mai no roto i to kotou vaa.” (E tatau ia Ephesia 4:29.) Tera te aiteanga kare tatou e tao me kore e tuatua akakino kia akatupu i te mamae ki tetai. Ka kopae tatou i te tuatua urutoe e te pikikaa.—E tatau ia Maseli 16:28.

3. Eaa te ka tauturu ia tatou kia tuatua akamaroiroi?

Maata anga o te taime i ta tatou ka tuatua te akaari maira i to tatou ngakau e ta tatou e manako ra. (Luka 6:45) No reira ka anoanoia tatou kia tereni ia tatou uaorai kia akamanako ua i te au mea papu—te au mea tika, viivii kore, rekarekaia, e te au mea rongo meitakiia. (Philipi 4:8) Kia rave ua rai i teia, ka iki meitaki tatou i ta tatou tamataora anga e te au oa. (Maseli 13:20) Kia akamanako marie katoa tatou i mua ake ka tuatua ai. Akamanako e akapeea taau tuatua me akakeu i tetai ke. Karanga te Pipiria: “Te tangata vaa karea ua ra, e tau ïa ki te koputaputa koke ra: ko te arero ra o te aronga pakari ra, mei te vairakau ïa.”—Maseli 12:18.

KIMI OONU

Apii akapeea me tuatua kia akamareka ia Iehova e te akamaroiroi i tetai ke.

4. Matakite i taau ka tuatua

Tetai taime, ka tuatua tatou i te au mea ka tataraara a muri ake. (Iakobo 3:2) E tatau ia Galatia 5:22, 23, e oti uriuri i teia au uianga:

Ko teea au tu ka pure koe ei tauturu ia koe kia akamako i taau tuatua? Akapeea teia au tu me tauturu ia koe?

E tatau ia 1 Korinetia 15:33, e oti uriuri i teia uianga:

Akapeea toou au oa e te au tamataora anga te akakeuanga i taau ka tuatua?

Tutu: Au angaanga tei akakeu i tetai tane kia tuatua kino ki tana vaine. 1. Akarongo aia ki te au imene kino. 2. Akarakara raua ko tona oa i te tarere anga moto i runga i te tivi. — Eaa te ka tupu mei taau ka tuatua?

Tutu: Au angaanga tei akakeu i taua tane kia tuatua maru ki tana vaine. 1. Tatau aia i te Pipiria. 2. Pukapuka raua ko tana vaine ki tetai taeake i ko i te Are Uipaanga Patireia. — Eaa te ka tupu mei taau ka tuatua?

E tatau ia Koheleta 3:1, 7, e oti uriuri i teia uianga:

Eaa te taime meitaki kia muteki me kore kia tiaki i te taime tau no te tuatua?

5. E tuatua akameitaki i tetai ke

Akapeea tatou me kopae i te tuatua akakino e te tau kore? Akatangi i te VITIO, e oti uriuri i te au uianga ka aru mai.

VITIO: E Tuatua i te “Tuatua Meitaki” ki Tetai (4:07)

I roto i te vitio, eaa te tumu i inangaro ei teia taeake i te taui i tana i tuatua no tetai ke?
Eaa tana i rave kia taui?

E tatau ia Koheleta 7:16, e oti uriuri i teia uianga:

Eaa ta tatou ka akamaara me timataia tatou i te tuatua akakino i tetai ke?

E tatau ia Koheleta 7:21, 22, e oti uriuri i teia uianga:

Akapeea teia nga irava me tauturu ia koe kia kore e riri i te tuatua akakino a tetai?

6. Akaari i te aroa me tuatua ki toou ngutuare tangata

Inangaro a Iehova ia tatou kia tuatua ma te aroa e te takinga meitaki ki to tatou ngutuare tangata. Akatangi i te VITIO, e oti uriuri i te uianga ka aru mai.