Me

Kua tupu rai ki te au Kerititiano o te anere mataiti mua te onge maata “i te pa enua ravarai.” Kua taitaia te au upoko ngutuare akapeea e rauka ai te kai ei angai i to ratou ngutuare. Akapeea te au mapu tei inangaro i te tutu aere i te au ngai ke? Penei kua manako ratou e kare ratou e rave i te reira? Noatu to ratou au turanga, kua akatanotano te au Kerititiano ki te reira. Kua tutu aere ua atu ratou, e kua tu’a ma te mataora i ta ratou au apinga ki te au taeake irinaki i Iudea. (Anga. 11:​29, 30) Kua kite te aronga tei rauka ia ratou te au apinga i to Iehova rima tauturu. (Mata. 6:​31-33) Penei kua akapiri vaitata ratou ki to ratou au taeake irinaki tei tauturu mai. Kua kite te aronga tei oronga ua mai e tei rave i te au angaanga pātu anga i te mataora mei te oronga anga.—Anga. 20:35. w23.04 16 ¶12-13

Tetai taime, ka pau mai a Iehova i te pure a tona iti tangata na te akakeu anga i te aronga irinaki kore kia tauturu mai ia ratou. Ei akaraanga, kua akakeu aia i te Ariki ko Aretekasaseta kia akatika ia Nehemia kia oki ki Ierusalema i te patu akaou i te oire. (Nehe. 2:​3-6) Teia tuatau katoa, ka akakeu a Iehova i te aronga kare e akamori ana iaia kia tauturu ia tatou. Kare ta tatou au pure e pauia mai na roto i tetai au mataara umere. Inara ko te au pau anga i orongaia mai kia tatou ko te reira ta tatou e anoano ra kia vai tiratiratu ki to tatou Metua i te rangi. No reira e tapapa ua rai i ta Iehova pau anga no taau pure. Mei tetai taime ki tetai taime, ka anoanoia tatou kia tāpu e kia akamanako akapeea a Iehova te pau mai anga i ta tatou pure. (Sala. 66:​19, 20) Ka akaari tatou i te akarongo kare e na te pure ua anga kia Iehova mari ra na te āriki katoa anga i tana pau anga no ta tatou pure noatu eaa te reira.—Ebe. 11:6. w23.05 11 ¶13; 12 ¶15-16

Ia tatou e akatapu ra ia tatou uaorai kia Iehova, kua tia tatou i te akamori iaia e te rave i tona anoano. E akono meitaki tatou i taua tia. E apainga puapinga i te akono i ta tatou akatapuanga, e kare ra i te mea teiaa. Te tumu, kua anga a Iehova ia tatou kia rave i tona anoano. (Apo. 4:11) Kua tuku aia ki roto ia tatou te anoano kia kite e kia akamori iaia e kua anga aia ia tatou i roto i tona uaorai tu. No reira, ka rauka ia tatou i te akavaitata atu kiaia e te rave i tona anoano ma te mataora. Pera katoa, me rave tatou i te anoano o te Atua e te aru i tana Tamaiti, ka rauka ia tatou “te akaangaroianga.” (Mata. 11:​28-30) E akaketaketa i toou uaorai inangaro no Iehova. E akamanako oonu i tana i rave noou e te au akameitakianga ka rave aia. Me maata atu toou inangaro i te Atua, mama ua ia koe i te akarongo kiaia. (1 Ioa. 5:3) Kua rauka ia Iesu i te rave i te anoano o te Atua no te mea kua pure aia kia Iehova no te tauturu e kua akamou i tona manako ki te tutakianga. (Ebe. 5:7; 12:2) Mei ia Iesu rai, e pure kia Iehova no te maroiroi e te akamanakoanga i te ora mutu kore. w23.08 27-28 ¶4-5

Mataora tatou i te aronga e akakoromaki ra. Eaa te tumu? Ka āriki meitaki tatou i te aronga e tapapa ra i tetai apinga kare ratou e manamanata ana. E reka ana tatou i te aronga e akakoromaki ua ra me rave tatou i te tarevake. E ka akameitaki tatou i te puapii apii Pipiria tei akakoromaki noatu te ngatā ia tatou i te apii, te āriki e te taangaanga i te apiianga a te Pipiria. Te mea puapinga, te akameitaki nei tatou i te Atua ko Iehova no te akakoromaki maata! Noatu te akaperepere nei tatou i te aronga e akakoromaki ra, ko tatou ra penei kare tatou e akakoromaki ana. Ei akaraanga, penei kare tatou e tiaki maru me piritia tatou i runga i te mataara. Ka riri tatou me akariri mai tetai ia tatou. Tetai au taime, kare tatou e akakoromaki ana i te tiaki ua atu i te ao ou o Iehova. Inara, i roto i teia au turanga, ka anoanoia tatou kia akakoromaki maata. w23.08 20 ¶1-2

Kua akakite a Iehova kia Gideona kia akaiti mai i tona pupu vaeau e 99 patene. Penei kua manako aia: ‘Ka anoano tikaiia ainei teia tauianga? Ka rauka ainei teia?’ Noatu rai, kua akarongo ua a Gideona. Ka aru te aronga pakari o teia tuatau i to Gideona tu na te rave anga i te au tauianga tei akakiteia mai e te akaaerenga. (Ebe. 13:17) Kua akarongo a Gideona kia Iehova noatu tona mataku e te kino ka tupu kiaia. (Aka. 9:17) Muri ake i ta Iehova akapapuanga, kua papu ia Gideona e ka tauturu mai te Atua iaia, me paruru aia i te iti tangata o te Atua. Ka aru te aronga pakari e noo ra i te au ngai kua araiia te angaanga i to Gideona tu. Ka arataki ngakau toa ratou i te au uipaanga e te angaanga tutu aere noatu ka opuia, ka uiuiia, ka ngere i te ngai angaanga, e noatu te kino. I te tuatau tumatetenga maata, ka anoano te aronga pakari i te ngakau toa kia akarongo ki te au akakiteanga ka orongaia mai kia ratou—noatu ka tupu te kino. w23.06 5-6 ¶12-13

Kua rekotiia te au angaanga memeitaki a te taunga maata ei apiianga na tatou. (Roma 15:4) Te mate anga a Iehoiada, kua akangateiteiia aia ma te tanumanga “i te Oire o Davida i roto i te au ariki ra, no te mea e meitaki tana i rave ia Iseraela i te Atua, e tona are.” (2 Para. 24:​15, 16) Ka tauturu te tua o Iehoiada ia tatou kia mataku i te Atua. Ka rauka i te au akaaere Kerititiano i te aru i te akaraanga o Iehoiada na te vai matakite anga e te paruru tiratiratu anga i te anana a te Atua. (Anga. 20:28) Ka apii te aronga pakarikari i te akaraanga o Iehoiada e me mataku ratou ia Iehova ma te tiratiratu, ka taangaanga Aia ia ratou ei akatupu i Tona akakoroanga. Ka apii te au mapu akapeea a Iehova te akono anga ia Iehoiada e kia aru i Tona akaraanga na te akangateitei anga i te aronga tiratiratu pakarikari, te aronga kua roa to ratou tavini tiratiratu anga. (Mase. 16:31) E turu tiratiratu tatou i te aronga “arataki” na te akarongo anga kia ratou.—Ebe. 13:17. w23.06 17 ¶14-15

I te au uipaanga, e akamanako e eia taime ka paupau koe. Me tāki ua i to tatou rima i te au taime ravarai, penei te māro ra tatou i te taeake akaaere kia iki ua mai ia tatou noatu kare tetai pae i paupau ake. Ka akamaromaroa teia i tetai pae kia tāki i to ratou rima. (Kohe. 3:7) Me maata te au taeake e tāki ra i to ratou rima i te tuatau o te apii, penei kare o tatou taime kia paupau. I tetai taime kare e rauka i te akaaere i te iki mai ia tatou. Ka maromaroa rai tatou, inara eiaa tatou e taitaia me kare tatou e ikiia mai. (Kohe. 7:9) Me kare e rauka ia koe te pau putuputu, e akarongo meitaki i te pauanga a tetai e me akamutu te uipaanga e akameitaki ia ratou. Ka riro taau akameitaki anga ei akamaroiroi maata i te au taeake e te au tuaine. w23.04 23-24 ¶14-16

Apii i te Tuatua a te Atua e kia akamanako marie i te reira. Ka tu ketaketa tetai pu rakau me e oonu te tumu o tona au aka, ka tu ketaketa rai tatou me kua aka oonuia to tatou akarongo i roto i te Tuatua a te Atua. Me tupu mai te pu rakau, ka toro oonu te au aka ki raro roa i te one. Me apii e me akamanako marie tatou, ka akaketaketa tatou i to tatou akarongo e ma te irinaki papu e meitaki atu te arataa o te Atua. (Kolo. 2:​6, 7) Akamanako akapeea ta Iehova apiianga, akoanga e te paruru i te tauturu anga i tona au tavini i te tuatau taito. Ei akaraanga, kua kite atu a Ezekiela na roto i te orama te vaito meitaki anga tetai angera i te iero. Kua akamaroiroi teia orama ia Ezekiela, e e apiianga tau teia no tatou akapeea tatou me turuturu i to Iehova au turanga no te akamorianga mou. (Eze. 40:​1-4; 43:​10-12) Ka puapinga katoa tatou me tuku tatou i te taime kia apii e kia akamanako marie i te au mea oonu i roto i te Tuatua a te Atua. Ka rauka ia tatou te ngakau maroiroi, i te irinaki anga ia Iehova.—Sala. 112:7. w23.07 18 ¶15-16

E maata te au tane i roto i te Pipiria tei riro mai ei au akaraanga meitaki no te au taeake mapu. E tu akono Atua to ratou e te kite karape i te arataki i tona iti tangata. E au akaraanga meitaki katoa tetai i roto i toou ngutuare e te putuputuanga. (Ebe. 13:7) E ko te akaraanga meitaki rava atu, ko Iesu Mesia. (1 Pete. 2:21) E apii meitaki i to ratou akaraanga e kia akamanako akapeea me aru i to ratou tu meitaki. (Ebe. 12:​1, 2) Ka tauturu te tu akono i tetai tangata kia akamanako i mua ake ka rave ei i te ikianga. No reira, e tauta pakari i te akatupu e te akaari i te tu akono. E akamata na te apii anga i te au kaveinga Pipiria e te akamanako i te puapinga o te reira noou. E oti, e taangaanga i teia au kaveinga kia rave i te au ikianga te ka akamareka ia Iehova. (Sala. 119:9) Ka tauturu maata te reira ia koe kia riro mai ei Kerititiano tukatau.—Mase. 2:​11, 12; Ebe. 5:14. w23.12 24-25 ¶4-5

Ka rauka i te au metua i te apii meitaki i ta ratou tamariki akapeea me tuatua maru no runga i to ratou irinakianga. (Iako. 3:13) Ka rave te au metua i tetai tuatau apiipii me rave i ta ratou akamorianga ngutuare. Ka uriuri ratou i te au tumu manako ka tupu mai i te apii, ka uriuri e ka akatutu akapeea me pau, me tuatua maru e te kauraro marie. Ka tauturu te tuatau apiipii i te au Kerititiano kia akamārama meitaki e kia akapapu kia ratou uaorai e kua tano rai to ratou irinakianga. Te tuanga o te “Ui te Au Mapu E” i runga i te jw.org te vaira te au pepa apii no te au mapu. Kua akapapaia teia tuanga ei tauturu i te au mapu kia akamatutu i to ratou irinakianga e kia akapapa i ta ratou ka tuatua. Na te apiianga i teia tuanga ei pamiri, ka apii tatou katoatoa akapeea me akamārama i to tatou akarongo ma te maru e te kauraro marie. w23.09 17 ¶10; 18 ¶15-16

Kua itae ainei koe i tetai akakoroanga pae vaerua, e e ngatā te reira? Me koia ia, kare ko koe ua. Ei akaraanga, kua inangaro a Philip kia meitaki atu e kia putuputu tana pure, inara e ngatā kia rauka te taime no te pure. To Erika akakoroanga kia tae vave aia ki te au uipaanga no te tutu aere; inara e reiti ua ana aia ki te reira. Me e akakoroanga toou kare i rauka ake, eiaa e taitaia. Ka anoanoia rai te taime e te angaanga pakari kia rauka tetai akakoroanga. No te mea te inangaro ra koe kia taeria toou akakoroanga, te akaari maira e te akaperepere ra koe i toou pirianga kia Iehova e te rave meitaki i te reira. Akaperepere a Iehova i taau tauta anga. Tika, kare aia e tapapa mai i te au mea kare e rauka ia koe i te rave. (Sala. 103:14; Mika 6:8) No reira e iki i te akakoroanga ka rauka ia koe te itae. w23.05 26 ¶1-2

Penei ka tupu te mataku ki te aronga ngakau toa, inara kare ratou e tuku kia tāpu te reira ia ratou mei te rave anga i te tika. E mapu ngakau toa a Daniela. Kua apii aia i te au tataanga a te au peroveta o te Atua mei te au totou rai a Ieremia. Mei tana i apii, kua kite mai a Daniela e kare e roa atu ka ope te oraanga tuikaa o te ngati Iuda i Babulonia. (Dani. 9:2) Kua akamatutuia to Daniela irinakianga i te akatupuia anga te au totou Pipiria, e pera katoa te aronga ngakau toa tei irinaki i te Atua. (Akaaite ia Roma 8:​32, 37-39.) Te mea maata, kua pure putuputu a Daniela ki tona Metua i te rangi. (Dani. 6:10) Kua aaki aia i tana au ara kia Iehova e kua akakite i tona manako. E kua pati ua rai i ta Iehova tauturu. (Dani. 9:​4, 5, 19) E tu tangata ua tona mei to tatou rai, no reira kare aia i anauia mai ma te ngakau toa. Mari ra, kua akatupu aia i teia tu na roto i tana apii, te pure e te irinakianga ia Iehova. w23.08 3 ¶4; 4 ¶7

Me akarongo tatou ki te aronga mana, ka puapingaia tatou e tetai. Akapeea? Tetai tumu, kare tatou e akautungaia no te aati i te ture. (Roma 13:​1, 4) Me akarongo tatou ki te aronga mana, ka kite ratou e e aronga akarongo ture te Au Kite o Iehova. Ei akaraanga, i Nigeria, kua tomo te au vaeau ki te Are Uipaanga Patireia o te Au Kite no te kimi i te aronga kare e tutaki ana i ta ratou tero. Inara kua akakite te rangatira ki tana au vaeau kia akaruke, te karanga anga: “E aronga tutaki tero te Au Kite o Iehova.” I te au taime me akarongo koe i te ture, te akatupu ra koe i te ingoa meitaki no te iti tangata o Iehova—e ka paruru koe i toou au taeake a tetai rā. w23.10 9 ¶13

Tetai au tavini o Iehova kua roa ratou i te tiaki anga e aea e ope ei teia akatereanga. Ta te tangata e manako ra, akara anga e te tavarevare nei a Iehova i te akatupu i tana taputou. Inara, kua kite a Iehova i teia no reira aia i akapapu ei ki te peroveta ko Habakuka e: “Te tuatau i akonoia ra taua orama nei, ei te openga ra e tuatua mai ei e kare e pikikaa; roa oti, ka tapapa atu rai; e tae tika mai ïa, e kare e tavarevare.” (Haba. 2:3) Kua oronga mai ainei te Atua i taua akapapu anga no Habakuka ua? Me kare e puapinga ainei Tana Tuatua no tatou? Kua akauruia te apotetoro ko Paulo kia akakite i taua au tuatua ki te au Kerititiano, tei tapapa atu i tetai ao ou. (Ebe. 10:37) Ae, papu tikai ia tatou e noatu e akara anga roa tei taputouia mai ka “tae tika mai ïa, e kare e tavarevare.” w23.04 30 ¶16

Kua patoi to Iseraela ia Mose, ta Iehova i taangaanga ei mata Iaia. (Nume.14:​10, 11) Kare ratou i āriki i ta Mose angaanga. No te reira, kare a Iehova i akatika i to Iseraela kia tomo i te Enua Taputouia. (Nume. 14:30) Noatu ra, kua aru tetai pae o Iseraela i ta Iehova aratakianga. Ei akaraanga, kua akakite a Iehova no “Kaleba . . . kua aru totomapu mai aia iaku.” (Nume. 14:24) Kua akameitaki a Iehova ia Kaleba, e kua tuku ia Kaleba kia iki i tona enua i Kanaana. (Iosu. 14:​12-14) Kua akanoo katoa te uki i aru mai o Iseraela i tetai akaraanga meitaki no te akono i ta Iehova aratakianga. I te mono anga a Iosua ia Mose ei arataki ia Iseraela, kua ‘mataku iora ratou iaia e ope rava akera ona puke ra i te ora anga.’ (Iosu. 4:14) Tei tupu, kua akameitaki a Iehova ia ratou na te arataki anga ia ratou ki te enua tei taputouia.—Iosu. 21:​43, 44. w24.02 21 ¶6-7

Mei te taote rai ka kite i te tu o to tatou pukuatu mei te pulse, ka kite katoa tatou i te tu maroiroi o to tatou aroa i te Atua, mei to tatou aroa anga i te au taeake. Me kite tatou e kua paruparu to tatou aroa no te au taeake, penei kua paruparu katoa to tatou aroa i te Atua. Inara me aroa putuputu tatou i te au taeake, te maroiroi ra to tatou aroa i te Atua. Kia matakite tatou me kare to tatou aroa i te au taeake e te au tuaine e maroiroi ana. No teaa ra? No te mea ka takino teia i to tatou pirianga kia Iehova. Te akamaara maira te apotetoro ko Ioane e: “Ko tei kore e aroa i tona taeake tei akaraia e ia ra, eaa e tika’i iaia kia anoano i te Atua tei kore i akaraia e ia ra.” (1 Ioa. 4:20) Eaa te apiianga? Ka mareka a Iehova ia tatou me “aroa katoa tatou ia tatou uaorai.”—1 Ioa. 4:​7-9, 11. w23.11 8 ¶3; 9 ¶5-6

I tona tamariki anga, kua tuku te Ariki ko Ioasa i tetai ikianga pakari. Ma te kore e metua tane, kua aru aia i te arataki anga a tetai Taunga Maata tiratiratu ko Iehoiada. Kua apii te reira taunga ia Ioasa ei tamaiti nana. Tei tupu, kua inangaro a Ioasa i te arataki i te akamorianga ma no te tavini ia Iehova. Kua akapapa a Ioasa kia ripeaia to Iehova iero. (2 Para. 24:​1, 2, 4, 13, 14) Me kua apiiia koe kia akaperepere ia Iehova e te aru i tana au turanga, e apinga puapinga taau i rauka. (Mase. 2:​1, 10-12) Ka rauka i toou nga metua i te oronga i te apiianga tukeke. Ia koe e taangaanga ra i te ako Pipiria, ka akarekareka koe i toou nga metua. Te mea puapinga rava atu, ka akarekareka koe i te Atua e ka rauka tetai pirianga oa mutu kore kiaia. (Mase. 22:6; 23:​15, 24) Kare ainei teia i te tumu meitaki noou kia aru i te akaraanga o Ioasa i tona tamariki anga? w23.09 8-9 ¶3-5

Taputou mai a Iehova e ka akarongo aia i ta tatou pure. Akaperepere to tatou Atua i tona aronga akamori mou, no reira ka akarongo mai aia i ta tatou pure. (Sala. 10:17; 37:28) Inara, kare te aiteanga e ka oronga mai aia i te au mea ravarai ta tatou e pati ra. Penei ka tiaki roa tatou i te ao ou e pau mai ei aia i ta tatou pure. Akamanako ra a Iehova i tona akakoroanga iaia e akarongo ra ki ta tatou pure. (Isa. 55:​8, 9) Ko tetai tuanga o tana akakoroanga, ko te akakī i te enua ki te aronga tei mareka i tana tutaraanga. Inara, karanga a Satani e meitaki atu te tangata i te akaaere ia ratou uaorai. (Gene. 3:​1-5) Kia akapapu e pikikaa ta Satani tuatua, kua ariu a Iehova kia akaaere te tangata ia ratou. Tei tupu, e maata te au manamanata ta te tutara a te tangata i akatupu i teia tuatau. (Kohe. 8:9) Kua kite tatou e kare a Iehova e takore pouroa i te kino i teia taime. w23.11 21 ¶4-5

Kua taputou mai a Iehova na roto ia Aberahama e ka akameitakiia te pa enua e manganui. Inara, e 100 o Aberahama mataiti e e 90 o Sara, e kare rai a raua tamaiti. Te akaraanga kare e rauka ia raua i te anau tamariki. E timataanga pakari te reira no Aberahama. Noatu ra, kua “akarongo atura ïa ma te tatari e, ka riro aia ei metua no te pa enua e manganui.” (Roma 4:​18, 19) Kua tupu rai te reira. Kua anau mai ta raua tamaiti ko Isaaka. (Roma 4:​20-22) Mei ia Aberahama rai, ka rauka ia tatou i te akamareka i te Atua e kia riro ei oa nona. Kua tata a Paulo: “Kare ra [no Aberahama] anake ua i tataia’i e, kua akonoia nana; No tatou katoa ra, no te aronga e akono katoaia te akarongo ei tuatua-tika kia akarongo tatou iaia i tei akatu akaou i to tatou Atu ra ia Iesu ki runga mei te mate maira.” (Roma 4:​23, 24) Mei ia Aberahama, ka anoanoia te akarongo, te angaanga e pera katoa te manakonakoanga. w23.12 7 ¶16-17

Me ō koe ki roto i te tumatetenga e me tupu te mataku, e akamaara te kite maira a Iehova i toou turanga. Ei akaraanga, kua kite a Iehova i te takinokinoia anga te ngati Iseraela i Aiphiti e kua “mamae” ratou. (Exo. 3:7) Me tupu te tumatetenga kia koe, penei ka manako koe kare a Iehova e tauturu mai ia koe. No reira, e pure kia kite koe i tana tauturu. (2 Ari. 6:​15-17) E kia ui kia koe uaorai: Kua akamaroiroi ainei tetai ako me kore pauanga iaku i ko i te uipaanga? Akapeea te au puka, te vitio me kore te imene ou? Kua akamaroiroi ainei tetai taeake ia koe? Kua tatau ainei aia i tetai irava akapumaana? Ka māmā ua i te ngaropoina i te aroa o te au taeake e te akamaroiroianga i roto i te Tuatua a te Atua. Inara, e au apinga aroa te reira no ko mai ia Iehova. (Isa. 65:13; Mare. 10:​29, 30) Te akapapu maira te reira i Tona inangaro noou. (Isa. 49:​14-16) E ka tau koe kia irinaki ua rai iaia. w24.01 4-5 ¶9-10

I mua ake ka oki ei ki te rangi, kua akamaara a Iesu i tana au pipi no ta ratou angaanga kia tutu aere no runga iaia “i Ierusalema nei, e Iudea katoa oki e pini ua ake, e Samaria.” (Anga. 1:8; Luka 24:​46-48) I muri poto ake, kua opu te au arataki ngati Iuda i te nga apotetoro ko Petero e Ioane e kua apai ia raua ki mua i te Sunederi, e kua akaue kia akamutu raua i te tutu aere, tapeka atura ia raua. (Anga. 4:​18, 21) Karanga atu a Petero e Ioane: “E mea tika i te Atua kia akarongo atu ia kotou auraka te Atua, ka akamaara io ïa kotou. Kare oki matou e tika kia kore e tuatua i ta matou i akara akenei, e ta matou i akarongo akenei.” (Anga. 4:​19, 20) Te tukuia anga a Petero e Ioane kia aere, kua pure raua kia Iehova ma te akamou ki runga i tona anoano. Kua pau a Iehova i te reira pure ngakau tae.—Anga. 4:31. w23.05 5 ¶11-12

No tetai tuatau roa, kua tupu tetai pirianga vaitata e te aroa i rotopu ia Iehova e tana Tamaiti akaperepere. Kua roa to raua pirianga i to tetai ua atu. Ka kite tatou i to Iehova aroa no Iesu, me tatau tatou i te tia no teia rā. Ka māmā ua ia Iehova te karanga, ‘Koia taku i mareka.’ Inara, kua inangaro aia kia kite tatou i tona akaperepere maata ia Iesu, na te karanga anga “ko taku Tamaiti akaperepere teia.” Kua ngakau parau a Iehova ia Iesu. (Ephe. 1:7) Kare a Iesu i ekoko ana i te aroa o tona Metua. E aroa mou to Iehova no Iesu e kua papu meitaki ia Iesu i te reira. Kua akakite putuputu aia i to te Metua aroa iaia.—Ioa. 3:35; 10:17; 17:24. w24.01 28 ¶8

Akamanako ana i teia: Kua tuatua akakino tetai tei akaperepere ia koe. Kua kite koe e pikikaa te reira; inara kua irinakiia e tetai pae. Tei kino atu, kua akatotoa ratou i teia pikikaa e e manganui tei irinaki i te reira. Eaa toou manako? Mea papu, ka mamae koe me akakinoia toou ingoa meitaki. Ka tauturu teia akaraanga ia tatou kia mārama i to Iehova mamae no tei akakinoia tona ingoa. Kua pikikaa tetai o tana tamariki vaerua ki te vaine mua ko Eva e kua irinaki aia i te reira. Aru mai, kua meameaau to tatou nga metua mua ia Iehova. Tei tupu, kua iri mai te ara e te mate ki te au tangata ravarai. (Gene. 3:​1-6; Roma 5:12) Pouroa te au manamanata i teianei ao, te mate, te tamaki e te taitaia. Kua tupu te reira mei te au tuatua pikikaa a Satani. Te mamae ra ainei a Iehova no teia pikikaa? Ae! Inara, kare Aia e akamoupuku mari ra e Atua mataora aia.—1 Timo. 1:11. w24.02 8 ¶1-2

Akapeea koe me aru i te akaraanga o Iosepha? E iki i teianei eaa taau ka rave me tupu te timataanga. E patoi viviki i te au mea ta Iehova e rikarika ra e auraka e akamanako i te reira. (Sala. 97:10; 119:165) Me rave koe i teia, kare koe e ngaueue. Penei kua kite koe i te tuatua mou e kua inangaro koe i te tavini ia Iehova ma te ngakau katoa. Inara, e apinga tetai te tāpupu ra ia koe kia kore e akatapu ia koe e kia papetito. E akamanako i te akaraanga o te Ariki ko Davida. Kua pati akatenga aia kia Iehova: “E unuunumou mai koe iaku, e te Atua, kia kite oki koe i toku ngakau; e timata mai iaku, e kia kite koe i toku manako: E akara mai i te aerenga kino e vai nei i roto iaku nei, e e arataki koe iaku i te arataa e tika i te vai marie anga te meitaki ra.” (Sala. 139:​23, 24) Ka akameitaki a Iehova i “te aronga i kimi tikai iaia.” No te mea te aruaru ra koe kia akatapuia e kia papetitoia, te akaari ra koe e te kimi ra koe iaia.—Ebe. 11:6. w24.03 6 ¶13-15

Kua akamanaia te taunga maata kia riro ei mata no te tangata ki mua i te Atua. Ko Aarona te taunga maata mua o Iseraela tei ikiia e Iehova i te akatapuia anga te tapenakara. Inara, kua akamārama te apotetoro ko Paulo e e “manganui oki to ratou i riro ei taunga, no te mea kare ratou e ora tamou i te mate.” (Ebe. 7:​23-26) E ei aronga apa ua, kua anoanoia te au taunga maata kia oronga i te atinga no ta ratou uaorai ara. Teia i reira te tuke anga maata i rotopu i te au taunga maata o Iseraela e te Taunga Maata, ko Iesu Karaiti. Ei Taunga Maata no tatou, ko Iesu Karaiti te “taunga no te ngai-tapu, i roto i te puakapa mou, ta te Atu i patia, kare ta te tangata.” (Ebe. 8:​1, 2) Akamārama mai a Paulo e “no te mea e tika [a Iesu] i te noo anga e tuatau ua atu, e kare tona taoonga taunga e riro ia etai ke.” Karanga katoa a Paulo e ko Iesu tei “viivii kore, e te taka ke oki te aronga rave ara ra” kare mei te au taunga maata o Iseraela, “kare oki e tau iaia, kia na mua i te tuku i te atinga i tana uaorai ara, . . . i te au rā katoa ra.” w23.10 26 ¶8-9

Ko “tei muatangana rangi,” te akataka ra i te au kavamani tei akaaereia e Satani e tana au temoni. (Mata. 4:​8, 9; 1 Ioa. 5:19) I roto i te Pipiria, te akataka ra te “enua” i te au tangata i te enua nei. (Gene. 11:1; Sala. 96:1) No reira, ko “tei muatangana enua” ko te aronga kino i teia tuatau. Kare a Iehova e akameitaki mai i te “rangi” e te “enua”; mari ra, ka takore takiri aia i te reira. Ka mono i reira aia i te rangi e te enua o teia tuatau ki te “rangi ou e te enua ou”—koia oki, tetai kavamani ou te ka tutara ki rungao i te aronga tuatua tika. Ka akariro a Iehova i te au mea ravarai ei mea ou na te akameitakianga i te enua e te tauturu anga i te tangata kia rauka te tu apa kore. Mei ta Isaia i totou, ka akariroia te enua katoa ei kainga manea—mei te aua rai i Edene. Ka akaou katoa ia tatou tataki tai. Ka akaoraia te aronga pirikoki, te matapo, e te aronga turi, e ka akaoraia te aronga tei mate.—Isa. 25:8; 35:​1-7. w23.11 4 ¶9-10

Ka tupu viviki te “mate maata.” (Mata. 24:21) Inara, e tuke teia tumatetenga, no te mea kua kite tatou te aere maira te reira. E 2,000 mataiti i teianei, kua akamatakite mai a Iesu i tana au pipi kia vai teateamamao no teia ra. Me vai teateamamao tatou, ka rauka ia tatou te akakoromaki e te tauturu atu i tetai. (Luka 21:36) Ka anoanoia te akakoromaki kia akarongo kia Iehova, te irinakianga e ka paruru aia ia tatou. Eaa ta tatou ka rave me ngere te au taeake i tetai me kore te katoa anga i ta ratou apinga? (Haba. 3:​17, 18) Ka tangi aroa atu tatou ma te tauturu ia ratou. Eaa ta tatou ka rave, me tamaki mai te au pupu enua, ka noo kapiti tatou i te pae i te au taeake e te au tuaine? (Eze. 38:​10-12) Ka akaperepere tatou ia ratou ma te tauturu ia ratou i te tuatau ngata. w23.07 2 ¶2-3

Ka rauka i te aronga akaipoipo te apiianga mei te akaraanga o Akuila e Peresila, tei akaperepereia e te au Kerititiano mua. (Roma. 16:3, 4) Noatu kare te Pipiria i akakite maata mai ana i to raua oraanga akaipoipo, kua angaanga, kua tutu aere, e kua tauturu kapiti raua i te au taeake. (Anga. 18:​2, 3, 24-26) Te tika, me taiku te Pipiria ia Akuila e Peresila, kua taiku kapitiia mai raua. Akapeea te au tokorua me aru i te akaraanga o Akuila e Peresila? Akamanako i te au mea taau e toou tokorua ka anoanoia kia rave. Ka rauka ainei ia korua te rave kapiti i teia au angaanga kare e ko koe anake ua? Ei akaraanga, kua tutu aere kapiti a Akuila e Peresila. Te rave putuputu ra ainei korua i te reira. Kua angaanga kapiti katoa a Akuila e Peresila. Noatu kare e aiteite ana ta korua ngai angaanga, ka rauka ainei ia korua te rave kapiti i te angaanga o te ngutuare? (Kohe. 4:9) Me tauturu korua i tetai e tetai, ka taokotai korua ei pupu e ka rauka ia korua te tuatua kapiti. w23.05 22-23 ¶10-12

Ka mataku te katoatoa i tetai au taime. Ei akaraanga, kua inangaro te Ariki ko Saula i te tamate ia Davida, no reira kua oro a Davida ki te oire o Gata i Philiseti. Kua kite te Ariki ko Akisa o Gata, e ko Davida te tumutoa tei tamate atu i te tai ngauru tauatini Philiseti. No reira, kua “mataku rava akera” a Davida. (1 Samu. 21:​10-12) Kua manata aia i ta Akisa ka rave kiaia. Eaa tei tauturu ia Davida kia ngakau toa? Ia Salamo 56, kua akakite a Davida i tei tupu kiaia i Gata. Akataka mai tera salamo i to Davida tu mataku, e akapeea aia i te autu anga i te reira. Te mataku anga aia, kua irinaki aia kia Iehova. (Sala. 56:​1-3, 11) Ma te tauturu a Iehova, kua rave a Davida i tetai ikianga karape: Kua akariro aia iaia uaorai ei tangata neneva! Kua taui a Akisa i tona manako no te tamate atu ia Davida, e kua ora mai a Davida.—1 Samu. 21:13–22:1. w24.01 2 ¶1-3

Koai teia aronga tei taikuia i roto i te tia o teia rā? Ko te au taeake akatainuia! No reira me apainaia te toenga o te aronga akatainuia ki te rangi vaitata ki te openga o te mate maata, ta ratou angaanga mua, ko te tamaki. No reira me apainaia ratou ki runga i te rangi, ka angaanga kapiti ratou kia Karaiti e tana au angera tapu e ka tamaki atu ratou i te au enemi o te Atua. Akamanako ana! Ia ratou i runga i te enua, e aronga pakarikari e te paruparu tetai pae o te aronga akatainuia. Inara me apainaia ratou ki runga i te rangi, ka riro mai ratou ei au vaerua matutu e te mate kore te ka tamaki atu i te pae i to ratou Ariki Tumutoa ko Iesu Mesia. I muri ake i te tamaki o Aramakito, ka angaanga ratou ma Iesu i te tauturu i te tangata kia riro mai ei aronga apa kore. Kare e ekoko, e maata atu te meitaki ta ratou ka rave mei te rangi no te tauturu i to ratou au taeake e te au tuaine akaperepereia tei kore i rauka ana ia ratou ei aronga apa ua i te enua! w24.02 6-7 ¶15-16

Kua emiemi tetai pae no te akatapuanga e te papetitoanga noatu kua papa ratou. Penei ka manako ratou, ‘Akapeea me ka rave au i te kino e ka akaateaia au ki vao i te putuputuanga?’ Me ko tera toou manako, e irinaki e ka oronga mai a Iehova i te au mea tei anoanoia “kia tau [toou] aerenga i te Atu i te au mea katoa e mareka mai ei ra.” (Kolo. 1:10) Ka oronga katoa mai aia i te maroiroi kia koe kia rave i te tika. Kua akapapu mai aia i te reira na roto i tana akono anga i te au taeake. (1 Kori. 10:13) Ko te reira tetai tumu i iti ei te numero o te aronga tei akaateaia ki vao i te putuputuanga. Ka tauturu a Iehova i tona iti tangata kia vai tiratiratu kiaia. Pouroa tatou ka timataia kia rave i te kino. (Iako. 1:14) Inara, naau te ikianga me ka rave koe i te kino. Tei ia koe te tikaanga kia akatere i toou uaorai oraanga. Noatu e ka patoi mai tetai aronga, ka rauka ia koe i te akatere i toou au anoano. w24.03 5 ¶11-12