Noema

Me e metua koe, e tauturu i ta kotou tamariki kia papa no te pau kia tau ki to ratou mataiti. I tetai taime ka uriuriia te au manako pakari mei te manamanata o te akaipoipo e te oraanga, inara te vaira tetai parakarapa ka rauka i taau tamaiti i te paupau. Pera katoa, e tauturu i taau tamariki kia mārama i te tumu me kare ratou e ikiia i te au taime ravarai me tāki i to ratou rima. Me akamārama i teia kare ratou e maromaroa me kare e ikiia. (1 Timo. 6:18) Pouroa tatou ka rauka i te akapapa i te au pauanga akamaroiroi te ka akangateitei ia Iehova e ka akamaroiroi i te au taeake. (Mase. 25:11) Ia tatou e akakite ra i tetai akaraanga poto eiaa e maata te tuatua. (Mase. 27:2; 2 Kori. 10:18) Mari ra, e akamou ki runga ia Iehova, tana Tuatua e tona iti tangata katoa.—Apo. 4:11. w23.04 24-25 ¶17-18

E puapinga katoa te aroa kia vai ara ua e kia matakite. (Mata. 22:​37-39) Ka tauturu te aroa no te Atua ia tatou kia akakoromaki i te tutu aere noatu te manamanata. (2 Timo. 1:​7, 8) No te mea ka aroa katoa tatou i te aronga kare o ratou akarongo, ka tutu aere ua tatou te kimi ia ratou, pera te tutu aere na runga i te tereponi e te tata reta. Kare tatou e tuku i te au penei ka taui to tatou tangata tupu e ka rave i te meitaki. (Eze. 18:​27, 28) To tatou aroa no te tangata tupu ka kapiti mai te au taeake Kerititiano. Ka akaari tatou i teia aroa me “akapumaana [tatou] tetai ki tetai, i te akatupu i te meitaki tetai ki tetai.” (1 Tesa. 5:11) Mei te au vaeau i roto i te tamaki, ka akamaroiroi tatou i tetai e tetai. Kare katoa tatou e tamamae i to tatou au taeake e te au tuaine ma te tutaki i te kino ki te kino. (1 Tesa. 5:​13, 15) Ka aroa katoa tatou na te akangateitei anga i te au taeake te arataki ra i te putuputuanga.—1 Tesa. 5:12. w23.06 10 ¶6; 11 ¶10-11

Tetai atu mataara ka akamatutu tatou i to tatou akarongo koia oki na te akamanako pakari anga i te oko. Te akapapu maira te oko e ka tupu te taputou a te Atua. Me akamanako meitaki tatou i te akakoroanga o te oko e eaa te ō maira, ka akamatutuia to tatou akarongo, e e mea papu e ka akatupuia te taputou a te Atua no te oraanga mutu kore i te ao meitaki rava atu. Eaa tatou i tuatua akapera ai? No reira, eaa te ō maira ki te oko? Kua tono mai a Iehova i tana Tama mua akaperepereia, tona oa piri vaitata, mei te rangi mai kia anauia ei tangata apa kore. Iaia i te enua nei, kua akakoromaki a Iesu i te au turanga ngatā. E kua mamae e kua tamateia. E tutaki anga maata tikai teia kia Iehova! Kare roa te Atua aroa e akatika kia mamae e kia mate tana Tamaiti e kia rauka ua mai tetai oraanga poto ua e te meitaki no tatou. (Ioa. 3:16; 1 Pete. 1:​18, 19) Kua oronga mai a Iehova i tana Tamaiti akaperepere ei tauturu ia tatou, no reira Nana e akapapu mai e ka noo tatou i roto i te ao ou tika tikai e tuatau ua atu. w23.04 27 ¶8-9

Tei ia Iehova ainei te anoano no te akatuakaou i tei mate? Ae. Kua akauru aia i te aronga tata Pipiria kia rekoti i tana taputou no te tuakaouanga a te tuatau ki mua. (Isa. 26:19; Apo. 20:​11-13) Me taputou a Iehova, ka akatupu rai aia i te reira. (Iosu. 23:14) Te inangaro ra a Iehova i te akatuakaou mai i te aronga tei mate. Akamanako ana i te au tuatua a Iobu. Irinaki papu aia noatu me mate aia, kua inangaro a Iehova i te kite akaou iaia. (Iobu 14:​14, 15) Ko to Iehova inangaro katoa no tona aronga akamori tei takake. Kua anoano aia i te akaora akaou mai ia ratou ma te oraanga kopapa meitaki e te mataora. Akapeea te au pirioni ua atu tangata tei takake kare i kite no runga ia Iehova? Kua inangaro to tatou Atua akaperepere i te akaora katoa ia ratou. (Anga. 24:15) Kua inangaro aia ia ratou kia riro ei au oa nona e kia ora e tuatau ua atu i te enua nei.—Ioa. 3:16. w23.04 9 ¶5-6

Akapeea koe me akamaroiroi ia koe no toou manakonakoanga? Ei akaraanga, me e manakonakoanga toou i te noo ki te enua e tuatau ua atu, e tatau i te au irava no te Parataito e e akamanako oonu i te reira. (Isa. 25:8; 32:​16-18) Akamanako ana mei teaa te oraanga i te ao ou. E akamanako ia koe i reira. Me mou to tatou manakonakoanga no te ao ou, e “mea ngiti poto māmā” to tatou manamanata. (2 Kori. 4:17) Na roto i te manakonakoanga ta Iehova i oronga mai, nana koe e akamaroiroi. Ka oronga mai aia i te maroiroi taau e anoano ra. No reira me anoano tauturu koe kia rave i taau angaanga, kia akakoromaki i te turanga ngatā, kia rekareka, e pure ngakau tae kia Iehova e e kimi i tana tauturu na roto i te apii. E āriki i te tauturu a toou au taeake e te au tuaine Kerititiano. E akamanako ua rai i toou manakonakoanga no te tuatau ki mua. Ei reira koe e “akamaroiroiia mai i te au maroiroi katoa, kia tau i [to te Atua] mana kakā, kia maata atu te akakoromaki, e te maru anga kia roa, ma te rekareka.”—Kolo. 1:11. w23.10 17 ¶19-20

E maata te au tumu kia akameitaki ia Iehova na roto i te pure. Ka akameitaki tatou iaia no tetai ua atu mea meitaki; no reira mai oki te au mea memeitaki ravarai. (Iako. 1:17) Ei akaraanga, ka akameitaki tatou i te manea o te enua e te au mea tei angaia. Ka akameitaki katoa tatou i te oraanga, te ngutuare tangata, te au taeake, e te manakonakoanga. Ka akameitaki tatou ia Iehova no tona pirianga oa akaperepere. Penei ka anoanoia tatou kia akamanako i te au tumu no te akameitaki ua ia Iehova. Te noo nei tatou i roto i tetai ao akameitaki kore. Kua akamou ua te tangata ki runga i ta ratou e inangaro ra kare kia akameitaki i ta ratou i rauka. Me tupu te reira, ka riro ta tatou pure ei mea patipati ua. Ka anoanoia tatou kia akameitaki ua i ta Iehova i rave no tatou.—Luka 6:45. w23.05 4 ¶8-9

Ei Metua aroa no tatou, kare a Iehova e inangaro kia tupu te mamae kia tatou. (Isa. 63:9) Noatu rai, kare aia e takore i to tatou au manamanata, tei akaaiteia mei te vai ta’e e te mura a’i. (Isa. 43:2) Inara, kua taputou mai aia i te tauturu ia tatou kia ‘aere na roto’ i te reira. Kare aia e akatika i to tatou manamanata kia akatupu i te kino kia tatou. Kua oronga katoa mai a Iehova i tona vaerua tapu ei tauturu ia tatou kia akakoromaki. (Luka 11:13; Phili. 4:13) No reira, papu ia tatou e ka oronga ua mai aia i ta tatou e anoano ra kia akakoromaki e kia vai tiratiratu kiaia. Inangaro a Iehova kia irinaki tatou iaia. (Ebe. 11:6) I tetai taime, e maata to tatou au manamanata. Ka ekoko tatou me ka tauturu mai a Iehova ia tatou. Inara te akapapu maira te Pipiria e ka rauka ia tatou i te autu i te au manamanata na roto i te mana o te Atua. (Sala. 18:29) No reira kare tatou e ekoko, mari ra ka pure tatou ma te irinaki e ka pau mai a Iehova i ta tatou pure.—Iako. 1:​6, 7. w23.11 22 ¶8-9

Mei teaa atura teia akatutu anga manea no te inangaro mou! Te akapapu maira teia au tuatua i tetai tika no te au tokorua akaipoipo: Ka rauka ia korua tetai inangaro mutu kore. Kia tupu te inangaro mutu kore i rotopu i te nga tokorua akaipoipo, tei runga ua te reira ia raua. Ei akatutuanga, ka kā mutu kore ua te a’i no tetai tuatau roa—tera ua kia tāuruuruia te reira. Me kare te reira e akonoia, ka mate te a’i. Pera te inangaro i rotopu i te tane e te vaine ka vai mutu kore te reira—me akamatutu raua i to raua pirianga. I tetai au taime, penei ka ngaro te inangaro o te nga tokorua, me tupu te ngatā o te moni, te makimaki, e te au taomi anga o te utuutu tamariki. Kia mura ua “te uira o Iehova,” ka anoanoia te tane e te vaine kia angaanga pakari kia rauka tetai pirianga matutu kia Iehova. w23.05 20-21 ¶1-3

Kia ngakau toa, eaa ta tatou ka rave? Penei ka akamaroiroi mai to tatou nga metua ia tatou kia ngakau toa, kare e rauka teia tu mei tetai apinga akaperepere rai. Ka anoanoia te apii anga i tetai tu ou kia rauka te tu ngakau toa. Ka rave tatou i te reira na te apii anga e te aru anga i te tu o tetai puapii. Mei te reira rai, ka akaari e ka aru katoa tatou i teia tu o te aronga ngakau toa. Mei ia Daniela, ka anoanoia tatou kia kite meitaki i te Tuatua a te Atua. Kia akatupu i tetai pirianga vaitata kia Iehova na te akakite anga i to tatou manako. E irinaki papu kia Iehova e ka tauturu ua mai aia ia tatou. Me timataia to tatou akarongo, ka ngakau toa tatou. Ka akameitakiia te aronga ngakau toa. Penei ka akakeu te reira tupuanga i te aronga ngakau tika kia Iehova. No reira e tumu meitaki ta tatou kia ngakau toa. w23.08 2 ¶2; 4 ¶8-9

Te tuatua Ereni “akara matariki marie” kua taangaangaia me akaraia te au apinga metera puapinga. No reira, kia matakite tatou i ta tatou e akarongo ra e e tatau ra me e tika te reira. E e puapinga atu te reira no tatou i te mate maata e vaitata maira. Kare tatou e āriki ua i ta tetai pae e karanga ra, ka taangaanga tatou i to tatou manako kia akaaite i ta tatou e tatau ra me kore e akarongo ra ki ta te Pipiria e te akaaerenga a Iehova e karanga ra. Na te rave anga i te reira, kare tatou e akavareia e tetai ua atu pikikaa a te au temoni me kore akavare anga. (Mase. 14:15; 1 Timo. 4:1) Ei pupu, ka ora atu te au tavini o te Atua i te mate maata. Inara, kare tatou tataki tai i kite eaa te ka tupu apopo. (Iako. 4:14) Noatu ra, me ka ora atu tatou i te mate maata e me ka mate i mua ake i te reira, ka tutakiia tatou ki te ora mutu kore me vai tiratiratu tatou. Kia akamou ua tatou ki runga i to tatou manakonakoanga meitaki e kia vai papa ua no to Iehova rā! w23.06 13 ¶15-16

Kare tatou e kite e ka akapeea tetai au totou Pipiria me akatupuia. (Dani. 12:​8, 9) Noatu kare tatou e mārama e ka akapeea tetai totou me akatupuia, ka tupu rai teia. No reira, e irinaki kia Iehova e ka akakite mai aia i te reira i te tuatau tau mei tana i rave ana. Aere ua rai ka rongo tatou i te kapiki anga e “e au, e kare e kino.” (1 Tesa. 5:3) Aru mai ka uri e ka takore te mana poritiki o teianei ao i te au akonoanga pikikaa. (Apo. 17:​16, 17) E oti, ka tamaki ratou i to te Atua iti tangata. (Eze. 38:​18, 19) Ka taki atu teia au tupuanga ki te tamaki openga o Aramagido. (Apo. 16:​14, 16) Papu ia tatou e kare e roa atu ka tupu teia. No reira, e akaperepere i to tatou Metua i te rangi na te apii meitaki anga i te au totou Pipiria e te tauturu i tetai pae kia kite i te reira. w23.08 13 ¶19-20

Te uriuri anga te apotetoro ko Paulo no runga i te akarongo, te manakonakoanga, e te aroa, kua taopenga aia na te karanga anga, “ko tei maata ra [o teia au tu] ko te aroa.” (1 Kori. 13:13) Eaa ra a Paulo i tuatua ai i teia? A te tuatau ki mua, kare e anoanoia te akarongo i roto i ta te Atua taputou no te ao ou, no te mea ka akatupuia teia manakonakoanga. No reira ka anoanoia ainei tatou kia akaperepere ia Iehova e tona iti tangata? Ae, ka akaperepere ua atu tatou ia ratou e tuatau ua atu. Te akaari katoa ra tatou e e au Kerititiano mou tatou. Kua akakite a Iesu ki tana au apotetoro: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioa. 13:35) Pera katoa, na te aroa e taokotai ia tatou. Karanga a Paulo no te aroa e “tatua apa kore” ïa. (Kolo. 3:14) Kua tata te apotetoro ko Ioane ki te au taeake: “Ko tei anoano i te Atua ra, kia aroa aia i tona taeake.” (1 Ioa. 4:21) Me aroa tatou ia tatou uaorai, te aroa katoa ra tatou i te Atua. w23.11 8 ¶1, 3

Te akaaite ra te Pipiria i to tatou oraanga Kerititiano ki tetai taemoemo anga. Te aronga oro tei tae ki te openga kua rauka te ora mutu kore ia ratou. (2 Timo. 4:​7, 8) Ka tauta pakari tatou i te oro tamou marie, no te mea te vaitata nei tatou ki te openga. Kua akakite mai te apotetoro ko Paulo i te ka tauturu ia tatou kia rauka te rē. Kua akakite mai aia e “e kopae atu tatou i te au mea teiaa ravarai . . . e oro tamou marie ei i teianei oroanga i tukuia mai ki mua ia tatou nei.” Te karanga ra ainei a Paulo e kare a te au Kerititiano apainga? Kare. Te karanga ra aia e e akaruke tatou i te au mea teiaa kare e anoanoia. No te mea ka tamanamanata e ka akaroiroi teia au mea ia tatou. Ka akara tatou e me te apai nei tatou i te au mea teiaa kare e anoanoia e e kopae viviki atu i te reira. Taua taime rai, ka apai tatou i te au apainga tei anoanoia. Me kare tatou e apai i teia au apainga nei, kare tatou e tae ki te openga o te oro anga.—2 Timo. 2:5. w23.08 26 ¶1-2

Ka tauturu te manako maru kia akangateitei tatou i te manako o etai ke. Ei akaraanga, e reka ana tetai au tuaine i te akamanea i to ratou mata, inara kare tetai pae e inangaro ana. E reka ana tetai au Kerititiano i te inu kava, kare ra tetai pae e inu ana. Te inangaro ra te au Kerititiano katoatoa i tetai oraanga kopapa meitaki inara e tukeke te rapakau anga ta ratou ka iki. Me manako tatou e meitaki atu ta tatou uaorai ikianga e ka maro atu i te au taeake i roto i te putuputuanga kia ariki i te reira, ka riro ia ei turorianga ia ratou e te akatupu anga ke anga i roto i te putuputuanga. Kare roa tatou e inangaro i te rave i te reira! (1 Kori. 8:9; 10:​23, 24) Ei akaraanga, kare a Iehova i akakite mai ana eaa tikai te kakau ka aao tatou, mari ra e au kaveinga tana i oronga mai kia aru tatou. Ka aao tatou i te kakau te akangateitei ra i te Atua, na te akaari anga i te tu tau, te akatietie kore, e te “akono meitaki.” (1 Timo. 2:​9, 10) No reira, kare tatou e aao i te kakau te ka akaturori ke i te manako o te tangata no te tu o to tatou kakau. Ka tauturu katoa te au kaveinga Pipiria i te aronga pakari kia kore ratou e tuku mai i ta ratou uaorai au ture no te kakau e te rouru. w23.07 23-24 ¶13-14

Kua akanoo a Iehova i te tango kia mataora to tatou oraanga. Ko te aronga tei āriki i te patianga a te “vaine neneva” ra e kua kimi i te au anoano navenave “mangaro” ra. ‘Tei raro rava to ratou openga ia Ade.’ (Mase. 9:​13, 17, 18) E tuke te aronga tei āriki i te patianga a te vaine tei akatutu i te “pakari” mou! (Mase. 9:1) Te apii nei tatou i te inangaro i ta Iehova e inangaro ra e kia rikarika i tana e rikarika ra. (Sala. 97:10) Mataora katoa tatou i te pati i te katoatoa kia puapingaia mei teia “pakari” mou. Mei te mea te ‘kapiki nei tatou mei te au ngai teitei o te oire. Ko tei auouo ra, e ariu mai ki aku nei.’ Kare te aronga te ka ariu mai e puapinga uaia i teianei. Mari ra ka puapingaia ratou no tetai tuatau roa, e “kia ora” e tuatau ua atu ia tatou ‘e aere ra na te ara kite.’—Mase. 9:​3, 4, 6. w23.06 24 ¶17-18

Eaa toou manako me ui mai toou oa angaanga e te oa apii i toou irinakianga? Ka ru ainei koe? Maata ia tatou ae. Inara te akaari maira te reira uianga i te manako o tetai tangata e tona irinakianga, i te akatupu anga i tetai tuatau no tatou kia akakite i te tuatua meitaki kiaia. I tetai taime ka ui mai te tangata na roto i te tu riririri. Kare i te mea poitirere. No te mea kua rauka ia ratou te akakiteanga pikikaa no to tatou irinakianga. (Anga. 28:22) Pera katoa, te noo nei tatou i te “tuatau openga,” ka riro te manganui “ei akaatikau koreromotu” e te “rotoriri.” (2 Timo. 3:​1, 3) Penei ka manako koe, ‘Akapeea au me tuatua meitaki e te kauraro marie me timata mai tetai i toku irinakianga Pipiria?’ Eaa te tauturu? Okotai tuatua—kia maru. Kare te tangata maru e riri vave mari ra ka akatere aia i tona tu me akaririia mai e me timataia. w23.09 14 ¶1-2

I tetai au taime, ka orongaia mai te au akoanga te ka akamatakite ia tatou auraka e anoano maata i te moni e kia kopae i te au angaanga te ka akamareka kore ia Iehova. Ka akameitakiia tatou me aru i ta Iehova aratakianga. (Isa. 48:​17, 18; 1 Timo. 6:​9, 10) No reira ka taangaanga ua rai a Iehova i te au tangata kia oronga mai i tana aratakianga i te tuatau o te mate maata e tae ua atu ki te Tutara Anga Tauatini Mataiti. Ka aru ainei tatou i te reira aratakianga? Tei ia tatou te tikaanga kia aru i ta Iehova aratakianga i teianei. No reira, e aru i ta Iehova aratakianga e te akarongo ki te au tangata tei ikiia kia tiaki ia tatou. (Isa. 32:​1, 2; Ebe. 13:17) Me pera tatou, e tumu meitaki ta tatou kia irinaki i to tatou Arataki ko Iehova, tei akatakake mai ia tatou mei te kino e te arataki ra ia tatou ki te ao ou. w24.02 25 ¶17-18

Kua mataora te apotetoro ko Paulo i tetai oraanga meitaki te tavini ia Iehova, inara e maata tona manamanata. Kua teretere mamao a Paulo, e kare te reira i te mea mama i te reira tuatau. I tona au tere, kua rokoia a Paulo e te “mate i te vai, e te mate i te anana keia.” Kua takinga kinoia aia e te aronga tei patoi mai iaia. (2 Kori. 11:​23-27) E kare te au taeake Kerititiano o Paulo i ariki ua ana i tana tauturu. (2 Kori. 10:10; Phili. 4:15) Eaa tei tauturu ia Paulo kia maroiroi ua te tavini ia Iehova? E maata ta Paulo i apii mei te au Tuatua Tapu no to Iehova tu e tona uaorai oraanga. Kua papu ia Paulo e te akaperepere maira a Iehova iaia. (Roma 8:​38, 39; Ephe. 2:​4, 5) E kua akaperepere maata aia ia Iehova. Kua akaari a Paulo i tona akaperepere ia Iehova na te “matuapuru [anga] i te aronga tapu, e te matuapuru ua” atu.—Ebe. 6:10. w23.07 9 ¶5-6

E maata te tangata tei āriki e ka anoanoia kia akarongo ki te kavamani e kia aru i tetai au ture a “te aronga mana taoonga.” Inara ka emiemi te reira aronga i te akarongo ki te au ture kare e tau ana e kare ratou e reka ana. Akakite te Pipiria e kua akatupu te kavamani i te kino maata i raro ake i ta Satani akakeuanga, kare e roa atu ka takoreia. (Sala. 110:​5, 6; Kohe. 8:9; Luka 4:​5, 6) Akakite katoa te reira e “ko tei māro atu ki te taoonga ra, kua māro aia i tei akonoia e te Atua ra.” No reira, kua tuku a Iehova i te au kavamani kia akaaere e kia akono i te anoano o te tangata e inangaro aia kia akarongo tatou kia ratou. No reira, ka “tuku atu [tatou] i te mea tau i te tangata katoatoa ra,” te tutaki i te tero, te akangateitei e te akarongo ua. (Roma 13:​1-7) Penei ka manako tatou i tetai ture e e mea ngatā e te tau kore. Inara ka akarongo tatou kia Iehova no te mea kua akaue mai aia kia akarongo tatou ki te aronga mana, auraka ra me patoi ratou i tana akauenga.—Anga. 5:29. w23.10 8 ¶9-10

I te anauia anga a Samasona, te tutara ra to Philiseti ki rungao i te iti tangata Iseraela e te takinokino anga ia ratou. (Aka. 13:1) Kua mamae tikai to Iseraela. Kua iki a Iehova ia Samasona kia “akaora ia Iseraela i te rima o te Philiseti.” (Aka. 13:5) Ka anoanoia a Samasona kia irinaki ua ia Iehova. I tetai atianga, kua aere mai te vaeau o Philiseti i te opu ia Samasona i Lehi, i Iuda. Kua mataku te iti tangata o Iuda, e kua tuku atu ia Samasona ki te enemi. Tapeka atura i te nga rima o Samasona ki te taura ou e rua e kua arataki atu te iti tangata Iseraela iaia ki te au Philiseti. (Aka. 15:​9-13) Inara, kua “aere viviki maira te vaerua o Iehova” ki runga ia Samasona e kua matara te taura mei iaia. “Kitea iora e ia tetai ivi tanga asini e mea mata,” kua rave i te reira e kua tamate e 1,000 tangata Philiseti!—Aka. 15:​14-16. w23.09 2 ¶3-4

Kua akaari mai a Iehova i “te akakoroanga nana mei muatangana mai” i roto i te Pipiria. Noatu ra, e puapinga ua ana aia no te mea “kua angā Iehova i te au mea katoa nei nona uaorai.” (Mase. 16:4) Ta Iehova ka rave, ka mou e tuatau ua atu. Eaa ta Iehova akakoroanga, e eaa tana akatanotanoanga i rave kia tupu te reira? Kua akakite te Atua ki te nga tangata mua i tana akakoroanga no raua. “Kia anau korua, e kia maata roa, e e akaki i te enua nei, e e akavi; e kia mana korua ki rungao . . . i te au mea ora katoa” i te enua nei. (Gene. 1:28) I te meameaau anga a Adamu raua ko Eva, te akatupu anga i te ara ki te tangata ravarai, kare ta Iehova akakoroanga i taui ana. Kua akatanotano aia akapeea te reira me akatupuia. I reira, kua akanoo a Iehova i tetai Patireia i te rangi te ka akatupu i tona akakoroanga no te tangata e te enua katoa.—Mata. 25:34. w23.10 20 ¶6-7

Ka rauka ia Iehova te tauturu ia tatou me aruaru ua tatou. Penei ka ngatā i te aere ua atu, me tupu akaou tetai tu paruparu. Tetai taime kua akaraanga e kua kino atu to tatou tu paruparu i to te apotetoro ko Petero. Inara ka rauka ia Iehova te oronga mai i te maroiroi kia tauta ua atu tatou. (Sala. 94:​18, 19) Ei akaraanga, kua rave tetai taeake i te oraanga homosexual no tetai au mataiti i mua ake ka apii ei i te tuatua mou. Kua akaruke tinamou aia i te reira peu ainga viivii. Inara i tetai taime, ka tupu ua mai teia anoano tarevake. Eaa tei tauturu iaia kia aruaru ua? Karanga aia: “Ka akamaroiroi a Iehova ia tatou.” E oti: “Ma tona vaerua . . . , kua kite mai au i te puapinga kia [akono ua] i te tuatua mou . . . kua taangaanga a Iehova iaku, noatu toku au tu paruparu e kua akamaroiroi mai iaku.” w23.09 23 ¶12

E te au taeake mapu, ka anoanoia koe kia tauta kia riro mai ei Kerititiano tukatau. E aru i te au akaraanga meitaki, e akatupu i te tu akono, kia irinakiia, kia apii i te au tu kite karape no te oraanga e kia akapapa no te tuatau ki mua. Penei ka manako koe e apainga teiaa teia au angaanga ka anoanoia. Inara ka rauka ia koe! E akamaara e ka tauturu a Iehova ia koe. (Isa. 41:​10, 13) Ka tauturu katoa toou au taeake e te au tuaine. Me riro mai koe ei Kerititiano tukatau, ka mataora toou oraanga e ka puapingaia. Akaperepere matou ia kotou e te au taeake mapu! E kia akameitaki a Iehova i ta kotou tautaanga kia riro mai ei au Kerititiano tukatau. w23.12 29 ¶19-20

Akamanako e tei te pae koe i te au taeake e te au tuaine mataora e kua nenei koe i tetai tutu. Kua nenei koe kare e tai mari ra e toru tutu. Inara e tai tutu e mata tumatuma to tetai taeake. Ka takore koe i te reira e ka toe mai e rua tutu e mata katakata to te katoatoa. Ka maara ua ia tatou te au taime i kapiti mataora ai tatou ki te au taeake e te au tuaine. Inara, i tetai atianga ka tuatua mai te taeake me kore te tuaine i tetai mea tau kore. Eaa taau ka rave? Ka akangaropoina koe i te reira mei te tutu kino i takore ei koe. (Ephe. 4:32) Ka rauka ia tatou i te akangaropoina i te tarevake no te mea ka maara ua ia tatou te taime mataora kia ratou. Ko te reira ta tatou ka akaperepere. w23.11 12-13 ¶16-17

Ko te aiteanga o te tuatua Ereni, kia akangateitei te akamanea o tetai vaine i te tangata e kia akamanako ia ratou. Akaperepere matou ia kotou e te au tuaine no ta kotou akamanea anga tau! Ko te kite pakari tetai tu puapinga ka anoanoia e te au tuaine tukatau. Eaa te tu kite pakari? Ko te tu akono meitaki—te kite i te mea tika mei te tarevake e kia rave i te ikianga meitaki. Akamanako i te akaraanga o Abigaila. Kua rave tana tane i tetai ikianga kino tei riro ei tumatetenga no tona kopu tangata. Kua rave viviki a Abigaila i tetai angaanga. E kua riro tona tu akono meitaki ei akaora i tona kopu tangata. (1 Samu. 25:​14-23, 32-35) Ka tauturu katoa te tu kite pakari ia koe kia kite i te taime tau no te tuatua e te noo muteki ua. Ka tauturu katoa ia koe kia akaari i te inangaro e kia akamareka i tetai ke.—1 Tesa. 4:11. w23.12 20 ¶8-9

Kua tata te apotetoro ko Paulo i teia irava ki te putuputuanga i Roma. Kua apii te au taeake e te au tuaine o reira no runga ia Iehova e Iesu, kua akatupu i te akarongo e kua riro mai ratou ei Kerititiano. “Kua akatikaia [ratou] e te Atua no te akarongo” e kua akatainuia ratou ki te vaerua tapu. (Roma 5:1) Kua rauka i reira ia ratou tetai manakonakoanga manea. I muri mai, kua tata a Paulo ki te au Kerititiano akatainuia i Ephesia no runga i to ratou manakonakoanga. Karanga a Paulo, kua rauka ia ratou te manakonakoanga “i akonoia na te aronga tapu.” (Ephe. 1:18) Te tataanga a Paulo ki to Kolosa, kua akakite aia i te ngai ka akatupuia to ratou manakonakoanga. Kapiki aia i te reira “ko te irinakianga i vaioia no kotou i te ao,” koia oki i te rangi. (Kolo. 1:​4, 5) No reira, ko te manakonakoanga o te au Kerititiano akatainuia, ka akatuia ratou ki te rangi e ka tutara kapiti ma Iesu e tuatau ua atu.—1 Tesa. 4:​13-17; Apo. 20:6. w23.12 9 ¶4-5

Ko te tuatua “e akamaroiroi mai,” te akataka ra i te au vaeau tei paruru i tetai oire mei te enemi. Kua moe meitaki te au tangata i reira te kite anga e te paruruia ra ratou e te au vaeau. Aite rai ki te ’au o te Atua tei paruru i to tatou ngakau e te manako. Ka maru tatou i te kite e te paruruia ra tatou. (Sala. 4:8) Mei ia Hana, noatu kare to tatou turanga e taui, ka kite rai tatou i te ngakau ’au. (1 Samu. 1:​16-18) E me marū to tatou ngakau, ka māmā ua i te manako e te rave i te au ikianga meitaki. Eaa ta tatou ka rave? Mei te aronga o te oire tei paruruia e te au vaeau tei tiaki i te au ngutupa o te oire, e pure tatou e te pati kia Iehova i tana tauturu e kia oronga mai i Tona ’au. (Luka 11:9; 1 Tesa. 5:17) Me na roto ra koe i tetai tumatetenga, e tamou marie i te pure e ka kite koe i te ’au o Iehova te paruru anga i toou ngakau e toou manako.—Roma 12:12. w24.01 21 ¶5-6

Kia akatapu i te ingoa o tona Metua, kua akakoromaki a Iesu i te au tu takinokino anga, tamamae anga e te au akaapaanga pikikaa. Kua kite aia e ka akarongo aia i te au mea pouroa a tona Metua e kia kore e akamā i te reira. (Ebe. 12:2) Kua kite katoa aia e te takinokino ra a Satani iaia i tera tuatau ngatā. (Luka 22:​2-4; 23:​33, 34) Kua inangaro a Satani kia tiratiratu kore a Iesu, inara kare te reira i puapingaia! Kua akapapu mai a Iesu e e pikikaa ta Satani akaapaanga e kare o Iehova tavini mou te ka tiratiratu kiaia noatu te pakari o te au timataanga! Ka inangaro ainei koe i te akamareka i toou Ariki i te rangi? E akapaapaa ua atu i te ingoa o Iehova e te tauturu i te tangata kia kite i to tatou Atua e tona au tu manea. Me rave koe i te reira, te aru ra koe i te akaraanga o Iesu. (1 Pete. 2:21) Mei ia Iesu rai, te akarekareka ra koe ia Iehova e te akapapu ra i te enemi ko Satani e pikikaa aia! w24.02 11-12 ¶11-13

I te rima mataiti i aereia mai, e mirioni tuma tangata tei papetitoia ei Au Kite no Iehova. Me akatapu koe ia koe uaorai kia Iehova, te iki ra koe kia riro ei pipi na Iesu Karaiti e kia rave i te anoano o Iehova, ko te mea puapinga maata i roto i toou oraanga. Eaa te ka anoanoia noou me akatapu koe i toou oraanga? Karanga a Iesu: “Ko tei inangaro i te aru mai iaku, e akaruke aia iaia uaorai.” (Mata. 16:24) Te aerenga tuatua Ereni tei uriia “e akaruke aia iaia uaorai” ko tetai aiteanga “kia tuatua aia kare kiaia uaorai.” Ei tavini akatapuia kia Iehova, ka anoanoia koe kia tuatua kare ki tetai apinga tei patoi i to Iehova anoano. (2 Kori. 5:​14, 15) Ei akaraanga, ka kapiti mai i te tuatua anga kare ki “te au angaanga a te kopapa,” mei te peu ainga tau kore. (Gala. 5:​19-21; 1 Kori. 6:18) Ka ngatā ainei te rave i te reira? Me akaperepere koe ia Iehova e kua kite koe i tana ture e mea meitaki noou, te pauanga kare.—Sala. 119:97; Isa. 48:​17, 18. w24.03 2 ¶1; 3 ¶4

Ka oronga mai a Iehova i tona vaerua tapu ki te aronga tana e mareka ra. (Mata. 12:18) E ui kia tatou uaorai, ‘Kua akaari ainei au i tetai tu o te vaerua tapu i roto i toku oraanga?’ Kua kite ainei koe e maata atu toou tu akakoromaki mei to mua ana? Ko te maata atu ia koe i te akaari i te ua o te vaerua, mea papu e te mareka ra a Iehova ia koe! Kua oronga mai a Iehova i te oko kia puapingaia te aronga tana e mareka ra. (1 Timo. 2:​5, 6) Akapeea ra me kare to tatou ngakau e āriki i te manako e te mareka ra a Iehova ia tatou, noatu kua papetitoia tatou? E akamaara, kare e rauka i te irinaki ia tatou uaorai mari ra ka irinaki tatou ia Iehova. Ka āriki aia i te aronga tei akatupu i te akarongo i roto i te atinga oko e te taputou ra i te akameitaki ia ratou.—Sala. 5:12; Roma 3:26. w24.03 30 ¶15; 31 ¶17