Kia Akameitakiia​—No te Tutara ra to Iehova Patireia na te Mesia

“E akameitaki matou ia koe, e Iehova Atua Mana Katoatoa, . . . no te mea kua rave koe i toou mana maata e kua akamata i te tutara ei ariki.”​—APOKALUPO 11:17, “NW.”

1. Eaa ta te peretiteni o te Watch Tower Society i tuatua i muri ake i tona tere ki Europa i te 1911?

I TE akamataanga o te 1911, kua rave te peretiteni o te Watch Tower Society, ko C. T. Russell, i etai au akoanga Puka Tapu i te au oire mamaata i Europa. I te akakiteanga i te reira tere, kua tata a Russell i te ka aru mai nei ki roto i Te Punanga Tiaki Anga (reo Peritane), Me 15, 1911: “Kua poitirere tikai matou i te kite anga e e manganui te au akapapuanga e te puapingaia ra te au ngai ravarai . . . Kua kite te aronga tatau i ta matou puka e no etai mataiti e te manakonako nei matou e ka ope teia Uki ma tetai tuatau taitaia kino rava, e te manako nei matou e ka tupu viviki mai ma te ririnui kare e roa i muri ake ia Okotopa, 1914, ko ta matou ia i kite i te au Tuatua Tapu, e ko te tuatau te reira e ope ei te Tuatau o te au Etene​—te tukuanga i te au patireia o te enua katoa nei ki te au Etene ra; no reira, ko te tuatau ia e akamataʼi te patireia o te Mesia i te taangaanga i tona mana.” I tupu ainei te reira manakonakoanga?

2. Akapeea te akangaangaa anga i te au i te 1914 ra, e eaa te tupuanga mii tikai ra?

² I te tuanga mua o te 1914, te akaraanga meitaki ra te ao katoa e kare e tamaki. Inara kua ngaangaa peretaia te au i te taia angaia e tetai Tepia (Serbia) te tangata tuanga no te terono o Autiria (Austria) ia Tiunu 28, 1914. Kare i roa kua tuku a Autiria-Ungarii (Hungary) i tana tika kia tamaki atu ia Tepia. Kua taokotai atu a Rutia kia Tepia, e no reira kua tuku a Tiamani i tana tika kia tamaki atu ia Rutia ia Aukute ra 1. E kua tuku a Tiamani i tana tika kia tamaki atu ia Varani ia Aukute ra 3; ko Peritane Maata kua tamaki atu ia Tiamani ia Aukute ra 4; ko Montenegro ia Autiria-Ungarii i Aukute ra 7; ko Tiapani kua tamaki atu ia Tiamani ia Aukute ra 23; ko Autiria-Ungarii ia Peritumu (Belgium) ia Aukute 28. E manganui tei irinaki e kare e roa atu ka akamutu te tamaki. Kareka ra, kua tupu atu e kua riro ko te reira te tamaki kino roa o te tuatua enua e tae roa mai ki te reira tuatau, ma etai atu enua e 19 tei o atu ki te reira pai anga toto no te ao katoa tei akapouia e tere atu i te 13,000,000 au vaeau e te au tangata ua nei, e e tere atu i te 21,000,000 i kino e kua putaputa.

3, 4. Eaa tei tupu i te opati maata o te Totaiete i te popongi o te Varaire, o Okotopa ra 2, 1914?

³ I te popongi, o Okotopa 2, 1914, kua akakiteia e Russell ki te aronga angaanga i te opati maata o te Watch Tower Society i Brooklyn, i New York: “Kua ope te au tuatau o te Etene ra; kua ope te tuatau o to ratou au ariki.” Kua maeva maataia te reira e te ngutuare tangata i Betela, koia “te are o te Atua.”

⁴ Eaa te akatikaanga ta C. T. Russell e tona au taeake i rekareka maatai i te reira popongi o Okotopa ra? I akamata mai te tuatua “Te au Tuatau o te Etene” kiea? E te akapapuanga e i ope te au tuatau o te Etene ia Okotopa 1914 ra? E eaa ta te reira ka akatupu kia koe?

Ierusalema e to te Etene Tuatau

5. I akamata mai iea te tuatua ‘to te Etene Tuatau’ ra?

⁵ Te tuatua ‘to te Etene Tuatau,’ me kare “te au tuatau akatakaia no te etene,” no ta Iesu i totou maata mai no te akapouanga ia Ierusalema ra. (Luka 21:5-36, King James Version) E rua ra i mua ake i tana tuatuaanga i te reira, kua oronga atu a Iesu iaia uaorai ki te au tangata o Ierusalema ei Mesia no ratou. Iaia i aere taakaaka atura ki te oire na runga i te atini, e aronga tini to te ngati Iuda tei maeva, mei ta Zekaria 9:9 i totou maira. “Kia akameitakiia Tei aere mai ei Ariki ma te ingoa o Iehova ra,” ko ta ratou ia i kapiki maata atu.​—Luka 19:28-40, NW.

6, 7. Eaa te apa kino i te toto ta to Iudea i apai ki runga ia ratou uaorai, e eaa tei tupu mai?

⁶ Inara kua kite a Iesu e kare e roa atu ka taruri keia te manako o te au tangata kia patoi atu iaia e no te makitakita e te anoano kia ta iaia te au arataki akonoanga atua o Ierusalema ra i raro ake i te mana o to ratou metua, koia te Tiaporo. (Genese 3:15; Ioane 8:44) I muri poto akera, ia Nisana 14, kua kapikipiki maata mai te urupu o te ngati Iuda ra kia tamateia a Iesu. Kua kapiki atura ratou ki taua kavana o Roma tei kore ra i akatika, “Ei rungao ia matou tona toto, e ei rungao i ta matou tamariki.” (Mataio 27:24, 25) Kare te kau taunga nunui ra i ariki ia Iesu ei Mesia Ariki, e kua karanga: “Kare o matou ariki, mari ra ko Kaisara anake ra.” (Ioane 19:15) Kua patitiia te Mesia mou ra i reira ki runga i te rakau tamamae anga kia mate, kua akaapa pikikaaia e e patoi i to Roma e e tuatua akakino i te Atua o te ngati Iuda ra.​—Mareko 14:61-64; Luka 23:2; Ioane 18:36; 19:7.

⁷ E mea papu e ka tupu mai te riri o te Atua ki runga i te au tangata o Iudea no to ratou apa kino i te toto ra. Kare e tau kia karangaia a Ierusalema ma tona iero meitaki ra e “ko te oire ïa o te Ariki maata,” ko Iehova. (Mataio 5:35; Luka 13:33-35) I etai ra i mua ake i to Iesu matenga, kua tuatua akaperepere atura tana au pipi i te iero ra. Kua pau atura Iesu, ma te totou anga: “Teianei au mea ta kotou e akara nei; te vaitata mai nei te tuatau, kare rava tetai toka e vaioia ki rungao i tetai, ka ope rava ïa i te uriia ki raro.”​—Luka 21:5, 6.

8. I ta Iesu oronga anga i “te akairo” o te au mea te ka tupu e taki atu ei ki te akapouanga o Ierusalema ra, eaa atu tei kapitiia mai?

⁸ Kua ui maira ta Iesu au pipi ma te poitirere: “E te Orometua, aea ïa au mea e tupu ei? e eaa te akairo e kiteaʼi e, kua vaitata i te tupu?” (Luka 21:7) I tana pauanga kua totou papu atura a Iesu i te au tupuanga tei taki atu ki te akapouanga o Ierusalema, e kua kapiti katoa atura aia i teia takiota tuatua puapinga maata e: “Ka takatakaiia oki Ierusalema e te au etene, e kia ope tikai to te etene tuatau.” (Luka 21:8-24, KJ) Kua tou maira a Iesu ki te tuatau ki mua, i tetai apinga i muri roa mai i te akapouanga o Ierusalema​—tetai apinga te ka tapapa mai e “kia ope tikai to te Etene tuatau.” No runga i “te akairo,” kua karanga a Iesu: “Kia akara kotou i taua au mea nei i te tupu anga, kua vaitata ïa te basileia o te Atua, kia kite oki kotou.” (Luka 21:31) No reira e rua tupu anga o te akairo. Te mea mua, me kare e tupu anga mea ngiti, ka akakite mai e ‘kua vaitata te akataneaanga ia Ierusalema.’ (Luka 21:20) Te rua, e koia te tupu anga maata, ka rokoia mai ei kia ope tikai to te Etene Tuatau, e na te reira e akakite mai e “kua vaitata ia te basileia o te Atua.”​—Akaaiteia atu kia Mataio 24:3.

Monoia a Ierusalema i te Enua nei e Tetai Oire Meitaki Roa Atu

9. I naea i kore ei te turanga akaperepereia o te Ierusalema i te enua nei, e kua monoia te reira ki teaa?

⁹ I te tuatuaanga “e ka takatakaiia oki Ierusalema e te au etene, e kia ope tikai to te etene tuatau,” te akakite maira ainei a Iesu e ka patu akaouia mai taua oire i te enua ra ei mea akaperepere na te Atua ra? Kare. I muri ake i te taangaia te Tamaiti akaperepere a te Atua ra, kua ngaro ke atu te turanga takake o Ierusalema e tuatau ua atu e kua monoia mai ki tetai e meitaki rava atu koia “te oire o te Atua ora ra, ko Ierusalema i te rangi ra.”​—Ebera 12:22, NW; Mataio 23:37, 38; 27:50, 51.

10. Eaa te aiteanga o te tuatua “Ierusalema i te rangi ra”?

¹⁰ Te tuatua “Ierusalema i te rangi ra” te taikuia ra i te Puka Tapu ei akataka i te Patireia i te rangi kare e rauka kia akapouia ko tei kapikiia atura e te au Kerititiano akatainuia ra ki reira.a (Ebera 11:10; 12:22, 28, NW) I ta Paulo tata anga i teia, te vaira taua oire i te enua ra ma tona iero katoa tei akaperepereia ra e te ngati Iuda. E no reira, a Paulo i akamaaraara atu ei i te au Kerititiano Epera ra e, “kare oki o tatou e oire e mou i ko nei, te umuumu nei ra tatou i taua oire no a muri atu.”​—Ebera 13:14.

Eaa i Tapaiaʼi ko Ierusalema i te Rangi

11. Eaa tei akatutuia mai e te Ierusalema i te enua nei, e tae roa mai ki te kore anga ta Iehova akaperepere i te reira?

¹¹ Kua roa a Ierusalema e koia te oire maata o te iti tangata Iseraela, tei tuatuaia ra tona au ariki e i noo “ki runga i te terono a Iehova.” (1 Paraleipomeno 29:23) Pera katoa oki, kua akono a Iehova i te koreromotu ma Davida e ka vai rai te patireia i tona ngutuare e tuatau ua atu. Mei te au oire maata o teianei tuatau, ia Washington, Moscow, Canberra, e Pretoria, te taikuia ra ei akataka i to ratou au kavamani ke ke, mei te reira katoa a Ierusalema i te taiku angaia e te Puka Tapu ei akatutu anga i te patireia o Davida ra.​—2 Samuela 7:16; Luka 1:32.

12. Eaa te akataka anga i te tuatua ‘to te Etene Tuatau ra’?

¹² Kua kotingaia to Davida patireia ra, kua totoa anake ki te au kena tei akatakaia e te Atua no Iseraela i taito ra. No reira ko Ierusalema i te enua nei e tutu anake ia no te Patireia tikai o te Mesia te ka tutara mei te rangi mai e ko te enua katoa nei tona ngai. (Salamo 2:2, 7, 8; Daniela 7:13, 14; 2 Timoteo 4:18) E no reira, te puka The Time Is At Hand (Kua Vaitata te Tuatau), tei neneiia ra e te Watch Tower Society i te 1889, te akataka meitaki maira e: “Te tuatua ‘To te Etene Tuatau’ kua akatakaia mai e to tatou Atu no te tuatau o te tuatua enua i rotopu i te takore angaia o te Patireia akatutu anga o te Atua ra, koia te Patireia o Iseraela (Ezekiela 21:25-27), e te akatupu anga e te akanoo anga i tona tu tika tikai, koia te Patireia mou o te Atua ra.”

To te Etene Tuatau​—Eaa te Roa?

13. I naea i akamataʼi to te Etene Tuatau ra, e eaa koe i pau mai ei mei tena?

¹³ Na Nebukanesa te ariki o Babulonia i akapou atu te patireia akatutu anga o te Atua ra i te 607 M.T.N. Kia tae ki te itu o te marama a te ngati Iuda ra, kia vaitata atu i rotopu ia Okotopa, kua vai taneaia te enua.b (2 Ariki 25:8, 9, 22, 25, 26) Ei akapapu e kua tupu te reira i ta te Atua ra tika, kua oronga te Atua ko Iehova i tetai moemoea kia Nebukanesa. E tumu rakau tetai i taua moemoea ra tei tipuia ki raro e kua tuku akaouia kia tupu i muri ake i tetai va o te “itu ua te tuatau.” Te tupu anga mua o taua moemoea ra i to Nebukanesa akaoki angaia ki runga i tona terono i muri ake i te tu neneva anga no te tuatau poto ua.​—Daniela 4:10-17, 28-36.

14. Eaa te tumu maata o ta Nebukanesa ra moemoea?

¹⁴ Inara, kua akaari mai te tumu maata o te moemoea a Nebukanesa ra e ko tona tupu anga te kapitiia ra ki te patireia akatutuia o te Atua, tei tukuia ra taua ariki Etene ra kia ‘tipuia ki raro.’ Kua akaopeia taua moemoea ra ma teia tuatua anga no tona akakoroanga e: “Kia kite te aronga e ora nei, e e Mana to Tei Teitei ra i te patireia o te tangata nei, e ka oronga aia i te reira ki tana tangata inangaro, e te tuku nei i tei akaaka roa o te au tangata nei ki rungao.”​—Daniela 4:17, NW.

15. Akapeea a Iesu Mesia i tau ei e ko “tei akaaka roa o te au tangata nei”? (Mataio 11:29)

¹⁵ Okotai ua peretana tei tau i tona au tu katoa kia karangaia e ko “tei akaaka roa o te au tangata nei.” Ko te Tamaiti anau tai a te Atua tei akapapu iaia uaorai kia pera na te akarukeanga i tona kaka i te rangi ra kia anauia mai ei tangata, e ko Iesu, tei tamamaeia ra i te rima o Satani i te matenga kino e te taakaaka roa oki. (Philipi 2:3, 5-11) I muri ake i tona tuakaouanga ki te tu kaka i te rangi ra, kua tiaki a Iesu kia ope roa te itu tuatau no te tutaraanga o te Etene i mua ake ka akateronoiaʼi ei Mesia Ariki ki rungao i te au tangata katoa.​—Ebera 10:12, 13.

16. Akapeea ta te puka Apokalupo tauturu anga i te au Kerititiano i te tareanga e i naea te openga o te itu tuatau ra?

¹⁶ Inara i akapeea te au Kite o Iehova i kite ei eaa te roa o taua itu tuatau ra? Te akakite maira te Puka Tapu e ko “tetai tuatau, e nga tuatau e te apa tuatau,” me kore e toru e te apa au tuatau, e 1,260 ra ia. (Apokalupo 12:6, 14, NW) No reira, kia takiruaia te reira numero, me kare kia itu tuatau, ka tae ia ki te 2,520 au ra. I te tumuanga no te arataki anga a te totou ra e “okotai rā okotai rai ïa mataiti,” riro maira te itu tuatau ei 2,520 mataiti. (Numero 14:34; Ezekiela 4:6) Na teia tareanga, ko to te Etene Tuatau, tei akamataia ra ia Okotopa 607 M.T.N., kua akaopeia e 2,520 mataiti i muri mai i roto ia Okotopa 1914.

17. Eaa te akakiteanga mataora tei tau kia akakiteia i te 1914 ra?

¹⁷ Ia Okotopa 1914, kua akanooia e te Atua ra ko Iehova tana Tamaiti akaperepere, koia te Atu ko Iesu Mesia, ki runga i te terono o te Patireia i te rangi ra. Ei reira, i akamataʼi te orama a Ioane te apotetoro Kerititiano ra ei mea tika tikai, e kua tau te akakite anga kia raveia: “Kua riro te patireia o teianei ao ei patireia no to tatou Atu [no Iehova] e no tana Mesia, e ka tutara aia [a Iehova] ei ariki e tuatau e tuatau ua atu.” (Apokalupo 1:10; 4:1; 11:15, NW) Mei teaa ra te kaka i te reira nuti e te tumu no te mataora maata rava atu no te aronga e tuanga katoa ra ta ratou e pera ki te aronga o raro ake i te reira Patireia ra!​—Apokalupo 11:17.

18. Eaa te au tu mii i tupu ei ki te au tangata katoa mei te 1914 maira?

¹⁸ E tika rai e no te maataanga o te au tangata, kare i maata te mataora anga ki runga i te enua nei mei te 1914 maira. Inara ko te au tu aue i runga i te enua nei e akapapuanga e kua vaitata i te ope ta Satani tutara. Akapeea tatou i kite ei i teia? Kua akakite mai te puka Apokalupo e ka akatupu mai te akanoo angaia te Patireia o te Atua ra i tetai tamaki i te rangi ra. Ka uriia mai a Satani e tana au temoni ki vao i te rangi e ka kotingaia to ratou ngai takapini i te enua nei. I muri ake i tona kiteanga i teia autu anga na roto i te orama, kua akarongo atura a Ioane i tetai reo maata i te na ko anga: “Kia rekareka, e te au rangi e, e ko kotou katoa oki ko tei noo i reira. E mate ra oki to te enua e to te tai! tei raro atu na oki te diabolo ia kotou na, e riri maata oki tona, no te mea kua kite aia e e manga tuatau poto ua tona e toe nei.”​—Apokalupo 12:1-12.

19. Eaa ra te au Kerititiano mou i rekarekaʼi e te ora nei ratou i teia tuatau?

¹⁹ Te au tu kino te aere ua atura ki teianei ao mei te 1914 mairai te akapapu ra e kua tupu tika tikai ta Ioane orama i kite ra e kua vaitata roa te openga o te au tangata ravarai te ka kore e kauraro i to te Atua ra ngateitei. (Luka 21:10, 11, 25-32) Mei teaa ra te rekareka i te ora anga i teia tuatau meitaki roa no te Atua ko Iehova, te Mana Katoatoa, kia akaoti i te maroanga no tona ngateitei i rungao i te enua nei! Ei reira, ka akariroia te enua ei parataito manea, e ka apaiia ake te au tangata tuatua tika te ka ora kia riro ei apa kore ua. Pera katoa ka akatuia mai tei mate ra e ka orongaia atu te tuatau ei akatau ia ratou no te oraanga mutu kore.​—Apokalupo 20:1-3, 12, 13; 21:3-5.

Akatikatika anga Anoanoia no Teia Tuatau

20. (a) I te enua nei, koai ma tei akapapu e e au tavini mou ratou no Iehova i mua ake i te 1914? (e) Eaa te akatikatika anga tei rekareka te au Kerititiano tiratiratu tei akatainuia ra i te rave?

²⁰ No te 38 mataiti i mua ake i te 1914, kua tou mai ra te Bible Students (Aronga Apii Puka Tapu), koia te ingoa tei karangaia ra te au Kite o Iehova i reira, ki te reira mataiti e ope ei to te Etene Tuatau.c E akapapu anga tikai te reira e e tavini mou ratou no Iehova! Tera ra, mei te au tavini o te Atua i te anere mataiti mua ra, ia ratou katoa oki etai au manakonako anga tarevake. Ei akatauanga, kua manako ratou e ko te numero ki katoa o te au Kerititiano akatainuia ra ka akatuia ki te rangi ia Okotopa 1914. Kua manako katoa ratou e ko te tamaki tei akamataia i te 1914 ka taki tika atu ki te openga o te ao o Satani nei.

21. Eaa te akoanga tei tupu ki te au Kerititiano mou i te tuatau o te Tamaki Mua o te Ao ra?

²¹ I muri ake, ra, kua kite te au Kerititiano akatainuia e e maata te angaanga te vaira na ratou kia rave i te enua nei. No to ratou rave tamou i te akakitekiteanga i te ngai tangata i te tuatau o te Tamaki Mua o te Ao ra, kua tupu kia ratou te takinga kino maata no ko mai i te aronga mana poritiki ra, e kua turuia te reira e te au orometua o Kerititome. (Salamo 2:1-6) Kua raveia te ta anga kino i te angaanga a te au Kerititiano mou ra ia Tiunu 21, 1918, i te tuku angaia te au opita akaaere o te Watch Tower Society i te Au Tuanga Enua Taokotaiia ki te are tapekaanga no te 20 mataiti i raro ake i te au akaapaanga tei pikikaaia.

22, 23. (a) Eaa ta te au Kerititiano tiratiratu tei akatainuia ra i rave mei te 1919 maira, e eaa nga tupu anga e rua? (e) Eaa tikai te Ierusalema tiratiratu kore?

²² Kua akamutu viviki ua te Tamaki Mua o te Ao ia Noema 1918. E, ia Mati 25, 1919, kua tukuia mai nga taeake akaaere o te Watch Tower Society ki vao i te tapeka anga. Kua akakore takiriia te au akaapaanga ia ratou i muri akera. Kua akatueraia mai tetai tuatau no te au kare ra i manakoia ana no taua aronga Kerititiano tiratiratu tei akatainuia ra, aiteite ki te au tuatau tei va maira e ki te au pipi mua a te Mesia i muri ake i to ratou akamana angaia ra ki te vaerua tapu i te 33 T.N.​—Angaanga 2:17-21, 41

²³ Mei te 1919 mairai, kua rave totomapu te au Kerititiano tiratiratu tei akatainuia ra ei pupu, i te akauenga tei kapitiia ra ki te au tuatua a Iesu ia Mataio 24:14: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” Ko tei tupu mai, e vaitata i te a mirioni o te “au mamoe ke atu” a te Mesia ra kua akatapu i to ratou oraanga kia tavini kapiti atu ia Iehova ma te toenga o te aronga tei akatainuia ra. (Ioane 10:16) Te rave ua atura a Kerititome, i raro ake i te mana o tona ra au orometua, i te kopae ke atu i te tuatua no te Patireia. Ko tana arikianga i te au ravenga a te porotiki tangata nei e tana takinga kinoanga i te au Kite o Iehova te aiteite ra ki te akono anga tau kore i te Mesia a te au tangata o Iudea i te anere mataiti mua ra. Mei ta Iehova rave anga i tana akautunga ki runga ia Ierusalema ra, ka pera katoa aia i te Ierusalema tei pikikaa tikai o teia tuatau nei, koia, a Kerititome. E mei te uki tei akarongo atura i ta te Mesia akavaanga tei ora atu kia kite i te akapouanga o tana i totou ra, ka pera katoa teianei uki mei te 1914 mairai “kare e ope” i mua ake ka tupu ei te “mate maata” tei totouia maira.​—Mataio 24:21, 22, 34.

24. Kia ora atu ei ki roto i ta te Atua ao ou, eaa ta tatou ka tau kia rave?

²⁴ Eaa ta tatou ka rave kia oraʼi i te mate maata e kia ora atu ki roto i te ao ou a te Atua ra? Noatu eaa te au manakonako anga tarevake ta tatou i manako i mua ana, ka tau tatou kia paruru e kia kore e topa i te moe i ta tatou au angaanga Kerititiano. (Habakuka 2:3; 1 Tesalonia 5:1-6) Te aronga te ka rauka ia ratou te akamanako i te au tupuanga mei te 1914 mai te toko iti ua atura. No reira, ka tau tatou kia matakite; kare e tuatau no te kaimoumou. (Mataio 24:42) Pouroa te aronga te anoano ra kia ora i te openga o to Satani ao kino nei ka tau kia akono i teianei i te mataara te ka akaari i tona akatikaanga i te au au tuatua tei akauruia ra: “E akameitaki matou ia koe, e Iehova Atua Mana Katoatoa, . . . no te mea kua rave koe i toou mana maata e kua akamata i te tutara ei ariki.”​—Apokalupo 11:17, NW.

[Au Tataanga Rikiriki i Raro]

Akapeea Koe Me Pau?

◻ Eaa ta Ierusalema i taito ra i akatutu mai, inara akapeea i kore ei tona turanga ngateitei?

◻ I naea i akamataʼi to te Etene Tuatau e i naea i ope ei, e eaa te tupuanga tei totouia maira?

◻ Eaa ta te akapouanga ia Ierusalema tiratiratu kore ra i akatutu mai?

◻ Akapeea tatou i kite ei e te vaitata nei te mate maata, e eaa ta tatou ka tau kia rave kia oraʼi i te reira?

[Tutu i te kapi 16]

Kua ngere a Ierusalema e tona iero i te turanga ngateitei inara kua tamou ua atu te Atua i te akameitaki i tana Tamaiti, te Mesia, pera katoa te tuatua kiaia mei te rangi mai