Ka Tau Ainei Kia Manakoia e Akapeea Taau Akamori Anga?

TE VERAVERA ra te ra i tetai oire meangiti i Aperika i te tuaero i te avatea. Ka rongona mei tetai o e vaitata maira te tangitangi anga oripu ua o te pate, te imeneanga, e te pokarakaraanga mataora. Inara kare teia i te tamatora anga. E peu akamori anga ia na to Aperika. Inara, te tarere ra te au tangitangi anga ma te tu pakari o te au reo no ko mai i tetai are pure akonoanga ririnui i te pae ua maira. I reira te rave ra te aronga akamori kare ra e rauka i te akatere i to ratou manako, i “te rapakauanga” temeio e te tuatua anga i te reo ke ke. I tetai openga o te oire ra ko tetai atu tu akamori anga. Ko te reo maata o tetai muezzin te kapiki ra i te au taeake akamori Mutiremi kia pure.

Ae, ko te akamori akonoanga e maata te au tuke anga ka kitea i te au oire e te au taoni e manganui i Aperika. No te au uki kua topa te reka ua ra to Aperika i te aru i ta ratou uaorai au peu akonoanga. Inara i muri maira kua aere mai te au mitinari o Kerititome, i te aru mai anga i te au vaeau o te au enua ke ke o Europa ra, e kua tamata aroa kore ua i te akariro i te katoatoa “ei Kerititiano”​—kapiti katoa oki i te tauianga i to ratou au ingoa ei au ingoa Kerititiano.

Ko te tupu anga? E tu akonoanga tei kairoia ra te au peu irinaki anga e te au ravenga a to Aperika ma te au akonoanga akarongo tei apaiia atura ki reira. Tae mai ki teia tuatau nei e manganui te aronga akonoanga akamori “Kerititiano” te rave ra i te au ei-kura e te au rei. Na te au mitinari Kerititome i rave tarevake i te akonoanga Kerititiano mou ra, e kua akaruke mai ratou i tetai apinga orongaia ma te reka koreia ra. No tetai tuanga maata, ko ratou te apai ra i te apa no te tu topiriia te manako ki te Puka Tapu te vaira i rotopu i tetai papaki o Aperika i teia tuatau nei.

Inara, e manganui te au tu “akonoanga Kerititiano” te rave ateaia ra. I teia au mataiti ua ake nei kua riro kia arikiia te au pupu akonoanga ririnui; kua maata te tupu anga o te au akonoanga rapakauanga akarongo ra. Kua akataka maira tetai tata nutipepa i te inangaroia o teia au akonoanga na te akara anga e ‘ko te marama anga akonoanga maata o to Aperika ra ko te raveanga i te meitaki no te aronga katoatoa. Ki te manako o to Aperika ra, ka tau te akonoanga kia rauka te orongaanga apinga tikai ei akamerengo anga i te ora anga tangata. E no reira, ki te tangata Aperika te irinaki ra e te anoanoia ra te rotopu i te pae vaerua e vaitata no te au apinga ravarai, ko te ravenga no te aru i te au akonoanga pae vaerua [me kare rapakauanga akarongo] te tau ra ma te au mea umuumuia no tona tu oraanga.’ Inara, e mea tangi e, e manganui te au akonoanga ririnui kua taka meitaki te akanoo anga no te pitiniti kimianga moni.

I teia tuatau, e tere atu i te 6,000 au akonoanga tangata nei te akonoia ra ki Aperika. Penei kua manako ana koe e ko teia au akonoanga katoatoa e te au akonoanga tangata nei te mou ra i te taviri no te ora. Inara ko te uianga tika tikai koia oki, Akapeea to te Atua ra manako?

Ka Mareka Ainei te Atua i Tetai Ua Atu Akonoanga?

E tika rava, kare Tei Anga i te ao katoa e pini ua ake e akaruke ia tatou kia kore ua e arataki anga no teia tu. (Amosa 3:7; Angaanga 17:26, 27) E te maata ra te akapapu anga e te kitea ra te arataki anga tu-Atua i te Puka Tapu. Kare, kare te Puka Tapu i ta tetai papaki i tapa ra i te reira, e e puka na te tangata teatea. Ko te tika ra, kare e tangata​—kerekere me kare teatea—​e rauka kia rave i te tika no te reira. “Te au tuatua tapu katoa i tataia ra, e mea akauruia mai e te Atua,” te tuatua maira 2 Timoteo 3:16. Ko te tuatua mou no te Puka Tapu, e te tau meitaki te au apiianga, tona taito mamao roa, tona ora anga i te au rave anga takinga kino, ko tona au totou tau tikai e te aite koreia te tua anga i te ao katoa nei​—e au akapapu anga taka meitaki anake i te tu-Atua o tei akapapa maira.

Eaa ta taua puka e apii maira kia tatou? Ko tetai apinga, te akakite maira kia tatou e e okotai ua “Atua mou.” (Ioane 17:3) I te mea ko te reira te tika, akapeea e tau ei e e tuatua mou tei roto i te au akonoanga katoatoa? Kare ainei te au pupu akonoanga e patoi ana tetai i tetai me ka akataka i te au tumuanga e koai e eaa te Atua ra? Kua tuatua te tata Puka Tapu ko Iakobo no te “akonoanga ma e te tika tikai.” (Iakobo 1:27, Today’s English Version) Me te anoanoia ra kia akataka i te akonoanga tika tikai, ka tau rai e te vaira te akonoanga pikikaa me kare akameamea ua. Ka akaapa te reira i te manako e ko te au akonoanga katoatoa e au mataara tuke tuke no te aravei anga i te Atua ra.

Te Au Turanga o Tei Anga Maira no te Akamori Anga

Eaa te mataara tika no te akamorianga i te Atua? Te apii maira te Puka Tapu kia tatou e ko te akamori anga tika tikai te akaia ra ki roto i te kite tika. Kua tuatua te peroveta maata ko Iesu Karaiti ki tetai vaine Samaria: “Kare kotou i kite i ta kotou e akamori nei.” (Ioane 4:22) Kare ainei teia, penei, ko te tika katoa ia noou? Kua apiiia ainei koe e ko te Atua Mana Katoatoa e e ingoa tona uaorai, ko Iehova? (Salamo 83:18) Kua kite ainei koe eaa tana au akakoroanga no te tangata e no te enua nei? (Mataio 6:9, 10; Ephesia 1:9, 10; 3:11) Te oronga nei ainei to akonoanga kia koe i tetai manakonako anga tika tikai no tetai tuatau meitaki ki mua? E me te akamanako ra koe ia koe uaorai e e Kerititiano, ka rauka ainei ia koe i te akataka mai i toou au irinakianga mei te au Tuatua Tapu maira, me kare e au mea oronga uaia mai ainei e kare koe i akapou taime i te kimikimi anga tikai?

Me te kite ra koe ia koe uaorai te ngere ra i te kite tika, ka rauka ia koe te reira na roto i tetai apii anga i te Tuatua a te Atua, koia te Puka Tapu. Te manako maira te Atua ko Iehova i tona aronga akamori mou kia kite meitaki i ta te Puka Tapu e apii ra. E tere atu i te reira, te manako katoa maira aia ia ratou kia akono i te reira i to ratou oraanga. Ka tau to tatou tu manako kia aite ki to te tata taramo tei tuatua ra: “E lamepa taau tuatua i toku nei vaevae, e turama no toku nei arataa.” (Salamo 119:105) Eaa te maata te tauturu anga a to akonoanga ia koe kia kite e kia marama i te Puka Tapu ra?

Ko tetai atu tumu puapinga maata o te akamori anga mou ko te akarongo ia Iesu Karaiti, kare e ei tetai peroveta maata anake mari ra ei te Tamaiti anau tai a te Atua ra. Te akakite marama maira te au Tuatua Tapu e ko Iesu “te Rima Rave Maata o te ora.” (Angaanga 3:15, NW; Angaanga 4:12) E manganui te akari ra e akarongo to ratou ia Iesu, inara akapeea te tika tikai o to ratou akarongo? Ko te akarongo tika tikai ia Karaiti te anoanoia ra kia akarongo i tana au apii anga katoa. Kua akamaroiroi maira te Atua uaorai i te reira i tana tuatua anga: “Taku Tamaiti akaperepere teia, ka akarongo iaia.” (Mareko 9:7) E no reira ka tauta te aronga akamori mou kia aaere vaitata ua na te au tapuae o Iesu ra. (1 Petero 2:21) Ko tetai mataara ta ratou ka rave i te reira na te raveanga i te tutuanga ki te ngai tangata tana i akamata maira. (Mataio 4:17; 10:5-7) Te akamaroiroi maira ainei taau akonoanga ia koe uaorai kia o atu ki te rave anga i teia angaanga?

Ko te aroa tetai atu umuumu anga no te akamori anga tika tikai ia. Kua akatakaia mai te Atua ko Iehova ra e ko te akatutu anga mai i te aroa ra, e kua tuatua a Iesu ki tana au pipi e ka akatakaia ratou na te aroa ta ratou ka akari i rotopu ia ratou uaorai. (Ioane 13:34, 35; 1 Ioane 4:8) I te akamanakoanga i te au mirioni au tangata e manganui i teia tuatau nei te karanga ra e au Kerititiano ratou, kare ainei i te mea tau kia ki pu tikai te ao nei i te aroa? Inara, ko te tika tikai, kua akapapuia to tatou ao nei e ko tetai ngai kore rava atu te aroa. Kua tamateia e au mirioni ua atu oraanga i roto i teia anere mataiti anake ua. Te tupu ua atura te rave kino e te ta ua. E no reira e ui kia koe uaorai, ‘Me piri mai te au tangata ravarai ki taku akonoanga, ka riro ainei te ao nei ei ngai maata atu te aroa?’

Ei mea openga, te akari maira te Puka Tapu e ka tau te aronga akamori mou kia taka ke mei teianei ao kare e kite i te Atua. I te akanoo anga taka ke a te Atua i te iti tangata taito o Iseraela ra ei paruru i te akamori ma, kua akamatakite atura aia i tona au tangata kia kopae ke i te piri anga oa vaitata ma to te au pa enua tau kore tei koropini ra ia ratou. (Deuteronomi 7:1-6) Ia Ioane 17:16, kua pera katoa a Iesu Karaiti i te tuatua anga no tana au pipi: “Kare ratou i to teianei ao, mei iaku nei rai oki, kare i to teianei ao.” Kare a te aronga akamori mou o te Atua tuanga i roto i te poritiki, te au ravenga tau kore, te okooko anga noinoi, me kare etai ua atu au apiianga akangateitei kore i te Atua. (Ioane 18:36; 1 Ioane 2:15-17) Ka akarongo ratou i te akauenga tei tataia ra ia Roma 12:2: “E eiaa e akatau atu i teianei ao.” Ko te reira aina ta to akonoanga e akamaroiroi atura ia koe kia rave?

Te Vai Maira te Tauturu

Ae, te tu o taau akamori anga e tumu tika tikai ma te Atua ra. Ko tana e manako ana, e okotai ua akonoanga mou. (Ephesia 4:4-6) Ko ta tatou uriuri anga manako kua piri ki etai au tumu tavini no te apiianga Puka Tapu. Eaa koe ka kore ei e tamata kia apii kia tere atu?

Noatu rai eaa to akonoanga i akatupuia ake koe na, ka rauka i te Au Kite o Iehova i te tauturu atu ia koe i tei tau. Kua kiteia ratou i te ao katoa nei no ta ratou angaanga apiianga maata i te Puka Tapu. Te manako ngakau ra ratou i tetai apainga kia tauturu i te au tangata no te au kopu ravarai e te au tu akonoanga katoa kia rauka ia ratou te kite anga oonu i te Puka Tapu. (Maseli 2:1-6) Te nenei ra ratou i te au puka apii Puka Tapu tei kimikimi matatioia ra.a Ko te tika ra, ka aere atu ratou ki toou ngutuare e kare e tutaki kia apii kapiti atu kia koe i te Puka Tapu na te tu tumuanga. E au mirioni ua atu te au tangata i te ao katoa nei te puapingaia ra mei teia porokarama apii anga Puka Tapu. Eaa koe uaorai ka koreʼi e rave i te reira? E tika rai, e mea puapinga e kia rave koe no te mea e tau tikai kia manakoia e akapeea taau akamori anga.

[Au Tataanga Rikiriki i Raro]

[Tutu i te kapi 5]

Kua tarevake takiri ta te au mitinari o Kerititome akatutu anga i te akonoanga Kerititiano mou ra

[Tutu i te kapi 5]

E manganui te au akonoanga ririnui te rave nei i te pitiniti kimianga moni

[Tutu i te kapi 6]

Ko te akarongo ia Iesu tetai tuanga puapinga maata no te akamori mou

[Tutu i te kapi 7]

E au mirioni ua atu te aronga ta te Au Kite o Iehova e tauturu ana kia rauka te kite tika na te apii anga Puka Tapu i te ngutuare ma te kore e tutaki