Aronga Akakitekite Patireia te Angaanga i te Enua Katoa

“Ei kite oki kotou noku . . . e tae ua atu ki te openga o te enua ra.”​—ANGAANGA 1:8.

1. Eaa te tuatua ta Iesu i karanga e ka akakitekiteia e tana au pipi i to tatou tuatau nei?

I TE akatakaanga i te angaanga ta Iehova i tono maira i tana Tamaiti ki te enua nei kia rave, kua na ko maira Iesu: “E tutu aere rai au i te evangelia o te basileia o te Atua.” (Luka 4:43) Mei te reira katoa oki, i te tuatuaanga i te angaanga te ka raveia e tana au pipi i runga i te enua nei i tona oki akaou mai anga ma te mana ei ariki, kua karanga a Iesu: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.”​—Mataio 24:14.

2. (a) Eaa ra i puapinga maataʼi kia akakitekite ateaia te tuatua no te Patireia? (e) Eaa te uianga te ka tau tatou katoatoa kia ui kia tatou uaorai?

² Eaa ra i puapinga maataʼi te nuti no te Patireia o te Atua? Eaa i umuumuiaʼi kia totoa roa te akakitekite anga i te Patireia ra? No te mea ko te Patireia Mesia ia te ka akatika tamou i te ngateitei o Iehova e pini ua ake i te ao katoa. (1 Korinetia 15:24-28) Na te reira, ta Iehova rave anga utunga i te akatereanga a Satani i te au mea o teia tuatau nei e ka akatupu katoa i tana taputou kia akameitaki i te ngutuare tangata i te pa enua katoa o te ao nei. (Genese 22:17, 18; Daniela 2:44) Na te akakitekite anga no te Patireia, kua kitea e Iehova te aronga tana i akatainu i muri akera ei aronga akatuanga kapitiia ma tana Tamaiti katoa ra. Na te akakitekite anga i te Patireia, te akatupuia ra te angaanga akatakaanga i teia tuatau nei. (Mataio 25:31-33) Te anoano ra a Iehova i te au tangata no te pa enua ravarai kia kite i tana akakoro anga. Te anoano ra aia kia rauka ia ratou te tuatau kia iki i te oraanga ei au tangata i raro ake i tona Patireia. (Ioane 3:16; Angaanga 13:47) Te rave ra ainei koe kia maata taau tuanga i te akakitekiteanga i teia Patireia?

Tapapa Anga i te Openga o te Au Tuatau Kenitara Ra

3. (a) E mea tau tikai, eaa te tumu tuatua ta C. T. Russell i akakitekite i tetai tutaka anga mua kia akapapa i te au pupu no te apii Puka Tapu? (e) Eaa ta taua Aronga Apiipii Puka Tapu mua ra i kite no te ngai tau no te Patireia o te Atua ra i roto i to ratou oraanga?

³ I te 1880 ra, kua aere a Charles Taze Russell, koia te etita mua o te makatini Punanga Tiaki ra, i tetai tutaka anga na roto atu i te apatokerau itinga o te Unaite Teite kia akamaroiroi atu i te akapapa anga i etai au pupu no te apii Puka Tapu. E mea tau ra e, ko te tumu tana i tuatua ko te “Au Apinga Tei Kapitiia ki te Patireia o te Atua ra.” Mei tei akaataia maira i te au itiu mua o te Punanga Tiaki ra, kua kite te Aronga Apiipii Puka Tapu (ko te ingoa ia i matauiaʼi te Au Kite o Iehova i te reira tuatau) e me ka akapapu ratou e e tau ratou no tetai tuanga i te Patireia o te Atua ra, ka tau katoa ratou kia akariro i te Patireia ei manako anga mua, ma te taangaanga i to ratou oraanga, to ratou kite, e ta ratou apinga oki i tana angaanga. Te au apinga ke atu i to ratou oraanga ka tukuia ki te ngai tuanga rua. (Mataio 13:44-46) Kua kapiti ta ratou apainga i te akakitekiteanga kia etai ke ra i te tuatua meitaki no te Patireia o te Atua ra. (Isaia 61:1, 2) Eaa te akatotoa anga ta ratou i rave i te reira i mua ake i te openga o te Au Tuatau Kenitara i te 1914 ra?

4. Eaa te maata o te tua anga a te pupu meangiti o te Aronga Apiipii Puka Tapu ra i te au puka Puka Tapu i mua ake i te 1914?

⁴ Mei te au mataiti o te 1870 mai e tae ua atu ki te 1914, e tokoiti ua te Aronga Apiipii Puka Tapu. Tae mai ki te 1914, e 5,100 ua tei rave ra i te tuaanga i te oronga akakite anga ki te ngai tangata. Mei teaa ra tetai akakite anga maata i te reira! I te 1881, e rua ua mataiti i muri ake i te nenei anga i te Punanga Tiaki mua ra, kua rave ratou i te tua anga i te puka e 162 kapi, Food for Thinking Christians. I roto i nga marama tokoiti ua, kua tuaia e ratou e 1,200,000 au kopi. I roto i nga mataiti tokoiti ua, e raungauru ua atu mirioni te au pepa tei tua aereia i te au mataiti tataki tai i roto i te au reo e manganui.

5. Koai ma te au koropota, e eaa te tu vaerua ta ratou i akakite maira?

⁵ Pera katoa oki akamata mai i te 1881, kua oronga tetai papaki ia ratou uaorai kia rave i te angaanga evangeria ei koropota. Ko teia aronga te tuanga momua o te au painia o teia tuatau nei (e aronga angaanga evangeria i te au tuatau katoa). Kua aaere tetai koropota, na runga i te vaevae me kare i te patikara takatakai, e kua akakite aere vaitata i te au tuanga ravarai o te enua i noo ra ratou. Ko etai kua itae atu ki te au enua ke ke e ko ratou te aronga mua i te rave atu i te tuatua meitaki ki te au ngai mei ia Vinirani, ia Papaeto, e Puma (ko Maianama ia i teianei). Kua akakite ratou i te tu maroiroi ei mitinari mei to Iesu Karaiti e tana au apotetoro rai.​—Luka 4:43; Roma 15:23-25.

6. (a) Eaa te mamao o te Taeake ko Russell aere anga i te akatotoa anga i te tuatua mou o te Puka Tapu? (e) Eaa atu tei raveia ei akatotoa atu i te tutu aereanga i te tuatua meitaki i te au enua ke ke i mua ake i te openga o te Au Tuatau Kenitara ra?

⁶ Kua aere mamao katoa oki te Taeake ko Rus­sell uaorai i te akatotoa anga i te tuatua mou. Kua aere putuputu aia ki Kanata; i tuatua aia i Panama, i Tiamaika, e Kupa; e tatini ona tutaka anga i Europa; e kua takapini aia i teianei ao i te tutaka anga evangeria. Kua tono katoa aia i etai atu aronga tangata ei akamata e ei arataki i te tutu aereanga i te tuatua meitaki i te au enua ke ke. Ko Adolf Weber tei tonokia ki Europa i nga mataiti rotopu o te 1890 ra, e kua itae atu tana tutu angaanga orometua mei Tuiterani ki Varani, Itale, Tiamani, e ki Peretiumu oki. Ko E. J. Coward tei ungaia atu ki te tuanga Karipeani. Ko Robert Hollister i tonokia ki te Orieni i 1912. I reira, kua akapapaia etai pepa i roto i nga reo e tai ngauru, e e au mirioni ua atu au kopi o te reira kua tuaia takapini i Initia, i Tinito, i Tiapani, e i Korea na te aronga enua i tua aere. Me ko koe tetai i ora ana i reira, i akakeu ainei toou ngakau ia koe kia tauta pakari kia itae atu koe ki etai ke ra i toou ngai e kia mamao atu oki ma te tuatua meitaki?

7. (a) Akapeea te taangaanga anga i te nutipepa i te akamaroiroi anga i te akakitekite anga? (e) Eaa te “Nuku-Teata o te Anga Mai Anga,” e eia te manganui o te au tangata tei akarakara i te reira i te mataiti okotai ua?

⁷ I te vaitata anga te openga o te Au Tuatau Kenitara, kua taangaangaia na te au nutipepa e akakitekite i te au tuatua Puka Tapu tei tuatuaia ra e te Taeake ko Russell. Kare ta ratou akaketaketa anga maata no runga i te mataiti 1914 mari ra, no runga i te akakoroanga a te Atua e te akapapu anga i tona tupuanga. Kua tae ki te 2,000 nutipepa i te au taime tataki tai, e kua itaeia e 15,000,000 te aronga tatau, kua putuputu te akakitekite anga i te reira au tuatua. I reira, i te mamaiata anga mai te mataiti 1914, kua akamataia e te Totaiete tana akariari anga i te “Nuku-Teata o te Anga Mai Anga.” I roto i nga akakite anga e a e rua ora tataki tai, kua akakiteia mai te au tuatua mou no te Puka Tapu mei te anga mai anga e tae roa ki roto i te Tauatini Mataiti ra. I roto i te okotai ua mataiti, kua tae kia tere atu i te iva mirioni te aronga akarakara katoa i Marike Apatokerau, i Europa, i Otereria, e i Nu Tirani tei kite i te reira.

8. Kia tae mai ki te 1914, eia au enua tei itaeia e te Aronga Apiipii Puka Tapu ma te tuatua meitaki?

⁸ Kia tau ki ta te au tataanga i akakite mai, kia tae ki te tuanga openga o te 1914, kua tae ki te au enua e 68 te akatotoa anga a teia pupu totomapu o te aronga angaanga evangeria i te akakitekite anga i te Patireia o te Atua ra.a Inara ko te akamataanga ua te reira!

Akakitekite Anga Toto Mapu i te Patireia tei Akanooia Ra

9. I nga uruoaanga i Cedar Point, i akapeea te akarapurapu anga taka ke i te akakitekite anga Patireia?

⁹ I te akaputuputu anga te au Aronga Apiipii Puka Tapu i Cedar Point, Ohio, i te 1919, kua akakite a J. F. Rutherford, koia ra te peretiteni o te Totaiete Punanga Tiaki i reira e: “Ko ta tatou angaanga e te vai nei kia akakitekite i te patireia kaka o te Mesia kua tae mai nei.” I te rua o te uruoaanga i Cedar Point, i te 1922, kua akakite maata maira te Taeake ko Rutherford i te tika e i te openga o te au Tuatau Kenitara, i te 1914, ‘kua rave atu te Ariki kaka i tona mana maata kiaia uaorai e kua akamata i te tutara.’ I muri akera, kua tuku aia i te tumu no te manako anga kia tau tikai ki te aronga akarongorongo atu kiaia ra, i te na ko anga: “Te irinaki ra ainei kotou e kua akamata te Ariki kaka ra i tana tutara? E no reira e oki akaou ki te ngai tutu aereanga, a kotou katoa te tamariki a te Atua teitei rava! . . . E akakite i te tuatua kia mamao e kia atea oki. Ka tau to teianei ao kia kite e ko Iehova te Atua e ko Iesu Karaiti te Ariki o te au ariki e te Atu o te au atu. Ko teia te ra maata o te au ra katoa. I na, te tutara nei te Ariki! Ko kotou tona au rima rave i te akakitekite aere.”

10, 11. Akapeea te akono anga tau i te ratio, te au motoka no te tuatua anga, e te au kati mamaata kia itae atu ei ki te au tangata ma te tuatua mou no te Patireia?

¹⁰ Kua tere atu i te 70 mataiti i topa mei aua nga uruoaanga i Cedar Point ra​—e vaitata i te 80 mataiti mei to Iehova ra akamata anga i te akakite i tona tu ngateitei na roto i te tutara anga Mesia o tana Tamaiti. Eaa te maata te akatupuanga tikai a te Au Kite o Iehova i te angaanga tei akanooia maira na ratou i roto i te Tuatua a te Atua? Eaa taau uaorai tuanga e rave ra i te reira?

¹¹ I te akamata anga mua mai o te au mataiti 1920 ra, kua rauka mai te ratio ei apinga no te taangaanga i te akakite atea anga i te tuatua no te Patireia. I te au mataiti o te 1930 ra kua akakiteia mai i te au tuatua o te uruoaanga e ko te Patireia te manakonako anga no teianei ao tei tukuia mai na te au pupu ratio akapapaia e te au raini tereponi tei koropini ra i te ao katoa nei. Te au motoka tei akapapaia ra te au apinga tuatua kua rave katoaia ei akatangi rekoti anga no te au tuatua anga Puka Tapu i te au ngai tangata ra. E, i te 1936, i Glasgow, i Kotirani, kua akamata to tatou au taeake i te aoao i te au kati mamaata e kua aaere ratou na roto i te au tapere pitiniti i te akakitekite anga i te au tuatua ki te ngai tangata. Pouroa teia au ravenga e meitaki anake no te orongaanga i tetai akakite anga ki te au tangata e manganui i te reira tuatau te tokoiti ua ra to matou numero.

12. Mei ta te au Tuatua Tapu i akari maira, eaa tetai o te au mataara meitaki rava no tatou tataki tai kia rave i te akakitekite anga?

¹² Inara, te akataka meitaki maira te au Tuatua Tapu e ei au Kerititiano, e apainga ta tatou tataki tai kia rave i te akakite anga. Kare e rauka ua ia tatou i te tuku na te au atikara nutipepa me kare na te ratio e rave i te angaanga. E au tauatini ua atu te au Kerititiano tiratiratu​—au tane, au vaine, e te au mapu—​kua ariki i taua apainga ra. Ko te tupu anga, kua riro te tutuanga i tera are i tera are ei akairo akataka anga i te Au Kite o Iehova.​—Angaanga 5:42; 20:20.

Itaeanga i te Pa Enua Ravarai

13, 14. (a) Eaa ra etai Au Kite ka aere ei ki etai atu oire, e pera katoa oki ki etai atu enua, i te rave anga i ta ratou angaanga orometua? (e) Akapeea te manako anga aroa no te au tangata i te enua i anau ei tetai i te tauturu anga i te akatotoa i te tuatua meitaki?

¹³ No te kiteanga e ko te tuatua i te Patireia ka tutu aereia ki to te pa enua ravarai, kua akamanako papu tetai papaki o te Au Kite o Iehova e eaa ta ratou uaorai te ka rave kia itae atu ki te au ngai mamao ke atu i to ratou uaorai ngai nooanga.

¹⁴ E manganui te au tangata tei kite i te tuatua mou i muri ake i to ratou akarukeanga i te ngai i anau ei ratou. Noatu rai e penei kua akaruke ratou no te kimi anga kia apinganui i te pae kopapa, kua kitea e ratou tetai apinga meitaki atu, e ko tetai papaki kua manako inangaro kia oki ki te enua me kare te ngai i anau mai ei ratou kia tua aere i te tuatua mou. No reira, i te akamataanga mai o teia anere mataiti kua akatotoaia te tutu aereanga i te tuatua meitaki ki Kanatinavia, ki Ereni, ki Itale, te au enua o Europa Itinga, e etai atu ngai e manganui. Noatu rai i teianei, i te au mataiti 1990 nei, te totoa aere nei te tuatua Patireia na roto i taua tu rai.

15. I te au mataiti 1920 e te 1930 ra, eaa tei akatupuia e tetai papaki tei aiteite ra to ratou tu akono mei tei tuatuaia maira ia Isaia 6:8?

¹⁵ Na te akonoanga i te ako no te Tuatua a te Atua i to ratou oraanga, kua rauka i tetai papaki i te akariro ia ratou uaorai kia papa no te angaanga i te au ngai kare ra ratou i noo ana i mua ana. Ko W. R. Brown (tei putuputu ra te tapaia ko “Bible Brown”) koia tetai o teia aronga. I te 1923, kua aere atu aia mei Tirinitata ki Aperika Opunga kia akatere atu i te angaanga tutu evangeria. I te au mataiti o te 1930 ra, ko Frank raua ko Gray Smith, e Robert Nisbet, e David Norman ko ratou etai i roto i te aronga tei rave atura i te tuatua Patireia i te tuanga taatai o te itinga o Aperika. Kua tauturu tetai papaki i te tatanu anga i Marike Apatonga. I te au mataiti akamataanga o te 1920 ra, kua rave katoa a George Young, no Kanata, i te angaanga i Atenetina, i Paratiri, i Porivia, i Tire, e i Peru. Ko Juan Muñiz, tei angaanga ana i Paniora, kua aru katoa atu aia na roto i Atenetina, i Tire, i Parakuai, e i Urukuai. Pouroa teia aronga kua akakite i tetai vaerua mei tei tuatuaia maira ia Isaia 6:8: “I na, teia au; ko au taau e tono.”

16. I teea ngai i te pae atu i te au ngai maata te au tangata i raveiaʼi te tutu aereanga i te au mataiti i mua ake i te tamaki ra?

¹⁶ Kua itae atu te tutu aereanga i te tuatua meitaki ki te au ngai mamao ra. Kua aere atu te au pai na te Au Kite i akono i te akatere anga ki te au ngai katoa no te tomo atu ki New­found­land, te tuanga taatai o Noruai tae atu ki te Atiki, te au enua o te Patipika, e te au ngai no te pai i Asia Apatonga Itinga.

17. (a) Kia tae mai ki te 1935, eia te manganui o te au enua tei itaeia e te Au Kite ra? (e) Eaa ra i kore ei te angaanga i akaotiia i te reira tuatau?

¹⁷ E mea umere ra, i te mataiti 1935, te rave maata ra te Au Kite o Iehova i te tutu anga i roto i te 115 au enua aere, e kua itae katoaia e ratou etai atu enua e 34 na te au tere akakitekiteanga me kare na te au puka tei tukuia atu na roto i te mere. Inara, kare te angaanga i oti ake. I taua mataiti ra kua akatueraia e Iehova to ratou mata kia kite i tana akakoro anga kia akaputuputu katoa mai i “tetai urupu maata” te ka ora atu tae roa ki roto i tana ao ou. (Apokalupo 7:9, 10, 14, NW) Te vaira e maata atu te akakitekiteanga no te raveanga!

18. I te angaanga akakitekite anga Patireia, eaa te tuanga ta te Apii Gileada i akaki e ta te Apii Terenianga Orometua?

¹⁸ Noatu rai i te koropini angaia te enua nei e te Tamaki II o Teianei Ao e kua araiia te au puka me kare te angaanga a te Au Kite o Iehova i te au enua e manganui, kua akatueraia e te Apii Puka Tapu Punanga Tiaki o Gileada i tona au ngutupa kia apiiia te aronga tau ei mitinari kia rave i tetai angaanga maata atu no te akakitekite anga i te Patireia i te pa enua ravarai. Kia tae mai ki teia tuatau, kua rave te au karatuati i Gileada i te tavini anga i te au enua e tere atu i te 200 katoa. Kua rave ratou kia maata atu i tua anake i te au puka e ka aere atu ei ki tetai ngai ke. Kua akono ratou i te au apii Puka Tapu, kua akapapa i te au putuputuanga, e kua tereni i te au tangata kia apai i te apainga tutaraatua. I teia tuatau ua akenei, kua tauturu te aronga pakari e te au tavini angaanga orometua tei karatuatiia mai mei te Apii Terenianga Orometua kia akaki i te au mea anoano maataia te kapitiia atura ma teia angaanga i runga i nga enua mamaata e ono katoa. Kua akanooia te tango meitaki te maroiroi no te tupu anga tamouia.​—Akaaite ia 2 Timoteo 2:2.

19. Mei teaa te maata o te akarongo anga o te au tavini o Iehova i te patianga kia tavini i te au ngai maata tei anoanoia?

¹⁹ Ka rauka ainei ia etai atu i te tauturu i te akono i tetai papaki o te au ngai kare i tutu aereia? I te 1957, i te au uruoaanga i te ao katoa nei, kua akamaroiroiia te aronga tataki tai e te au ngutuare tangata​—Au Kite o Iehova kua pakari—​kia akamanako i te aere atu ki te au ngai te maata ra te anoanoia kia noo ki reira e kia rave i ta ratou angaanga orometua ki reira. Kua aite taua patianga ra mei ta te Atua i oronga atura ki te apotetoro kia Paulo, tei kite ra na roto i te orama i tetai tangata tei pati maira kiaia: “Ka ano mai ki Makedonia nei, e tupae mai ia matou.” (Angaanga 16:9, 10) Kua akono tetai papaki i taua patianga ra i te tuatau o te au mataiti 1950 ra, ko etai no muri maira. E okotai tauatini te manganui o te Au Kite tei aere atu ki Airerani e ki Koromopia; e au anere ua atu tei aere ki etai ngai ke atu. E ngauru ua atu tauatini tei aere atu ki etai au ngai e maata atu te anoanoia i roto i to ratou uaorai enua ra.​—Salamo 110:3.

20. (a) Mei te 1935 mairai, eaa tei oti i te akatupu anga i ta Iesu i totou ia Mataio 24:14 ra? (e) I nga mataiti tokoiti i topa, i akapeea te akarapurapu anga i te angaanga ra?

²⁰ Ma ta Iehova ra akameitakianga ki runga i tona au tangata, te tupu ua atu nei te angaanga akakitekite anga Patireia na tetai tupu anga viviki. Mei te 1935 mairai kua tupu kia maata te numero o te au papuritia e vaitata i te varu ngauru taime te maata atu anga, e ko te tupu anga o te au pupu painia e 60 patene te tere atu i to te numero o te aronga tutu aere ua. Kua akamataia te apii Puka Tapu i te ngutuare i te tuatau o te au mataiti 1930 ra. E tere atu i teianei i te a e te apa mirioni apii Puka Tapu i te ngutuare te akonoia ra i te au marama tataki tai. Mei te 1935 mairai e tere atu i te 15 pirioni ora tei akonoia i te angaanga akakitekite anga Patireia. Te rave tamouia nei te tutu aereanga i te tuatua meitaki i teianei i te 231 au enua katoa. I te akatuera angaia te au ngai i Europa Itinga e i Aperika no te tutuanga arai koreia te tuatua meitaki, kua rave meitakiia te au uruoaanga i te pa enua ravarai ei akari anga taka meitaki i te tuatua Patireia ki mua i te au ngai tangata. Mei ta Iehova rai i totou mai, ia Isaia 60:22 e, ka rave tikai aia i ‘te akarapurapu anga i taua angaanga ra i tona uaorai tuatau.’ Mei teaa ra te tuatau meitaki no tatou i teianei kia rave i te reira!

Itaeanga i te Aronga Katoa ka Rauka ma te Tuatua Meitaki

21, 22. Eaa ta tatou tataki tai ka rave kia riro ei ei Au Kite meitaki atu noatu teiea tatou e tavini ra?

²¹ Kare te Atu i tuatua mai e kua oti te angaanga. E manganui ua atu tauatini te vaira i te akamata anga i te akamori anga mou. No reira te tu maira te uianga, Te rave nei ainei tatou i te au mea ravarai te ka rauka ei akono meitaki i te tuatau te akatikaia ra e to Iehova akakoromaki anga no teia angaanga?​—2 Petero 3:15.

²² Kare e rauka i te katoatoa i te aere atu ki te ngai e takitai ua ake te raveanga i te angaanga tutu anga. Inara te taangaanga ra ainei koe i te au tuatau te va maira kia koe? Te akakitekite ra ainei koe ki toou au oa angaanga? ki te au puapii e te au oa apiiia ra? Kua akatanotano ra ainei koe kia tau ki te au turanga tauianga i toou ngai? Me no te tupuanga o te tu tauianga angaanga, e tokoiti ua te au tangata i to ratou ngutuare i te avatea, kua taui ainei koe i taau akapapa anga kia raukai ia koe i te aravei atu ia ratou i te aiai? Me kua akonoia kia kore e rauka i te aere atu ki te au ngutuare te aronga tutaka kare ra i patiia mai, te rave ra ainei koe i te tuatua anga na te tereponi me kare te akakitekiteanga na te mere? Te oki akaou ra ainei koe ki te aronga tei akari mai i te inangaro e te orongaanga kia akono koe i te au apii Puka Tapu i te ngutuare? Te rave marie ra ainei koe kia oti meitaki taau angaanga orometua?​—Akaaite ia Angaanga 20:21; 2 Timoteo 4:5.

23. Ia Iehova e akara maira i ta tatou e rave ra i tana angaanga, eaa te mea tau kia kitea mai i ta tatou e rave ra?

²³ Kia rave tamou marie ra tatou katoatoa i ta tatou angaanga orometua na roto i te tu te ka akari taka meitaki kia Iehova e te ariki tika tikai ra tatou i te tuatau tau no te akono anga ei Au Kite nona i teia au tuatau puapinga maata nei. Kia tau ra no tatou te tuatau ei au kite akara mata i ta Iehova ra rave anga i te akapou anga i te akatereanga taito viivii nei e tana rave mai anga i te Tutara Anga Tauatini Mataiti kaka o Iesu Karaiti!

[Au Tataanga Rikiriki i Raro]

E Manako Akaou Anga

◻ Eaa ra i puapinga maataʼi te tutu aereanga i te tuatua no te Patireia?

◻ Eaa te maata o te tutu aereanga i te tuatua meitaki tae roa mai ki te 1914?

◻ Eaa te maata o te akakitekite anga tei raveia mei te akanoo anga mairai te Patireia ra?

◻ Penei na teaa e akariro i ta tatou uaorai tuanga i te angaanga orometua kia uua maata mai?

[Pia i te kapi 16, 17]

AU KITE O IEHOVA​—E Aronga Akakitekite i te Patireia o te Atua

I te au anere ua atu uruoaanga takapini i teianei ao i te 1993-94, kua tuatuaia mai te akakiteanga no te oronga anga i tetai puka ou tei tapaia ko te Jehovah’s Witnesses​—Proclaimers of God’s Kingdom. Ko teia e akakite anga maata, e te taka meitaki i te tuatua enua o te Au Kite o Iehova. E puka ia e 752 ona kapi, e manea te akatutu anga, ma te au tutu e tere atu i te tauatini tei akaputuia mai no etai au enua ke ke e 96 katoa. I te openga o te 1993 kua oti i te neneiia i roto i te au reo e 25 e te uriia maira kia maata atu.

Na teaa i akariro i taua puka ra kia tau no teia tuatau nei? I teia au mataiti ua akenei e au mirioni ua atu te au tangata i te ao katoa nei kua riro mai ei Au Kite o Iehova. E mea tau kia akakite meitakiia kia ratou te tuatua enua o te akaaerenga ta ratou e kapiti atura. Pera katoa oki, kua tomo atu ta ratou tutu aereanga e ta ratou tu akamori anga ki roto i te au enua e te au pupu kopu ke ke i te ao katoa e kua takaveia e te aronga ou e te aronga ruaine, i te au tu o te puapinga e te tu kite katoatoa oki. Ko te tupuanga, e manganui o te aronga te akara maira i te tupuanga e au uianga ta ratou no te Au Kite​—kare no to ratou au irinaki anga anake mari katoa ra no to ratou akamata anga, to ratou tuatua enua, ta ratou akaaerenga, e to ratou au akakoro anga. Ko tetai papaki kua tata no ratou, inara kare e tau ana ta te katoa. Inara, kare okotai i kite meitaki atu i te tuatua enua o teia tuatau nei no te Au Kite o Iehova mari ua ko te Au Kite uaorai. Kua tauta te aronga tata o teia puka kia oronga mai i taua tuatua enua ra na roto i tetai tu akakoro anga e te tiratiratu. I te raveanga i te reira, kua tata akataka katoa mai ratou i te tupuanga e tae mai ki teia tuatau nei no te tu puapinga maata o te akairo no to Karaiti parutia tei rekotiia ra ia Mataio 24:14, e kua rave ratou i te reira ma te au akakite anga tau te ka riro anake na te aronga tei oonu ra te o anga ki roto i taua angaanga i totouia maira e oronga mai.

Kua akatakakeia te puka ki roto i nga tuanga maata e itu katoa:

Tuanga 1: Te kimikimi matatio ra teia tuanga i te au aka tuatua enua o te Au Kite o Iehova. Te kapiti ra te reira i tetai akakite anga tapotoia i te katoa anga o to ratou tuatua enua mei te 1870 e tae mai ki te openga o te 1992.

Tuanga 2: Ko teia tetai akakite akaou anga i te tupu marie anga o te au irinaki anga tei akataka ra i te Au Kite o Iehova mei etai atu au pupu akonoanga katoa ra.

Tuanga 3: Te akara matatio ra teia tuanga o te puka i te tupu anga o te patuanga o ta ratou akaaerenga. Te akakite maira i te au tumu reka kia manakoia o ta ratou au uipaanga putuputuanga e te au uruoaanga, e pera katoa te tu o ta ratou patu anga i te au Are Uipaanga Patireia, te au Are Akaputuputuanga maata atu, e te au ngai no te neneianga i te au puka apii Puka Tapu ra. Te akari maira i te maroiroi o te Au Kite o Iehova i te akakitekite anga i te Patireia o te Atua e te aroa te kitea ra ia ratou e utuutu ra tetai i tetai i te au tuatau tumatetenga ra.

Tuanga 4: I konei ka kitea e koe te au tataanga manea e i akapeea te itae anga te akakitekite anga i te Patireia o te Atua i te taeanga ki te au enua mamaata e te au airani mamao takapini te ao katoa. E tamanako ana​—te tutu aereanga i te 43 au enua i te mataiti 1914, inara i te au enua e 229 i te tae anga ki te 1992! E akapumaana ngakau tikai te au tupuanga ki te aronga tei o atura ki roto i teia akatotoa anga i te ao katoa nei.

Tuanga 5: I te akatupuanga i teia angaanga katoa no te akakitekite anga i te Patireia kua umuumuia te patu anga i te au ngai no te neneianga i te au Puka Tapu e pera katoa te au puka apii Puka Tapu i roto i te au reo tere atu i te rua anere i te pa enua katoa. I konei ka kite koe i te reira tuanga o ta ratou angaanga.

Tuanga 6: Kua aro katoa oki te Au Kite i te au timata anga​—ko etai no te tu tangata apa ua nei, ko etai atu no te au taeake pikikaa, e ei maata atu oki no te takinga kino tikai. Kua akamatakite mai te Tuatua a te Atua e ka tupu teia. (Luka 17:1; 2 Timoteo 3:12; 1 Petero 4:12; 2 Petero 2:1, 2) Te akakite taka meitaki maira teia tuanga o te puka i tei tupu tikai ra e i akapeea te akarongo o te Au Kite o Iehova ra i te akariro anga ia ratou kia autu.

Tuanga 7: I te openga ra, te uriuri manako maira te puka e eaa te Au Kite o Iehova i irinaki ngaueue kore ei e ko te akaaerenga e tuanga ra ratou no te reira te arataki tikaia ra ia e te Atua. Te uriuri manako katoa ra te reira e eaa ratou i manako ngakau ei i tei anoano ra, i te pae o te akaaerenga e te aronga tataki tai oki, kia matakite.

Kapiti katoa ki to runga akenei, ko teia puka manea te akapapa anga te o katoa atura ki roto i tetai tuanga e 50 kapi manea e te akakite anga meitaki i te au tutu karakara, te akarianga i te opati maata i teianei ao e pera katoa te au ngai o te au opati manga no te angaanga a te Au Kite o Iehova i te ao katoa nei.

Me kare koe i rave ake i te reira, papu e ka puapingaia koe na te raveanga e te tatauanga i tetai kopi o teia puka manea.

Au Tuatua mei ko Mai i Tetai Papaki tei Tatau ana i te Reira

Eaa te au manako o te aronga kua tatau ke ana i teia puka? Teia etai tokoiti:

“Koi oti ua akenei iaku te tatau i te tataanga ora e te manea Jehovah’s Witnesses​—Proclaimers of God’s Kingdom. Ko tetai akaaerenga anake tei tiratiratu e tei irinaki taakaaka i te tuatua mou te ka tata papu tikai, ma te mataku kore, e te tu manako tau oki.”

“Te tatau ra te reira mei te puka o Angaanga ra, ma tona tu tiratiratu e te kore e tapaepae ke anga.”

“Mei teaa ra te meitaki i teia puka ou nei! . . . E rave anga karape ia i te tuatua enua.”

I muri ake i te tatauanga e vaitata i te apa o te puka, kua tata tetai tangata: “Kua tukiia au e te mataku, kua muteki ua, e kua vaitata te tae te roi mata. . . . I oku nei au mataiti katoa, kare atu e puka ke tei akakiia ki teia akakeu anga manako ngakau.”

“Te imene nei toku ngakau i te au taime ravarai me akamanako au e ka akapeea teia puka i te akamaroiroi anga i te akarongo o te au mapu e pera katoa te aronga ou te aere maira ki roto i te akaaerenga i teia tuatau nei.”

“Kua ariki tamou marie ua rai au i te tuatua mou, inara na te tatauanga i teia puka i akatuera i toku nga mata e i tauturu mai iaku kia kite kia maata atu i to mua ana e ko te vaerua tapu o Iehova te tauturu nei i te au mea katoatoa te piri atura ki te reira.”

[Au Tutu i te kapi 18]

E manganui te au tangata tei itaeia ma te tuatua no te Patireia ra noatu i te tuatau te tokoiti ua ra te numero o te Au Kite ra