‘Auraka e Taitaia Mei Tetai Papaki’
KUA kite ainei koe te tu o tetai tiare tona akaraanga kua piko ki raro i muri ake i tetai uriia? I tetai tu e kite anga akakeu tikai i te ngakau te reira. Mei tera te tu, kua totoa aere te ua i te au animara e te au tangata e manganui—e au mea maroiroi roa atu ki taua tiare ra—kia kimi i te ngai paruruia. Inara, kua tu iora te tiare ki reira, te akaia ra, e te aroanga atu i te reva ririnui katoa. I teianei, teia oki aia i tona katoa anga, kua piko ra ki raro inara kare i atiati, te akaarianga i tetai maroiroi tei tuke ra ki tona akaraanga paruparu. Me akara atu koe i tona manea, penei ka manako koe e, me ka rauka akaou mai i teia tiare nei te maroiroi no te taki akaou atu i tona katu manea ki te rangi.
E aiteite katoa teia ki te tangata. I teia au tuatau manamanata, te aro atura tatou i te au uriia tuketuke. Te au manamanata i te pae moni, te taitaia, te apikepike i te pae kopapa, te mate anga o tetai tei akaperepereia—ka rokoia tatou katoatoa e teia au manamanata i tetai au taime, e etai taime kare e rauka ia tatou i te akakore atu i te reira mei te tiare kare e rauka i te kiriti tumu iaia uaorai e te oro atura ki te ngai paruru anga. Ka akakeuia te ngakau i te kite i te au tangata apikepike tataki tai tei akaari i te maroiroi umere tikai e te tamou marie i te reira au manamanata. Akapeea ratou te rave tikai i te reira? E putuputu te taime ko te akarongo oki te taviri. Kua tata a Iakobo te apa teina o Iesu Karaiti e: “Kua kite oki kotou e me autu to kotou akarongo i te aro atu i te reira au timata anga, ka tupu iora te rauka anga kia tamou marie.”—Iakobo 1:3, Today’s English Version.
Ko te tiakianga tetai taviri. Ei akatauanga, me ka rokoia te mate i tetai tei akaperepereia, e mea puapinga tikai te tiakianga ki te au tangata ora. Kua tata te apotetoro ko Paulo ki te au Kerititiano i Tesalonia e: “Kare au i inangaro e kia kore kotou e kite i te tuatua i te aronga i topa i te moe nei, kia kore oki kotou kia taitaia, mei tetai papaki kare o ratou tiakianga ra.” (1 Tesalonia 4:13) Noatu rai ka aue te au Kerititiano no tei mate ra, e tuke tetai. E kite tika tikai to ratou i te turanga o te mate e te tiakianga no te tuakaouanga.—Ioane 5:28, 29; Angaanga 24:15.
Ko teia kite ka oronga atu ia i te tiakianga kia ratou. E na te reira tiakianga e taparuparu i to ratou mamae ngakau. Ka tauturu te reira ia ratou kia tamou marie, e te maata atu. E kare e roa atu, mei te tiare rai i muri ake i te uriia, ka taki atu i to ratou katu mei te mamae ngakau e ka kite akaou i te rekareka e te ki katoa anga i te oraanga.