Te Vaitata nei te Autu Anga o te Akamori Mou

“Ka riro oki ko Iehova te ariki ki runga i te enua katoa nei.”​—ZEKARIA 14:9.

1. Eaa te tupu anga ki te au Kerititiano akatainuia ra i te tuatau o te Tamaki I o Teianei Ao ra, e i akapeea te totou anga mai i te reira?

I TE tuatau o te tamaki mua o teianei ao, kua mamae te au Kerititiano akatainuia ra i te au tu ngata e manganui e te au tapeka anga a te au rima o te au iti tangata tei tamaki ra. Kua arai ketaketaia ta ratou au atinga akapaapaa ia Iehova, e kua topa ratou ki roto i tetai turanga tuikaa i te pae vaerua. Pouroa teia kua totouia mai ia Zekaria 14:2, tei akataka maira i tetai tamaki anga na to te pa enua ki runga ia Ierusalema. Te oire o teia totou anga ko “Ierusalema i te rangi ra,” te Patireia o te Atua i te rangi ra e te ngai ko te “reira ra te terono o te Atua e to te Punua-mamoe.” (Ebera 12:22, 28, NW;Ebera 13:14; Apokalupo 22:3) Ko te aronga akatainuia a te Atua ra i te enua nei tei akatutuia maira e taua oire ra. Ko te aronga tiratiratu i roto ia ratou tei ora atu i taua tamaki anga ra, ma te koreanga e akatika ia ratou uaorai kia akaateaia “ki vao i taua oire ra.”a

2, 3. (a) I akapeea te autu anga o te akamori ia Iehova mei te 1919 maira? (e) Mei te 1935 maira, eaa te tupu anga tei rokoia mai?

² I te 1919 kua akarangatiraia te aronga akatainuia tiratiratu ra mei to ratou tu tuikaaia, e kua taangaanga viviki maira ratou i taua tuatau o te au tei aru mai i te tamaki ra. Ei au karere no Ierusalema i te rangi ra, kua mou ratou i te tuatau meitaki no te tutu anga i te tuatua meitaki o te Patireia o te Atua ra e kia tauturu i te akaputuanga i te au mema openga o te 144,000 ra. (Mataio 24:14; 2 Korinetia 5:20) I te 1931 kua mou ratou i te ingoa tau i te Tuatua Tapu ra koia te Au Kite o Iehova.​—Isaia 43:10, 12.

³ Mei reira maira, kare te Au Kite akatainuia o te Atua i akara ki muri. Kare i rauka ia Hitler ma tana matini tamaki Nati i te akamuteki ia ratou ra. Noatu rai te takinga kinoanga i te ao katoa, kua uua mai ta ratou angaanga i te ao katoa nei. E maata oki mei te mataiti 1935 maira, kua kapiti atu te “aronga maata rava” no te au pa enua, tei totouia maira i te puka o Apokalupo. Kua akatapu katoaia oki teia aronga, ei au Kerititiano papetitoia e “kua orei i to ratou kakau, e kua akateatea i te toto o te Punua-mamoe ra,” koia a Iesu Karaiti. (Apokalupo 7:9, 14) Inara, kare ratou i te aronga akatainuia, ma te manakonako anga no te oraanga ki te rangi. To ratou manakonako anga kia akatuangaia i tei ngaro ra ia Adamu raua ko Eva, koia oki, te oraanga tangata apa kore ua ki runga i tetai enua parataito. (Salamo 37:29; Mataio 25:34) I teia tuatau, kua tae te numero o te aronga maata rava kia tere atu i te rima mirioni tangata. Te autu nei te akamori mou ia Iehova, inara ko tona autu anga openga te aere mai ra.

Te Aronga Tangata Ke i te Iero Vaerua o te Atua

4, 5. (a) Te akamori nei te aronga maata rava ia Iehova ki ea? (e) Eaa te angaanga ta ratou e rekareka ra, e i te akatupu anga i teea totou?

⁴ Mei tei totouia maira, no te aronga maata rava “e i akamori ei ratou [i te Atua] i te po e te ao i tona nao.” (Apokalupo 7:15) I te mea kare ratou i te Iseraela kau taunga vaerua, penei kua kite a Ioane ia ratou i te tu anga i te iero ra i te paepae o te au Kenitara i vao akera. (1 Petero 2:5) Mei teaa ra te riro anga kia kaka te iero vaerua o Iehova ra, kua akakiia tona tuanga ma teia aronga maata, te akapaapaa katoa ra iaia ma te toenga o te Iseraela vaerua ra!

⁵ Kare te aronga maata rava e tavini i te Atua i te turanga akatutuia maira e te paepae kau taunga i roto roa. Kare ratou e akatikaia ei aronga tuatua tika no te akakoro anga kia riro ei tamariki vaerua akatuangaia na te Atua ra. (Roma 8:1, 15) Inara, na te akonoanga i te akarongo i te atinga oko o Iesu, e turanga ma to ratou ki mua ia Iehova. Kua akatikaia ratou ei tuatua tika ma te akakoro anga kia riro ei au oa nona ra. (Akaaite ia Iakobo 2:21, 23.) Kua tika katoa oki ratou kia oronga i te au atinga arikiia ki runga i te atarau vaerua a te Atua. E no reira, i roto i teia urupu maata, te akatupu kakaia ra te totou ia Isaia 56:6, 7: “E te au tamariki o te tangata ke, ko tei piri kia Iehova ra, ei akamori iaia, e kia inangaro oki i te ingoa o Iehova, kia riro ei au tavini nona; . . . Ko ratou rai oki taku e arataki ki taku maunga tapu ra, e akarekareka au ia ratou i roto i toku are pure anga: e marekaia mai ta ratou au atinga karakaratio, e ta ratou atinga, ki runga i taku atarau; e tapaia oki toku are, I te are pure anga no te tangata ravarai.”

6. (a) Eaa te tu atinga ta te aronga tangata ke e oronga ra? (e) Eaa ta te ariki vai i te paepae o te kau taunga e akamaaraara maira ia tatou?

⁶ I roto i te au atinga ta teia aronga tangata ke ka oronga “koia oki ta te vaa nei [penei kua teateamamaoia mei te atinga titona ra], i te akapaatu anga i [to te Atua] ingoa” e “kareka te takinga-meitaki e te oronga, eiaa rava ïa e akatopaia.” (Ebera 13:15, 16) Ko te ariki maata no te vai ta te kau taunga e akono ra ei tama ia ratou uaorai e apinga puapinga maata katoa ia ei akamaaraara i teia aronga tangata ke. Ka tika katoa ratou kia kauraro i te tamaanga i te pae vaerua e te tu tau i te akariro anga kia marama atu te Tuatua a te Atua ra kia ratou.

Te Ngai Tapu e Tona Au Apinga

7. (a) Eaa te manako o te aronga maata rava no te au angaanga a te kau taunga tapu ra? (e) Eaa te au angaanga kapitiia mai tei rauka i tetai papaki o te aronga tangata ke ra?

⁷ E aite anga ainei to te Ngai Tapu e tona au apinga no teia aronga maata rava o te tangata ke ra? Kare rava ratou e tau i te tu tei akatutuia maira e te Ngai Tapu ra. Kare ratou i anau ouia ei tamariki vaerua na te Atua ma te kainga ki te rangi ra. Kua akariro ainei teia ia ratou kia riri me kare kia manako morimori? Kare. Mari ra, te rekareka ra ratou i ta ratou angaanga turuanga i te toenga o te 144,000 ra, e te akaari ra ratou i te ariki anga oonu no ta te Atua akakoro anga i te akatamarikianga i teia au tamariki vaerua, te ka akatuangaia ma Karaiti i te taoki akeanga i te au tangata kia apa kore ua. Pera katoa, te aronga maata rava o te tangata ke ra te akaperepere ra i to te Atua aroa ua i te orongaanga mai kia ratou i tetai manakonako anga no te ora mutu kore ki te Parataito i te enua nei. Ko tetai papaki o teia aronga tangata ke, mei te Netini i taito ra, kua orongaia atu te angaanga ei akaaere i te tauturuanga i te kau taunga tapu ra.b (Isaia 61:5) No roto mai i teia aronga ta Iesu ka “akaariki i te pa enua katoa ra.”​—Salamo 45:16.

8, 9. Eaa te puapinga te rauka ra i te aronga maata rava i te akamanakoanga i te au apinga o te Ngai Tapu ra?

⁸ Noatu rai e kare ratou e tomo ki roto i te Ngai Tapu tikai ra, ka kite ra te aronga maata rava o te tangata ke ra i te au apiianga puapinga maata mei tona au apinga maira. Mei te tu anga ramepa tei anoano uaia ra te inu, mei te reira katoa te aronga tangata ke ra i te anoano anga vaerua tapu ei tauturu ia ratou kia mou i te au tuatua mou te aere maira no te Tuatua a te Atua, na roto i “te tavini akono meitaki e te pakari.” (Mataio 24:45-47) Pera katoa, te tauturu ra te vaerua o te Atua ia ratou kia akarongo ki teia patianga: “E te tuatua nei te Vaerua ma te vaine akaipoipo ou [te toenga o tei akatainuia] ra, E aere mai. E ko tei akarongo ra, ka tuatua katoa aia e, E aere mai. E ko tei kaki ra, ka aere mai. E tei anoano ua ra, ka rave ua mai aia i te vai ora.” (Apokalupo 22:17) E no reira, ka akamaara mai te tu anga ramepa ra ki te aronga maata rava i ta ratou apainga kia kaka ei au Kerititiano e kia kopae ke i tetai ua atu apinga i te tu akono, te manako, te tuatua, me kare te angaanga te ka akariri atu i te vaerua tapu o te Atua ra.​—Ephesia 4:30.

⁹ Te akamaaraara maira te kaingakai o te varaoa aroaro ra ki te aronga maata rava e e vai ora meitaki ei i te pae vaerua, ka tika ratou kia kai putuputu i te kaikai vaerua no te Pipiria mai e no te au puka a “te tavini akono meitaki e te pakari.” (Mataio 4:4) Te akamaara maira te atarau o te akakakara anga kia ratou i te puapinga maata o te pureanga akatenga kia Iehova no te tauturu kia tamou ei to ratou tiratiratu. (Luka 21:36) Ka tau ta ratou pure kia kapiti i te au tuatua akapaapaa e te akameitaki anga no te ngakau mai. (Salamo 106:1) Te akamaara katoa maira te atarau no te akakakara anga ia ratou i tei anoanoia kia akapaapaa i te Atua na etai atu mataara, mei te imeneanga ma to ratou ngakau katoa ra i te au imene Patireia i te au uipaanga Kerititiano e na ta ratou teateamamao meitaki anga e kia “aaki te tuatua e kia rauka atu te ora.”​—Roma 10:10.

Te Autu Takiri Anga o te Akamori Mou

10. (a) Eaa te manakonako meitaki ta tatou ka rauka kia akara matariki atu ki mua? (e) Eaa te tupu anga te ka tika kia tupu na mua?

¹⁰ I teia tuatau nei “e manganui te tangata” no te au pa enua katoa te aere ra ki to Iehova are no te akamori. (Isaia 2:2, 3) I te akapapuanga i teia, te tuatua ra Apokalupo 15:4 e: “Koai oki te ka kore e mataku ia koe, e te Atu, e te akakakā i toou ingoa? ko koe anake oki Tei Tapu; e ope katoa te pa enua i te aere mai ki mua i toou aroaro e akamori ei; kua akakite uaia taau ra au tutaki anga tika.” Te akataka maira a Zekaria pene 14 i te ka aru mai. I te tuatau vaitata ki mua, ka itae te tu manako kino o te maata anga o te au tangata i te enua nei ki tetai take ia ratou ka akaputu kia tamaki atu ia Ierusalema​—koia te au komono o te Ierusalema o te rangi ra i runga i te enua nei. Ei reira a Iehova ka rave ei. Mei tetai Atua Toa ra, “e aere atu ei [aia], ka tamaki ei ki taua au enua ra” koai ra ka anoano kia rave i teia tamaki anga.​—Zekaria 14:2, 3.

11, 12. (a) Eaa ta Iehova ka rave ki te takinga kinoanga i te ao katoa nei te aere mai ra ki rungao i te aronga akamori i tona iero ra? (e) Eaa te tupu anga no ta te Atua ra tamaki anga?

¹¹ “Teia ra te mate ta Iehova e ta mai i te au tangata ravarai i tei tamaki ia Ierusalema ra: E pou ua to ratou kiko tu uaʼi to ratou vaevae ki runga, e pou ua oki to ratou mata i roto i te rua mata tikai ra, e pou ua oki to ratou arero i roto i to ratou vaa. E riro oki i taua rā ra, tetai oripu anga maata i te tupu i rotopu ia ratou no ko mai ia Iehova ra, e opu anake oki ratou ravarai i te rima o tona uaorai tangata tupu, e akateitei oki aia a tona rima e rave i te rima o tona tangata tupu.”​—Zekaria 14:12, 13.

¹² Me e tika tikai teia mate me kare e akatutu anga, ka tatari tatou kia kite. Inara, e okotai apinga te papu ra. I to te Atua au enemi e aere atura i te rave i ta ratou tamaki anga i te au tavini o Iehova i te ao katoa nei, ka tapuia mai ratou e tetai akakiteanga mataku i to te Atua ra mana katoatoa. Ka akamutekiia to ratou vaa. Ka riro mei te mea rai e kua pe atu to ratou au arero patoi ra. Ka riro ta ratou akakoro anga taokotai kia poiri i ta ratou akara anga, mei te mea rai e kua pe atu to ratou mata. To ratou maroiroi kopapa, tei akamaroiroi ra ia ratou kia tamaki atu, ka kore ua ia. Na roto i te oripu ua anga, ka ariu atu ratou tetai ki tetai ma te ta anga maata. E no reira pouroa te au enemi no te akamori anga i te Atua ra ka takoreia atu. Ei reira, to te pa enua ravarai e akariroiaʼi kia kite i to Iehova ra ngateitei i te ao katoa e pini ua ake. Ka akatupuia te totou e: “Ka riro oki ko Iehova te ariki ki runga i te enua katoa nei.” (Zekaria 14:9) A muri iora, ka tapekaia a Satani e tana au temoni katoa i te akamata anga te Tutara Tauatini Mataiti o Karaiti ma te au akameitakianga maata te vai maira no te au tangata.​—Apokalupo 20:1, 2; 21:3, 4.

Te Tuakaouanga ki te Enua Nei

13. Koai ma te aronga te ka “toe” mai no te pa enua ravarai?

¹³ Kua akakite katoa mai te totou a Zekaria i te pene 14, irava 16 e: “E riro oki, ko te tangata ravarai i toe i roto i te au enua katoa ra, tei aere e tamaki ia Ierusalema, e aere katoa ïa i tera mataiti i tera mataiti, e akamori i te Ariki ra, ia Iehova Sabaota, e akono oki i te oroa patia anga puakapa ra.” Kia tau ki ta te Pipiria, ko te au tangata katoatoa te ora nei i teia tuatau e ka ora ua atu ki te openga o teianei akatereanga kino e tei akavaia ei au enemi no te akamori mou “ko te ka akautungaia mai ïa i te mate mutu kore.” (2 Tesalonia 1:7-9; akara katoa ia Mataio 25:31-33, 46.) Kare ratou e akatuakaouia mai. Penei, i reira, ko te aronga te ka “toe” mai ka kapiti katoa i te au mema o te pa enua tei mate ra i mua ake i te tamaki openga a te Atua e no ratou ra tetai manakonako anga akatumuia mai i te Pipiria no tetai tuakaouanga. “Te vaitata mai nei oki te ora,” ta Iesu i taputou ra, “e akarongo ei te aronga katoa i roto i te rua i tona reo, e kua aere mai ki vao; tei rave ana i te meitaki ra, ei te tuakaouanga ora ïa ratou; e tei rave ana i te kino ra, ei te tuakaouanga akaapa ïa ratou.”​—Ioane 5:28, 29.

14. (a) Eaa ta te aronga akatuakaouia mai ka tika kia rave kia raukaʼi te ora mutu kore? (e) Eaa te ka tupu ki tetai ua atu tei kore e akatika kia akatapu ia ratou uaorai kia Iehova e kia akono i te akamori mou ra?

¹⁴ Pouroa teia aronga akatuakaouia ka tika kia rave i tetai apinga e tau ei no to ratou tuakaouanga kia riro ei tetai no te ora e kare ei tetai no te akaapa anga. Ka tika ratou kia aere mai ki te paepae o te iero o Iehova i te enua nei e kia tupou ki raro i te akatapuanga ki te Atua na roto ia Iesu Karaiti. Ko tetai ua atu o te aronga akatuakaouia mai te ka kore e rave i teia ka mamae rai ratou i te mate mei te ka tupu ki to te pa enua i teia tuatau nei. (Zekaria 14:18) Koai tei kite eia te manganui o te aronga akatuakaouia mai te ka kapiti rekarekaia ma te aronga maata rava i te akonoanga i te Oroa Patia Anga Puakapa tika tikai? Kare e ekoko anga, e ka manganui ratou, e ka riro te iero vaerua maata o Iehova ra kia tere atu te kaka anga!

Te Oroa Patia Anga Puakapa Tika Tikai

15. (a) Eaa etai tuanga meitaki roa o te au Oroa Patia Anga Puakapa o Iseraela i taito ra? (e) Eaa i orongaiaʼi e 70 toa puakatoro i te tuatau oroa ra?

¹⁵ I te au mataiti tataki tai, kua umuumuia a Iseraela i taito ra kia akono i te Oroa Patia Anga Puakapa. Kua raveia te reira no te epetoma okotai e i te openga o te tuatau o ta ratou mou ra. E tuatau rekareka ia no te akameitaki anga. No taua epetoma ra, kua noo ratou ki roto i te au are kapakapa ua tei tapokiia ra ki te rau rakau, e maata oki te kikau nu tamara ra. Kua akamaaraara teia oroa i to Iseraela i ta te Atua ra akaora anga i to ratou ai metua mei Aiphiti mai e i akapeea tana utuutu anga ia ratou ia ratou i noo puakapa ei i te aaereanga no te 40 mataiti i te metepara e itae roa atu ratou ki te Enua Taputouia. (Levitiku 23:39-43) I te tuatau o taua oroa ra, e 70 toa puakatoro tei tuku atingaia ki runga i te atarau i te iero ra. I te akara anga, ko teia tuanga o te oroa totou anga mai i te angaanga akaora oraanga apa kore ua e te oti takiri ta Iesu Karaiti ka rave. Ka tae atu te au puapinga o tona atinga oko i te openga ki te au manotini​—penei e au pirioni ua atu—​o te au anaunga o te 70 pamiri o te au tangata nei tei eke mai ia Noa ra.​—Genese 10:1-29; Numero 29:12-34; Mataio 20:28.

16, 17. (a) I na ea i akamataʼi te Oroa Patia Anga Puakapa tikai ra, e i akapeea te rave anga i te reira? (e) E akapeea te aronga maata rava i te piri anga ki roto i taua akono anga ra?

¹⁶ E no reira kua tou mai te Oroa Patia Anga Puakapa taito ra ki te akaputuanga rekareka i te aronga ara te ka okoia mai ki roto i te iero maata o Iehova. Te akatupu anga a teia oroa tei akamataia mai ia Penetekote i te 33 T.N. ma te akamata anga o te akaputuanga rekareka i te Iseraela vaerua ra ki roto i te putuputuanga Kerititiano ra. (Angaanga 2:41, 46, 47) Kua ariki teia aronga akatainuia ra e e “tuitarere” ratou i roto i to Satani ao nei no te mea ko to ratou “kainga te vaira i te au rangi ra.” (1 Petero 2:11; Philipi 3:20, NW) Kua akapoiri potoia te oroa rekareka ra e te akonoanga akaruke anga tupu maira i te akapapa anga ia Kerititome. (2 Tesalonia 2:1-3) Inara, kua rave akaouia te oroa i te 1919 ma te akaputuanga rekareka i te au mema openga o te 144,000 au Iseraela vaerua ra, tei aruia mai e te aronga maata rava o te pa enua ia Apokalupo 7:9 ra.

¹⁷ Te akatutuia maira te aronga maata rava ma te kikau nu tamara i to ratou rima, tei akaari maira e e aronga akono rekareka katoa oki ratou i te Oroa Patia Anga Puakapa tikai ra. Ei au Kerititiano akatapuia, te rave rekareka ra ratou i te angaanga akaputuanga kia maata atu te aronga akamori ki roto i te iero o Iehova ra. Pera katoa oki, ei aronga ara, te ariki ra ratou e kare o ratou tika kia noo tamou ki runga i te enua nei. Ko ratou, ma te aronga akatuakaouia mai i te tuatau ki mua ra, ka tika kia akono marie i te akarongo i te atinga oko o Karaiti kia itae roa ratou ki te tu tangata apa kore ua a te openga o te Tauatini Mataiti Tutara Anga o Karaiti.​—Apokalupo 20:5.

18. (a) Eaa te ka tupu a te openga o te Tauatini Mataiti o te Tutara a Iesu Karaiti ra? (e) Ka akapeea te akamori mou ia Iehova ra e autu ei i te openga ra?

¹⁸ Ei reira, te aronga akamori i te Atua ki runga i te enua nei ka tu ei ki mua iaia ei tangata apa kore ua ma te kore e umuumuia tetai kau taunga i te rangi ra. Ka tae mai te tuatau “ka tuku atu ei a Iesu Karaiti i te basileia ki te Atua, ki te Metua ra.” (1 Korinetia 15:24) Ka tukuia a Satani “i tetai manga tuatau iti” kia timata i te au tangata kua apa koreia ra. Ko etai ua atu aronga tiratiratu kore ka akapouia e tuatau ua atu, ma Satani e tana au temoni katoa. Ko te aronga te ka vai tiratiratu ka orongaia te oraanga mutu kore. Ka riro ratou ei aronga noo tamou i te Parataito i te enua nei. E na reira ka tae te Oroa Patia Anga Puakapa tikai ki tetai oti anga autu e te kaka oki. Ka autuia te akamori mou ei akakaka anga e tuatau ua atu ia Iehova e te mataora anga mutu kore no te tangata katoa oki.​—Apokalupo 20:3, 7-10, 14, 15.

[Au Tataanga Rikiriki i Raro]

Au Uianga Akamanako Akaou

◻ I akapeea te takinga kino anga “ia Ierusalema” i te tuatau o te tamaki mua o te ao ra?​—Zekaria 14:2.

◻ Eaa tei tupu ana ki te au tangata o te Atua ra mei te 1919 maira?

◻ Koai ma te o atura ki te akonoanga i te Oroa Patia Anga Puakapa tikai ra?

◻ Akapeea te akamori mou e autu takiri ei?

[Tutu i te kapi 23]

Kua taangaangaia te au kikau nu tamara i te akono anga i te Oroa Patia Anga Puakapa