Te Maara Ainei ia Koe?

Kua kite ainei koe i te au itiu i ou ake nei o Te Punanga Tiaki ei mea puapinga ma te tau noou? Ka kore i reira e timata i toou roro i te au uianga te ka aru mai?

◻ Eaa te tu o Aramakito? (Apokalupo 16:14, 16)

Kare ia i tetai akapouanga nukiria ra me kare e tumatetenga na te tangata i akakeu. Kare, na te Atua te reira tamaki ei akaope i ta te tangata au tamaki katoatoa, no te akapou i te aronga katoatoa te akatupu ra i taua au tamaki ra, e te apai mai i te au tikai ki te aronga te inangaro ra i te au. Kare te reira e taroaroa. (Habakuka 2:3)​—4/15, kapi 17.

◻ Eaa te tu akaipoipoanga te akangateitei ra ia Iehova?

Ko te akaipoipoanga tei akariro i te au mea pae vaerua kia akatere ki rungao i te au tu o teianei ao ka akangateitei tikai ia ia Iehova. Ka rekareka te au Kerititiano i te ati anga me kopae ratou i te au peu taeke o teianei ao, te au tu mataku tau kore, e te au rave anga maata; na te kore anga e tuku i te reira kia tamanata i te au angaanga tamou teokaratiki; e na to ratou akaarianga i te tu mako auraka te tu akaariari.​—4/15, kapi 26.

◻ Eaa te au tu o tetai tangata tu tika?

Ka rauka tetai tangata tu tika kia irinakiia, kare anake e tona au taeake, mari ra, tei puapinga roa atu, e te Atua. Ka kiteaia to tetai tangata tu ma o te ngakau na tana e rave ra. Kare ona tu pikikaa. Kare ona tu akavare me kore pikikaa kino. (2 Korinetia 4:2)​—5/1, kapi 6.

◻ Eaa a Ieremia i tuatuaʼi: “E meitaki no te tangata kia apai i te zugo i tona ou anga ra”? (Te Aue o Ieremia 3:27)

Na te apiianga kia autu atu i te au timata anga koi mapu ou ei ka akateateamamao i tetai kia aravei i te au akaao anga o te tuatau me mamaata mai. (2 Timoteo 3:12) E maata roa atu te au puapinga o te tu akarongo i tetai ua atu akamaru anga poto ta te tuku ua anga ka apai mai.​—5/1, kapi 32.

◻ Eaa tei akatutuia e te mama mai anga o Mose raua ko Elia i roto i te orama akatukeanga?

I roto i te aerenga tuatua o te akatuke anga, e akatutu anga tau a Mose raua ko Elia no te au taeake akatainuia o Iesu. Ko ratou, pera katoa a Iesu, ‘te mama mai anga i roto i te kakā’ kua akatutu i te au Kerititiano tiratiratu akatainuia e ka “akakakā kapipitiia” ma Iesu i roto i te akanoo anga Patireia i te rangi. (Luka 9:30, 31; Roma 8:17; 2 Tesalonia 1:10)​—5/15, kapi 12, 14.

◻ Eaa ta te Atua ‘tuatua ngaro tapu’? (1 Korinetia 2:7)

No runga ta te Atua ‘tuatua ngaro tapu’ ia Iesu Karaiti. (Ephesia 1:9, 10) Inara, kare ko te akataka ua anga ia Iesu ei te Mesia tei taputouia ra. Te kapiti maira te reira i tetai kavamani i te rangi, to te Atua Patireia na te Mesia, e te kapiti maira i te tuanga ta Iesu i tukuia kia angaanga i roto i ta te Atua akakoro anga.​—6/1, kapi 13.

◻ Akapeea tetai Kerititiano me manako i te tangata metua me kore te maki?

I te mea ka akara i te timata anga ei kotinga i tana tavini anga ia Iehova, ka tau aia kia akara i te reira ei tuatau no te akamaata atu i tona irinaki anga ki rungao iaia. Kia akamaara katoa aia, te vaitoia ra te puapinga o tetai Kerititiano kare na runga anake i te maata o tana angaanga, mari katoa ra na tona akarongo e te oonu o te aroa. (Mareko 12:41-44)​—6/1, kapi 26.

◻ Akapeea ta Iehova taangaanga anga i te au tangata kare te au angera kia tata i te Pipiria i te akaari anga i tona tu pakari maata?

Me kare takiri te tu tangata, penei ka ngata ia tatou i te marama i te tuatua a te Pipiria. Pera katoa, te vaira i te Pipiria te tu maana, te tukeke, e te tu tei tau i te tangata ra.​—6/15, kapi 8.

◻ Eaa te mea anoanoia no te mataora anga ngutuare tangata?

Te vaira te mea anoanoia i roto i te au kapi o te Tuatua na te Atua, koia te Pipiria, e te taangaanga anga i tana au kaveinga, mei te tu akatere uaorai, te kite anga i te taoonga upoko, te komunikeiti anga meitaki, e te aroa.​—6/15, kapi 23, 24.

◻ Akapeea te rapakauanga tei raveia e Iesu i tuke roaʼi mei tei matauia i te raveia e te aronga tei karanga e au mana rapakauanga to ratou?

Kare e akaariari anga manako ngakau ketaketa mei te au urupu tangata e kare o Iesu tu putakaiti maata. Pera katoa, kare rava a Iesu i autu kore ana i te rapakau i te aronga apikepike te akamanako anga e kare ta ratou moni i rava no te oronga mai me kore ra kare o ratou akarongo.​—7/1, kapi 5.

◻ Akapeea a Iehova i te tauturu anga i tona iti tangata kia rauka tetai ngai i roto i tana akakoroanga tu-Atua no tona ingoa e te Patireia?

Te mea mua, kua irinaki a Iehova i te oronga i te tuatua mou ki tona iti tangata. Te rua, kua orongaia aia i tona vaerua tapu kia ratou. E te toru, e akataeakeanga to tatou i te ao katoa e ta Iehova akanoo anga akaaereia no te akamori.​—7/1, kapi 19, 20.

◻ Eaa te tu akono tika meitaki?

Te tu akono tika meitaki ko te kite akono tau ia, te meitaki, te angaanga e te manako anga tau. Kare te reira i tetai tu angaanga kore mari ra e mea angaanga ia, e te papu. Te aiteanga o te tu akono tika meitaki e maata atu ia i te kopae ua anga i te ara; tona aiteanga ko te aruaruanga i te mea meitaki. (1 Timoteo 6:11)​—7/15, kapi 14.

◻ Eaa te apinga puapinga roa atu te ka rauka i te au metua i te oronga ki ta ratou tamariki?

Te apinga puapinga roa atu ko to ratou uaorai akaraanga o te akaari anga i te tu aroa ki tetai atu. Ma te puapinga, te anoanoia ra te au tamariki kia kite e kia akarongo i to ratou metua i te tuatua anga e te akaari anga i te aroa tae tikai no te Atua i ta ratou au mea ravarai ka rave.​—7/15, kapi 21.

◻ Eaa etai au apinga puapinga no tetai apii Pamiri meitaki?

Ka anoanoia tetai apii pamiri kia rave tamouia. Ka anoanoia koe kia “taporoporo marie i te tuatau” no te apii. (Ephesia 5:15-17) E rave i te au tuatau apii ei mea oraora no te tamariki na te akariro anga i te Pipiria ei mea ora. E rekarekaʼi te tamariki i te reira, kia kite ratou e te o ra ratou ki roto i te reira.​—8/1, kapi 26, 28.