Te Putuputuanga Kerititiano​—E Tumu no te Tauturu Akamaroiroianga

KUA apiapi a Popi, e vaine tei roto i tona 20 mataiti, no te mea kare tona nga metua i komunikeiti ana kiaia no tetai turanga mamae ngutuare tangata.a I muri ake i te riringi anga i tona ngakau ki tetai tangata pakari Kerititiano e tana vaine, kua tata aia kia raua: “Te akameitaki nei au ia korua no te akapou anga i tetai tuatau i te tuatua mai kiaku. Kare korua i kite e mea puapinga kiaku e te manako maira korua. Te akameitaki nei au ia Iehova no tei oronga mai i te au tangata ka rauka iaku i te irinaki e ka tuatua atu.”

Kua kite a Toula, e vaine takaua i ou ua akenei ma te nga tamariki mapu e rua, iaia uaorai i roto i te au tu ngata manamanata o te manako ngakau e te pae moni. Kua rauka putuputu iaia e tana tamariki te atoro anga akamaroiroi mei tetai nga tokorua akaipoipo Kerititiano o te putuputuanga. I muri ake i te autu manuia anga aia i tona turanga, kua tuku atu aia i tetai kati na raua, te na ko ra: “E maara ua ana iaku korua i roto i taku au pure. Kua maara iaku te au taime e manganui kua tauturu mai korua iaku e kua turu mai iaku.”

Te manako ra ainei koe i etai taime e te “teiaa [ra koe] i te apainga” te au taomi anga maata o teia ao? (Mataio 11:28) Kua takore ainei te “tuatau ra, e te manuia ua” i toou oraanga ma te au kite anga mamae tikai? (Koheleta 9:11) Kare koe e ko koe ua. Inara, mei ta te au tauatini aronga taitaia i kite takere, ka rauka katoa ia koe te tauturu puapinga i te putuputuanga Kerititiano a te Au Kite o Iehova. I te anere mataiti mua T.N., kua kite te apotetoro ko Paulo e te vaira etai au taeake irinaki e kua “akapumaana” iaia. (Kolosa 4:10, 11) Ka rauka ia koe te kite anga mei te reira rai.

Tauturu Anga e te Turu Anga

I roto i te au Tuatua Tapu Ereni Kerititiano, te tuatua “putuputuanga” kua uriia mei te tuatua Ereni ek·kle·siʹa, te aite anga e pupu tangata kua akaputuputuia mai. Tei o atu ki taua tuatua koia ko te au manako taokotai anga e te oronga anga tau.

Te akono ra te putuputuanga Kerititiano i te tuatua mou o te Tuatua a te Atua e te akakite ra i te tuatua meitaki o tona Patireia. (1 Timoteo 3:15; 1 Petero 2:9) Inara, te oronga katoa ra te putuputuanga i te tauturu i te pae vaerua e te turu ra i te aronga tei piri ki te reira. I roto rai, ka kitea e tetai i etai pupu inangaro, manako ua, e te au taeake te manako maira, te papa ra e te puareinga ra i te tauturu e te akapumaana i tetai ke i te au tuatau taitaia.​—2 Korinetia 7:5-7.

Kua kitea uaia e te aronga akamori ia Iehova i te meitaki e te tinamou i roto i tana putuputuanga. Kua akakite te tata taramo e kua kite aia i te rekareka e te manako ngakau tinamou i roto i te iti tangata akaputuputuia o te Atua. (Salamo 27:4, 5; 55:14; 122:1) Mei te reira rai i teia tuatau, te putuputuanga Kerititiano e taokotai anga aronga irinaki te akamatutu ra e te akamaroiroi ra tetai i tetai.​—Maseli 13:20; Roma 1:11, 12.

Kua apiiia te au mema o te putuputuanga kia ‘takinga-meitaki i te tangata ravarai, kia maata atura ki to te ngutuare o te akarongo ra.’ (Galatia 6:10) Kua akakeu te apii anga akatumuia ki runga i te Pipiria ia ratou kia akaari i te aroa taeake e te aroa maru no tetai. (Roma 12:10; 1 Petero 3:8) Kua akakeuia te au taeake tungane e te tuaine i te pae vaerua kia takinga meitaki, kia au ua, e kia tangi aroa. (Ephesia 4:3) Koi kore ei i te aronga akamori ua, te akaari ra ratou i te aroa no tetai ke.​—Iakobo 1:27.

No reira, i roto i te putuputuanga, kua kitea e te aronga taomiia te reva pumaana mei to roto rai i te ngutuare tangata. (Mareko 10:29, 30) Te manakoanga e kua piri atu ratou ki tetai pupu aroa e te vaitata kua akaketaketa ia ratou. (Salamo 133:1-3) Na roto i te putuputuanga, kua oronga mai te “pupu tavini akono meitaki e te pakari” i te “kai [pae vaerua] na ratou i te ora mou ra.”​—Mataio 24:45.

Tauturu mei te Au Akaaere Aroa Ra

Ka rauka i te au mema o te putuputuanga Kerititiano i te kite i roto i te reira te au tiaki tau, aroa ua, e te marama te ka oronga mai i te tauturu e te akamaroiroianga i te pae vaerua. Mei te “punanga i te uriia ra, mei te pipinianga i te matangi maata ra” te au tiaki ma te reira au tu. (Isaia 32:1, 2) Te akono ra te aronga pakari akatainuia i te vaerua, me kare te au akaaere, i to te Atua au iti tangata mei te mamoe te tu, ka akamaroiroi i tei maki e tei taitaia, e ka kimi i te akaoki mai i tei rave tarevake ra.​—Salamo 100:3; 1 Petero 5:2, 3.

E tikai, kare te au pupu tangata pakari o te putuputuanga ei au mema kite i te au taote manako me kare ei aronga rave i te pae oraanga, ka rauka i te rapakau i te au manamanata i te pae manako me kare i te pae kopapa tei aroia atu e te aronga irinaki. I roto i teia akatereanga o te au mea nei, te anoano ra rai tei maki ra i te “taunga.” (Luka 5:31) Noatu rai, ka rauka i taua aronga tiaki ra i te tauturu i te aronga tei inangaro i te tauturu i te pae vaerua. (Iakobo 5:14, 15) Te ngai ka rauka, ka akapapa katoa te aronga pakari i tetai atu turu anga.​—Iakobo 2:15, 16.

Koai to muri i taua akanoonoo anga aroa? Ko te Atua ko Iehova uaorai! Te akatutu ra te peroveta ko Ezekiela ia Iehova te akakite ra: “Naku, naku uaorai nei e aru aere i taku au mamoe, e e kimi oki ia ratou. . . . E ka akaora ia ratou i te au ngai katoa i pueurikiriki ke ei ratou . . . Naku e akaangai i taku anana, e naku rai e akamoe ia ratou ki raro.” Te manako katoa ra te Atua i te mamoe maroiroi kore e te paruparu.​—Ezekiela 34:11, 12, 15, 16.

Tauturu Tika i te Tuatau Tau

Te rauka ra ainei te tauturu tikai i te putuputuanga Kerititiano? Ae, e te akatutu maira te au akaraanga te ka aru mai i te au turanga tukeke i te reira kua riro te putuputuanga ei turu anga.

◆ Kua ngere i tei akaperepereia ra. Kua mate ta Anna tane i muri ake i tetai maki kino. “Mei reira mai, kua rauka iaku te aroa pumaana mei te taeake Kerititiano,” i nana ei. “Te au tuatua takinga meitaki tamou ua no te tauturu e te akamaroiroi mei te taeake irinaki ra, kapiti mai te au kukumi anga ngakau tae, kua akapumaana iaku auraka e manako taitaia, e te akameitaki nei au ia Iehova. Kua akariro to ratou aroa iaku kia manako e kua tauturu maata ia, kua akamatutuia, e kua manakoia mai.” Penei kua kite ana koe i te mamae no te ngereanga i tei akaperepereia i te mate. I taua taime, ka rauka i te au mema o te putuputuanga i te oronga i te au pumaana anoanoia e te turuanga manako ngakau.

◆ Te maki. E atoro putuputu ana a Arthur, e akaaere tutaka mei Poland, i te au putuputuanga i Asia Rotopu e raukai i te akaketaketa ia ratou i te pae vaerua. I tetai o teia au atoro anga, kua maki tikaiia aia e kua tupu te au manamanata ki tona tauta anga kia meitaki mai. “Te inangaro nei au i te akakite atu kia kotou e akapeea te au taeake tungane e te tuaine i [tetai oire i Kazakhstan] i te akono anga mai iaku,” i maara ei a Arthur ma te ariki anga oonu ra. “Kua apai mai te au taeake tungane e te au tuaine, e manganui kare au i kite​—e pera te aronga inangaro​—i te moni, te kai, e te vairakau. . . . E kua rave ratou i te reira ma te rekareka maata.

“Ka akamanako ana i toku manako ngakau i te rauka anga iaku tetai tikiro ma tetai moni e tetai reta: ‘Ki te Taeake, te tuku atu nei au i toku aroa pumaana. Kua oronga mai a mama i tetai moni naku ei oko aiti kirimi, inara kua iki au i te oronga atu i te reira naau ei tutaki i toou vairakau. E kia meitaki mai ine. Te inangaro nei a Iehova ia tatou no tetai tuatau roa. Kia meitaki ra. E akakite mai kia matou i etai au tua meitaki. Vova.’” Ae, mei tei akaariia i roto i teia tu, ka rauka i te aronga ou e te pakari i te putuputuanga kia oronga i te tauturu akaketaketa anga i te tuatau maki ra.​—Philipi 2:25-29.

◆ Te taitaia. E anoano ngakau tae tikai to Teri no te tavini ei painia, me kare ei tangata akakite tamou i te Patireia. No te au tu ngata, inara, kua akamutu aia i te painia. “Kua taitaia tikai au no te tauta anga i te tavini na teia tu e kare i roa ana i te mataiti okotai,” i tuatuai aia. Kua irinaki tarevake a Teri e tei runga ua to Iehova tu mareka i te maata anga o tana angaanga kiaia. (Akatuke ia Mareko 12:41-44.) Kua taitaia tikai, kua akatakake aia iaia uaorai. Inara kua aere mai te tauturu oraora mei te putuputuanga.

Kua maara ia Teri: “Kua aere ua mai tetai tuaine painia pakari i te turu iaku e kua akarongo mai iaku e riringi ra i toku manako ngakau. I toku akaruke anga i tona kainga, kua manako au e mei te mea kua taakiia tetai apinga teiaa mei iaku. Mei reira mai, kua oronga mai teia painia tuaine e tana tane, e tangata pakari i te putuputuanga, i te tauturu puapinga. Kua aravei mai ratou i te au ra te ui anga mai e peea ua au. . . . Kua ariki mai raua iaku kia kapiti atu ki ta raua apii ngutuare tangata i tetai au taime, tei akaoonu i te puapinga kiaku e kia kapiti vaitata te ngutuare tangata.”

Kare i te mea matau koreia no te manganui​—te au Kerititiano akatapuia katoa​—kia taitaia, kia maroiroi kore, e koia ua. Mei teaa ra to tatou kia rekareka e te rauka ra te tauturu noinoi kore e te aroa i roto i ta te Atua putuputuanga!​—1 Tesalonia 5:14.

◆ Au tumatetenga e te au u anga. E tuku ia koe uaorai ki roto i te turanga o tetai ngutuare tangata e a tei ngere pouroa i ta ratou au apinga i te ka anga to ratou are. Kare i roa kua rauka ia ratou ta ratou i kapiki e ko “tetai kite anga akamaroiroi te ka akatuki ia matou e tuatau ua atu e kua akakeu ia matou ma te aroa mou i roto i to Iehova iti tangata.” Kua akamarama ratou: “Vaitata e i reira rai kua tupu ua te ringi anga ngakau tae ei tauturu e te tangi aroa mei to matou au taeake tungane e te tuaine. Kua tangi tamou ua te terepaoni. Kua akakeu tikai to te katoatoa manako e te aroa e kua aue matou ma te akameitaki anga.”

Kare i roaia, kua akapapaia tetai pupu taeake maatamaata e te aronga pakari o te putuputuanga, i nga mea ra, kua patu ratou i tetai are ou no teia ngutuare tangata. Kua umere tetai tangata i te pae mai: “Kia kite tikai koe! Te vaira e tuke te au tangata e angaanga ra i reira​—te au tane, te au vaine, e au kerekere, e te Paniora!” E kite anga meitaki teia o te aroa taeake tikai.​—Ioane 13:35.

Kua oronga katoa te au taeake Kerititiano i te kakau, te kai, e te moni na te ngutuare tangata. Kua tuatua te papa: “Kua tupu teia i te tuatau Kiritimiti i te oronga anga te katoatoa i te au apinga aroa, inara ka rauka ia matou i te tuatua tika e kare tetai ke i rekareka ana i te tu takinga meitaki ngakau tae, tei kiteia e matou.” E kua tuatua mai ratou: “Te ngaro marie nei te au manako o te ai e te pauia nei e te au manako akaperepereia o te au raveanga takinga meitaki e te au oa meitaki. Te akameitaki nei matou i to matou Metua i te rangi ra, ko Iehova, e kua rauka ia matou i tetai pamiri taeake taokotai umere tikai i te enua nei, e te mareka nei matou i te riro anga ei tuanga no te reira!”

E tikai, kare e rauka ua taua akao anga, kare katoa i tapapaia te reira, i te au tumatetenga ravarai. Inara te akatutu papu nei teia atianga i te turu anga penei ka oronga te putuputuanga.

Te Pakari no Runga Mai

Kua kitea e te manganui i tetai atu tumu tauturu e te akamatutu anga i roto i te putuputuanga Kerititiano. Eaa te reira? Te au puka tei akapapaia e “te tavini akono meitaki e te pakari.” Te mea rongoia i te reira ko te au tianara Te Punanga Tiaki e te Awake! E raukai i te oronga i te au ako anga oonu e te ikuiku anga tau, te irinaki ra teia au puka ki runga tikai i te pakari tu-Atua tei kiteia i roto i te Pipiria. (Salamo 119:105) Kua kapitiia atu ki te akakite anga Tuatua Tapu te au kimikimi anga akamanaia e te tika no runga i te au tumu manako mei te taitaia manako ngakau, meitaki maira mei te akakino anga, au manamanata tukeke i te pae moni e te oaoa, te au akaaoanga tei aroia atu e te au mapu, te au tu ngata tuke ki te au enua kare e meitaki ana te tupu anga. Tei runga rava ake, te akono ra teia au puka i ta te Atua tu e ko tetai ravenga meitaki o te oraanga.​—Isaia 30:20, 21.

I te mataiti tataki tai, e rauka ana i te Taiate Punanga Tiaki i te au reta akameitaki anga e tauatini ua atu. Ei akatauanga, no runga i tetai atikara Awake! no te tamate ua, kua tata mai tetai mapu tane Rutia: “No toku tu taitaia, . . . e manganui te tuatau kua manako ana au i te tamate iaku. Kua akamatutu mai teia atikara i toku irinaki anga e ka tauturu te Atua iaku kia akono i toku au manamanata. Te inangaro ra aia iaku kia ora. Te akameitaki nei au iaia no tana turuanga tei orongaia mai na roto i teia atikara.”

I te akara anga e mea ngata no te autu i te au ngaru o te manamanata i teia ao, ka papu ia koe te vaira tetai ngai meitaki i te putuputuanga Kerititiano. E tikai, me te mou ra teia metepara aroa kore o teia akatereanga i toou tu maroiroi, ka rauka ia koe te kite i tetai vai akamatutu i roto i te akaaerenga a Iehova. I muri ake i te kite anga i taua turuanga, penei ka tuatua katoa koe i te au tuatua a tetai vaine Kerititiano tei akono manuia i te maki kino o tana tane e kua tata: “No te aroa e te manako tei akaariia mai kia maua, kua manako au e kia rave ke atu a Iehova ia maua mei roto i te au tumatetenga ki tona rima. Mei teaa ra toku rekareka i te riro anga ei tuanga no teia akaaerenga meitaki tikai a Iehova!”

[Tataanga Rikiriki i Raro]

[Au Tutu i te kapi 26]

Ka rauka ia tatou i te oronga i te tauturu akaketaketaanga ki te aronga maki, tei mamae, e tetai atu