Eaa ra ka Akono ei i Taau Au Taputou?

“E VOTI i te tangata e meangiti tana taputou; koia te mea meangiti i te maromaroa,” i tuatuai te tangata ikuiku tei mate o te peretiteni ko Bernard Baruch. I roto i teia ao i te akaraanga kua tuatuaia te au taputou e kia kore e akonoia. Penei e au tia akaipoipo ratou, e au koreromotu pitiniti, me kare e au taputou no te akapou maata i te taime ma te tamariki. Ko tei kopae matauia koia oki ko te aite anga, “Ka meitaki ua tetai tangata mei tana i tuatua.”

Ae, e manganui te tangata kare i akakoro ana i te akono i ta ratou au taputou. Kua tuku ua tetai i te au taputou kare e rauka ia ratou i te akono me kare ka aati i ta ratou tuatua no te mea kua riro teia ei aerenga ngoie i te aru.

E tika, penei ka ngata i te akono i tetai taputou me tupu mai te au turanga manako koreia. Inara ka akatupu ainei te taputou tei aatiia i te kino? Ka tau ainei koe kia manako pakari tikai no runga i taau au taputou? Ka tauturu te akara poto anga i ta te Atua ko Iehova akaraanga ia tatou kia kite e eaa tatou ka tau ei kia manako pakari tikai i teia tumu manako.

Akatupu a Iehova i Tana Au Taputou

Te akamori ra tatou i tetai Atua ko tona ingoa te piri vaitata ra i te akatupu anga i tana au taputou. I te tuatau Pipiria e putuputu te taime kua akataka te ingoa i tetai tangata. Kua tika katoa teia i te ingoa o Iehova, te aite anga “Nana e Akariro kia Tupu.” No reira te kapiti maira ki te ingoa tu-Atua te manako e ka akatupu te Atua i tana au taputou e ka akatupu i tana au akakoroanga.

E tikai ki tona ingoa, kua akono a Iehova i te taputou pouroa tana i papau ki te iti tangata taito o Iseraela. No runga i teia au taputou, kua akakite te Ariki ko Solomona: “Kia akameitakiiā Iehova, kua oronga mai aia i te au ki tona ra au tangata kia Iseraela, mei tana oki i tuatua maira; kare oki tetai reo i topa i te au tuatua memeitaki katoa tana i tuatua mai i tona tavini ra ia Mose.”​—1 Ariki 8:56.

E tau tikai to Iehova tu irinaki anga e kua rauka i te apotetoro ko Paulo i te akamarama: “Ka tuatua mai ei oki te Atua i tana tuatua kia Aberahama ra, no te mea kare atu e mea mana atu kia taputou aia, kua taputou iora iaia uaorai.” (Ebera 6:13) Ae, to Iehova ingoa tikai e te peretana te akapapu maira e kare aia e oki ki muri no tana au taputou, noatu e ka tutaki maata aia i te reira. (Roma 8:32) Te tika e te akatupu ra a Iehova i tana au taputou te oronga maira kia tatou i te manakonakoanga e e tutau ia no to tatou meta, me kare oraanga.​—Ebera 6:19.

Ta Iehova Au Taputou e to Tatou Tuatau ki Mua

To tatou manakonakoanga, to tatou akarongo, e to tatou uaorai oraanga te irinaki pouroa ra ki runga i te tupuanga o ta Iehova au taputou. Eaa te manakonakoanga ta tatou e akaperepere ra? “Te tatari nei ra tatou i te rangi ou e te enua ou tana [ta te Atua] i tuatua maira, i te vai tika anga o te tuatua-tika ra.” (2 Petero 3:13) Te oronga katoa maira te au Tuatua Tapu te tumu no te akarongo e “e tuakaouanga to tei mate, te aronga tuatua-tika e te aronga tuatua-tika kore.” (Angaanga 24:15) E ka papu ia tatou e apinga maata atu tetai i te oraanga i teianei. Ae, ko ta te apotetoro ko Ioane i kapiki e ko “taua meitaki” koia oki “te ora mutu kore.” (1 Ioane 2:25) Inara kare i kotingaia te au taputou a Iehova i roto i tana Tuatua ki te tuatau ki mua. Te oronga maira ratou i te aite anga ki to tatou au oraanga i te au ra i teianei.

Kua imene te tata taramo: “Te vaitata mairā Iehova i te aronga i kapiki atu iaia, . . . ka akarongo mai aia i ta ratou kapiki.” (Salamo 145:18, 19) Te akapapu katoa maira te Atua e “te oronga nei aia i te maroiroi no tei paruparu; e te akamaata nei aia i te maroiroi no tei apikepike.” (Isaia 40:29) E mei teaa ra te pumaana i te kite i te ‘Atua, kare aia e vaoo ia kotou kia timataia, mari ra ko te tika ia kotou kia akakoromaki ra; e akatupu katoa aia i te akapuanga i taua timataanga ra’! (1 Korinetia 10:13) Me kua kite tikai tatou uaorai i te tupuanga i etai o teia au taputou, kua kite tatou e ka tau a Iehova kia irinaki tikaiia. I te manako anga i te au puapinga ka rauka ia tatou mei te au taputou e manganui ta te Atua i papau e te akono ra, akapeea tatou me manako atu i ta tatou au taputou kiaia?

Akonoanga i ta Tatou Au Taputou ki te Atua

Kare e ekoko anga e ko to tatou akatapu anga ki te Atua te taputou puapinga maata ia ta tatou ka papau. Na te rave anga i teia takainga, te akatutu ra tatou e te inangaro ra tatou i te tavini mutu kore ia Iehova. Koi kore ei e teiaa ta te Atua au akauenga, penei kare i te mea ngoie i te rave i tona anoano, ia tatou e noo nei i roto i teia akatereanga kino o te au mea. (2 Timoteo 3:12; 1 Ioane 5:3) Inara me ‘tuku [tatou] i to tatou rima ki te arote’ e kua riro mai ei au tavini akatapuia no Iehova e ei pipi na tana Tamaiti, ko Iesu Karaiti, auraka tatou e akara ki muri i te au mea o te ao ta tatou i akaruke ki muri.​—Luka 9:62.

Me pure tatou kia Iehova, penei ka akakeuia tatou kia taputou kiaia e ka tamaki tatou no te autu i tetai tu paruparu, ka tatanu i te tu Kerititiano, me kare ka akamaata i etai tuanga o ta tatou angaanga teokaratiki. Eaa te ka tauturu ia tatou kia akono i teia au taputou?​—Akaaite ia Koheleta 5:2-5.

No roto mai te au taputou ngakau tae i te ngakau e pera i te manako. No reira, kia turu tatou i ta tatou au taputou kia Iehova na te akatuera anga i to tatou au ngakau kiaia na roto i te pure, te akakite tika tikai i to tatou au tu mataku, au anoano, e te au tu paruparu. Te pureanga no runga i tetai taputou ka akaketaketa i ta tatou i akakoro no te akono i te reira. Ka rauka ia tatou i te akara atu i ta tatou au taputou ki te Atua ei au kaiou. Me maata te au kaiou, ka anoanoia e kia tutaki marieia te oko. Pera katoa, te au taputou e manganui ta tatou i papau kia Iehova ka anoanoia te tuatau kia akatupuia. Inara na te oronga putuputu anga kiaia te ka rauka ia tatou, te akaari ra tatou e te akakoro ra tatou i ta tatou i tuatua, e ka akameitaki mai aia ia tatou ma te tau ra.

Ka rauka ia tatou i te akatutu e te manako pakari tikai ra tatou i ta tatou au taputou na te pure putuputuanga no runga i te reira, penei i te au ra tataki tai. Na teia e akaari ki to tatou Metua i te rangi ra e ngakau tae to tatou. Ka riro katoa ei akamaara anga putuputu. Kua akaruke mai a Davida kia tatou i tetai akaraanga meitaki no teia. I roto i te imene, kua pati akatenga aia kia Iehova: “E akarongo mai, e te Atua, i taku i pati nei, e akono mai oki i taku nei pure. . . . E pera ua rai au i te imene akapaapaa i toou ra ingoa e tuatau ua atu; e rave rai au i taku i tia ra i tera rā i tera rā.”​—Salamo 61:1, 8.

Akonoanga i ta Tatou Au Taputou te Patu ra i te Irinaki Anga

I te mea kare e tau kia manako ngoie uaia te au taputou ki te Atua, ka aiteite rai kia tuatuaia no runga i ta tatou i akanoo ma te au taeake Kerititiano. Auraka tatou e akono ia Iehova i tetai tu e i to tatou au taeake i tetai. (Akaaite ia 1 Ioane 4:20.) I roto i tana Tuatua i te Maunga, kua tuatua a Iesu: “Kia riro ra ta kotou Koia, ei koia; e ta kotou Kare, ei kare.” (Mataio 5:37) I te akapapu anga e tiratiratu ua ta tatou au tuatua ko tetai tu ia kia ‘takinga-meitaki ki to te ngutuare o te akarongo ra.’ (Galatia 6:10) Ta tatou taputou ravarai i akono te patu ra i te irinaki.

Te kino tei raveia no te aati anga i tetai taputou kua akamaataia i te maata anga o te taime me o mai te moni. Me te tutaki ra i tetai rounu, te rave ra i tetai angaanga, me kare te akatupu ra i tetai koreromotu i te pae moni, ka tau tetai Kerititiano kia akono i tana i tuatua. Ka akamareka teia i te Atua e ka patu i te irinaki tau te anoanoia ra me “kia noo katoa te au taeake ma te tau tikai!”​—Salamo 133:1.

Inara, ko te kore e akono i te au koreromotu, ka rauka i te akakino i te putuputuanga e pera katoa i te au tangata tataki tai te o maira. Kua akakite tetai akaaere tutaka e: “Te au maro anga pitiniti​—tei akatupu uaia ana e te au koreromotu kare tetai i akono​—maata anga o te taime kua riro mai e kia kiteia e te tangata. Tei tupu, kua takake te au taeake, e ka riro te reva i roto i te Are Uipaanga Patireia ei mea ngata.” Mei teaa te puapinga kia akamanako meitaki no runga i te koreromotu ta tatou ka akanoo e kia tataia te reira!a

Ka tau katoa kia akonoia te tu matakite me oko i te au apinga okomaata me kare te taiku ra i te au investment, i te mea tikai ka puapingaia tatou mei te reira. Pera katoa, te vaira te anoano kia matakite e auraka kia tuatua maata no runga i te au puapinga o tetai au apinga me kare au apinga vai rakau me kare kia taputou i te au puapinga tika kore no runga i te au investment. Ka tau te aroa kia akakeu i te au Kerititiano kia akamarama tikai no runga i te au mea kino te o maira. (Roma 12:10) I te mea kua kotingaia te au taeake no runga i te kite anga pitiniti, penei ka irinaki ratou i ta tatou ka tuatua atu no te mea e piri anga to tatou kia ratou i roto i te akarongo. Mei teaa ra te kino me akakinoia teia irinaki!

Ei au Kerititiano, kare tatou e ariki i te au rave anga pitiniti tika kore me kare te kopae ra i te anoano tau o tetai ke. (Ephesia 2:2, 3; Ebera 13:18) E raukai to Iehova tu mareka ei “tuitarere i toou ra puakapa,” kia tiratiratu tatou. ‘Noatu kua taputou tatou, kia kino uaʼi no tatou, kare e taeke ua.’​—Salamo 15:1, 4.

Kua tia te Akava ko Iepheta o Iseraela e me oronga te Atua kiaia te re ki rungao i to Amona, ka oronga aia kia Iehova ei atinga karakaratio te tangata mua te ka aravei mai iaia i muri ake i te oki anga mei te tamaki. Kua riro mai te reira e ko te tama anake a Iepheta, inara kare aia i uri ana ki muri no runga i tana tuatua. Ma te ariki anga ngakau tae a tana tamaine, kua oronga atu aia iaia kia angaanga tamou i te ngai akamorianga o te Atua​—e atinga kare e ekoko anga e mea mamae ia e te oko maata i te au tu ravarai.​—Akava 11:30-40.

Koia tikai i te au akaaere putuputuanga e apainga ta ratou kia akono i ta ratou au koreromotu. Kia tau kia 1 Timoteo 3:2, ka tau tetai akaaere e kia “apa kore.” Ko teia te aite anga o te tuatua Ereni “kare e rauka i te raveia, kare e akakinoia, mamao atu i te akakinoia.” Te “taiku ra kare anake e tangata ripoti meitakiia, e kua tau aia kia pera.” (A Linguistic Key to the Greek New Testament) Mei te mea kia apa kore tetai akaaere, ka tau kia irinakiia tana au taputou.

Tetai Au Tu no te Akono i ta Tatou Au Taputou

Akapeea tatou me manako i ta tatou au taputou i papau ki te aronga kare i te au taeake Kerititiano? “To kotou mārama, kia kaka ïa ki mua i te aroaro o te tangata nei,” i na Iesu ei, “kia akara ratou i ta kotou angaanga meitaki, e kia akameitaki ratou i to kotou Metua i te ao ra.” (Mataio 5:16) Na te akapapuanga e te akangateitei ra tatou i ta tatou tuatua, penei ka akakeu tatou i tetai atu ki ta tatou tuatua Kerititiano. Noatu te topa ra te au turanga o te tu tika tikai i te ao katoa, te akaperepere ra rai te maata anga o te tangata i te tu tiratiratu. Ko te akonoanga i ta tatou au taputou ko tetai tu no te akaari i te aroa no te Atua e te tangata i te pae mai e kia akakeu i te aronga inangaro i te tu tuatua tika.​—Mataio 22:36-39; Roma 15:2.

I to ratou mataiti tavini anga 1998, kua pou i te Au Kite o Iehova e tere atu i te pirioni ora no te akakite anga i te ngai tangata te tuatua meitaki o te Patireia o te Atua. (Mataio 24:14) Penei kua topa etai o teia angaanga tutu aere ki runga i te taringa turi me kare tatou e akono i ta tatou tuatua i roto i te au rave anga pitiniti me kare i tetai au mea. I te mea te mono ra tatou i te Atua mou, te tika ra e te tapapa maira te tangata kia rave tuatua tika rai tatou. Na roto i te tu irinaki anga e te tika, “kia manea te tuatua a te Atua a to tatou Ora ra ia ratou i te au mea katoa ra.”​—Tito 2:10.

I roto i ta tatou angaanga orometua, tei ia tatou te au tuatau no te akono i ta tatou tuatua me oki akaou tatou i te akara i te aronga tei akaari i te inangaro i roto i te tuatua Patireia. Me tuatua tatou e ka oki mai tatou, kia pera tatou. Te oki anga mei ta tatou i taputou e tu ia ‘auraka e tāpu i te meitaki i te tangata e tau iaia ra.’ (Maseli 3:27) Kua akamarama tetai tuaine i te tumu na teia tu: “I te atianga e manganui, e aravei ana au i te au tangata inangaro tataki tai tei tuatua e kua taputou tetai Kite no te oki akaou mai inara kare i pera ana. E tikai, noatu penei kua kite au e kare te tangata nona te kainga i te kainga me kare penei kua taui te au turanga kia kore e rauka no te oki akaou mai. Inara kare au e inangaro i tetai kia tuatua akapera iaku, no reira ka rave au i tei rauka iaku no te kimi i te tangata i te kainga. Te irinaki nei au me akamaromaroa au i tetai tangata, ka akaata kino ki runga ia Iehova e toku au taeake i te katoa anga.”

I etai au turanga, penei kare tatou e inangaro i te oki akaou no te mea kua taopenga tatou kare te tangata e inangaro tikai. Kua akamarama taua tuaine: “Kare au e tauta i te akava mei teaa te maata i te inangaro. Na toku uaorai kite anga i apii mai iaku e tarevake te au akaraanga mua. No reira ka tauta au kia manako papu tikai, te akara anga i tetai tangata ei taeake tungane me kare e tuaine.”

I roto i te angaanga orometua Kerititiano e i roto i tetai au ngai e manganui, ka anoanoia tatou kia akaari e ka tau ta tatou tuatua kia irinakiia. E tika, te ngoie ua ra etai au apinga i te tuatuaia e kia raveia. Kua kite te tangata pakari: “E manganui te tangata i akakite aere i to ratou uaorai takinga-meitaki: te tangata tuatua-mou ra, kitea iaai?” (Maseli 20:6) Ma te tauta anga, ka tiratiratu tatou e ka tika ki ta tatou tuatua.

Au Akameitakianga Puapinga mei te Atua

Te rave akakoro anga no te tuku i te taputou puapinga kore e tiratiratu kore ia e penei ka akaaiteia i te tataanga i tetai cheque ma te kore e au moni i roto i te pangika no te pau i te reira. Inara mei teaa ra te au tutaki anga e te au akameitaki anga ka rauka ia tatou no te akonoanga i ta tatou au taputou! Ko tetai akameitaki anga no te tiratiratu koia oki ko te akava ngakau meitaki. (Akaaite ia Angaanga 24:16.) I te mea ka koumuumu ua i te au manako kino, ka merengo ua tatou e te au. Pera katoa, na te akonoanga i ta tatou tuatua, te tauturu ra tatou i te taokotai anga o te putuputuanga, tei iriia ki runga i te irinaki tau. Ta tatou “tuatua-mou” te akakite katoa ra e e au orometua tatou no te Atua o te tuatua mou.​—2 Korinetia 6:3, 4, 7.

Te tika ra a Iehova ki tana tuatua, e te rikarika ra aia i te “arero pikikaa.” (Maseli 6:16, 17) Na te aruanga i to tatou Metua i te rangi ra, te akavaitata ra tatou kiaia. Papu, i reira, e tumu meitaki to tatou no te akonoanga i ta tatou au taputou.

[Tataanga Rikiriki i Raro]

[Au Tutu i te kapi 10]

Kua akono a Iepheta i tana taputou, noatu i te rave anga i te reira e mea mamae ia

[Au Tutu i te kapi 11]

Me kua taputou koe no te oki akaou, e akapapa meitaki no te akapera