Te Akono ra Ainei Koe i Taau Apainga Katoa ki te Atua?

“E apai oki te Atua i to au tuatua katoatoa ki te akavaanga, e te au mea ngaro katoa ra, te au mea meitaki, e te kino katoa ra.”​—KOHELETA 12:14.

1. Eaa te au apinga ta Iehova i rave mai no tona au tangata?

TE TURU ra a Iehova i te aronga te akamanako tamou marie maira iaia e ko Tei Anga mai ia ratou. Te oronga ra tana Tuatua akauruia i te kite umuumuia no ratou kia akamareka tikai iaia. Te arataki ra te vaerua tapu o te Atua ia ratou i te raveanga i te anoano tu-Atua e “kia tupu te au angaanga meitaki katoa.” (Kolosa 1:9, 10) Pera katoa, te oronga maira Iehova i te kai vaerua e te arataki anga teokaratiki na roto i “te tavini akono meitaki e te pakari.” (Mataio 24:45-47) E manganui te au tu, i reira, tei te au tangata o te Atua te akameitakianga no te rangi mai ia ratou e tavini ra ia Iehova e te rave ra i te angaanga puapinga maata no te tutuanga i te tuatua meitaki o te Patireia ra.​—Mareko 13:10.

2. No runga i te tavini anga kia Iehova, penei eaa te au uianga te ka tu mai?

² Te mataora ra te au Kerititiano mou kia rave i te tavini anga tapu kia Iehova. Inara, penei tetai papaki te mareka kore ra e te manako ra e te puapinga kore ra ta ratou au tauta anga. Ei akatauanga, i etai tuatau, penei ka manako ua te au Kerititiano akatapuia ra me te tau ra e te puapinga ra ta ratou au tauta anga tikai. I te akaataanga ki runga i ta ratou apiianga i te ngutuare tangata e etai atu au angaanga oki, penei ka tu mai etai au uianga mei teianei ki roto i te manako o te upoko ngutuare ra: ‘Te mareka tika ra ainei a Iehova i ta tatou e rave nei? Te akatupu ra ainei tatou i ta tatou apainga katoa ki te Atua?’ Ka rauka i te au tuatua pakari a te orometua ra i te tauturu i te pauanga i taua au uianga ra.

E Puapinga Kore Ainei te Au Apinga Ravarai?

3. I te akonoanga kia tau ki ta Koheleta 12:8, eaa te mea puapinga kore rava?

³ Penei ka manako tetai papaki e akamaroiroi kore te au tuatua a te tangata pakari ra ki tetai ua​—te aronga ou e te aronga ruaine oki. “Te tuatua nei te Orometua, e mea puapinga kore maata teia; e mea puapinga kore te au mea katoa nei.” (Koheleta 12:8) E tika ra, ko tetai mea puapinga kore rava ia kia manako kore i Tei Anga maira i to mapu anga, kia riro kia ruaine ma te kore e tavinianga iaia, e kia akaari anake i te ruaine anga ei tupu anga no tetai oraanga roa. E puapinga kore anake ia, me kare e apinga kore, no taua tu tangata ra, noatu rai me ka mate atu aia ma te apinganui e te rongonui o teianei ao te vai ua nei i te mana kino o Satani te Tiaporo ra.​—1 Ioane 5:19.

4. Eaa ka raukai kia tuatuaia e kare te apinga ravarai i te puapinga kore?

⁴ Kare te apinga ravarai i te puapinga kore no te aronga te ka akaputu i ta ratou apinga ki te rangi ra ei au tavini tiratiratu no Iehova. (Mataio 6:19, 20) E maata ta ratou kia rave i te angaanga a te Atu ka tutakiia ra, e kare tikai taua au angaanga ra i te mea puapinga kore. (1 Korinetia 15:58) Inara me e au Kerititiano akatapuia tatou, te rave tamou marie ra ainei tatou i te angaanga ta te Atua i akaue mai no teia tuatau openga nei? (2 Timoteo 3:1) Me kare kua akono ainei tatou ki roto i tetai tu oraanga matauia e meangiti ua te tuke anga i to te aronga i te pae mai ia tatou? Penei te taokotai atura ratou ma te au akonoanga tuke tuke e te maroiroi ra i te aere ki to ratou au are akamori putuputu anga e te tautaanga kia apai i ta ratou tu akamori e umuumu maira ia ratou. Tera ra, kare ratou e akakitekite i te tuatua o te Patireia. Kare to ratou i te kite tika e ko “te tuatau openga” teianei e kare o ratou manako rapurapu no te tuatau ta tatou e noo nei.​—Daniela 12:4.

5. Me ko te aruaru anga matauia no te oraanga kua riro ei manakoanga maata, eaa ta tatou ka tau kia rave?

⁵ Kua tuatua a Iesu Karaiti no to tatou tuatau kino nei: “E mei te tuatau ia Noa ra, koia katoa te aerenga mai o te Tamaiti a te tangata nei. Mei tei te tuatau i muao i te diluvi ra, te kaikai ra ratou e te inu ra, te akaipoipo ra, e te orongaia ra kia akaipoipoia, e tae rava atu ki te rā i tomo ei a Noa ki roto i te araka, kare rava i kite, e rokoia iora ratou e te diluvi, e ope takiri akera ratou i te mate; koia katoa te aerenga mai o te Tamaiti a te tangata nei.” (Mataio 24:37-39) Me kai mako ua, kare e tarevake i te kaianga e te inuanga, e ko te akaipoipo anga e akanoonooanga ia tei akamataia mai e te Atua uaorai. (Genese 2:20-24) Inara, me ka kite tatou e ko te au aruaru anga matau ia o te oraanga kua riro ei manakoanga maata na tatou, eaa tatou ka kore ei e akariro i teia ei tetai tumu no te pure anga? Ka rauka ia Iehova kia tauturu ia tatou kia manako tamou i te Patireia na mua, e rave i te mea tika, e kia akatupu i ta tatou apainga kiaia ra.​—Mataio 6:33; Roma 12:12; 2 Korinetia 13:7.

Akatapuanga e ta Tatou Apainga ki te Atua

6. I roto i teea tu puapinga maata i kore ei tetai papaki o te aronga papetitoia e akono i ta ratou apainga ki te Atua ra?

⁶ Ka tau tetai papaki o te au Kerititiano papetitoia kia pure akatenga no to ratou kore e akono i te au apainga orometua ta ratou i akatika kia rave i te akatapuanga ki te Atua ra. I te mataiti e tere atu i te 300,000 kua papetitoia no etai au mataiti i teianei, inara ko te katoa anga o te Au Kite o Iehova te rave angaanga nei kare i itae ki taua numero ra. Tetai papaki tei riro ra ei papuritia no te Patireia kua akamutu te akakitekite i te tuatua meitaki. Inara, ka tika te aronga tataki tai kia rave i te angaanga orometua i mua ake ka papetitoiai ratou. No reira kua matakite ratou i te akauenga ta Iesu i oronga ki tana au pipi katoatoa: “Ka aere kotou e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te Vaerua Tapu; Ma te apii atu ia ratou, kia akono i te au mea katoa taku i akaue atu kia kotou.” (Mataio 28:19, 20) Me te tupu ra kia ratou te au kotinga kino rava no te oraanga kopapa me kare etai atu tumu kare e rauka ia ratou kia akatere, ko te aronga papetitoia kare ra e tavini ana ei Au Kite no te Atua e no Karaiti kare ratou e akono ana kia tau ki ta ratou apainga katoa ki mua i Tei Anga maira ia tatou nei.​—Isaia 43:10-12.

7. Eaa tatou i tau ei kia uipa putuputu no te akamori anga?

⁷ A Iseraela i taito ra ko tetai iti tangata ia tei akatapuia ki te Atua, e i raro ake i te Ture koreromotu ra, e au apainga ta tona au tangata ki mua ia Iehova ra. Ei akatauanga, kia akaputu atu te au tangata tane katoatoa ra no nga oroa e toru i te mataiti ra, e ko tetai tangata tei akakoro ra kia kore e rave i te Pasa ra kua “tipu keia” aia i roto i te matenga. (Numero 9:13; Levitiku 23:1-43; Deuteronomi 16:16) Kia akatupu i ta ratou apainga ki te Atua ei au tangata akatapuia nona ra, kua tau to Iseraela ra kia akaputu atu no te akamori anga. (Deuteronomi 31:10-13) Kare e apinga i roto i te Ture ra tei tuatua e, ‘E rave i teia me ka rauka ia koe i te tauru atu ki roto i toou ora anga.’ No te aronga tei akatapuia kia Iehova i teianei, e mea tika tikai te kapiti atura teia i te akateiaa anga ki te au tuatua a Paulo: “E akono marie rai tatou tetai ki tetai, ka akamaroiroi atu ei kia maata te aroa; e i te angaanga memeitaki ra: Auraka e akaruke i to tatou akaputuputu anga mei ta tetai aronga, ka akamaroiroi ra, e kia maata atu rai te maroiroi, no te mea te akara na kotou i taua rā ra i te vaitata anga mai.” (Ebera 10:24, 25) Ae, ko te akaputuanga putuputu ma te au oa akarongo ra e tuanga ia no te apainga a te Kerititiano akatapuia ra ki te Atua.

E Paunu Matakite i Taau Au Ikianga!

8. Eaa ra i tau ei tetai tangata ou akatapuia ra kia rave i te pure akamanako anga i tana tavinianga tapu?

⁸ Penei e tangata ou ua koe tei akatapuia kia Iehova. Te vaira te au akameitakianga apinganui naau me ka tuku koe i te au manakoanga Patireia na mua i toou oraanga. (Maseli 10:22) Ma te pure e te paranianga matakite, penei ka rauka ia koe kia akapou i te au mataiti o toou ouanga ra ki roto i tetai tu no te tavini anga i te au tuatau ravarai​—ei tetai tu meitaki kia akaari e te akamanako ra koe i Tei Anga mai ia koe ra. Me ka kore ra, penei ka akamata mai te au manako anga apinga kia akaki i te maataanga o toou tuatau e te manako anga oki. Mei tei matauia no te au tangata nei, penei ka akaipoipo vave koe i toou oraanga e ka o atu ki te kaiou ei oko i te au apinga kopapa nei. Penei ko tetai angaanga moni ka akapou i te maataanga o toou taime e te ririnui oki. Me ka anau mai te tamariki naau, ka rave koe i te apainga i to ngutuare tangata no etai raungauru mataiti. (1 Timoteo 5:8) Penei kare i ngaropoina ia koe Tei Anga maira ia koe, mari ra e mea pakari kia kite e ko taau parani vaveanga, me kare ko te kore e pera, ka akanoo i te aerenga no toou oraanga pakari anga. I te au mataiti a muri akera, penei ka akara koe ki muri e ka anoano e naringa toou ouanga ra i maata atu te akapouia i te angaanga tapu ki Tei Anga mai ia tatou nei. Eaa koe ka kore ei e oronga i toou au manakonakoanga na roto i te pure i teianei, tikai kia kite ei koe i te merengo anga i taau tavini anga tapu kia Iehova i toou au mataiti ouanga ra?

9. Penei eaa te ka rauka i tetai tei ruaine ra e i rave ana aia i tetai apainga teiaa i roto i te putuputuanga i mua ana?

⁹ E akamanako i tetai atu akanoo anga i te au turanga​—no tetai tangata tei tavini ra ei tiaki no “te anana a te Atua” i mua ana. (1 Petero 5:2, 3) No tetai tumu, kua akamutu ua aia i taua angaanga ra. E tika kua ruaine atu aia i teianei, e penei kua ngata atu nona kia rave akaou i te tavini i te Atua ra. Inara ka tau ainei kia kimi akaou aia no etai angaanga teokaratiki? Mei teaa ra te au akameitakianga penei ka apai mai taua tangata ra kia etai ke me ka rauka iaia tetai atu apainga i roto i te putuputuanga! E i te mea kare tetai tangata e noo kiaia anake uaorai, ka rekareka te au oa e te aronga akaperepereia ra me ka rauka iaia kia akatere atu i tana tavini anga, ei akakaka i te Atua. (Roma 14:7, 8) Te mea maata katoa, kare e ngaropoina ia Iehova eaa ta tetai ua atu i rave i te tavini anga iaia. (Ebera 6:10-12) No reira, eaa te ka tauturu ia tatou kia akamanako i Tei Anga mai ia tatou nei?

Au Tauturu ei Akamanakoanga i Tei Anga ia Tatou

10. Eaa ra i riro ei te orometua ra i roto i tetai turanga meitaki kia oronga mai te au kaveinga no te tumu o te akamanakoanga i Tei Anga maira ia tatou nei?

¹⁰ I roto te orometua ra i tetai turanga meitaki kia oronga mai te au kaveinga no tatou kia akamanako i Tei Anga mai ia tatou. Kua pau a Iehova i tana au pure no te ngakau maira na te orongaanga kiaia i te pakari meitaki rava. (1 Ariki 3:6-12) Kua rave a Solomona i tetai kimikimi anga tau tikai no te katoaanga o te au ravenga a te tangata nei. Pera katoa, kua akauruia aia kia tata i tana i kite kia puapingaiai etai ke ra. Kua tata aia: “Te maata ra te pakari o te Orometua, te maata ra tana apii anga ki te tangata kia kite; e kua kimi tikai, e kua akamakitoro marie aia, kua akapapa marie i te maseli e manganui. Kua kimi te Orometua kia kitea te tuatua te ka ārikiia ra: e ko tei tataia ra, e mea tiratiratu ïa, e te tuatua-mou.”​—Koheleta 12:9, 10.

11. Eaa tatou i tau ei kia ariki i te ako pakari a Solomona?

¹¹ Te tatau ra te urianga Septuagint Ereni no teianei au tuatua: “E pera katoa oki, no te pakari o tei tutu ra, no tana apii anga i te tangata kia pakari; e kia kitea e te taringa te mea tau no te au parapore mai, kua kimikimi marie tei tutu maira kia kitea te au tuatua marekaanga e tetai tataanga i te au tuatua​—te tuatua mou.” (The Septuagint Bible, na Charles Thomson i uri) Kua tauta a Solomona kia itae i te au ngakau o te aronga tatau i te au tuatua mareka e te au tumu tau e te meitaki tikai. I te mea ko tana au tuatua tei kitea ra i te au Tuatua Tapu na roto mai i te akauru anga a te vaerua tapu ra, ka rauka ia tatou ma te kore e ekoko anga kia ariki i tana au mea i kite e te akoanga pakari.​—2 Timoteo 3:16, 17.

12. I roto i taau uaorai tuatua, akapeea koe me akataka i ta Solomona i tuatua tei tataia ia Koheleta 12:11, 12 ra?

¹² Noatu rai e kare a ratou apinga rave neneianga mei to teia tuatau nei, e maata te au puka i te tuatau ia Solomona ra. Eaa te manako anga no te au puka ra? Kua tuatua aia: “E tau te tuatua a te aronga pakari ra ki te ko, e mei te nairo akamou meitakiia ra e te aronga e uipa [i te au tuatua] ra; kua akonoia ïa e te Tiaki okotai ra. E teianei kia akarongo koe, e taku tamaiti, ia ratou: kia akapapa tini i te buka ra, kare e akaeaanga, e roiroi te kopapa ra kia maata te kimi i te tuatua.”​—Koheleta 12:11, 12, akaaite ia NW.

13. Akapeea te au tuatua a te aronga e pakari tau i te Atua ra to ratou i te riro anga mei te au ko ra, e koai ma tei aite mei te “nairo akamou meitakiia ra”?

¹³ Kua aite te au tuatua a te aronga e pakari tau i te Atua mei te ko ra. Naea ra? Te ko ra ratou i te aronga tatau me kare te aronga akarongorongo kia akatere ki mua kia rotai ma te au tuatua pakari tei tatauia me kare tei akarongorongoia ra. Pera katoa, te aronga ‘e uipa i te au tuatua ra,’ me kare te tuatua pakari tikai e te puapinga, mei te “nairo akamou meitakiia ra.” E tau ra teianei no te mea e meitaki te au tuatua a taua aronga akataka maira i te pakari o Iehova e ka rauka kia akamou e kia turu oki i te aronga tatau me kare akarongorongo ra. Me ko koe tetai e metua mataku i te Atua, kare ainei koe e tau kia rave i te tauta anga kia tauru i taua pakari ra ki roto i te manako e te ngakau oki o taau tamaiti?​—Deuteronomi 6:4-9.

14. (a) Ki teea au tu puka kare e puapinga ‘kia maata te kimi anga’? (e) Ki teea au puka ka tau tatou kia oronga i te akamanako anga maata, e no teaa ra?

¹⁴ Inara, eaa a Solomona i tuatuai mei tana i tuatua no te au puka ra? Mei teia te tu, me akaaiteia atu ma te Tuatua a te Atua, ko te au akapapa anga openga kore o te au puka o teianei ao te ki ra i te manakoanga tangata ua nei. E ko te maataanga o taua au manakoanga te akaata maira i te manako o Satani te Tiaporo ra. (2 Korinetia 4:4) No reira, ‘kia maata te kimi anga’ i taua au puka ra e meangiti ua te puapinga. Ko te tika, ko te maataanga o te reira ka riro ei akakino i te pae vaerua. Mei ia Solomona rai, e tamanako tatou ki runga i te Tuatua a te Atua no te oraanga. Na teia e akamaroiroi i to tatou akarongo e ka akavaitata atu oki ia tatou kia Iehova. Te tamanako maataanga ki etai atu au puka me kare au tumu no te apiianga ka akaroiroi ia tatou. E maata oki mei taua au tataanga ra no te manakoanga mai o teianei ao te patoi nei i te pakari tau i te Atua ka akakino e ka akapou i te akarongo ki te Atua e tana au akakoroanga. No reira, kia maara tatou e ko te au tataanga puapinga rava o to Solomona tuatau e to tatou uaorai oki ko tei akaata maira i te pakari o te “tiaki okotai ra,” koia te Atua ko Iehova. Nana i oronga mai i te 66 puka o te au Tuatua Tapu ra, e ka tau tatou kia akamanako teitei i te reira. Na te Pipiria e te au puka a te “tavini akono meitaki” e tauturu ia tatou kia rauka “te kite i te Atua.”​—Maseli 2:1-6.

Ta Tatou Apainga Katoa ki te Atua

15. (a) Akapeea koe me akataka i te au tuatua a Solomona no te ‘apainga katoa a te tangata nei’? (e) Eaa ta tatou ka tika kia rave me kia akono tatou i ta tatou apainga ki te Atua ra?

¹⁵ I te akatakaanga i tana kimikimianga katoa, kua tuatua te orometua, ko Solomona: “E akarongo ana tatou i te akaotianga o taua au tuatua katoa nei; Ko te Atu te mataku atu, e akono oki i tana au akauenga: ko ta te tangata [apainga] katoa e pini ua ake. E apai oki te Atua i te au tuatua katoatoa ki te akavaanga, e te au mea ngaro katoa ra, te au mea meitaki, e te kino katoa ra.” (Koheleta 12:13, 14, akaaite ia NW.) Ko tetai mataku tau, me kare manako akatapu no Tei Anga mai ia tatou ka paruru ia tatou, e to tatou au pamiri katoa oki, kia kore e aruaru i tetai tu oraanga neneva te ka apai mai i te taitaia e te mii maata ki runga ia tatou e ta tatou au akaperepere. Te mataku tau ia Iehova e viivii kore ia e ko te akamataanga tikai o te pakari e te kite. (Salamo 19:9; Maseli 1:7) Me e kite oonu to tatou tei akanooia ki runga i te Tuatua akauruia a te Atua e ka akono oki i tana akoanga no te au apinga katoatoa, ka akatupu tatou i ta tatou ‘apainga katoa’ ki te Atua ra. Kare, kare ia i tetai akapapaanga no te au apainga ra. Mari ra, ko tei umuumuia ra e kia akara tatou ki te au Tuatua Tapu i te akono anga i te au manamanata o te oraanga e kia rave oki i te au apinga na ta te Atua ra mataara.

16. No runga i te akavaanga, eaa ta Iehova ka rave?

¹⁶ Ka tau tatou kia kite e kare e apinga te ngaro ke ra i te akara anga a Tei Anga mai ia tatou. (Maseli 15:3) Nana ‘e apai i te au tuatua katoatoa ki te akavaanga.’ Ae, ka akava Tei Teitei Rava ra i te au mea katoatoa, kapiti katoa te au mea uunaia ra mei te au mata tangata nei. Na te matakite i taua au tu ra ka riro ei akakeuanga kia akono i te au akauenga a te Atua ra. Inara ko te akakeuanga maata rava ka tau ko te inangaro i to tatou Metua i te rangi ra, no te mea kua tata te apotetoro ko Ioane: “Teia oki te inangaro i te Atua, ko te akono i tana au akauenga; kare oki tana au akauenga i te mea teiaa.” (1 Ioane 5:3) E i te mea kua akapapaia ta te Atua au akauenga kia akatupu i te meitaki mutu kore no tatou, e mea tika kare i te tau anake mari ra e pakari katoa oki kia akono ia ratou. Kare teia i te apainga teiaa no te aronga inangaro i Tei Anga maira. Te anoano ra ratou kia akatupu i ta ratou apainga kiaia.

E Akono i Taau Apainga Katoa

17. Eaa ta tatou ka rave me te anoano tika ra tatou kia akono i ta tatou apainga katoa ki te Atua ra?

¹⁷ Me e pakari to tatou e te anoano tika ra kia akono i ta tatou apainga katoa ki te Atua, i te pae atu i te raveanga i tana au akauenga, ka mataku tapu katoa tatou i te akamareka koreanga iaia. E tika, “ko te akamataanga o te pakari ra, koia te mataku ia Iehova ra,” e ko te aronga akono i tana au akauenga e “kite maata” to ratou. (Salamo 111:10; Maseli 1:7) No reira kia rave pakari tatou e kia akarongo ia Iehova i te au mea ravarai. E puapinga maata to teia i teianei, no te mea tei konei te Ariki ko Iesu Karaiti, e kua vaitata te ra akava anga nana ei Akava akataoongaia e te Atua ra.​—Mataio 24:3; 25:31, 32.

18. Eaa te ka rauka kia tupu no tatou me ka akono tatou i ta tatou apainga katoa ki te Atua ko Iehova ra?

¹⁸ Tei raro ake tatou tataki tai i te akara anga matariki tu-Atua i teianei. Te manako ra ainei tatou i te pae vaerua, me kare kua tuku ainei i te au mana o teianei ao kia akaparuparu i to tatou pirianga ma te Atua ra? (1 Korinetia 2:10-16; 1 Ioane 2:15-17) Me e ou me kare kua ruaine, e rave tatou i te katoa anga te ka rauka ia tatou kia akamareka i Tei Anga mai ia tatou. Me ka akarongo tatou ia Iehova e ka akono i tana au akauenga, ka kopae ke atu tatou i te au apinga puapinga kore o teianei ao taito te ngaro ke nei. Ei reira ka rauka ia tatou kia akara atu i te manakonako anga no te ora mutu kore ki roto i ta te Atua ra akatereanga ou o te au mea. (2 Petero 3:13) Mei teaa ia te mekameka i teia au manakonako anga no te katoatoa te akono ra i ta ratou apainga katoa ki te Atua ra!

Akapeea Koe me Pau?

◻ Eaa koe ka tuatuai e kare te apinga ravarai i te puapinga kore ei?

◻ Eaa ra i tau ei tetai Kerititiano ou kia pure akamanako i tana tavini anga tapu ra?

◻ Ki teea au tu puka kare e puapinga ‘kia maata te kimi anga’?

◻ Eaa ‘te apainga katoa a te tangata nei’?

[Tutu i te kapi 20]

Kare te au apinga ravarai i te puapinga kore no te aronga tei tavini ra ia Iehova

[Tutu i te kapi 23]

Kare mei te au puka e manganui o teianei ao, e akapumaana anga e te puapinga oki te Tuatua a te Atua ra