Mataora Mutu Kore i te Rangi Ainei Me i te Enua?

KA IRINAKI uaia ainei toou mataora anga ki runga i te ngai e noo ra koe? Ka akakite ua te maata anga o te tangata e tei runga ua te mataora i te au tu mei te oraanga kopapa meitaki, tetai akakoroanga i te oraanga, e te au pirianga ma tetai atu. Te taiku ra tetai materi Pipiria i te reira na teia tu: “Meitaki ïa kai anga i te kai kinaki kore anake ra ma te aroa, i te puakatoro matu ma te riri.”​—Maseli 15:17.

Inara, ma te maromaroa, e tuatua enua roa to tatou enua no te riri, te ta ua, e tetai atu au tu kino. Inara akapeea te rangi ra, me kore te ngai vaerua, te ngai te manakonako ra te manganui o te tangata i te aere atu ki reira i muri ake i te mate anga ratou? Kua riro ua ainei te reira ei ngai au e te mataora, kare e manamanata o tetai ua atu tu, tei manako matauia ra?

Te apii maira te Pipiria e te noo ra te Atua i te rangi ra ma te au mirioni au mea vaerua tei tapaia e ko te au angera. (Mataio 18:10; Apokalupo 5:11) Kua akatakaia teia ei “au tamariki [vaerua] a te Atua.” (Iobu 38:​4, 7) Mei te au tangata rai, e au mea anoano ma te rangatira te au angera; kare ratou i te au ropoti. No reira, tei aru mai, ka rauka katoa ia ratou i te iki te rave i te tika me kore te tarevake. Ka iki ainei te au angera i te rave tarevake? Penei ka aere mai ei mea poitirere anga ki etai kia apii mai e tauatini mataiti i topa, kua ara tetai au angera e maata te numero, te tika, i te Atua​—kua meameaau ratou iaia!​—Iuda 6.

Aronga Meameaau i te Rangi Ra

Kua tupu mai te ara i roto i te ngai vaerua no te mea kua meameaau tetai angera, tei riro mai e ko Satani (Tei Patoi) e ko te Tiaporo (Tei Pikikaa). Kua iki teia angera tei akarongo ana i mua ana i te rave i te tarevake tana rai i anoano. I muri mai kua riro aia ei akakeu anga kino ki tetai atu au mea vaerua, e tae mai ki te tuatau o Noa, i mua ake i te Vaipuke, kua kapiti tetai ia ratou e maata te numero kia Satani i te meameaau anga i te Atua.​—Genese 6:2; 2 Petero 2:4.

Kare teia au angera tei inga i akaatea vivikiia mai mei te rangi ra. Mari ra, kua akakoromakiia to ratou vai anga​—ma tetai au arairai anga​—no tetai au tauatini mataiti.a Inara, i te ope anga to te Atua tu akakoromaki no teia aronga rave kino, kua “uriia” mai ratou mei te rangi ra, i te openga ra kia takoreia. Kua na ko mai tetai reo mei te rangi ra: “Kia rekareka, e te au rangi e, e ko kotou katoa oki ko tei noo i reira.” (Apokalupo 12:​7-12) I te akaraanga, kua rekareka maata tikai te au angera tiratiratu, i te openga ra, kua akaateaia mei te au rangi ra taua au mea rave manamanata ra!

Te manakoanga no runga i teia au tuatua kare i kiteia, te kiteaia ra e kare te au tika me manako kore te au mea vaerua kite i te au ture a te Atua e te au kaveinga. (Isaia 57:​20, 21; Ieremia 14:​19, 20) I tetai tua, me akarongo te katoatoa i te ture a te Atua, ka autu te au e te tu maru. (Salamo 119:​165; Isaia 48:​17, 18) No reira me inangaro e te akarongo te au tangata ravarai i te Atua e kua inangaro tetai i tetai, kare ainei te enua e riro ei ngai mataora e te reka tikai? Te pau maira te Pipiria ae!

Inara akapeea te aronga tei patoi noinoi kore no te taui i to ratou au tu kino? Ka tamanamanata mutu kore ainei ratou i te au o te aronga te inangaro tikai ra i te rave i to te Atua anoano? Kare, kua akono te Atua i te au angera kino i te rangi ra, e ka rave akapera rai aia ma te au tangata kino i te enua nei.

Tetai Enua Tamaia kia Ma

“Ko te au rangi toku terono, e te enua nei ko toku takainga vaevae,” i na te Atua ei. (Isaia 66:1) I te riro anga e ko te take tikai o te tu tapunui, kare te Atua e akatika i tona “takainga vaevae” kia takinoia e tuatau ua atu e te kino. (Isaia 6:​1-3; Apokalupo 4:8) Mei tana tama anga i te au rangi ra i te au vaerua kino ra, ka pera katoa rai aia i te tama anga i te enua i te au tangata kino ra, mei ta te au tataanga Pipiria e akaari maira:

“Ka riro oki te aronga i rave i te kino ra i te tipu keia; ko te aronga ra i tapapa ia Iehova ra, ko ratou te ka noo ki te enua.”​—Salamo 37:9.

“Na te aronga tiratiratu oki e noo i te enua, e te aronga apa kore te ka akatinamouia ki reira; Ka tipu keia ra te aronga kino i te enua nei, e te aronga rave ara ra, ka kiriti tumuia ïa.”​—Maseli 2:​21, 22.

“E mea tika ïa i te Atua kia tutaki i te aronga i mate ei kotou na i te mate: Kareka ia kotou i tei takinga-kinoia ra, ko te ora ïa tana e tuku mai no tatou katoa nei, kia mama mai te Atu ra ko Iesu mei te rangi mai, ma tana au angela mana katoa ra, Ma te ai mura ra, i te tuku anga mai i te mate i te aronga kare i kite i te Atua, e tei kore i akarongo i te evangelia o to tatou Atu o Iesu Mesia: Ko te ka akautungaia mai ïa i te mate mutu kore mei te aroaro atu o te Atu ra, e te kakā o tona mana.”—2 Tesalonia 1:​6-9.

“Te ngaro ke nei teianei ao [te au tangata kino], ma ta to reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.”​—1 Ioane 2:17.

Ka Vai Au Tikai Ainei te Enua?

Noatu te akaari meitaki maira te au Tuatua Tapu e kotinga anga to te tu akakoromaki o te Atua i te kino, akapeea tatou e papu ei, e me takoreia te kino, kare e tupu akaou mai? I te mea ra, i muri ake i te Vaipuke o to Noa tuatau, kua akamata akaou te reira ki tetai take e kua tamanamanata te Atua i te au ravenga kino a te tangata na te akaoripu anga i to ratou reo.​—Genese 11:​1-8.

To tatou tumu maata no te irinaki papu e kare te kino e tupu akaou mai koia oki kare roa te enua e tutaraia e te au tangata mei tei tupu i muri ake i te Vaipuke. Mari ra, ka tutaraia te reira e te Patireia o te Atua. Te tutara anga mei te rangi ra, ka riro teia Patireia e ko te kavamani anake ia o te enua. (Daniela 2:44; 7:​13, 14) Ka rave viviki teia i te patoi i tetai tei tauta i te akamata akaou i te kino. (Isaia 65:20) Te tika, ka takore te reira i te openga ra i tei akamata i te kino​—Satani te Tiaporo​—kapiti mai i te au temoni, te au angera kino tei aru iaia.​—Roma 16:20.

Pera katoa, kare o te au tangata au tumu no te taitaia i te kai, te kakau, te are, e te ngai angaanga​—te kore anga o teia i teia tuatau te akakeu ra i tetai kia rave i te oraanga ta ua. Ae, ka tauiia te katoa anga o te enua i roto i tetai parataito uua ma te maata no te katoatoa.​—Isaia 65:​21-23; Luka 23:43.

Tei maata atu, ka apii te Patireia i te aronga i raro ake i te reira na roto i tetai tu au o te oraanga e i taua taime rai te utuutu maira ia ratou ki te tu apa kore tikai o te tangata ra. (Ioane 17:3; Roma 8:21) I muri maira, kare te tangata ravarai e umuumuia kia putoto ma te au tu paruparu e te ara ua, te akariro anga i te akarongo apa kore ki te Atua kia rauka ua e te reka tikai, mei tei tupu ki te tangata apa kore ko Iesu. (Isaia 11:3) Te tika, kua vai tiratiratu a Iesu ki te Atua noatu te pakari i te timata anga e te tamamae anga​—e au mea ka riro ei apinga ke ki te oraanga i roto i te Parataito.​—Ebera 7:26.

Eaa ra Etai ka Aere ei ki te Rangi Ra

Inara, kua kite te aronga tatau e manganui o te Pipiria i te au tuatua a Iesu: “Manganui te nooanga tikai i te are o taku Metua ra. . . . Te aere nei au e akamanea i tetai ngai no kotou.” (Ioane 14:​2, 3) Kare ainei teia e patoi ana i te manako o te ora mutu kore i te enua parataito?

Kare teia au apii anga e tuke ana. Te tika, te turu ra tetai i tetai. Ei akamata anga, te akakite ra te Pipiria e e iti ua te numero o te au Kerititiano tiratiratu​—e 144,000 ia ratou​—ka akatuia ei au mea vaerua kia noo i te rangi ra. Eaa ra i orongaiai teia tutaki anga umere kia ratou? No te mea ko ratou tetai pupu ta Ioane i kite i roto i tetai orama tei “noo iora ratou ki o te Mesia ra ma te au katoa ra, e okotai tausani i te mataiti.” (Apokalupo 14:​1, 3; 20:​4-6) Me akaaiteia ki te au pirioni i te enua nei, e “anana iti” tikai te 144,000. (Luka 12:32) Pera katoa, te kite anga i te au manamanata matauia e te au tangata ravarai, mei ia Iesu rai ka rauka ia ratou e “tika kia aroa mai ia tatou i to tatou au paruparu nei” ia ratou e akaaere maira i te akono akaou anga i te tangata ravarai e te enua.​—Ebera 4:15.

Enua​—To te Tangata Ravarai Kainga Mutu Kore

Na te orongaanga mai i te atinga oko o Iesu Karaiti, kua akamata te Atua i te akaputu mai i te 144,000 vaitata e 2,000 mataiti i topa, e te akakite maira te au tata anga e kua oti meitaki teia pupu. (Angaanga 2:​1-4; Galatia 4:​4-7) Inara, kare te atinga o Iesu e no te au ara a te 144,000 anake, no “te ao katoa nei ra.” (1 Ioane 2:2) No reira, ko te katoatoa tei akono i te akarongo ia Iesu tei ia ratou te manakonakoanga o te ora mutu kore. (Ioane 3:16) Te aronga e moe ra i roto i te rua inara tei roto i to te Atua manako ka akatuia mai, kare i te rangi ra, mari ra ki te ora i runga i tetai enua ma. (Koheleta 9:5; Ioane 11:​11-13, 25; Angaanga 24:15) Eaa te tapapa maira ia ratou?

Te pau maira Apokalupo 21:​1-4, i te na ko anga: “I na, tei ko te tangata ra te puakapa o te Atua . . . E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.” Ka akamanako ana​—i te au tangata i te akarangatira angaia mai mei te matenga, e te mamae e te aue ta te reira e akatupu ra kua ngaro ke ua atu! I te openga ra, te akakoroanga mua a Iehova no te enua e te tangata ravarai ka tae ki to reira tupu anga kaka.​—Genese 1:​27, 28.

Ta Tatou Iki Anga​—Ora me e Matenga

Kare i orongaia kia Adamu raua ko Eva te tuanga kia aere ki te rangi ra. Ta raua iki anga koia oki kia akarongo i te Atua e kia noo e tuatau ua atu i te enua parataito me kore kia akarongo kore iaia e kia mate. Ma te maromaroa, kua iki raua i te akarongo kore e no reira kua oki atu ki te “one-pueu” o te enua. (Genese 2:​16, 17; 3:​2-5, 19) Kare rava i te akakoro anga na te Atua no te pamiri tangata kia mate e kia akaki i te rangi ra na roto i te matenga. Kua anga te Atua i te au angera e manganui kia ora i te rangi ra; kare teia au mea vaerua ora i te au tangata tei mate e kua akatuia ki te ora i te rangi ra.​—Salamo 104:​1, 4; Daniela 7:10.

Eaa ta tatou ka rave e raukai te akameitaki anga o te ora anga e tuatau ua atu i te Parataito i te enua? Te takainga mua koia oki kia apii i te Tuatua a te Atua, te Pipiria Tapu. “Teia oki te ora mutu kore,” i na Iesu ei i roto i te pure, “kia kite ratou ia koe i te Atua mou ra, e ia Iesu i te Mesia, i taau i tono maira.”​—Ioane 17:3.

Te taangaanga anga i taua kite ra ko tetai atu takainga ia ki te mataora mutu kore i Parataito. (Iakobo 1:​22-24) Te aronga te akono ra i te Tuatua a te Atua tei ia ratou te manakonakoanga no te kite anga ma to ratou nga mata i te tupu anga o te au totou rekareka mei tei rekotiia ia Isaia 11:9, te na ko ra: “Kare ratou [te tangata ravarai] e kanga, kare oki e mea e mate ei, i toku katoa nei maunga tapu: no te mea, ka ki te enua i te kite ia Iehova, mei te vairanga tai e ki i te tai ra.”

[Tataanga Rikiriki i Raro]

[Tutu i te kapi 7]

“Ka riro te enua no te aronga tuatua-tika, ka noo tamou rai ratou i reira.”​—Salamo 37:29